ຮ່າງກົດໝາຍວ່າດ້ວຍທີ່ດິນສະບັບປັບປຸງ ໄດ້ເພີ່ມເນື້ອໃນເຂົ້າເກືອບຮ້ອຍມາດຕາ

- advert banner 728 90 728x90 - ຮ່າງກົດໝາຍວ່າດ້ວຍທີ່ດິນສະບັບປັບປຸງ ໄດ້ເພີ່ມເນື້ອໃນເຂົ້າເກືອບຮ້ອຍມາດຕາ

ຮ່າງກົດໝາຍວ່າດ້ວຍທີ່ດິນສະບັບປັບປຸງໃໝ່ໄດ້ເພີ່ມເນື້ອໃນເຂົ້າຕື່ມເກືອບຮ້ອຍມາດຕາຄືຈາກເດີມມີພຽງ 6 ພາກ, 14 ໝວດ ແລະ 87 ມາດຕາ ມາເປັນ 14 ພາກ, 32 ໝວດ ແລະ 183 ມາດຕາ ແລະ ເມື່ອທ້າຍອາທິດຜ່ານມາ, ກໍໄດ້ມີກອງປະຊຸມເປີດກວ້າງທາບທາມຜ່ານຮ່າງກົດໝາຍດັ່ງກ່າວ, ໂດຍການເປັນປະທານຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ເພື່ອທົບທວນການຜັນຂະຫຍາຍມະຕິຂອງຄະນະບໍລິຫານງານສູນກາງພັກວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໄລຍະໃໝ່ ແລະ ປຶກສາຫາລື, ຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນຂອງຮ່າງກົດໝາຍວ່າດ້ວຍທີ່ດິນສະບັບປັບປຸງເພື່ອໃຫ້ມີເນື້ອໃນຄົບຖ້ວນ, ສົມບູນ ແລະ ເປັນເອກະພາບກັນໃນດ້ານຫລັກການ, ກ່ອນຈະສະເໜີໃຫ້ກະຊວງຍຸຕິທຳກວດກາຄວາມສອດຄ່ອງທາງດ້ານກົດໝາຍ ແລະ ສະເໜີລັດຖະບານຮັບຮອງເອົາໃນກອງປະຊຸມລັດຖະບານປະຈໍາເດືອນພືດສະພາ ແລະ ນໍາສະເໜີຕໍ່ກອງປະຊຸມສະໄໝສາມັນຄັ້ງທີ 6 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງ.
ທ່ານລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ກ່າວວ່າ: ໃນໄລຍະຜ່ານມາ, ພັກ ແລະ ລັດຖະບານ ໄດ້ມີນະໂຍບາຍ, ກົດໝາຍ ແລະ ລະບຽບການຕ່າງໆເພື່ອຄຸ້ມຄອງກ່ຽວກັບທີ່ດິນ, ເພື່ອຮັບປະກັນໃຫ້ປະຊາຊົນບັນດາເຜົ່າມີຄວາມຕື່ນຕົວເປັນເຈົ້າຂອງທີ່ດິນ, ປົກປັກຮັກສາ, ນຳໃຊ້ ແລະ ມີການພັດທະນາທີ່ດິນຫລາຍຂຶ້ນ, ໂດຍສະເພາະນໍາໃຊ້ເຂົ້າໃນການຜະລິດກະສິກຳ, ປ່າໄມ້, ອຸດສາຫະກຳ, ປຸກສ້າງ ແລະ ອື່ນໆ, ເພື່ອນຳຜົນປະໂຫຍດມາສູ່ໃຫ້ຕົນເອງ ແລະ ປະເທດຊາດ.

- lattana 1 - ຮ່າງກົດໝາຍວ່າດ້ວຍທີ່ດິນສະບັບປັບປຸງ ໄດ້ເພີ່ມເນື້ອໃນເຂົ້າເກືອບຮ້ອຍມາດຕາ

ແຕ່ໃນຕົວຈິງແລ້ວເຫັນວ່າການຄຸ້ມຄອງທີ່ດິນຍັງເກີດມີຫລາຍບັນຫາສັບສົນ ເປັນຕົ້ນ: ການຫັນປ່ຽນປະເພດທີ່ດິນຍັງບໍ່ທັນປະຕິບັດຕາມກົດໝາຍເຂັ້ມງວດ, ການສ້າງແຜນແມ່ບົດຈັດສັນທີ່ດິນແຫ່ງຊາດ ແລະ ວາງແຜນນຳໃຊ້ທີ່ດິນຂອງຂະແໜງການຍັງບໍ່ທັນສຳເລັດ, ພາໃຫ້ເກີດສະພາບການນຳໃຊ້ທີ່ດິນມີລັກສະນະຟູມເຟືອຍ, ມີການຈັບຈ່ອງດິນ ແລະ ປ່າແບບຊະຊາຍ, ມີການແບ່ງປັນທີ່ດິນຂອງລັດໃຫ້ບຸກຄົນຖືສິດນຳໃຊ້ຂາດຕົວບໍ່ຖືກຕ້ອງຕາມລະບຽບກົດໝາຍ ແຜ່ຫລາຍໃນເງື່ອນໄຂທີ່ລາຄາດິນນັບມື້ສູງຂຶ້ນ, ໂດຍສະເພາະແມ່ນທີ່ດິນເຂດ ຕົວເມືອງ, ການຊື້-ຂາຍສິດນຳໃຊ້ທີ່ດິນຖືກຮົ່ວໄຫລຢ່າງໜັກໜ່ວງ, ອັນກໍ່ໃຫ້ເກີດມີການຮ້ອງຟ້ອງເປັນຄະດີຄວາມກ່ຽວກັບທີ່ດິນນັບມື້ຫລາຍຂຶ້ນ. ດັ່ງນັ້ນ, ການເພີ່ມທະວີການຄຸ້ມຄອງທີ່ດິນຕາມກົດໝາຍເຂັ້ມງວດນັ້ນ ແມ່ນມີຄວາມຈຳເປັນຮີບດ່ວນເພື່ອແກ້ໄຂບັນຫາທີ່ເກີດຂຶ້ນ, ໂດຍເລີ່ມຈາກການຮັບປະກັນການປະຕິບັດພາລະບົດບາດຄຸ້ມຄອງຂອງລັດ ແລະ ຄວາມສັກສິດຂອງກົດໝາຍ ເພື່ອແກ້ໄຂບັນຫາທີ່ເປັນຊ່ອງຫວ່າງຕ່າງໆ ແລະ ປາກົດການຫຍໍ້ທໍ້ຕ່າງໆ ກໍຄືຂໍ້ຂັດແຍ່ງກ່ຽວກັບທີ່ດິນໃຫ້ຖືກຕ້ອງຕາມກົດໝາຍ.