ປີ​ນີ້​ເຂດ​ເສດຖະກິດສະຫວັນ​-​ເຊ​ໂນຕ້ອງ​ການ​​ແຮງ​ງານ 5 ພັນ​ຄົນ​

- advert banner 728 90 728x90 - ປີ​ນີ້​ເຂດ​ເສດຖະກິດສະຫວັນ​-​ເຊ​ໂນຕ້ອງ​ການ​​ແຮງ​ງານ 5 ພັນ​ຄົນ​

​     ປີ​ນີ້ເຂດ​ເສດຖະກິ​ດພິ​ເສດ​ສະ​ຫວັນ-​ເຊ​​ໂນ​ຫຼື​ສະຫວັນ​ພາກ, ຕ້ອງການ​ແຮງ​ງານເຖິງ 5 ພັນ​ຄົນ​, ເພື່ອ​ສະໜອງ​ໃຫ້​ແກ່​ສອງ​ບໍລິສັດ​ຄື: ອາຄ​ອນ (Acon) ແລະ cvilvx ທີ່​​ກຽມຈະ​ເປີດ​ດຳ​ເນີນ​ງານໃນ​ກາງ​ປີ​ນີ້ແລະ ຄາດ​ວ່າ​ຮອດປີ2020ຄວາມ​ຕ້ອງການ​ແຮງ​ງານ​ຈະ​ເພີ່ມ​ຂື້ນ​ເຖິງ 20 ​ພັນຄົນ, ​ເນື່ອງຈາກ​ແຂວງສະຫວັນ​ນະ​​ເຂດ​ມີ​ທ່າ​​ແຮງ​ຫຼາຍ​ດ້ານ ກາຍ​ເປັນ​​ແຮງ​ຈູງ​ໃຈໃຫ້​ນັກ​ລົງທຶນ​​ແຫ່ເຂົ້າ​ມາ​ລົງ​ທຶນ​ຢ່າງ​ຫຼວງ​ຫຼາຍ.

- lattana 1 - ປີ​ນີ້​ເຂດ​ເສດຖະກິດສະຫວັນ​-​ເຊ​ໂນຕ້ອງ​ການ​​ແຮງ​ງານ 5 ພັນ​ຄົນ​

ທ່ານ ທອງ​​ໃສຫົວໜ້າຄະນະ​ບໍລິຫານງານ​ເຂດ​ເສດຖະກິດດັ່ງກ່າວໃຫ້​ຮູ້ວ່າ: ພວກ​ເຮົາ​​ໄດ້ສ້າງ​ໂຄງ​ລ່າງ​ພື້ນ​ຖານ​ຮອງ​ຮັບ​ໃຫ້ແກ່ການ​ລົງ​ທຶນຕ່າງໆ​ເຊັ່ນ: ​ເສັ້ນທາງ, ນ້ຳ​ປະປາ,​ ໄຟຟ້າ, ລະບົບ​​ໂລ​ຈິ​ສຕິກການ​ເຂື່ອນ​ຖ່າຍ​ສິນຄ້າ, ບໍລິການ​ຜ່ານ​ປະຕູ​ດຽວ, ພ້ອມ​ມີ​ນິຕິ​ກຳ​ທີ່​ເປັນ​ການ​ສົ່ງ​ເສີມ​ທີ່​ດີ​ໂດຍ​ສະ​ເພາະ​ບໍ່​ໄດ້​ເກັບ​ຄ່າ​ພາສີ-ອາກອນດ້ານ​ສິນຄ້າ​ຂາ​ອອກ ແລະ ​ເປັນ​ສິ່ງ​ເອື້ອ​ອຳນວຍ​ໃຫ້​ມີ​ນັກ​ລົງທຶນ​ຈາກ​ຍີ່ປຸ່ນ, ​ໃຕ້ຫວັນ, ​ກາ​ນາ​ດາ​ແລະ​ອື່ນໆ​ເຂົ້າ​ມາ​ລົງທຶນ​​ແລ້ວ 97 ບໍລິສັດ,​ ລວມມີມູນ​ຄ່າ​ການ​ລົງທຶນ 333,2 ລ້ານ​​ໂດ​ລາ​ສະຫະລັດ. ເຮັດ​​ໃຫ້​ມີ​ການ​ຈ້າງ​ແຮງ​ງານ​ແລ້ວ​ ​ເຖິງ 4.630 ​ຄົນ​ ​ແລະ ​ມີ​ຫຼາຍກວ່າ 50​ ​ບໍລິສັດ​ມາລົງທຶນ​ສ້າງ​ໂຮງງານຜະລິດ​ສິ້ນ​ສ່ວນ​ອີ​​ເລັກ​ໂຕຣ​ນິກ​ເຊັ່ນ: ສິ້ນ​ສ່ວນອາ​ໄລ່​ກ້ອງ​ນິຄອນ, ສິ້ນ​ສ່ວນ​ອາ​ໄຫລ່ລົດ​ໂຕ​ໂຍຕາ, ສິ້ນ​ສ່ວນອາ​ໄລ່ໂທລະສັບ, ສິ້ນ​ສ່ວນ​ຄອມ​ພິວ​ເຕີ, ສິ້ນ​ສ່ວນ​ເຄື່ອງມື​ການສື່ສານ ແລະ ອື່ນໆທີ່ສົ່ງໄປຕະຫຼາດໂລກ​ແລ້ວ​ໃນ​ມູນ​ຄ່າ 322,5 ລ້ານ​ໂດ​ລາ​ສະຫະລັດ ແລະ​ ກາງປີ​ນີ້ ກຽມ​ຈະ​ເປີດ​ໃໝ່​​ຄື​ບໍລິ​ສັດ​ໃຕ້​ຫວັນ​ຜະລິດ​ສິ້ນ​ສ່ວນ​ອີ​ເລັກ​ໂຕ​ນິ​ກ​ເຊັ່ນ: ​ແຜງ​ບອດ​​ແລະສາຍ​​ໄຟ ​ເຊິ່ງຕ້​ອງ​ການ​ແຮງ​ງານ 3,5 ພັນ​ຄົນ​​ແລະ​​ຮອດ​ປີ 2020​ຈະຕ້ອງການ​​ແຮງ​ງານເຖິງ 20​ ພັນ​ຄົນ.

ປະຈຸ​ບັນ​​ແຂວງ​ສະຫວັນມີ​ການລົງທຶນ​ຫຼາຍ,​ ແຕ່​ການ​ຮອງ​ຮັບ​ຂອງ​ແຮງ​ງານ​ມີ​ໜ້ອຍ​ແລະສ່ວນ​ໜຶ່ງ​ກໍ່​ໄປ​ຂາຍ​ແຮງ​ງານ​ຢູ່​ຕ່າງປະ​ເທດ,​ ເຮັດ​ໃຫ້ພາຍ​ໃນ​​ເກີດ​ສະພາບ​ຂາດ​ແຮງ​ງານ.​ ດັ່ງ​ນັ້ນ​ ​ໃນ​ປັດຈຸບັນ​ເຂດ​ເສດຖະກິດ​ດັ່ງກ່າວ​ກໍ່​ພວມເລັ່ງ​ໂຄສະນາ​ຮັບ​ແຮງ​ງານ​​ໄປໃນ​ທຸກໆ​ເມືອງ​ແລະ​​ຕ່າງ​ແຂວງ​ເຊັ່ນ​:​ ແຂວງຈຳປາ​ສັກ, ຄຳ​ມ່ວນ, ຊຽງ​ຂວາງ, ສ​ະລະ​ວັນ​ ແລະ ​​ແຂວງ​ອື່ນໆ ​ເພື່ອ​ສະໜອງ​ແຮງ​ງານ​ໃຫ້​ແກ່​ການ​ລົງທຶນ​ໄດ້​ຢ່າ​ງພຽງພໍ.

ທ່ານ ຕີ ສີ​​ເຊັງ ນັກ​ພັດທະນາ​ເຂດ​ເສດຖະກິ​ດພິ​ເສດ​ສະຫວັນ-​ເຊ​ໂນ​ຈຸດຊີ​ກ່າວ​ວ່າ: ກາງ​ປີ​ນີ້​ພວກ​ເຮົາ​ຈະ​ເປີດ​ອີກ​ສ​ອງ​ໂຮງ​ງານ​ຂອງ​ບໍລິສັດ​ອ​າຄ​ອນ (ACON) ແລະ CVILVX​​ ເຊິ່ງຕ້ອງການ​ແຮງ​ງານ​ໃນ​ລະດັບ 3-5​ພັນ​ຄົນ ​ເພື່ອ​ບັນຈຸ​ຕຳ​ແໜ່​ງງານຜິ​ລິດ​ສິ້ນ​ສ່ວນ​ອີ​ເລັກ​ໂຕຣນິກ​ແຝງ​ບອດ, ສາຍ​​ໄຟ​ທີ່​ຕະຫຼາດມີ​ຄວາມ​ຕ້ອງການ​ສູງ​​. ປັດຈຸ​ບັນ​​ໄດ້​ສົ່ງ​ແຮງ​ງານ 150 ​ຄົນ​ໄປ​ຝຶກ​ອົບ​ຮົບ​ຢູ່​ ສປ ຈີນ, ​ເພື່ອ​ໃຫ້​ເປັນ​ຜູ້​ສຳ​ນານ​ງານ​​ແລ້ວມາ​ຝຶກ​ງານ​ໃຫ້​ຜູ້​ອື່ນ​ຕໍ່.​ ສ່ວນ​ແຮງ​ງານ​ທີ່​ຕ້ອງການ​ຈຳນວນ​ຫຼາຍ​ນັ້ນ​​ໂດຍ​ບໍ່​ໄດ້​ຈຳ​ແນ​ກ​ເພດ​ໄວ​ເຖິງ​ຈະ​ເປັນ​ແຮ​ງງານ​ດິບ ​ກໍ່​ຈະ​ຮັບ​​ແລະຈະ​ຝຶກ​ໃຫ້ກາຍ​​ເປັນ​ແຮງ​ງານ​ທີ່​ມີ​ສີມື​​, ພ້ອມ​ທັງ​ຮຽກຮ້ອງ​ເຖິງ​ຜູ້​ທີ່​ໄປ​ຂາຍ​ແຮງ​ງານ​ຢູ່​ຕ່າງປະ​ເທດ​​ໃຫ້ກັບ​ຄືນ​ມາ​ອອກ​ແຮງ​ຢູ່​ບ້ານ​ເຮົາ ​ເພາະ​ມີ​ຫຼາຍ​ຕຳ​ແໜ່​ງວຽກ​ຍັງ​ລໍຖ້າ​ທ່ານ​ຢູ່.