ທ່ານ​ຮອງນາຍົກລັດຖະມົນຕີຮ່ວມສະຫລອງ 10 ປີພູເບ້ຍມາຍນິງ

- advert banner 728 90 728x90 - ທ່ານ​ຮອງນາຍົກລັດຖະມົນຕີຮ່ວມສະຫລອງ 10 ປີພູເບ້ຍມາຍນິງ

  ໃນຕອນຄໍ່າຂອງວັນທີ 15 ພຶດສະພານີ້, ທີ່​ໂຮງ​ແຮມຄລາວພລາຊາ, ບໍລິສັດ ພູເບ້ຍ ມາຍນິງ ໄດ້ຈັດງານສະເຫລີມສະຫລອງ ເນື່ອງໃນໂອກາດຄົບຮອບ 10 ປີແຫ່ງການດໍາເນີນງານຂອງໂຮງງານຜະລິດທອງ-ຄໍາພູຄໍາ, ​ໂດຍ​ການ​ເປັນກຽດ​ເຂົ້າຮ່ວມ​ຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ​ເຊິ່ງມີ​ການ​ນຳ​ພັກ-​ລັດ, ພະນັກງານຂັ້ນສູງຂອງລັດຖະບານ ແລະ ​ແຂກຕ່າງປະ​ເທດ, ພ້ອມດ້ວຍຄູ່​ຮ່ວມ​ມື, ລູກຄ້າຕ່າງເຂົ້າຮ່ວມເປັນຈໍານວນຫລາຍ.

          ​ໃນ​ພິທີ, ຄະນະ​ອຳນວຍ​ການ ​ໄດ້​ລາຍ​ງານ​ໃຫ້​ຊາບ​ວ່າ: ໂຮງງານຜະລິດທອງ-ຄໍາ ພູຄໍາ ໄດ້ເປີດຢ່າງເປັນທາງການ ໃນວັນທີ 09 ພຶດສະພາ 2008 ແລະ ຕະຫລອດໄລຍະເວລາດັ່ງກ່າວໂຮງງານບ້ານຫ້ວຍຊາຍຜະລິດໂລຫະທອງໄດ້ 690.000 ກວ່າໂຕນ, ຜະລິດຄໍາ​ 1.352.252 ອອນ ແລະ ເງິນ 9.530.722 ອອນ. ມາຮອດປະຈຸ​ບັນ, ​ໄດ້ປະກອບສ່ວນ​​ງົບປະມານ​ໃຫ້​ລັດຖະບານແລ້ວ 623 ລ້ານໂດລາສະຫະລັດ. ສໍາລັບບໍລິສັດ ພູເບ້ຍ ມາຍນິງ ໄດ້ລົງທຶນເຂົ້າໃນກິດຈະການດັ່ງກ່າວປະມານ 1,4 ລ້ານໂດລາສະຫະລັດ.

          ນອກ​ນັ້ນ, ບໍ​ລິ​ສັດ ຍັງ​ໄດ້ລົງ​ທຶນ​ໃສ່​​ໃນການສ້າງຖະໜົນຫົນທາງ ແລະ ການບໍາລຸງສ້ອມແປງເສັ້ນທາງຂົນສົ່ງ ແລະ ເສັ້ນທາງໃນບໍລິເວນໃກ້ຄຽງກັບເຂດດໍາເນີນງານຂອງບໍລິສັດມີມູນ​ຄ່າກວ່າ 60 ລ້ານໂດລາສະຫະລັດ. ພ້ອມ​ທັງ ໄດ້ປະກອບສ່ວນຢ່າງຫລວງຫລາຍເຂົ້າໃນ​ການ​ພັດ​ທະ​ນາຊຸມຊົນທີ່ຢູ່ໃກ້ເຂດດໍາເນີນງານ. ປັດຈຸ​ບັນ, ບໍລິສັດມີ​ແຮງ​ງານ​ຄົນລາວກວ່າ 90% ຂອງ​ກຳ​ລັງ​ແຮງ​ງານ​ທັງ​ໝົດ, ໂດຍຜ່ານການຈ້າງງານ​ພາຍ​ໃນ ແລະ ທ້ອງ​ຖິ່ນ, ຊຶ່ງນັບແຕ່ປີ 2008 ​ເປັນຕົ້ນມາ, ບໍລິສັດໄດ້ປະກອບສ່ວນເຂົ້າໃນ 293 ໂຄງການພັດທະນາຊຸມຊົນ ທີ່​​ໄດ້ສຸມ​ໃສ່​ວຽກ​ງານດ້ານການສຶກສາ, ສາທາລະນະສຸກ, ການພັດທະນາກະສິກໍາ, ທຸລະກິດຂະໜາດນ້ອຍ, ການເງິນຈຸລະພາກ ແລະ ການສ້າງໂຄງລ່າງພື້ນຖານ ລວມ​ເປັນ​ມູນ​ຄ່າປະມານ 4,3 ລ້ານໂດລາສະຫະລັດ.

- lattana 1 - ທ່ານ​ຮອງນາຍົກລັດຖະມົນຕີຮ່ວມສະຫລອງ 10 ປີພູເບ້ຍມາຍນິງ