ຈົ່ງຮ່ວມກັນປະຕິບັດ 4 ບໍ່ ເພື່ອປາບໄພຢາເສບຕິດ

- advert banner 728 90 728x90 -  ຈົ່ງຮ່ວມກັນປະຕິບັດ 4 ບໍ່ ເພື່ອປາບໄພຢາເສບຕິດ

ປັດຈຸບັນ, ລັດຖະບານກໍ່ຄືສະພາແຫ່ງຊາດພວກເຮົາໄດ້ສັ່ງໃຫ້ທົ່ວສັງຄົມ ຕ້ອງພ້ອມກັນປະຕິບັດ 4 ບໍ່ຄື: ບໍ່ຂາຍ-ບໍ່ຊື້-ບໍ່ ເສບ ແລະບໍ່ຜະລິດປຸງແຕ່ງຢາເສບຕິດໃນທຸກປະເພດ ແລະໃຫ້ກາຍເປັນໜ້າທີ່, ເປັນຄວາມຮັບຜິດຊອບຂອງທົ່ວປວງຊົນ ທັງນີ້ກໍ່ເພື່ອຫຼຸດຜ່ອນ ແລະກ້າວໄປເຖິງການຢຸດຕິການແຜ່ກະຈາຍຂອງໄພຢາເສບຕິດ.

- lattana 1 -  ຈົ່ງຮ່ວມກັນປະຕິບັດ 4 ບໍ່ ເພື່ອປາບໄພຢາເສບຕິດ

ບັນຫາດັ່ງກ່າວ ໄດ້ຖືກເປີດເຜີຍຢູ່ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ທີ່ສະເໜີໂດຍທ່ານພົນຈັດຕະວາ ຄໍາສຸກ ວີອິນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະ ພາແຫ່ງຊາດ ກ່ຽວກັບການແກ້ໄຂໄພຢາເສບຕິດ ໂດຍຕ້ອງພ້ອມກັນຕັ້ງໜ້າໂຄສະນາ, ສຶກສາອົບຮົມທົ່ວປວງຊົນ ເຂົ້າຮ່ວມສະ ກັດກັ້ນ ແລະຕ້ານຢາເສບຕິດ ດ້ວຍຫຼາຍວິທີ ແລະຫຼາຍຮູບແບບ ເຮັດໃຫ້ວຽກງານນີ້ ກາຍເປັນສະຕິ, ເປັນເຈົ້າການ ແລະເປັນ ຄວາມຮັບຜິດຊອບຂອງທົ່ວປວງຊົນ ໂດຍສະເພາະຕ້ອງປະຕິບັດໃຫ້ໄດ້ 4 ບໍ່ ຄື: ບໍ່ຂາຍ-ບໍ່ຊື້-ບໍ່ເສບ ແລະບໍ່ຜະລິດປຸງແຕ່ງໃຫ້ເປັນຮູບປະທໍາໂຕຈິງໃນທົ່ວປະເທດ ແລະພ້ອມນັ້ນ ຕ້ອງປັບປຸງວຽກງານວິຊາສະເພາະ, ປັບປຸງກໍາລັງ ປກສ ສະກັດກັ້ນ ແລະຕ້ານຢາເສບຕິດ,  ຍົກສູງຄຸນນະພາບວຽກງານສືບສວນ-ສອບສວນ ດໍາເນີນຄະດີຢ່າງຈະແຈ້ງ, ຊັດເຈນ ຮັດກຸມ ວ່ອງໄວ ທັງມີຄວາມໂປ່ງໃສ; ສືບຕໍ່ຫັນລົງຮາກຖານຊ່ວຍທ້ອງຖິ່ນແກ້ໄຂບັນຫາຢາເສບຕິດ, ກໍາທຸກສະພາບກົນອຸບາຍ ເລ້ຫຼ່ຽມການເຄື່ອນໄຫວບັນດາເປົ້າໝາຍທັງລາຍໃຫຍ່, ລາຍກາງ, ລາຍຍ່ອຍຢູ່ພາຍໃນ ແລະຕ່າງປະເທດ, ແກ້ແຕ່ກົກເຖິງປາຍ ທັງເດັດ ດ່ຽວປາບປາມ ແລະເອົາຜິດກັບທຸກຄົນທີ່ໄປກ່ຽວຂ້ອງກັບຢາເສບຕິດຢ່າງບໍ່ຍົກເວັ້ນ.

ຢາເສບຕິດ ເປັນໄພອັນຕະລາຍທີ່ທ້າທາຍ ແລະພວມຂົ່ມຂູ່ຕໍ່ມວນມະນຸດຍະຊາດໃນທົ່ວໂລກ ກໍຄືປະເທດເຮົາ, ສໍາລັບຢູ່ລາວ ບັນຫາຢາເສບຕິດໃນປັດຈຸບັນ ພວມມີລັກສະນະເພີ່ມຂຶ້ນ ແລະແຜ່ຂະຫຍາຍໄປທົ່ວທຸກບ່ອນໃນສັງຄົມ ໃນລະ ດັບທີ່ແຕກຕ່າງກັນ; ການພົວພັນຄ້າ-ຂາຍຢາເສບຕິດມີທັງຄົນລາວ ແລະຄົນຕ່າງປະເທດ, ມີການເຄື່ອນໄຫວຂ້າມຊາດ ແລະມີການນໍາໃຊ້ພາຫະນະ-ເຕັກນິກ ທີ່ທັນສະໄໝເຂົ້າໃນການຂົນສົ່ງຢາເສບຕິດຢ່າງເລິກແລບແນບນຽນທີ່ສຸດ; ບັນຫາທີ່ໜ້າເປັນຫ່ວງ ຢາເສບຕິດ ໄດ້ຊຶມເລິກເຂົ້າຫຼາຍຊັ້ນຄົນໃນສັງຄົມ ເຊິ່ງໃນປີ 2018 ມານີ້, ເຈົ້າໜ້າທີ່ຕໍາຫຼວດ ແລະພາກສ່ວນກ່ຽວຂ້ອງ ໄດ້ດໍາເນີນການປາບປາມ ແລະເອົາຜິດຕໍ່ຂະບວນການຢາເສບຕິດ ສາມາດຢຶດຂອງກາງເປັນຢາເສບຕິດໄດ້ຈໍານວນຫຼວງຫຼາຍ ເປັນຕົ້ນໃນເດືອນກຸມພາ ທະຫານກອງຮ້ອຍຊາຍແດນ 112 ໄດ້ຈັບຕົວຜູ້ກະທໍາຜິດ ແລະຢືດຢາບ້າໄດ້ 300.000 ເມັດ, ໃນເດືອນຕໍ່ມາ ເຈົ້າໜ້າທີ່ຕຳຫຼວດແຂວງຫຼວງນໍ້າທາ ສາມາດຈັບຕົວ ແລະຢືດຢາບ້າໄດ້ 100.000 ເມັດ, ເຈົ້າໜ້າທີ່ ປກສ ເມືອງຂວາ ແຂວງຜົ້ງສາລີ ຢຶດເຮໂລອິນໄດ້ 58 ແທ່ງ, ຢາມ້າເກືອບ 4.000 ເມັດ, ປກສ ແຂວງຊຽງຂວາງຢຶດ ເຮໂລອິນໄດ້ 10 ແທ່ງ, ປກສ ແຂວງຫົວພັນ ຢຶດເຮໂລອິນໄດ້ 33 ແທ່ງ ນໍ້າໜັກ 13,7 ກິໂລ, ກົມໃຫຍ່ຕໍາຫຼວດ ກະຊວງ ປກສ ຢືດຢາບ້າ ໄດ້ 100.000 ກ່ວາເມັດ ແລະປກສ ແຂວງບໍ່ແກ້ວ ຢຶດຢາໄອສ໌ ໄດ້ 25 ເປົາ ມີ 651 ຫໍ່ ແລະຍັງມີຫຼາຍກົມກອງ, ທ້ອງຖິ່ນ ໂດຍສະເພາະໜ່ວຍງານສະ ກັດກັ້ນ ແລະຕ້ານຢາເສບຕິດຂອງສູນກາງ, ແຂວງ, ເມືອງຕ່າງໆ ກໍ່ສາມາດປາບປາມ, ຈັບກຸມຜູ້ກະທໍາຜິດ, ຢຶດຢາເສບຕິດ ແລະວັດຖຸ, ອຸປະກອນ, ພາຫະນະໃນການກໍ່ເຫດ ໄດ້ຈໍານວນຫຼວງຫຼາຍ.

ສະເພາະຢູ່ແຂວງຫຼວງພະບາງ ໃນປີ 2017 ກໍມ້າງຄະດີຢາເສບຕິດໄດ້ 171 ເລື່ອງ, ມີຜູ້ຕ້ອງຫາ 280 ຄົນ, ພວມດໍາເນີນຄະດີ 104 ເລື່ອງ, ຢຶດຢາບ້າ-ຢາໄອສ໌-ຢາຝິ່ນ ໄດ້ຈໍານວນຫຼວງຫຼາຍ ແລະ ຢຶດເຄື່ອງຈັກຜະລິດຢາບ້າ 136 ຊຸດ; ສໍາລັບແຂວງ ສະຫວັນນະເຂດ ສາມາດແກ້ໄຂຄະດີຢາເສບຕິດໄດ້ 968 ກ່ວາເລື່ອງ, ຜູ້ຕ້ອງຫາ 1.600 ກ່ວາຄົນ ທຽບໃສ່ປີຜ່ານມາ ເພີ່ມຂຶ້ນ 343 ຄົນ, ຢຶດຢາບ້າໄດ້ 200.000 ກ່ວາເມັດ ແລະແຂວງຄໍາມ່ວນ ສາມາດມ້າງຄະດີຢາເສບຕິດໄດ້ເກືອບ 200 ເລື່ອງ, ກັກຕົວຜູ້ຕ້ອງຫາໄດ້ 310 ຄົນ, ຢຶດຢາບ້າໄດ້ເກືອບ 100.000 ເມັດ ແລະແຂວງອື່ນໆ ກໍໄດ້ສະກັດກັ້ນ ແລະຕ້ານຢາເສບຕິດໄດ້ຈໍານວນຫຼວງຫຼາຍເຊັ່ນດຽວກັນ.

ຕໍ່ກັບໄພອັນຕະລາຍຈາກຢາເສບຕິດດັ່ງກ່າວ, ຢູ່ໃນກອງປະຊຸມສະພາແຫ່ງຊາດ ຊຸດນີ້, ທ່ານ ທອງລຸນ ສີສຸລິດ ນາຍົກ ລັດຖະມົນຕີ ໄດ້ກ່າວຢ່າງໜັກແໜ້ນວ່າ: ນັບແຕ່ປີກາຍນີ້ເປັນຕົ້ນມາ ລັດຖະບານ ໄດ້ປະກາດຜະເດັດເສິກກັບບັນຫາຢາເສບຕິດ ແລະລັດຖະບານ ໄດ້ຊີ້ນໍາໃຫ້ກະຊວງປ້ອງກັນຄວາມສະຫງົບ ແລະພາກສ່ວນກ່ຽວຂ້ອງຈັດຕັ້ງປະຕິບັດ ແລະນັບແຕ່ປີ 2016 ເປັນຕົ້ນມາ ແມ່ນໄດ້ເລີ່ມບຸກໜັກ ແລະໄດ້ຊອກຫາຈັບກຸມຜູ້ເປັນຫົວໂປ່ໂຕການຜູ້ກະທໍາຜິດໃນການຊື້-ຂາຍຢາເສບຕິດ, ຫົວໂປ່ນໍາເອົາທາດຕ່າງໆມາຜະລິດ ເພື່ອສົ່ງອອກ ຫຼື ນໍາເຂົ້າ-ສົ່ງອອກ ແລະໄດ້ເປັນຂ່າວລາຍວັນ ທີ່ເຈົ້າໜ້າທີ່ພວກເຮົາຈັບໄດ້ ແລະເອົາມາສືບສວນ-ສອບສວນ ແລະໄດ້ນໍາໂຕເຂົ້າສູ່ຂະບວນການຍຸຕິທໍາ ແລະມີຫຼາຍລາຍໄດ້ຂຶ້ນສານຕັດສິນ, ແຕ່ມາເຖິງປັດຈຸບັນ ຍັງສືບ ຕໍ່ແກ້ໄຂ ເພື່ອນໍາເອົາຫົວໂປ່ໃຫຍ່ມາລົງໂທດ ແລະກ່ຽວກັບການຈັບຕົວ, ກັັກຕົວ, ການຢຶດຊັບ ແມ່ນໄດ້ເປັນໄປຕາມລະບຽບກົດໝາຍ ແລະພວກເຮົາແມ່ນບໍ່ປະໃຫ້ບັນຫາຢາເສບຕິດນີ້ໄວ້ຢູ່ປະເທດຂອງພວກເຮົາອີກຕໍ່ໄປແລ້ວ.

                               # ຂ່າວ-ພາບ: ຣັດສະໝີ ດວງສັດຈະ