ການກະກຽມນຳ​ສະ​ເໜີແຫລ່ງມໍລະດົົກໄຫຫີນຊຽງຂວາງ ເປັນມໍລະດົກໂລກມີ​ຄວາມ​ຄືບ​ໜ້າ

- advert banner 728 90 728x90 - ການກະກຽມນຳ​ສະ​ເໜີແຫລ່ງມໍລະດົົກໄຫຫີນຊຽງຂວາງ ເປັນມໍລະດົກໂລກມີ​ຄວາມ​ຄືບ​ໜ້າ

​      ຂປລ. ການກະກຽມນຳ​ສະ​ເໜີແຫລ່ງມໍລະດົກໄຫຫີນແຂວງຊຽງຂວາງ ເປັນມໍລະດົກໂລກ ມາ​ຮອດ​ປັດຈຸບັນໄດ້ສຳເລັດການສຳຫລວດ ແລະ ຂຶ້ນທະບຽນແຫລ່ງໄຫຫີນດັ່ງກ່າວແລ້ວ 11 ແຫລ່ງ ຢູ່ໃນ 4 ເມືອງຄື: ເມືອງແປກ, ຜາໄຊ, ພູກູດ ແລະ ເມືອງຄຳ ຊຶ່ງແຫລ່ງມໍລະດົກໄຫຫີນ 11 ແຫລ່ງດັ່ງກ່າວ ເປັນຕົວແທນອັນໂດດເດັ່ນໃຫ້ແກ່ແຫລ່ງໄຫຫີນທັງໝົດໃນທົ່ວແຂວງຊຽງຂວາງທີ່ມີຫລາຍກວ່າ 80 ແຫລ່ງ. ກອງປະຊຸມລາຍງານຜົນຄວາມຄືບໜ້ານີ້ໄດ້ມີຂຶ້ນໃນວັນທີ 11 ຕຸລາ 2018 ທີ່ເມືອງແປກ ແຂວງຊຽງຂວາງ.

- lattana 1 - ການກະກຽມນຳ​ສະ​ເໜີແຫລ່ງມໍລະດົົກໄຫຫີນຊຽງຂວາງ ເປັນມໍລະດົກໂລກມີ​ຄວາມ​ຄືບ​ໜ້າ

ໃນໂອກາດກ່າວເປີດກອງປະຊຸມ, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ກອງປະຊຸມຄັ້ງນີ້, ແມ່ນມີຄວາມໝາຍສຳຄັນຫລາຍ ເພາະພວກເຮົາຈະໄດ້ພ້ອມກັນກວດກາປະເມີນໃນດ້ານຕ່າງໆ ໂດຍສະເພາະພື້ນທີ່ຂອງແຫລ່ງມໍລະດົກໄຫຫີນ ທັງ 11 ແຫລ່ງໃນ 4 ເມືອງ ທີ່ສະເໜີເປັນມໍລະດົກໂລກ,ໃນນັ້ນກໍຈະໄດ້ຮ່ວມກັນສັງເກດ ແລະ ຕີລາຄາບັນດາຂະບວນການໃນການກະກຽມຄວາມພ້ອມ ໂດຍສະເພາະວຽກງານຄຸ້ມຄອງບໍລິຫານແຫລ່ງມໍລະດົກດັ່ງກ່າວ ທັງຢູ່ໃນຂັ້ນເມືອງ ແລະ ການມີສ່ວນຮ່ວມຂອງປະຊາຊົນຂັ້ນບ້ານ, ມີຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍແນວໃດ, ພ້ອມຊອກວິທີທາງແກ້ໄຂທີ່ເໝາະສົມ.

ພ້ອມນີ້, ທ່ານ ບໍ່ແສງຄໍາ ວົງດາລາ ຍັງໄດ້ຮຽກຮ້ອງບັນດາຜູ້ແທນທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງພ້ອມກັນເອົາໃຈໃສ່ປຶກສາຫາລື ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ເພື່ອແນໃສ່ເຮັດໃຫ້ການກະກຽມດ້ານຕ່າງໆ ໃຫ້ປະສົບຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້, ສາມາດອະທິບາຍຕໍ່ການລົງມາກວດກາປະເມີນຜົນພື້ນທີ່ຕົວຈິງຂອງຊ່ຽວຊານສາກົນຈາກສູນມໍລະດົກໂລກໃຫ້ມີເນື້ອໃນຖືກຕ້ອງ, ຄົບຖ້ວນຕາມຂະບວນການ ແລະ ມີຜົນສຳເລັດ.