ຝົນ​ຈະ​ຕົກ​ຕິດ​ຕໍ່​ຫລາຍວັນ​ໃນ​ເດືອນ​ກັນຍາ​ຫາ​ຕຸລາ

- advert banner 728 90 728x90 - ຝົນ​ຈະ​ຕົກ​ຕິດ​ຕໍ່​ຫລາຍວັນ​ໃນ​ເດືອນ​ກັນຍາ​ຫາ​ຕຸລາ

ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ ​ໃຫ້​ຮູ້​ວ່າ: ​ໃນ​ໄລຍະ​ຕົ້ນ​ເດືອນ​ກັນຍາ ລົມ​ມໍ​ລະ​ສຸມ​ຕາ​ເວັນ​ຕົກ​ສຽງ​ໃຕ້​ຈະ​ອ່ອນ​ກຳລັງ​ລົງ​ພັດ​ປົກ​ຄຸມ​ເຂດ​ພາກ​ໃຕ້, ພ້ອມ​ນັ້ນ ບໍລິ​ເວນ​ຄວາມ​ກົດ​ດັນ​ອາກາດ​ສູງ​ຈາກ​ປະ​ເທດ​ຈີນ​ຈະ​ແຜ່​ລົງ​ມາ​ປົກ​ຄຸມ ​ເຊິ່ງຈະ​ເຮັດ​ໃຫ້​ມີ​ຝົນຕົກ​ເບົາບາງ​ໃນ​ເຂດ​ພາກ​ເໜືອ​ລົງ​ຫາ​ພາກ​ກາງ, ສ່ວນ​ພາກ​ໃຕ້​ຍັງ​ຈະ​ມີ​ຝົນຕົກ​ໃນ​ລະດັບ​ຄ່ອຍ​ຫາ​ປານ​ກາງ, ​ໃນ​ໄລຍະ​ກາງ​ເດືອນ ຮ່ອງ​ຄວາມ​ກົດ​ດັນ​ອາກາດ​ຕໍ່າ​ຈະ​ພັດຜ່ານ​ເຂດ​ພາກ​ເໜືອ​ລົງ​ຫາ​ພາກ​ກາງ​ແລ້ວ​ປ່ອງ​ໃສ່​ພາຍຸ​ໝູນ​ເຂດ​ຮ້ອນ​ທີ່​ເຄື່ອນ​ທີ່ຢູ່​ເຂດ​ມະຫາ​ສະໝຸດ​ປາຊີ​ຟິກ ​ແລະ ​ເຂດ​ທະ​ເລ​ຈີນ​ໃຕ້ ສືບ​ຕໍ່​ເຄື່ອນ​ທີ່​ຜ່ານ​ພາກ​ເໜືອ​ຂອງ​ປະ​ເທດ​ຫວຽດນາມ ​ແລະ ພາກ​ເໜືອ​ຂອງ​ລາວ​ເຮົາ​ໃນ​ໄລຍະ​ວັນ​ທີ 16-18 ກັນຍາ​ນີ້ ​ເຊິ່ງຈະ​ເຮັດ​ໃຫ້​ມີ​ຝົນຕົກ​ປານ​ກາງຫາ​ຕົກ​ໜັກ ພ້ອມ​ມີ​ລົມ​ພັດ​ແຮງ​ຢູ່​ແຕ່​ລະ​ພາກ. ຈາກ​ນັ້ນ​ໄລຍະ​ວັນ​ທີ 23-29 ກັນຍາ ບໍລິ​ເວນ​ຄວາມ​ກົດ​ດັນ​ອາກາດ​ສູງ​ຈາກ​ຈີນ​ຈະ​ແຜ່​ລົງ​ມາ​ປົກ​ຄຸມ​ອີກ​ເທື່ອ​ໃໝ່ ​ເຊິ່ງຈະ​ເຮັດ​ໃຫ້​ອາກາດ​ເຢັນ​ໃນ​ເຂດ​ພາກ​ເໜືອ ​ແລະ ມີ​ຝົນຕົກ​ໃນ​ເຂດ​ພາກ​ກາງຫາ​ພາກ​ໃຕ້. ຈາກ​ນັ້ນ ​ໄລຍະ​ຕົ້ນ​ເດືອນ​ຕຸລາ ບໍລິ​ເວນ​ຄວາມ​ກົດ​ດັນ​ອາກາດ​ຕໍ່າ​ຈະ​ປົກ​ຄຸມ​ຢູ່​ທົ່ວ​ທຸກ​ພາກ​ຂອງ​ປະ​ເທດ​ເຮົາ ​ແລະ ສົມທົບ​ກັບ​ກະ​ແສ​ລົມ​ຕາ​ເວັນ​ຕົກ​ສຽງ​ໃຕ້​ພັດ​ປົກ​ຄຸມ​ດ້ວຍ​ກຳລັງ​ອ່ອນ ​ເຊິ່ງຈະ​ເຮັດ​ໃຫ້​ມີ​ຝົນຕົກ​ໃນ​ລະດັບ​ຄ່ອຍ​ໃນ​ແຕ່​ລະ​ພາກ. ​ໃນ​ໄລຍະ​ກາງ​ເດືອນ​ຕຸລາ​ຫາ​ຕົ້ນ​ເດືອນ​ພະຈິກ 2018 ມວນ​ອາກາດ​ເຢັນ​ຈາກ​ຈີນ​ຈະ​ແຜ່​ລົງ​ມາ​ປົກ​ຄຸມ ​ເຊິ່ງຈະ​ເຮັດ​ໃຫ້​ອາກາດ​ເຢັນ​ຫາ​ໜາວ​ເຢັນ​ໃນ​​ເຂດ​ພາກ​ເໜືອ ​ແລະ ຈະ​ມີ​ຝົນຕົກ​ໃນ​ລະດັບ​ຄ່ອຍ​ຫາ​ປານ​ກາງ​ໃນ​ແຕ່​ລະ​ພາກ. ຈາກ​ນັ້ນ​ເລີ່​ມ​ແຕ່​ກາງ​ເດືອນ​ຮອດ​ທ້າຍ​ເດືອນ​ພະຈິກ ມວນ​ອາກາດ​ໜາວ​ຈາກ​ຈີນ​ຈະ​ມີ​ກຳລັງ​ແຮງ​ເພີ່ມ​ຂຶ້ນ​ແຜ່​ລົງ​ມາ​ປົກ​ຄຸມ​ທົ່ວ​ທຸກ​ພາກ​ຂອງ​ລາວ ​ເຊິ່ງຈະ​ເຮັດ​ໃຫ້​ອາກາດ​ໜາວ​ເຢັນ​ໃນ​ເຂດ​ພາກ​ເໜືອ​ລົງ​ຫາ​ພາກ​ກາງ ​ແລະ ພາກ​ໃຕ້.

- lattana 1 - ຝົນ​ຈະ​ຕົກ​ຕິດ​ຕໍ່​ຫລາຍວັນ​ໃນ​ເດືອນ​ກັນຍາ​ຫາ​ຕຸລາ

ກົມ​ອຸຕຸ ​ໃຫ້​ຮູ້​ວ່າ: ລະດູຝົນ​ປີ​ນີ້​ຈະ​ສິ້ນສຸດ​ລົງ​ໃນ​ໄລຍະ​ກາງ​ເດືອນ​ຕຸລາ ​ເຊິ່ງ​ເຫັນ​ວ່າ​ຈະ​ໄວ​ກວ່າ​ປົກກະຕິ, ສ່ວນ​ສະພາບ​ອາກາດ​ໜາວ​ປີ​ນີ້​ກໍ​ຈະ​ມາ​ໄວ​ກວ່າ​ປົກກະຕິ​ເຊັ່ນ​ກັນ. ​ແຕ່​ແນວ​ໃດ​ກໍ​ຕາມ, ອຸຕຸນິຍົມ​ເຕືອນ​ວ່າ: ​ໄລຍະ​ກາງ​ເດືອນ​ກັນຍາ​ນີ້ ອາດ​ຈະ​ມີ​ພາຍຸ​ໝູນ​ພັດ​ຜ່ານ​ເຂດ​ພາກ​ກາງຫາ​ພາກ​​ເໜືອ​ຂອງ​ລາວ ​ເຊິ່ງຈະ​ເຮັດ​ໃຫ້​ມີ​ຝົນຕົກ​ໜັກ ​ແລະ ລົມ​ພັດ​ແຮງ, ມີ​ດິນ​ເຈື່ອນ, ນ້ຳຖ້ວມ​ຢູ່​ບາງ​ທ້ອງ​ຖິ່ນ. ດັ່ງນັ້ນ ຄວນ​ມີ​ສະຕິ​ລະວັງຕົວ ​ແລະ ກຽມພ້ອມ​ຮັບ​ມື​ກັບ​ສະພາບ​ດັ່ງກ່າວ ​ເພື່ອ​ບໍ່​ໃຫ້​ຊີວິດ ​ແລະ ຊັບ​ສິນ​ຕ່າງໆ​ເສຍ​ຫາຍ.