ກອງຄຸ້ມຄອງພາສີ V ເຂັ້ມງວດສະກັດກັ້ນປາກົດການຫຍໍ້ທໍ້ຕ່າງໆ

- advert banner 728 90 728x90 - ກອງຄຸ້ມຄອງພາສີ V ເຂັ້ມງວດສະກັດກັ້ນປາກົດການຫຍໍ້ທໍ້ຕ່າງໆ

ຫົວໜ້າກອງຄຸ້ມຄອງພາສີ V ໄດ້ໃຫ້ຮູ້ວ່າ: ປັດຈຸບັນ, ກົມກອງຂອງຕົນພວມເລັ່ງໃສ່ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆເພື່ອເຮັດໃຫ້ການຈັດເກັບລາຍຮັບເຂົ້າງົບປະມານບັນລຸໄດ້ຕາມແຜນການວາງໄວ້, ໂດຍສະເພາະແມ່ນເລັ່ງອັດຊ່ອງຫວ່າງການຮົ່ວໄຫລຂອງລາຍຮັບດັ່ງກ່າວ, ຊຶ່ງກອງຄຸ້ມຄອງພາສີ V ປະກອບມີ 4 ແຂວງຄື: ແຂວງບໍລິຄໍາໄຊ, ແຂວງວຽງຈັນ, ແຂວງໄຊສົມບູນ ແລະ ນະຄອນຫລວງວຽງຈັນ, ປະກອບມີ 3 ຂະແໜງຂຶ້ນກັບຄື: ຂະແໜງບໍລິຫານ-ການເງິນ, ຂະແໜງກວດສອບຄືນການແຈ້ງພາສີ, ຂະແໜງຕ້ານການລັກລອບໜີພາສີ, ໂດຍໄດ້ກຳນົດເອົາວັນທີ 5 ຂອງທຸກໆເດືອນເປັນມື້ປະຊຸມສ່ອງແສງວຽກງານວິຊາສະເພາະ, ປັບປຸງແບບແຜນວິທີເຮັດວຽກ, ຜັນຂະຫຍາຍມະຕິຄຳສັ່ງ ແລະ ບັນຫາອື່ນໆ ແລະ ມີ 4 ດ່ານພາສີສາກົນ, 3 ດ່ານທ້ອງຖິ່ນ, 5 ດ່ານປະເພນີຂຶ້ນກັບ. ສໍາລັບປີ 2018 ນີ້, ກອງຄຸ້ມຄອງພາສີດັ່ງກ່າວ ໄດ້ຮັບຕົວເລກມອບໝາຍຈາກກົມພາສີໃຫ້ຈັດເກັບລາຍຮັບເຂົ້າງົບປະມານທັງໝົດ 3.963 ຕື້ກີບ, ກວມເອົາ 55% ຂອງລາຍຮັບພາສີທົ່ວປະເທດ 7.200 ຕື້ກີບ. ໃນນັ້ນ, ໄດ້ແບ່ງຕົວເລກໃຫ້ແຕ່ລະແຂວງຈັດເກັບລາຍຮັບເຂົ້າງົບປະມານແຫ່ງລັດ, ສະເພາະນະຄອນຫລວງວຽງຈັນໃຫ້ໄດ້ 3.327 ຕື້ກີບ, ແຂວງບໍລິຄໍາໄຊກວ່າ 630 ຕື້ກີບ, ແຂວງວຽງຈັນ 4,8 ຕື້ກວ່າກີບ.

- lattana 1 - ກອງຄຸ້ມຄອງພາສີ V ເຂັ້ມງວດສະກັດກັ້ນປາກົດການຫຍໍ້ທໍ້ຕ່າງໆ

ຜ່ານການຈັດຕັ້ງປະຕິບັດວຽກງານເກັບລາຍຕົວຮັບຈິງນັບແຕ່ວັນທີ 1 ມັງກອນ-ວັນທີ 9 ພຶດສະພານີ້, ສາມາດປະຕິບັດໄດ້ທັງໝົດ 1.322 ກວ່າຕື້ກີບ, ເທົ່າກັບ 33,37% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ,​ ຊຶ່ງບັນດາແຂວງທີ່ສາມາດປະຕິບັດລາຍຮັບໄດ້ພົ້ນເດັ່ນກວ່າໝູ່ແມ່ນແຂວງບໍລິຄຳໄຊ, ໂດຍສະເພາະແມ່ນດ່ານພາສີສາກົນປາກຊັນ, ພຽງ 3 ເດືອນຕົ້ນປີ (ງວດທີ 1) ສາມາດປະຕິບັດໄດ້ 79 ຕື້ກວ່າກີບ ເທົ່າກັບ 39,09% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາເທົ່າກັບ 184,77%, ສະເພາະນະຄອນຫລວງວຽງຈັນການຈັດເກັບລາຍຮັບເຂົ້າງົບປະມານເຫັນວ່າໄດ້ດີພໍສົມຄວນ ແລະ ມີລັກສະເພີ່ມຂຶ້ນທຸກໆປີ, ແຕ່ຖ້າທຽບໃສ່ຕົວເລກແຜນການແມ່ນຍັງບໍ່ທັນບັນລຸຕາມແຜນ, ຊຶ່ງລາຍຮັບຫລັກໆ ແມ່ນຈາກການນຳເຂົ້າພາຫະນະ, ນໍ້າມັນເຊື້ອໄຟ, ວັດສະດຸກໍ່ສ້າງ, ເຄື່ອງອຸປະໂພກ-ບໍລິໂພກນຳເຂົ້າເພື່ອສົ່ງອອກ ແລະ ຄ່າທໍານຽມຕ່າງໆ.

ເຖິງແນວໃດກໍຕາມ, ຫົວໜ້າກອງຄຸ້ມຄອງພາສີ V ໄດ້ຢືນຢັນຕື່ມວ່າ: ເພື່ອຮັບປະກັນໃຫ້ການຈັດເກັບລາຍຮັບເຂົ້າງົບປະມານແຫ່ງລັດປີ 2018  ບັນລຸຕາມແຜນການ ຫລື ລື່ນແຜນການ, ຕ້ອງໄດ້ເຂັ້ມງວດໃນການຈັດຕັ້ງປະຕິບັດໜ້າທີ່ວິຊາສະເພາະ, ເອົາໃຈໃສ່ຕ້ານ ແລະ ສະກັດກັ້ນການລັກລອບໜີພາສີ, ເພີ່ມທະວີຊີ້ນໍາ-ນຳພາວຽກງານການເມືອງແນວຄິດ, ​ເອົາໃຈໃສ່ປັບປຸງກົນໄກວຽກງານຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ແລະ ເອົາໃຈໃສ່ປະຕິບັດ 10 ຂໍ້ຫ້າມຂອງພະນັກງານ-ລັດຖະກອນຂະແໜງການເງິນໃຫ້ເຂັ້ມງວດ.