ປີນີ້ທົ່ວປະເທດມີແຜນປ່ອຍປາໃຫ້ໄດ້ 45 ລ້ານໂຕ

ປີນີ້ທົ່ວປະເທດມີແຜນປ່ອຍປາໃຫ້ໄດ້ 45 ລ້ານໂຕ - advert banner 728 90 728x90 - ປີນີ້ທົ່ວປະເທດມີແຜນປ່ອຍປາໃຫ້ໄດ້ 45 ລ້ານໂຕ

ພັກ ແລະ ລັດຖະບານ ໄດ້ກໍານົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ເພື່ອປູກຈິດສໍານຶກໃຫ້ແກ່ເຍົາວະຊົນ ແລະ ອະນຸຊົນລຸ້ນຫຼັງ ກໍຄືທົ່ວສັງຄົມ ໃຫ້ເຫັນໄດ້ຄວາມສໍາຄັນຂອງສັດນໍ້າ-ສັດປ່າ. ຄືດັ່ງທີ່ພວກເຮົາຮູ້ແລ້ວວ່າ ສປປ ລາວ ເຮົາເປັນປະເທດໜຶ່ງ ທີ່ອຸດົມຮັ່ງມີໄປດ້ວຍຊັບພະຍາກອນທຳມະຊາດ, ຊັບໃນດິນ, ສິນໃນນໍ້າ, ມີຊະນິດພັນປາພື້ນເມືອງຫຼາຍກວ່າ 500 ຊະນິດ, ເປັນບ່ອນອາໄສຂອງສັດປ່າທີ່ຫາຍາກ ແລະ ໃກ້ຈະສູນພັນຂອງໂລກ ເຊັ່ນ: ໂຕເສົາລາ, ໂຕຂະຍຸ, ຊ້າງ, ເສືອໂຄ່ງ  ແລະ ສັດປ່າຊະນິດອື່ນໆ. ສັດນໍ້າ-ສັດປ່າດັ່ງກ່າວ ແມ່ນມີຄວາມສໍາຄັນຕໍ່ການຮັກສາຄວາມອຸດົມສົມບູນ, ຄວາມສົມດູນຂອງລະບົບນິເວດໃນທຳມະຊາດ, ເປັນມໍລະດົກອັນລ້ຳຄ່າຂອງຊາດ, ທັງເປັນທ່າແຮງໃຫ້ແກ່ການພັດທະນາເສດຖະກິດສັງຄົມ ແລະ ເປັນເງື່ອນໄຂທີ່ດີໃຫ້ແກ່ປະຊາຊົນລາວບັນດາເຜົ່າ ໄດ້ນຳໃຊ້ຊັບພະຍາກອນທຳມະຊາດເຫຼົ່ານັ້ນ ເຂົ້າໃນການຜະລິດ ແລະ ການດຳລົງຊີວິດເພື່ອຍົກສູງຄຸນນະພາບຊີວິດໃຫ້ດີຂຶ້ນ.

ປີນີ້ທົ່ວປະເທດມີແຜນປ່ອຍປາໃຫ້ໄດ້ 45 ລ້ານໂຕ - lattana 1 - ປີນີ້ທົ່ວປະເທດມີແຜນປ່ອຍປາໃຫ້ໄດ້ 45 ລ້ານໂຕ

ຍ້ອນເຫັນໄດ້ບົດບາດສໍາຄັນຂອງສັດນໍ້າ-ສັດປ່າຄືດັ່ງກ່າວ, ພັກ ແລະ ລັດຖະບານ ຈຶ່ງໄດ້ກໍານົດເອົາວັນທີ 13 ກໍລະກົດ ຂອງທຸກປີ ເປັນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ, ຊຶ່ງກົງກັບວັນຄ້າຍວັນເກີດຂອງປະທານ ສຸພານຸວົງ ເພື່ອເປັນ​ການ​ຈົດ​ຈຳ​ລ້ຳ​ລຶກ​ຄຸນ​ງາມ​ຄວາມ​ດີ ແລະ ຜົນ​ງານ​ອັນ​ໃຫ່​ຍ​ຫຼວງ​ຂອງ​ທ່ານທີ່​ໄດ້​ອຸ​ທິດ​ໃຫ້​ແກ່​ພາ​ລະ​ກິດ​ແຫ່ງ​ການ​ຕໍ່​ສູ້​ກູ້​ຊາດກໍ​ຄື​ການ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ​ຂອງ​ພວກ​ເຮົາ. ທັງເປັນການປູກ​ຈິດ​ສຳ​ນຶກ​ໃຫ້​ແກ່​ອະ​ນຸ​ຊົນ, ເຍົາ​ວະ​ຊົນ​ຂອງ​ຊາດກໍ​ຄື​ລູກ​ຫຼານ​ຜູ້​ເກີດ​ໃໝ່​ໃຫ່​ຍ​ລຸນໃຫ້​ມີ​ສະ​ຕິຮັກ ແລະ ຫວງ​ແຫນສັດ​ນ້ຳ-ສັດ​ປ່າ​ ແລະ ພ້ອມທັງ​ເປັນ​ການ​ປຸກ​ລະ​ດົມ​ທົ່ວ​ປວງ​ຊົນເຂົ້າ​ຮ່ວມ​ໃນ​ການ​ຄຸ້ມ​ຄອງ, ປົກ​ປັກ​ຮັກ​ສາ, ພັດ​ທະ​ນາແລະນຳ​ໃຊ້ສັດ​ນ້ຳແລະ ສັດ​ປ່າ ແນ​ໃສ່ເຮັດ​ໃຫ້ປະ​ຊາ​ກອນ​ສັດ​ນັບ​ມື້​ມີ​ຄວາມ​ອຸ​ດົມ​ສົມ​ບູນ ແລະ ກາຍ​ເປັນ​ທ່າ​ແຮງ​ໃນ​ການ​ຄ້ຳ​ປະ​ກັນ​ດ້ານ​ສະ​ບຽງ​ອາ​ຫານ, ໂພ​ຊະ​ນາ​ການກໍ​ຄື​ການ​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໃຫ້​ນັບ​ມື້​ດີ​ຂຶ້ນ. ນອກນີ້, ທັງເປັນ​ການ​ສືບ​ສານ​ຮີດ​ຄອງ​ປະ​ເພ​ນີ​ໃນ​ຊ່ວງ​ເຂົ້າ​ພັນ​ສາ​ບໍ່ຂ້າສັດຕັດຊີວິດໃຫ້​ມີ​ຄວາມ​ໝາຍ​ຄວາມ​ສຳ​ຄັນ​ຍິ່ງໆ​ຂຶ້ນ.

ໃນວັນທີ 11 ກໍລະກົດ ນີ້, ທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຖະແຫລງຕໍ່ສື່ມວນຊົນວ່າ: ເພື່ອສ້າງຂະບວນການ ພ້ອມທັງປູກຈິດສໍານຶກ ໃຫ້ທົ່ວສັງຄົມ ສະນັ້ນ, ເນື່ອງໃນໂອກາດ ວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດປີນີ້, ກະຊວງກະສິກໍາ ແລະ ປ່າໄມ້  ພວກເຮົາ ໄດ້ສົມທົບກັບຄະນະພັກອົງການປົກຄອງທ້ອງຖິ່ນ ທົ່ວປະເທດ ກະກຽມແຜນການ ແລະ ຂະບວນປ່ອຍປາ ໃຫ້ເປັນຂະບວນຟົດຟື້ນ ຄາດຫມາຍວ່າ ແຕ່ລະທ້ອງຖິ່ນ ໃນຂອບເຂດທົ່ວປະເທດ ຈະປ່ອຍປາໃຫ້ໄດ້ 45 ລ້ານໂຕ ລົງໃສ່ແຫຼ່ງນໍ້າທໍາມະຊາດ ເຊັ່ນ: ແມ່ນໍ້າຂອງ ແລະ ແມ່ນໍ້າສາຂາ, ອ່າງເກັບນໍ້າເຂື່ອນໄຟຟ້າ, ອ່າງເກັບນໍ້າຊົນລະປະທານ, ໜອງ ແລະ ບຶງທໍາມະຊາດ, ໜອງປາຊຸມຊົນ ແລະ ດິນບໍລິເວນນໍ້າປະເພດຕ່າງໆ. ໃນວັນທີ 13 ກໍລິກົດ, ນີ້ ກະຊວງກະສິກໍາ ແລະ ປ່າໄມ້ ຮ່ວມກັບ ນະຄອນຫຼວງວຽງຈັນ ຈະຈັດພິທີປ່ອຍປາ ທີ່ອ່າງນໍ້າຫຸມ ເມືອງ ນາຊາຍທອງ ນະຄອນຫຼວງວຽງຈັນ. ສຳລັບບັນດາພະແນກກະສິກໍາ ແລະ ປ່າໄມ້ແຂວງ ແລະ ເມືອງ ໃນທົ່ວປະເທດ ກໍມີແຜນການປ່ອຍປາ ຢູ່ທ້ອງຖິ່ນຕົນ.

ເນື່ອງໃນໂອກາດ ການສະເຫຼີມສະຫຼອງວັນດັ່ງກ່າວນີ້, ຂໍຮຽກຮ້ອງມາ​ຍັງ​ພາກ​ສ່ວນ​ຕ່າງໆທັງ​ພາກ​ລັດ ແລະ ເອ​ກະ​ຊົນໃນ​ທົ່ວ​ສັງ​ຄົມ ຈົ່ງພ້ອມກັນຮ່ວມແຮງຮ່ວມໃຈ ​ຄຸ້ມ​ຄອງ, ປົກປັກຮັກສາ, ພັດ​ທະ​ນາ ສັດນໍ້າ-ສັດປ່າ ໃຫ້ຫຼາຍຂຶ້ນ ແນ່ໃສ່ເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈຳນວນປະຊາກອນຂອງ ສັດນ້ຳ ແລະ ສັດປ່າ ທີ່ເປັນມໍລະດົກທາງທຳມະຊາດອັນລ້ຳຄ່າຂອງຊາດ ໃຫ້ໄດ້ຮັບການປົກປັກຮັກສາ, ຊົມໃຊ້ແບບຍືນນານ ແລະ ເປັນມູນມໍລະ ດົກຕົກທອດຮອດເຊັ່ນລູກເຊັ່ນຫລານ ຂອງພວກເຮົາ ຕະຫຼອດໄປ.