ການຄົ້ນຫາ​ຜູ້​ສູນຫາຍ ​ແລະ ​ເສຍ​ຊີວິດ​ຈາກ​ໄພ​ນ້ຳຖ້ວມຢູ່​ເມືອງ​ສະໜາມ​ໄຊ​ເຕັມ​ໄປ​ດ້ວຍ​ຄວາມ​ລຳບາກ

- advert banner 728 90 728x90 - ການຄົ້ນຫາ​ຜູ້​ສູນຫາຍ ​ແລະ ​ເສຍ​ຊີວິດ​ຈາກ​ໄພ​ນ້ຳຖ້ວມຢູ່​ເມືອງ​ສະໜາມ​ໄຊ​ເຕັມ​ໄປ​ດ້ວຍ​ຄວາມ​ລຳບາກ

ຄະນະ​ແກ້​ໄຂ​ໄພພິບັດພາກ​ສະໜາມ​ ລາຍ​ງານ​ໃຫ້​ຮູ້​ໃນ​ວັນ​ທີ 8 ສິງຫານີ້​ວ່າ: ການ​ປະຕິບັດ​ພາລະກິດ​ຊອກ​ຄົ້ນຫາ​ຜູ້​ສູນຫາຍ ​ແລະ ​ເສຍ​ຊີວິດ​ຈາກ​ເຫດການ​ນ້ຳຖ້ວມ​ຢູ່​ເມືອງ​ສະໜາມ​ໄຊ ​ແຂວງ​ອັດ​ຕະປື ມາ​ຮອດ​ປັດຈຸບັນ​ນີ້​ແມ່ນ​ເຕັມ​ໄປ​ດ້ວຍ​ຄວາມ​ຫຍຸ້ງຍາກ​ລຳບາກ, ​ເຖິງ​ວ່າ​ລະດັບ​ນ້ຳ​ໄດ້​ບົກ​ແຫ້ງ​ຫລາຍ​ແລ້ວ ​ແຕ່​ເສດ​ຊາກ​ຕົ້ນ​ໄມ້, ກິ່ງ​ໄມ້ ​ແລະ ຂີ້ຕົມ​ທີ່​ມີ​ລະດັບ​ສູງ​ແມ່ນ​ອຸປະສັກ​ທີ່​ພາ​ໃຫ້​ວຽກ​ງານ​ຄົ້ນຫາ​ມີ​ຄວາມ​ລ້າ​ຊ້າ, ​ໂດຍ​ສ່ວນ​ໃຫຍ່​ແມ່ນ​ໃຊ້​ກຳລັງ​ຄົນ​ເປັນ​ຫລັກ​ໃນ​ການ​ລຸຍ​ຂີ້ຕົມ ​ເພື່ອ​ເຂົ້າ​ໄປ​ງົມ​ທາວ​ຫາ​ຕາມ​ຈຸດ​ເປົ້າໝາຍ​ຕ່າງໆ ​ແລະ ມາຮອດປັດຈຸບັນການຄົ້ນ​ພົບ​ຜູ້​ເສຍ​ຊີວິດຍັງ​ຢູ່​ຕົວ​ເລກ 35 ສົບ, ໃນນັ້ນມີ ຍິງ 14 ສົບ, ຊາຍ 21 ສົບ, ​​ເດັກນ້ອຍ​ອາຍຸ​ຕໍ່າ​ກວ່າ 10 ປີ​ລົງ​ມາ​ມີ 11 ສົບ. ສ່ວນວຽກ​ເບິ່ງ​ແຍງ​ຜູ້​ປະສົບ​ໄພ​​ແມ່ນ​ສຳ​ເລັດ​ການ​ຕິດຕັ້ງ​ເຕັ້ນແລ້ວຈຳນວນ 439 ຫລັງ ​ແລະ ​ໄດ້​ຈັດ​ສັນ​ຜູ້​ປະສົບ​ໄພ​ເຂົ້າ​ໄປ​ພັກ​ເຊົາ​ເປັນ​ແຕ່​ລະ​ຊຸດ, ສ່ວນ​ການ​ແຈກ​ຢາຍ​ເງິນ​ແຮ​ເບື້ອງຕົ້ນຄອບຄົວ​ລະ 5 ​ແສນ​ກີບ ​ແມ່ນ​ມີ​ຜູ້​ມາ​ຮັບ​ເອົາ​ແລ້ວ​ຈຳນວນ 1.171 ຄອບຄົວ ລວມ​ເປັນ​ເງິນ​ທັງ​ໝົດ 585 ລ້ານ​ກີບ, ຊຶ່ງນອນໃນ ຈຳນວນເງິນ​ຊ່ວຍ​ເຫລືອຂອງ​ພາກສ່ວນ​ຕ່າງໆ​ທັງ​ພາຍ​ໃນ ​ແລະ ຕ່າງປະ​ເທດ.

- lattana 1 - ການຄົ້ນຫາ​ຜູ້​ສູນຫາຍ ​ແລະ ​ເສຍ​ຊີວິດ​ຈາກ​ໄພ​ນ້ຳຖ້ວມຢູ່​ເມືອງ​ສະໜາມ​ໄຊ​ເຕັມ​ໄປ​ດ້ວຍ​ຄວາມ​ລຳບາກ

ຄະນະ​ດັ່ງກ່າວ​ໃຫ້​ຮູ້​ຕື່ມ​ວ່າ: ​ໄດ້​ຮັບຮອງ​ເອົາ 4 ຈຸດ​ເປັນ​ບ່ອນ​ສ້າງ​ເປັນ​ບ້ານ​ພັດທະນາ​ທີ່​ຖາວອນ​ໃນ​ອະນາຄົດ​ຄື: ​ເຂດ​ບ້ານ​ດົງ​ບາກ, ​ທ່າ​ແສງ​ຈັນ, ຕະມໍ​ຢອດ ​ແລະ ບ້ານ​ປິນດົງ ​ແລະ ​ແຜນ​ວຽກ​ຮີບ​ດ່ວນ​ໃນ​ຕໍ່ໜ້າ​ນີ້​ແມ່ນ​ສືບ​ຕໍ່​ຊອກ​ຄົ້ນຜູ້​ຫາຍ​ສາບ​ສູນ ​ແລະ ​ເສຍ​ຊີວິດ, ສຳ​ຫລວດ​ຈຳນວນ​ພົນ​ຜູ້​ໄດ້​ຮັບ​ຜົນ​ກະທົບ ​ເພື່ອ​ອອກ​ບັດ​ໃຫ້​ສຳ​ເລັດ, ສືບ​ຕໍ່​​ເບີກ​ຈ່າຍ​ເງິນ​ແຮ​ເບື້ອງຕົ້ນ​ໃຫ້​ຄົບ​ຖ້ວນ​ທຸກ​ຄອບຄົວ, ປຸກ​ສ້າງ​ທີ່ຢູ່​ອາ​ໄສ​ຊົ່ວຄາວ, ສ້ອມ​ແປງ​ເສັ້ນທາງ ​ແລະ ຂົວ​ໃຫ້​ສາມາດ​ສັນຈອນ​ໄປ​ມາສະ​ດວກ.