ກາແດງສາກົນ ມອບອຸປະກອນການແພດໃຫ້ແກ່ໂຄງການເກັບກູ້ລະເບີດແຫ່ງຊາດ

- advert banner 728 90 728x90 - ກາແດງສາກົນ ມອບອຸປະກອນການແພດໃຫ້ແກ່ໂຄງການເກັບກູ້ລະເບີດແຫ່ງຊາດ

ພິທີມອບ-ຮັບ ອຸປະກອນການແພດ ຈາກຄະນະກໍາມະການກາແດງສາກົນ (ICRC) ໃຫ້ແກ່ໂຄງການເກັບກູ້ລະເບີດແຫ່ງຊາດ (ຄກລ), ເພື່ອປະກອບສ່ວນຊ່ວຍເຫຼືອລັດຖະບານລາວໃນການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ລາວ, ໄດ້ມີຂຶ້ນໃນວັນທີ 11 ຕຸລານີ້, ທີ່ນະຄອນຫຼວງວຽງຈັນ ລະຫວ່າງທ່ານ ຄໍາແກ້ວ ສານບຸນຄູນໄຊ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ຈອນນີ້ ແຮງເຄນເບີກ ທອມສັນ ທີ່ປຶກສາຝ່າຍອາວຸດສົງຄາມຕົກຄ້າງປະຈໍາພື້ນທີ່ອາຊີ.

- lattana 1 - ກາແດງສາກົນ ມອບອຸປະກອນການແພດໃຫ້ແກ່ໂຄງການເກັບກູ້ລະເບີດແຫ່ງຊາດ

ນັບແຕ່ປີ 2010 ເປັນຕົ້ນມາ, ຄະນະກໍາມະການກາແດງສາກົນ ໄດ້ໃຫ້ການສະໜັບສະໜູນແກ່ໂຄງການເກັບກູ້ລະເບີດແຫ່ງຊາດ ລວມມູນຄ່າການຊ່ວຍເຫຼືອທັງໝົດຫຼາຍກວ່າ 150 ພັນໂດລາສະຫະລັດ, ການສະໜັບສະໜູນແມ່ນໄດ້ເນັ້ນໃສ່ການຝຶກອົບຮົມ ແລະ ການສະໜອງອຸປະກອນການແພດໃຫ້ແກ່ທີມງານແພດສະໜາມ.

ໃນພິທີທ່ານ  ຈອນນີ້ ແຮງເຄນເບີກ ທອມສັນ ມີຄໍາເຫັນວ່າ: ໂດຍປົກກະຕິແລ້ວ ການເກັບກູ້ລະເບີດບໍ່ທັນແຕກ ແມ່ນມີຄວາມສ່ຽງ ແລະ ອັນຕະລາຍ, ສະນັ້ນ, ຈຶ່ງມີຄວາມສໍາຄັນຢ່າງຍິ່ງທີ່ຈະຕ້ອງຮັບປະກັນຄວາມປອດໄພ ແລະ ຕ້ອງມີການກະກຽມການຊ່ວຍເຫຼືອຢ່າງເໝາະສົມໃຫ້ແກ່ພະນັກງານພາກສະໜານ. ໜຶ່ງໃນວິທີທີ່ມີປະສິດທິຜົນທີ່ສຸດໃນກາບັນລຸເປົ້າໝາຍນີ້ ກໍຄືການຍົກລະດັບຄວາມຮູ້ທາງດ້ານວຽກງານການແພດ ແລະ ສ້າງຂີດຄວາມສາມາດ ໃຫ້ແກ່ພະນັກງານແພດສະໜາມຂອງໂຄງການເກັບກູ້ລະເບີດແຫ່ງຊາດ.

ໃນໂອກາດດຽວກັນ, ທ່ານ ຄໍາແກ້ວ ສານບຸນຄູນໄຊ ກໍໄດ້ກ່າວສະແດງຄວາມຂອບໃຈເປັນຢ່າງສູງຕໍ່ຄະນະດັ່ງກ່າວ ທີ່ໄດ້ສະໜອງອຸປະກອນການແພດໃຫ້ແກ່ໂຄງການເກັບກູ້ລະເບີດແຫ່ງຊາດ ຊຶ່ງເປັນອົງການປະຕິບັດງານແຫ່ງຊາດ ດ້ານການເກັບກູ້ລະເບີດບໍ່ທັນແຕກ ເພື່ອມະນຸດສະທໍາຂອງລັດຖະບານລາວ, ການສະໜອງອຸປະກອນດັ່ງກ່າວ ຈະຊ່ວຍປັບປຸງຄຸນນະພາບຂອງອຸປະກອນການແພດໃຫ້ແກ່ທີມງານພາກສະໜາມຂອງ ຄກລ ໃນ 9 ແຂວງ. ນອກນີ້, ອຸປະກອນບາງຈໍານວນແມ່ນຈະນໍາໃຊ້ເຂົ້າໃນການຝຶກອົບຮົມວຽກງານການແພດ ຢູ່ສູນຝຶກອົບຮົມ ຄກລ.