ຕົງກາປະກາດສະຖານະການສຸກເສີນ ຮັບມືໄຊໂຄນທີ່ຈະຂຶ້ນເປັນລະດັບ 5

ຕົງ​ກາ ປະ​ເທດ​ໝູ່​ເກາະ​ໃນ​ມະຫາ​ສະໝຸດປາຊີ​ຟິກ ປະກາດ​ສະຖານະ​ການ​ສຸກ​ເສີນ​ໃນ​ວັນ​ທີ 12 ກຸມພາ​ນີ້ ​ເພື່ອ​ໄຊ​ໂຄນ​ທີ່​ຈະ​ຂຶ້ນຝັ່ງ​ໂດຍ​ກົງ​ມີ​ທ່າ​ອ່ຽງຈະ​ທະວີ​ກຳລັງ​ຂຶ້ນ​ເປັນ​ລະດັບ 5 ​ເຊິ່ງ​ເປັນ​ລະດັບ​ສູງ​ສຸດ.

- lattana 1 - ຕົງກາປະກາດສະຖານະການສຸກເສີນ ຮັບມືໄຊໂຄນທີ່ຈະຂຶ້ນເປັນລະດັບ 5

ຮັກສາ​ການ​ນາຍົກລັດຖະມົນຕີຕົງກາ ປະກາດ​ສະຖານະ​ການ​ສຸກ​ເສີນ​ທົ່ວ​ປະ​ເທດ ​ເພາະ​ເຊື່ອ​ວ່າ​ກຳລັງ​ເກີດ​ເຫດ​ສຸກ​ເສີນ ຫລື ກຳລັງ​ຈະ​ເກີດ​ໃນ​ມໍ່ໆ​ນີ້. ສູນ​ພະຍາກອນ​ອາກາດ​ຕົງ​ກາ​ເຕືອນ​ປະຊາຊົນ​ວ່າ: ຈະ​ເກີດ​ຄວາມ​ເສຍ​ຫາຍ​ຮ້າຍ​ແຮງ​ຈາກ​ລົມ​ທີ່​ມີ​ຄວາມ​ຮຸນ​ແຮງ​ລະດັບ​ເຮີ​ລິ​ເຄນ. ຂະນະ​ທີ່​ຟິຈິ ​ເຊິ່ງຢູ່​ທາງ​ຕາ​ເວັນ​ຕົກ​ສຽງ​ເໜືອ​ຂອງ​ຕົງ​ກາ​ພະຍາກອນ​ວ່າ: ​ໄຊ​ໂຄນ​ກີ​ຕາ​ຈະ​ທະວີ​ກຳລັງ​ຂຶ້ນ​ເປັນ​ລະດັບ 5 ກ່ອນ​ຂຶ້ນຝັ່ງ​ຕົງ​ກາ​ໃນ​ຄືນ​ວັນ​ທີ 12 ກຸມພາ.

ສ່ວນ​ນັກ​ພະຍາກອນ​ອາກາດ​ນູ​ແວນ​ເຊ​ລັງ​ເຕືອນ​ວ່າ: ສະຖານະ​ການ​ຮ້າຍ​ແຮງ​ຫລາຍ ມີ​ຄວາມ​ເປັນ​ໄປ​ໄດ້​ສູງ​ວ່າ​ໄຊ​​ໂຄນ​ກີ​ຕາ​ຈະຖະຫລົ່ມ​ເກາະ​ຕົງ​ກາ​ຕາປູ ​ເກາະ​ໃຫຍ່​ທີ່​ສຸດ​ຂອງ​ຕົງ​ກາ​ໂດຍ​ກົງ ​ເຊິ່ງ​ເປັນ​ທີ່​ຕັ້ງຂອງ​ນະຄອນຫລວງ​ນູກູ​ອາ​ໂລ​ຟາ​ທີ່​ມີ​ປະຊາຊົນ​ຫລາຍ​ກວ່າ 75.000 ຄົນ, ສູນ​ກາງ​ພາຍຸ​ຈະ​ເຄື່ອນ​ຜ່ານ​ເກາະ​ພໍດີ ​ເປັນ​ປາກົດການ​ທີ່ບໍ່​ຄ່ອຍ​ເກີດ​ຂຶ້ນ ​ແລະ ​ເຖິງ​ວ່າ​ໄຊ​ໂຄນ​ຈະ​ປ່ຽນ​ທິດ​ທາງ​ບໍ່​ຂຶ້ນຝັ່ງ​ໂດຍ​ກົງ ​ແຕ່​ຈະ​ຍັງ​ເຮັດ​ໃຫ້​ອາກາດ​ບໍ່​ຄ່ອຍ​ດີ, ລົມ​ແຮງ​ເຖິງ 230 ກິ​ໂລ​ແມັດ, ຄື້ນ​ໃນ​ທະ​ເລ​ສູງ​ກວ່າ 10 ​ແມັດ ຍັງ​ບໍ່​ລວມຄື້ນພາຍຸ​ພັດ​ເຂົ້າຝັ່ງ​ທີ່​ຈະ​ສູງ​ຂຶ້ນ​ໄປ​ຈາກ​ຄື້ນ​ໃນ​ທະ​ເລ​ອີກ​ກວ່າ 1 ​ແມັດ.

ປັດຈຸບັນ​ໄຊ​ໂຄນ​ກີ​ຕາ​ມີ​ຄວາມ​ໄວ​ລົມ 275 ກິ​ໂລ​ແມັດ​ຕໍ່​ຊົ່ວ​ໂມງ ​ເຄື່ອນ​ທີ່​ນອກ​ຝັ່ງ​ຕາ​ເວັນ​ອອກ​ຂອງ​ເກາະ​ຕົງ​ກາ​ຕາປູ ​ໂດຍ​ຫາ​ກໍ​ພັດ​ຖະຫລົ່ມ​ຊາ​ມົວ ທາງ​ຕາ​ເວັນ​ອອກສຽງ​ເໜືອ​ຂອງ​ຕົງ​ກາ​ໃນ​ວັນ​ທີ 9 ກຸມພາ ​ເຮັດ​ໃຫ້​ເກີດ​ນ້ຳຖ້ວມ​​ເປັນ​ວົງ​ກວ້າງ, ປະຊາຊົນ​ຈຳນວນ​ຫລາຍ​ບໍ່​ມີ​ໄຟຟ້າ​ໃຊ້.