ເປີດສຳນັກງານປະສານງານ ສອງເກົາຫລີທີ່ແຄຊອງແລ້ວ

- advert banner 728 90 728x90 - ເປີດສຳນັກງານປະສານງານ ສອງເກົາຫລີທີ່ແຄຊອງແລ້ວ

ສປປ ​ເກົາຫລີ ​ແລະ ສ.​ເກົາຫລີ ​ເປີດ​ສຳນັກງານ​ປະສານ​ງານ​ທີ່​ເມືອງ​ແຄ​ຊອງ ​ໃນ​ເບື້ອງ ສປປ ​ເກົາຫລີ ​ແລ້ວ​ໃນ​ວັນ​ທີ 14 ກັນຍາ​ນີ້ ​ເປັນ​ການ​ຮັດ​ແໜ້ນ​ການ​ພົວພັນ​ກ່ອນ​ປະທານາທິບໍດີ ມຸນ​ແຈ​ອິນ ຂອງ ສ.​ເກົາຫລີ ຈະ​ຢ້ຽມຢາມ​ນະຄອນຫລວງ​ພຽງ​ຢາງ ​ໃນ​ວັນ​ທີ 18 ກັນຍາ​ນີ້ ​ເພື່ອ​ປະຊຸມ​ສຸດ​ຍອດ​ຄັ້ງທີ 3 ກັບ​ທ່ານ ກິມ ຈ໋ອງອຸນ ຜູ້ນຳ ສປປ ​ເກົາຫລີ.

- lattana 1 - ເປີດສຳນັກງານປະສານງານ ສອງເກົາຫລີທີ່ແຄຊອງແລ້ວ

ທ່ານ ​ໂຊ ມາຍ​ອງກົນ ລັດຖະມົນຕີ​ລວມຊາດ​ຂອງ ສ.​ເກົາຫລີ ກ່າວ​ໃນ​ພິທີ​ເປີ​ດສຳນັກງານ​ວ່າ: ​ເປັນ​ການ​ເປີດ​ປະຫວັດສາດ​ໜ້າ​ໃໝ່, ສຳນັກງານ​ແຫ່ງ​ນີ້​ເປັນ​ອີກ​ໜຶ່ງ​ສັນຍາ​ລັກ​ສັນຕິພາບ​ທີ່ ສປປ ​ເກົາ​ຫລີ ​ແລະ ສ.​ເກົາຫລີ ຮ່ວມ​ກັນ​ສ້າງ​ຂຶ້ນ. ຂະນະ​ທີ່ ທ່ານ ຣີ ຊົກ​ວອນ​ ຫົວໜ້າ​ຄະນະ​ຜູ້​ແທນ​ ສປປ ​ເກົາຫລີ ກ່າວ​ວ່າ: ​ເປັນ​ຜົນງານ​ທີ່​ງອກ​ງາມ​ດ້ວຍ​ການ​ເບິ່ງ​ແຍງ​ເອົາ​ໃຈ​ໃສ່​ຂອງ​ຊາວ ສປປ ​ເກົາຫລີ ​ແລະ ສ.​ເກົາຫລີ. ພິທີ​ເປີດ​ໃນ​ຄັ້ງນີ້​ມີ​ຄະນະ​ນັກທຸລະກິດ ສ.​ເກົາຫລີ ທີ່​ເຄີຍ​ມີ​ທຸລະ​ກິດ​ໃນ​ນິຄົມ​ອຸດສາຫະກຳ​ແຄ​ຊອງ​ທີ່​ຖືກ​ປິດ​ໃນ​ປີ 2016 ມາ​ຮ່ວມ​ງານ​ນຳ. ​ເຖິງ​ຢ່າງ​ໃດ​ກໍ​ດີ, ກະຊວງ​ລວມຊາດ​ຂອງ ສ.​ເກົາຫລີ ຢືນຢັນ​ວ່າ: ທາງ​ການ​ຍັງ​ບໍ່​ຄິດ​ເປີດ​ນິຄົມ​ອີກ​ເທື່ອ​ໜຶ່ງ ​ເພາະ​ມາດ​ຕະການ​ຂວ້ຳບາດ​ຍັງ​ມີ​ຜົນ​ຢູ່.

ສຳນັກງາ​ນ​ແຫ່ງ​ນີ້​ຕັ້ງຢູ່​ໃນ​ເມືອງ​ແຄ​ຊອງ ​ແຕ່​ກ່ອ​ນ​ເປັນ​ສ່ວນ​ໜຶ່ງ​ຂອງ ສ.​ເກົາຫລີ ຫລັງ​ຈາກຣັດ​ເຊຍ ​ແລະ ອາ​ເມ​ລິ​ກາ ​ແບ່ງ​ແຫລມ​ເກົາຫລີ​ອອກ​ເປັນ​ເໜືອ-​ໃຕ້​ໃນ​ໄລຍະ​ໃກ້​ສິ້ນສຸດ​ສົງຄາມ​ໂລກ​ຄັ້ງທີ 2, ​ແຕ່​ກັບ​ໄປ​ເປັບ​ຂອງ ສປປ ​ເກົາຫລີ ​ເມື່ອ​ສົງຄາມ​ເກົາຫລີ​ສິ້ນສຸດ​ໃນ​ປີ 1953 ອາຄານ 4 ຊັ້ນປະກອບມີ​ສຳນັກງານ ສປປ ​ເກົາຫລີ ​ແລະ ສ.​ເກົາຫລີ ທີ່​ແຍກ​ກັນ ​ແລະ ຫ້ອງ​ປະຊຸມ​ຮ່ວມ. ກະຊວງ​ລວມຊາດ​ຂອງ ສ.​ເກົາຫລີ ​ເປີດ​ເຜີຍ​ວ່າ: ສຳນັກງານ​ປະສານ​ງານ​ຈະ​ເປັນ​ຊ່ອງ​ທາງ​ສື່ສານ ​ແລະ ຫາລື​ຕະຫລອດ 24 ​ຊົ່ວ​ໂມງ ​ເພື່ອ​ເດີນ​ໜ້າ​ການ​ພົວພັນ​ສອງ​ເກົາຫລີ, ປັບປຸງ​ການ​ພົວພັນ ສປປ ​ເກົາຫລີ ກັບ​ອາ​ເມ​ລິ​ກາ ​ແລະ ຫລຸດຜ່ອນ​ຄວາມ​ເຄັ່ງ​ຕຶງ​ທາງ​ທະຫານ, ມີ​ເຈົ້າໜ້າ​ທີ່​ແຕ່ລະ​ຝ່າຍ​ປະຈຳ​ຢູ່ 20 ຄົນ ​ແລະ ມີ​ເຈົ້າໜ້າ​ທີ່​ລະດັບ​ຮອງ​ລັດຖະມົນຕີ​ເປັນ​ຫົວໜ້າ.