ຂະແໜງທະນາຄານ ເພີ່ມທະວີການຮ່ວມມືກັບສາກົນ
ເນື່ອງໃນໂອກາດວັນສ້າງຕັ້ງ ທຫລ ຄົບຮອບ 50 ປີ (07 ຕຸລາ 1968-07 ຕຸລາ 2018)
ປະຕິບັດຕາມແນວທາງການຕ່າງປະເທດຂອງພັກ ແລະ ລັດຖະບານ; ຄະນະພັກ-ຄະນະນຳ ທະນາຄານແຫ່ງ ສປປ ລາວ (ທຫລ) ໄດ້ເອົາໃຈໃສ່ຊີ້ນຳ ນຳພາ ແລະໄດ້ມີການເຄື່ອນໄຫວໃນວຽກງານການພົວພັນຮ່ວມມືກັບສາກົນໃນກອບການຮ່ວມມືສອງຝ່າຍນັບແຕ່ປີ 1975-1986 ຕົ້ນຕໍ ໄດ້ພົວພັນຮ່ວມມືກັບ ສສ ຫວຽດນາມ ແລະກໍາປູເຈຍ ພິເສດໃນຕົ້ນລະດູບານໃໝ່ປີ 1979 ການນໍາຂອງທະນາຄານກາງລາວ ໄດ້ໄປຢ້ຽມຢາມ ແລະ ເຮັດວຽກກັບທະນາຄານແຫ່ງລັດ ຫວຽດນາມ ໂດຍໄດ້ເຊັນສັນຍາເອກະສານຮ່ວມມືຂອງສອງທະນາຄານກາງ; ຈາກນັ້ນ ໄດ້ມີກອງປະຊຸມການນໍາ ຂັ້ນສູງຂອງທະນາຄານກາງຂອງ ລາວ-ຫວຽດນາມ-ກໍາປູເຈຍຢູ່ ສປປ ລາວ ໃນເດືອນພະຈິກ 1983.
ປະຕິບັດແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກນັບແຕ່ປີ 1986 ເປັນຕົ້ນມາ , ທະນາຄານກາງຂອງລາວ ກໍ່ໄດ້ເສີມຂະຫຍາຍການຮ່ວມມືກັບທະນາຄານກາງບັນດາປະເທດເພື່ອນມິດ ແລະ ສາກົນ ເຊິ່ງໄດ້ມີການເຊັນບົດບັນທຶກຄວາມເຂົ້າໃຈຮ່ວມມືກັບທະນາຄານກາງປະເທດຕ່າງໆ ຄື:(ສສ. ຫວຽດນາມ, ສປ ຈີນ, ໄທ, ກຳປູເຈຍ, ມຽນມາ, ສິງກະໂປ, ລັດເຊຍ, ສ.ເກົາຫຼີ, ເບລາລຸດ ແລະລຸກຊຳບວກ) ເພື່ອຊ່ວຍເຫຼືອທາງດ້ານວິຊາການໃນການແລກປ່ຽນບົດຮຽນນໍາກັນ ແລະ ການກໍ່ສ້າງພະນັກງານທັງໄລຍະສັ້ນ ແລະ ໄລຍະຍາວ, ອັນພົ້ນເດັ່ນ ທຫລ ໄດ້ຮ່ວມມືຢ່າງໃກ້ສິດກັບທະນາຄານແຫ່ງລັດ ຫວຽດນາມ, ທະນາຄານກາງກໍາປູເຈຍ ແລະ ທະນາຄານແຫ່ງປະເທດໄທ; ມາຮອດປັດຈຸບັນ ທຫລ ໄດ້ຮັບທຶນການຊ່ວຍເຫຼືອຈາກທະນາຄານແຫ່ງລັດ ຫວຽດນາມ ແລະທະນາຄານກາງຂອງປະເທດເພື່ອນມິດຫຼາຍສົມຄວນ; ນອກຈາກຮ່ວມມືທາງດ້ານວິຊາການ ຍັງພັດປ່ຽນກັນຈັດການແຂ່ງຂັນກິລາມິດຕະພາບ ແລະການແລກປ່ຽນວັດທະນາທໍາລະຫວ່າງ ທຫລ ກັບທະນາຄານແຫ່ງລັດຫວຽດນາມ ແລະທະນາຄານແຫ່ງປະເທດໄທ; ນອກນີ້ ທຫລ ຍັງໄດ້ຊຸກຍູ້ໃຫ້ມີການຮ່ວມມືທາງດ້ານການເງິນ ແລະ ວິຊາການ ລະຫວ່າງທະນາຄານທຸລະກິດພາຍໃນ ແລະ ຕ່າງປະເທດ.
ໃນຂອບການຮ່ວມມືຫຼາຍຝ່າຍ, ນັບແຕ່ປີ 1986 ເປັນຕົ້ນມາ ສປປ ລາວ, ທຫລ ໄດ້ເປັນເຈົ້າການໃນການຮ່ວມມືກັບກອງທຶນສາກົນ (IMF), ທະນາຄານໂລກ (WB) ແລະທະນາຄານພັດທະນາອາຊີ (ADB) ເຊິ່ງໄດ້ຮັບການຊ່ວຍເຫຼືອຫຼາຍດ້ານ ປະກອບສ່ວນເຂົ້າໃນການພັດທະນາປະເທດຊາດ; ທຫລ ເປັນໃຈກາງໃນການເຮັດວຽກກັບຄະນະຂອງກອງທຶນສາກົນທີ່ຕິດຕາມສະພາບເສດຖະກິດມະຫາພາກຂອງປະເທດເຮົາໃນແຕ່ລະປີ ໂດຍໄດ້ເຮັດວຽກກັບຄະນະວິຊາການຂອງ WB ແລະADB; ນອກນີ້ ຍັງເຂົ້າຮ່ວມກອງປະຊຸມປະຈຳປີຂອງອົງການການເງິນສາກົນ; ທຫລ ໄດ້ຕອ້ນຮັບຜູ້ອໍານວຍການໃຫ່ຍຂອງ IMF ທີ່ມາຢ້ຽມຢາມ ສປປ ລາວ 2 ຄັ້ງໃນປີ 2016 ແລະ ຕົ້ນປີດຽວກັນ ກໍ່ໄດ້ເປັນເຈົ້າການຮ່ວມມືທາງດ້ານການເງິນ-ທະນາຄານໃນຂອບອາຊຽນ, ອາຊຽນ + 3 ຕາມພັນທະຂອງປະ ເທດສະມາຊິກ; ພິເສດ ທຫລ ແລະ ກະຊວງການເງິນ ໄດ້ເປັນເຈົ້າພາບຈັດກອງປະຊຸມລະດັບວິຊາການ, ກອງປະຊຸມລະດັບລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ; ຜູ້ວ່າການ ທຫລ ໄດ້ຕາງໜ້າຜູ້ວ່າການທະນາຄານກາງອາຊຽນ + 3 ເປັນປະທານຮ່ວມກັບປະທານທະນາຄານກາງສະຫະພາບເອີໂຣບໃນກອງປະຊຸມຜູ້ວ່າການອາຊຽນ ແລະ ຜູ້ວ່າການທະນາຄານກາງເອີຣົບ ທີ່ປະເທດເຢຍລະມັນໃນເດືອນພຶດສະພາ 2016 ຜ່ານມາ, ນອກນີ້ ທຫລ ຍັງປະກອບສ່ວນໃນຂອບການຮ່ວມມືກັບອົງການການຄ້າໂລກ, ພົວພັນຮ່ວມມືກັບສູນຝຶກອົບຮົມ ແລະ ຄົ້ນຄວ້າວຽກງານທະນາຄານກາງຂອງອາຊີຕາເວັນອອກສ່ຽງໃຕ້ໃນການພັດທະນາຊັບພະຍາກອນມະນຸດ ເຊິ່ງ ທຫລ ໄດ້ຮັບທຶນຝຶກອົບຮົມ ແລະ ຮ່ວມມືກັບກຸ່ມອາຊີປາຊິຟິກ (APG) ໃນຖານະເປັນປະເທດສະມາຊິກໃນວຽກງານຕ້ານ ແລະ ສະກັດກັ້ນການຟອກເງິນ ແລະ ການສະໜອງທຶນແກ່ການກໍ່ການຮ້າຍ.
ຜ່ານການເຄື່ອນໄຫວວຽກງານພົວພັນສາກົນຢ່າງຕັ້ງໜ້າ, ຂະແໜງທະນາຄານ ໄດ້ເສີມຂະຫຍາຍການຮ່ວມມືກັບສາກົນຢ່າງເປັນເຈົ້າການ ສາມາດຍາດແຍ່ງການຊ່ວຍເຫຼືອທາງດ້ານທຶນຮອນ ແລະ ວິຊາການໄດ້ຈໍານວນຫຼາຍສົມຄວນໃນການສ້າງຄວາມເຂັ້ມແຂງໃຫ້ແກ່ພະນັກງານຂອງທະນາຄານ ແລະ ຖານະບົດບາດຂອງຂະແໜງການທະນາຄານຂອງລາວ ໄດ້ຮັບການຍົກສູງຂື້ນໃນເວທີພາກພື້ນແລະສາ ກົນ ປະກອບສ່ວນເຂົ້າໃນການປະຕິບັດນະໂຍບາຍການຕ່າງປະເທດຂອງ ພັກ-ລັດໄດ້ເປັນຢ່າງດີ.
ໂດຍ: ຣັດສະໝີ ດວງສັດຈະ
