ກິ່ນໝາກຖົ່ວລຽນຕິດລົດຈະກຳຈັດແນວໃດ ?

- advert banner 728 90 728x90 - ກິ່ນໝາກຖົ່ວລຽນຕິດລົດຈະກຳຈັດແນວໃດ ?

ທ່ານໃດພວມມີບັນຫາກິ່ນໝາກຖົ່ວລຽນຕິດລົດ ມື້ນີ້ພວກເຮົາມີເຄັດລັບການກຳຈັດກິ່ນດັ່ງກ່າວມາແນະນຳ.

- lattana 1 - ກິ່ນໝາກຖົ່ວລຽນຕິດລົດຈະກຳຈັດແນວໃດ ?

     – ຈອດລົດຕາກແດດພ້ອມທັງເປີດປະຕູໄວ້ : ຂັ້ນພື້ນຖານອັນດັບທຳອິດ ຫາກພົບບັນຫາກິ່ນໝາກຖົ່ວລຽນຕິດລົດຢ່າງຮຸນແຮງ ສິ່ງທຳອິດທີ່ຄວນເຮັດແມ່ນເປີດແວ່ນລົດ ຫລື ປະຕູລົດທັງໝົດ ພ້ອມທັງເປີດຝາກະໂປງທ້າຍລົດ, ຈອດລົດຂອງທ່ານຕາກແດດໄວ້ໃຫ້ອາກາດພາຍນອກຖ່າຍເທ ແລະ ຊ່ວຍພັດເອົາກິ່ນຈາກພາຍໃນລົດອອກໄປສູ່ພາຍນອກ ວິທີນີ້ເປັນວິທີທີ່ດີທີ່ສຸດ. ແນວໃດກໍຕາມ, ທ່ານຕ້ອງມີເວລາປະມານເຄິ່ງມື້ເປັນຢ່າງໜ້ອຍ.

     – ຂັບລົດເປີດລະບົບໝູນວຽນອາກາດພາຍນອກ : ອີກໜຶ່ງວິທີການທີ່ຫລາຍຄົນອາດເບິ່ງຂ້າມ ແລະ ບໍ່ເຄີຍສົນໃຈມັນເລີຍກໍມີ ກັບປຸ່ມທີ່ຢູ່ເທິງແຜງໜ້າປັດເຄື່ອງປັບອາກາດໃນລົດຂອງທ່ານ ນັ້ນກໍຄື ປຸ່ມເປີດລະບົບໝູນວຽນອາກາດພາຍນອກເຂົ້າສູ່ໃນລົດ ເຊິ່ງໂດຍປົກກະຕິແລ້ວເວລາຂັບລົດໃນໂຕເມືອງ ລົດເກືອບທຸກຄັນຈະເປັນລະບົບໝູນວຽນອາກາດພາຍໃນເພື່ອຫລຸດກິ່ນມົນລະພິດເທິງຖະໜົນຈາກພາຍນອກ. ແນວໃດກໍດີ ຫາກໃນລົດຂອງທ່ານມີກິ່ນໝາກຖົ່ວລຽນ ການຂັບລົດເປີດແອ ພ້ອມກັບເປີດລະບົບໝູນວຽນອາກາດພາຍນອກເຂົ້າມາແມ່ນສິ່ງທີ່ຈຳເປັນທີ່ສຸດ ສິ່ງສຳຄັນຄວນເປີດພັດລົມເບີແຮງທີ່ສຸດເພື່ອເປັນການໄລ່ອາກາດ ແລະ ກິ່ນທີ່ຍັງຄ້າງຢູ່ໃນລົດອອກມາ ລວມເຖິງຄວນເປີດແວ່ນຫລັງທັງ 2 ບານໜ້ອຍໜຶ່ງໃນຂະນະລົດແລ່ນ ເພື່ອຊ່ວຍລະບາຍກິ່ນອອກຈາກລົດນຳ.

     – ນຳ້ຫອມປັບອາກາດຊ່ວຍໄດ້ ແຕ່ບໍ່ຂໍແນະນຳ : ຫລາຍຄົນອາດຈະເລືອກໃຊ້ນຳ້ຫອມ ຫລື ສະເປຣປັບອາກາດເພື່ອດັບກິ່ນ ເຊິ່ງອາດຈະໄດ້ຜົນໃນລະດັບໜຶ່ງໃນໄລຍະເລີ່ມຕົ້ນ ແຕ່ໃນໄລຍະຍາວແລ້ວພົບວ່າບາງເທື່ອກິ່ນຂອງນຳ້ຫອມເຊິ່ງເປັນສານສັງເຄາະເມື່ອປະສົມກັບກິ່ນທີ່ບໍ່ເພິງປະສົງໃນລົດ ໂດຍສະເພາະແມ່ນກິ່ນໝາກຖົ່ວລຽນແລ້ວ ອາດເຮັດໃຫ້ກິ່ນໃນລົດຂອງທ່ານຮຸນແຮງຂຶ້ນກ່ວາເກົ່າ ສະນັ້ນ ໃນກໍລະນີນີ້ບໍ່ແນະນຳໃຫ້ໃຊ້ນຳ້ຫອມປັບອາກາດໃນການກຳຈັດກິ່ນໝາກຖົ່ວລຽນ.

     – ກາກກາເຟ – ໃບຊາ, ໃບເຕີຍ ຊ່ວຍທ່ານໄດ້ : ກິ່ນຂອງພືດເຫລົ່ານີ້ມີຄຸນສົມບັດທີ່ສາມາດດູດກິ່ນທີ່ບໍ່ເພິງປະສົງໄດ້ ແລະ ກິ່ນຫອມອ່ອນໆຍັງຊ່ວຍໃຫ້ທ່ານສົດຊື່ນຂຶ້ນນຳອີກ.

     – ເຮັດຄວາມສະອາດ ພ້ອມອົບໂອໂຊນ : ທາງອອກສຸດທ້າຍ ຫາກກິ່ນທີ່ບໍ່ເພິງປະສົງຍັງບໍ່ຫາຍໄປ ທ່ານອາດຕ້ອງອາໄສການອົບໂອໂຊນ ທີ່ປະຈຸບັນມີບໍລິການທົ່ວໄປຕາມຮ້ານຄາແຄໃຫຍ່ໆ. ນອກຈາກນີ້, ຫາກກິ່ນນັ້ນຄ້າງຢູ່ໃນລົດເປັນເວລາຫລາຍມື້ ທ່ານອາດຈຳເປັນຕ້ອງລົງທຶນຮື້ຜ້າພົມໃນລົດທັງໝົດອອກມາຊັກ ລວມເຖິງເຮັດຄວາມສະອາດເບາະ ເພາະກິ່ນຕ່າງໆຈະຕິດຢູ່ກັບຜ້າພົມ ແລະ ເບາະ ໂດຍສະເພາະຖ້າເປັນເບາະຜ້າ ຮັບຮອງວ່າກິ່ນຍິ່ງຕິດດີກ່ວາເບາະໜັງແນ່ນອນ.