ມີຫລາຍປັດໄຈພາໃຫ້ລາຄາ​ນ້ຳມັນເຊື້ອໄຟເໜັງ​ຕິງ

- advert banner 728 90 728x90 - ມີຫລາຍປັດໄຈພາໃຫ້ລາຄາ​ນ້ຳມັນເຊື້ອໄຟເໜັງ​ຕິງ

ປະເທດ​ເຮົາ​, ແມ່ນນຳ​ເຂົ້ານໍ້າມັນ​ເຊື້ອ​ໄຟ 100% ສະ​ເລ່ຍປີ​ໜຶ່ງ​ປະມານ 1.200-1.300 ລ້ານ​ລິດ​, ສະນັ້ນການເໜັງຕີງຂື້ນ-ລົງຂອງລາຄານໍ້າມັນນັ້ນແມ່ນ​ອີງຕາມ​ລາຄາ​ໃນ​ຕະຫລາດ​ໂລກ. ຂະນະດຽວກັນກໍມີປັດໃຈ​ພາຍ​ໃນບາງດ້ານທີ່ເຮັດ​ໃຫ້​ລາຄາ​ນ້ຳມັນ​ຢູ່ປະເທດເຮົາຍັງສູງ​ກວ່າ​ປະ​ເທດ​ໃກ້​ຄຽງ ແລະ ໃນ 5 ເດືອນຜ່ານມານີ້, ຢູ່ປະເທດເຮົາໄດ້ປັບລາຄານ້ຳມັນຂຶ້ນ ຄັ້ງ ແລະ ປັບລົງພຽງຄັ້ງດຽວ.

- lattana 1 - ມີຫລາຍປັດໄຈພາໃຫ້ລາຄາ​ນ້ຳມັນເຊື້ອໄຟເໜັງ​ຕິງ

ທ່ານ ວິໄລວົງ ບຸດດາຄຳ ປະທານກຳມາທິການແຜນການ, ການເງິນແລະ ກວດສອບ ສະພາແຫ່ງຊາດໄດ້ຊີ້ໃຫ້ເຫັນວ່າ: ສາເຫດທີ່ລາຄານ້ຳມັນເຊື້ອໄຟໃນປະເທດເຮົາມີການເໜັງຕີງຍ້ອນຈາກປັດໃຈພາຍໃນ ແລະ ພາຍນອກຄື:​ປັດ​ໃຈ​ພາຍ​ນອກ​ແມ່ນ​ສະພາບ​ຄວາມ​ບໍ່​ໝັ້ນຄົງ​ຂອງ​ສາກົນ, ບັນຫາ​ສົງຄາມ ​ແລະ ​​ການ​ແກ້ງ​ແຍ້​ງດ້ານ​ພະລັງງານ​ຂອງ​ບັນດາ​ປະ​ເທດ​ມະຫາ​ອຳນາດ​ໃນ​ໂລກ​ທີ່​ມີ​ການ​ຜັນ​ແປແບບ​ຄາດ​ຄະ​ເນ​ໄດ້​ຍາກ, ການ​ສະໜອງ​​ຈາກ​ກຸ່ມ​ຜູ້​ຜະລິດ​ນ້ຳມັນ​ເຊື້ອ​ໄຟ​ລາຍ​ໃຫຍ່​ຂອງ​ໂລກ​ຍັງ​ສືບ​ຕໍ່ຫລຸດ​ລົງ​ຈົນ​ຮອດ​ທ້າ​ຍປີ 2018 ​ແລະ ​ຍັງ​ມີ​ການ​ຜູກຂາດ​ບາງ​ປະ​ເທດ​ໃນ​ອາຊີ, ຕົ້ນ​ທຶນ​ໃນການຂົນ​ສົ່ງ​ນ້ຳມັນ​ເຊື້ອ​​ໄຟ​ມາ​​ປະ​ເທດ​ເຮົາ​ແມ່ນ​ສູງ​ກວ່າ​ປະ​ເທດ​ໃກ້​ຄຽງ. ສ່ວນ​ປັ​ດ​ໃຈ​ພາຍ​ໃນ​ແມ່ນ​ຍ້ອນ​ການ​ກຳນົດ​ໂຄ​ງປະກອບ​ລາຄາ​ນ້ຳມັນ​ເຊື້ອ​ໄຟ​ຍັງ​ມີຫລາຍ​ລາຍການ, ການ​ເກັບ​ພາສີ-​ອາກ​ອນຍັງ​ມີຫລາຍ​ລາຍການ ​​ແລະ ​ຊ້ຳ​ຊ້ອນ​ ເຊັ່ນ: ພາສີ​ຂາເຂົ້າ, ອາກອນ​ຊົມ​ໃຊ້​ຂາ​ເຂົ້າ ​ແລະ ​ອາກອນ​ມູນ​ຄ່າ​ເພີ່​ມ, ການ​ເກັບ​ຄ່າ​ກວດກາ​ນັບ​ບໍລິ​ມາດ​ນ້ຳມັນ​ເຊື້ອ​ໄຟ, ການ​ນຳ​ໃຊ້​ຄັງ​ແຮ ​ເພື່ອ​ດັດສົມ​ນ້ຳມັນ​ເຊື້ອ​ໄຟ​ຍັງ​ມີ​ຫລາຍ​ຂັ້ນ​ຕອນ ​ແລະ ​​ບໍ່​​ຕອບ​ສະໜອງ​ໄດ້ຕໍ່​ສະພາບ​ການ​ເໜັງ​ຕີ, ການ​ບໍລິການ​ນຳ​ເຂົ້າ​ນ້ຳມັນ​ເຊື້​ອ​ໄຟ​ຍັງ​ມີຫລາຍ​ຂັ້ນ​ຂອດ ​ເພິ່ມຄ່າ​ສິ້ນ​ເປືອງ​ຕ່າງໆຫລາຍຂຶ້ນ. ສະນັ້ນກ່ອນອື່ນ ​ຕ້ອງ​ໄດ້​ແກ້​ໄຂປັບປຸງ​ໂຄງ​ປະກອບ ​ແລະ ​ກຳນົດ​ລາຄາ​ນ້ຳມັນ​ເຊື້ອ​ໄຟ ​ໂດຍ​ການ​ເກັບ​ພາສີ​ນຳ​ເຂົ້າ​ໃນ​ອັດຕາ​​ໃນ​ຂອບ​ການ​ຄາ​ເສລີ AFTA​ ແລະ​ຫລຸດຜ່ອນ​ອັດຕາ​ອາກອນ, ຄ່າ​ທຳນຽມ ​ແລະ ​ຄ່າ​ບໍລິການ​ຕ່າງ​ໆ​ຂອງ​ພາກລັດ​ໃຫ້​ເໝາະ​ສົມ ​ແລະ ​ເພື່ອຫລຸດຜ່ອນ​ການ​​ແບກຫາບລາຄາຂອງ​ຜູ້​ຊົມ​ໃຊ້ກໍ​ຄື​ປະຊາຊົນ.

ທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ໃຫ້ຮູ້ວ່າ: ການປັບລາຄານໍ້າມັນເຊື້ອໄຟຂຶ້ນ-ລົງໃນປະເທດເຮົາ, ແມ່ນອີງຕາມລາຄານ້ຳມັນຈາກຕະຫລາດໂລກ ໂດຍສະເພາະແມ່ນຕະຫລາດສິງກະໂປ ແລະ ໃນປີ 2018 ນີ້, ບໍ່ສາມາດປັບຕາມລາຄາຕະຫລາດໂລກໄດ້ ເນື່ອງຈາກອາຊຽນໄດ້ຫລຸດອັດຕາພາສີນ້ຳມັນເຊື້ອໄຟລົງເຫລືອ 0%. ຈາກບັນຫາດັ່ງກ່າວ, ລັດຖະບານໄດ້ເກັບອາກອນຊົມໃຊ້ເພີ່ມຂຶ້ນ 4%.

ລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ການຕິດຕາມລາຄານໍ້າມັນແມ່ນເບິ່ງຈາກສອງແຫລ່ງຄື: ນ້ຳມັນດິບແມ່ນຈາກຕະຫລາດ WTI, Brent ແລະ ດູໄບ (Dubai) ແລະ ນ້ຳມັນສຳເລັດຮູບແມ່ນຕິດຕາມຈາກຕະຫລາດສິງກະໂປ, ຊຶ່ງເປັນຕະຫລາດໃຫຍ່ທີ່ສຸດໃນອາຊີຕາເວັນອອກສ່ຽງໃຕ້. ສ່ວນໂຄງປະກອບລາຄານ້ຳມັນຢູ່ລາວ ນອກຈາກລາຄານຳເຂົ້າແລ້ວຍັງປະກອບມີພາສີ-ອາກອນ ແລະ ຄ່າທຳນຽມຕ່າງໆ, ລາຍຈ່າຍ ຫລື ຕົ້ນທຶນຂອງຜູ້ປະກອບການ ແລະ ກຳໄລຂອງຜູ້ປະກອບການ ແລະ ໃນປີ 2018 ລາຄານ້ຳມັນດິບໃນຕະຫລາດໂລກເພີ່ມຂຶ້ນກວ່າ 70 ໂດລາສະຫະລັດຕໍ່ບາເຣນ ແລະ ນ້ຳມັນສຳເລັດຮູບໄດ້ສູງຂຶ້ນກວ່າ 80 ໂດລາສະຫະລັດຕໍ່ບາເຣນ. ອັນໄດ້ເຮັດໃຫ້ວັນທີ 15 ມັງກອນ 2018 ໄດ້ຫລຸດການເກັບຄັງແຮລົງຈາກ 500 ມາເປັນ 300 ກີບຕໍ່ລິດ ແລະ ປັບລາຄາຂຶ້ນ 100-140 ກີບຕໍ່ລິດຕາມລຳດັບ.

ທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ກ່າວວ່າ: ເພື່ອຮອງຮັບການຫລຸດອັດຕາພາສີເຫລືອ 0% ລັດຖະບານໄດ້ເພີ່ມການເກັບອາກອນ ຊົມໃຊ້ຂຶ້ນຈາກ 35% ເປັນ 39% ສໍາລັບນໍ້າມັນແອັດຊັງພິເສດ, ຈາກ 30% ເປັນ 34% ສໍາລັບນໍ້າມັນແອັດຊັງທຳມະດາ ແລະ ຈາກ 20% ເປັນ 24% ສໍາລັບນໍ້າມັນກາຊວນ, ອັນໄດ້ເຮັດໃຫ້ລາຄານ້ຳມັນເຊື້ອໄຟພາຍໃນເພີ່ມຂຶ້ນຢ່າງໜ້ອຍ 200 ກີບຕໍ່ລິດ ແລະ ບວກກັບການເໜັງຕີງຂອງອັດຕາແລກປ່ຽນທີ່ມີການເໜັງຕີງເລື້ອຍໆ.