ລັດໄດ້ຮັບຜົນປະໂຫຍດແນວໃດຈາກການຂາຍປ້າຍລົດເລກງາມ

- WhatsApp Image 2017 07 12 at 9 - ລັດໄດ້ຮັບຜົນປະໂຫຍດແນວໃດຈາກການຂາຍປ້າຍລົດເລກງາມ

- 496155332 39ae0651c0 300x200 - ລັດໄດ້ຮັບຜົນປະໂຫຍດແນວໃດຈາກການຂາຍປ້າຍລົດເລກງາມ

- lattana 1 - ລັດໄດ້ຮັບຜົນປະໂຫຍດແນວໃດຈາກການຂາຍປ້າຍລົດເລກງາມ

(ຮຸບພາບສົມມຸດ)

ພາຍຫລັງສຳເລັດການປະມູນຂາຍລົດການນຳຂັ້ນສູງຈຳນວນ 14 ຄັນເມື່ອທ້າຍເດືອນກຸມພາຜ່ານມານີ້, ໂດຍສາມາດໄດ້ເງິນທັງໝົດ 11,6 ຕື້ກວ່າກີບ. ເຫດການດັ່ງກ່າວນັບວ່າເປັນນິມິດໝາຍທີ່ດີສ່ອງແສງໃຫ້ເຫັນເຖິງຄວາມເປັນແບບຢ່າງອັນດີແກ່ສັງຄົມຂອງບັນດາການນໍາເຮົາທີ່ຍອມສະຫລະຄວາມສະດວກສະບາຍສ່ວນຕົວເພື່ອຜົນໂຫຍດລວມຂອງຊາດ. ນອກນີ້ຍັງເປັນແບບຢ່າງທີ່ດີໃຫ້ແກ່ພະນັກງານຮຸ່ນສືບທອດເພື່ອບໍ່ໃຫ້ແລ່ນນຳແຕ່ວັດຖຸມີຄ່າເກີນຕົວ ແລະ ບໍ່ໃຫ້ຟຸມເຟືອຍ.

ແນວໃດກໍດີ, ຮູບແບບການປະມູນດັ່ງກ່າວຄວນຖືກຜັນຂະຫຍາຍ ແລະ ນຳໃຊ້ເປັນມາດຕະການເພື່ອຂຸດຄົ້ນແຫລ່ງລາຍຮັບເຂົ້າງົບປະມານລັດ ແລະ ການປະມູນລັກສະນະນີ້ສາມາດນໍາມາໃຊ້ກັບການປະມູນຂາຍປ້າຍລົດເລກງາມຍິ່ງເປັນການດີ ເພື່ອສ້າງລາຍຮັບໄດ້ຫລາຍຂຶ້ນອີກ. ເນື່ອງຈາກຜ່ານມາ, ການເກັບລາຍຮັບຈາກການຂາຍປ້າຍລົດເລກງາມຢູ່ແຕ່ລະທ້ອງຖິ່ນເຫັນວ່າຍັງບໍ່ເປັນເອກະພາບ ແລະ ໄດ້ເງິນມາໃຫ້ລັດບໍ່ເຕັມສ່ວນ, ບາງກໍລະນີແມ່ນມອບໃຫ້ບຸກຄົນ ຫລື ພາກເອກະຊົນສຳປະທານຂາຍ, ເຊິ່ງການປະຕິບັດລັກສະນະນີ້ອາດບໍ່ມີຄວາມໂປ່ງໄສ, ເຮັດໃຫ້ລັດເສຍໂອກາດ, ເປັນຊ່ອງທາງຮົ່ວໄຫລຂອງເງິນ ແລະ ເຮັດໃຫ້ຜົນປະໂຫຍດສ່ວນໃຫຍ່ຕົກຢູ່ນຳບຸກຄົນ ຫລື ເອກະຊົນຫລາຍກວ່າ.

ໃນປີ 2016 ຜ່ານມາ, ສະເພາະແຕ່ຢູ່ນະຄອນຫລວງວຽງຈັນໄດ້ອອກທະບຽນພາຫານະຫລາຍກວ່າ 700 ພັນຄັນ, ໃນນັ້ນລົດໃຫຍ່ກວມ 50% ແລະ ໃນສົກດຽວກັນການເກັບລາຍຮັບເຂົ້າງົບປະມານຂອງລັດບັນລຸໄດ້ພຽງ 95% ຂອງແຜນປີ ແລະ ນຳມາສູ່ການຂາດດຸນງົບປະມານ ເຖິງ 6,9% ຂອງ GDP (ລາຍຮັບແຫ່ງຊາດ), ເຊິ່ງສູງກວ່າອັດຕາສູງສຸດ ບໍ່ໃຫ້ເກີນ 5% ທີ່ລັດຖະບານກໍານົດໄວ້ ແລະ ເປັນອັດຕາສ່ວນທີ່ອົງການການເງິນສາກົນ IMF ແນະນຳໃຫ້ແຕ່ລະປະເທດຮັບປະກັນບໍ່ໃຫ້ມີການຂາດດຸນງົບປະມານກາຍ 5%.

ຈາກສະພາບການຂາດດຸນດ້ານງົບປະມານໃນລະດັບສູງດັ່ງກ່າວນັກເສດຖະສາດຫລາຍທ່ານໄດ້ເຕືອນວ່າ: ມັນອາດນໍາໄປສູ່ການເປັນໜີ້ຫລາຍຂຶ້ນເພື່ອສ້າງຄວາມດຸ່ນດ່ຽງດ້ານງົບປະມານ, ເຊິ່ງຜ່ານມາປະເທດເຮົາແມ່ນມີອັດຕາໜີ້ສາທາລະນະສູງຢູ່ແລ້ວ.

ເພື່ອແກ້ໄຂສິ່ງທ້າທາຍທາງການເງິນ ແລະ ຫລຸດຜ່ອນການຂາດດຸນງົບປະມານ, ໄລຍະຜ່ານມາລັດຖະບານໄດ້ສຸມທຸກຄວາມພະຍາຍາມໃນການເພີ່ມແຫລ່ງລາຍຮັບ ແລະ ຈຳກັດການຮົ່ວໄຫລຂອງການຈັດເກັບລາຍຮັບເຊັ່ນ: ຫ້າມສົ່ງອອກຜະລິດຕະພັນໄມ້ທີ່ຍັງບໍ່ທັນໄດ້ແປຮູບ ແລະ ປັບປຸງທຸລະກິດຂຸດຄົ້ນໄມ້ໃຫ້ເຂົ້າສູ່ລະບຽບຢ່າງເຂັ້ມງວດ, ໂຈະສຳປະທານບໍ່ແຮ່ທີ່ບໍ່ໄດ້ປະຕິບັດຕາມຂໍ້ຕົກລົງ ແລະ ເຮັດໃຫ້ລັດເສຍຜົນປະໂຫຍດ, ຢຸດເຊົາການຍົກເວັ້ນພາສີນຳເຂົ້ານໍ້າມັນ, ຄຽງຄູ່ກັບມາດຕະການສ້າງຄວາມໂປ່ງໄສ ແລະ ວິໄນທີ່ເຄັ່ງຄັດໃນການຂຸດຄົ້ນ ແລະ ເກັບລາຍຮັບ ແລະ ຫລີກເວັ້ນບໍ່ໃຫ້ມີປະກົດການສໍ້ລາດບັງຫຼວງໃນຖັນແຖວພະນັກງານຂະແໜງການເງິນ.

ນອກຈາກການປະມູນຂາຍປ້າຍລົດເລກງາມແລ້ວ, ລັດຍັງສາມາດນຳໃຊ້ຮູບແບບການປະມູນທີ່ໂປ່ງໄສ ແລະ ເປີດໂອກາດໃຫ້ທຸກຄົນ ແລະ ທຸກພາກສ່ວນສາມາດເຂົ້າເຖິງໄດ້ ເຊັ່ນ: ການຂາຍຊັບສີນຂອງລັດ, ການໃຫ້ສໍາປະທານທີ່ດິນ, ການລົງທຶນຂຸດຄົ້ນແຫລ່ງຊັບພະຍາກອນທຳມະຊາດ ແລະ ຂະແໜງການອື່ນໆ ເພື່ອຮັບປະກັນເຮັດໃຫ້ລັດໄດ້ຮັບຜົນປະໂຫຍດສູງສຸດ.