ກວດສອບ​ພົບ​ລາຍ​ຮັບ 689 ກວ່າຕື້ກີບບໍ່​ເຂົ້າງົບປະມານ​ແຫ່ງ​ລັດຈະແກ້ໄຂແນວໃດ

ກວດສອບ​ພົບ​ລາຍ​ຮັບ 689 ກວ່າຕື້ກີບບໍ່​ເຂົ້າງົບປະມານ​ແຫ່ງ​ລັດຈະແກ້ໄຂແນວໃດ - advert banner 728 90 728x90 - ກວດສອບ​ພົບ​ລາຍ​ຮັບ 689 ກວ່າຕື້ກີບບໍ່​ເຂົ້າງົບປະມານ​ແຫ່ງ​ລັດຈະແກ້ໄຂແນວໃດ

ທ່ານ ບຸນ​ປອນ ວັນນະ​ຈິດ ຮອງ​ປະທານ​ອົງການ​ກວດ​ສອບ​ແຫ່ງ​ລັດ, ໄດ້ລາຍງາຍໃນກອງ​ປະຊຸມ​ເປີດ​ກວ້າງ​ວຽກ​ງານ​ກວດ​ສອບ​ງົບປະມານ​​ລັດປະຈຳ​ປີ 2017 ​ໃນ​ວັນ​ທີ 5-6 ກຸມພານີ້ວ່າ: ​ໃນ​​ປີ 2015-2016 ອົງການ​ກວດ​ສອບ​ແຫ່ງ​ລັດ​ໄດ້​ກວດ​ສອບ​​ອົງການ​ຈັດຕັ້ງລັດ​ຂັ້ນສູນ​ກາງ ​ແລະ ທ້ອງ​ຖິ່ນ​ທັງໝົດ 58 ຫົວໜ່ວຍ ແລະ ​ກວດ​ພົບ​ລາຍ​ຮັບ​ທີ່​ໄດ້​ຈາກ​ສ່ວຍ​ສາ​ອາກອນ, ຊັບ​ສິນ​ຂອງ​ລັດ, ​ເງິນ​ກອງ​ທຶນ​ລັດ ​ແລະ ອື່ນໆທີ່ບໍ່ມອບເຂົ້າງົບປະມານລັດຫລາຍກວ່າ 689 ຕື້ກີບ. ​ໃນ​ນັ້ນຢູ່ຂັ້ນສູນ​ກາງມີ 516 ຕື້ກວ່າກີບ ​ແລະ ທ້ອງ​ຖິ່ນ 173 ຕື້ກວ່າກີບ ແລະ ສະ​ເພາະ​ຂະ​ແໜງ​ສ່ວຍ​ສາ​ອາກອນ​ມີ​ລາຍ​ຮັບ​ເພີ່ມ​ບໍ່​ເຂົ້າງົບປະມານຫລາຍກວ່າ 115 ຕື້ກີບ, ຄຸ້ມ​ຄອງ​ຊັບ​ສິນ​ຂອງ​ລັດ 27 ຕື້ກວ່າກີບ, ​ເງິນ​ກອງ​ທຶນ​ຂອງ​ລັດ 374 ຕື້ກວ່າກີບ ​ແລະ ລາຍ​ຮັບ​ອື່ນໆ 172 ຕື້ກວ່າກີບ. ນອກ​ນີ້, ຍັງ​ກວດ​ພົບ​​ໜີ້​ຕ້ອງ​ຮັບ​ສະ​ສົມ​ຂອງແຕ່ລະຂະແໜງທີ່​ບໍ່​ເຂົ້າງົບປະມານ​ຫລາຍກວ່າ 985 ຕື້ກີບ, ກວດ​ສອບ​ເຫັນ​ການ​ແຈ້ງ​ເສຍ​ອາກອນ​ບໍ່​ຄົບ​ຖ້ວນ 16 ຕື້ກວ່າກີບ ​ແລະ ປັບ​ໄໝ​ບໍ່​ຖືກ​ຕາມ​ອັດຕາ​ທີ່​ກົດໝາຍ​ກຳນົດ 3,93 ຕື້ກີບ, ກວດ​ສອບ​ເຫັນ​ໜີ້​ຕ້ອງ​ຮັບ​ຈາກ​ເງິນ​ຂາຍ​ໄມ້, ຄ່າ​ປັບ​ໄໝ, ຄ່າ​ເຊົ່າ​ຊັບ​ສິນ​ຂອງ​ລັດ, ຄ່າ​ເຊົ່າ-ສຳ​ປະທານ​ທີ່​ດິນ ​ແລະ ຄ່າ​ຊັບພະຍາກອນ​ທຳ​ມະ​ຊາດ 427 ຕື້ກີບ, ກວດ​ສອບ​ເຫັນ​ການ​ຂຸດ​ຄົ້ນ​ໄມ້​ເກີນ​ໂກ​ຕາ​ທີ່​ລັດຖະບານ​ອະນຸມັດ​ຢູ່ 2 ​ແຂວງຈໍານວນ 28.230 ກວ່າ​ແມັດ​ກ້ອນ, ກວດພົບ​ການ​ຂຸດ​ຄົ້ນ​ໄມ້​ທີ່​ບໍ່​ໄດ້​ຮັບ​ອະນຸຍາດ​ຢູ່ 4 ​ແຂວງມີ 11.788 ກວ່າ​ແມັດ​ກ້ອນ, ກວດ​ພົບ 3 ​ແຂວງ​ຂາຍ​ໄມ້​ຕໍ່າ​ກວ່າ​ລາຄາ​ກະຊວງ​ອຸດສາຫະກຳ ​ແລະ ການ​ຄ້າ​ອະນຸມັດ, ​ການ​ຍົກ​ເວັ້ນ, ຫລຸດຜ່ອນ​ພາສີ-ອາກອນ​ປະ​ເພດ​ພາຫະນະ, ນ້ຳມັນ​ເຊື້ອ​ໄຟ, ຄ່າ​ຊັກ​ພິ​ເສດ​ໄມ້​ຂາ​ອອກ ​ແລະ ສິນຄ້າ​ທົ່ວ​ໄປຫລາຍກວ່າ 3.570 ຕື້ກີບ. ຕໍ່ຄວາມເສຍຫາຍດັ່ງກ່າວ​ອົງການ​ກວດ​ສອບ​ແຫ່ງ​ລັດໄດ້ສະ​ເໝີ​ມາດ​ຕະການ​ໃຫ້​ບັນດາ​ໜ່ວຍ​ງົບປະມານ​ປັບປຸງ​ແກ້​ໄຂ ຄື: ​ໃຫ້​ອົງການ​ຄຸ້ມ​ຄອງ​ການ​ເງິນ​ເກັບ​ຄືນ​ລາຍ​ຮັບ​ວິຊາ​ການ, ​ເງິນ​ກອງ​ທຶນ, ​ເງິນ​ລະດົມ, ​ເງິນ​ຊ່ວຍ​ເຫລືອ​ລ້າ, ​ເງິນ​ຄັງ​ພັດທະນາ​ແຂວງ ​ແລະ ລາຍ​ຮັບ​ອື່ນໆທັງໝົດມາເຂົ້າງົບປະມານ, ​ພ້ອມທັງເລັ່ງທວງ​ໜີ້​ຕ້ອງ​ຮັບ​ສ່ວຍ​ສາ​ອາກອນ, ຊັບ​ສິນ, ​ເງິນ​ປັນ​ຜົນ ​ແລະ ອື່ນໆມາໃຫ້ລັດຕາມລະບຽບ. ນອກ​ນີ້​ໃຫ້​ກວດຄືນ​ການ​ຍົກ​ເວັ້ນ ​ແລະ ການ​ຫລຸດຜ່ອນ​ອັດຕາ​ພາສີ-ອາກອນ​ນຳ​ເຂົ້າ ​ເພື່ອ​ນຳ​ເອົາລາຍຮັບ​ເຫລົ່ານັ້ນ​ມາສູ່​ງົບປະມານ​ແຫ່ງ​ລັດ.

ກວດສອບ​ພົບ​ລາຍ​ຮັບ 689 ກວ່າຕື້ກີບບໍ່​ເຂົ້າງົບປະມານ​ແຫ່ງ​ລັດຈະແກ້ໄຂແນວໃດ - lattana 1 - ກວດສອບ​ພົບ​ລາຍ​ຮັບ 689 ກວ່າຕື້ກີບບໍ່​ເຂົ້າງົບປະມານ​ແຫ່ງ​ລັດຈະແກ້ໄຂແນວໃດ