ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນທີ່ນະຄອນຊຽງໄຮ້

ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນທີ່ນະຄອນຊຽງໄຮ້ - advert banner 728 90 728x90 - ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນທີ່ນະຄອນຊຽງໄຮ້

ໃນຕອນເຊົ້າ ວັນທີ 5 ພະຈິກນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສ ປປ ລາວ ໄດ້ນຳຄະນະຜູ້ແທນຂັ້ນສູງຂອງລາວເຮົາເຂົ້າຮ່ວມພິທີ ເປີດງານວາງສະແດງສີນຄ້ານຳເຂົ້າສາກົນຈີນ ຄັ້ງທີ 1 ( China International Import – Expo) ທີ່ນະຄອນຊຽງໄຮ້, ພາຍໃຕ້ການເປັນປະທານຂອງທ່ານ ສີ ຈີ້ນຜີງ ປະທານປະເທດແຫ່ງ ສປຈີນ ຮ່ວມກັບ 12 ປະເທດ ທີ່ຖືກເຊີນມາຮ່ວມງານດັ່ງກ່າວ, ໃນຖານະປະເທດປະທານຮ່ວມ.

ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນທີ່ນະຄອນຊຽງໄຮ້ - lattana 1 - ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນທີ່ນະຄອນຊຽງໄຮ້

ງານວາງສະແດງດັ່ງກ່າວ, ໄດ້ຈັດຂຶ້ນເປັນຄັ້ງທໍາອິດພາຍໃຕ້ຫົວຂໍ້: “ຍຸກສະໄໝໃໝ່, ຊົມໃຊ້ອານາຄົດຮ່ວມກັນ” ເປັນການວາງສະແດງສິນຄ້າລະດັບສາກົນຈາກບັນດາປະເທດທີ່ເປັນຄູ່ຄ້າກັບ ສປຈີນ, ໂດຍສະເພາະປະເທດກໍາ ລັງພັດທະນາ, ຊຶ່ງສະແດງໃຫ້ເຫັນເຖິງຄວາມຕັ້ງໃຈຂອງ ສປຈີນ ໃນການສືບຕໍ່ເປີດປະຕູສູ່ໂລກພາຍນອກທັງເປັນການເອື້ອອຳນວຍໂອກາດອັນດີ ໃຫ້ຫລາຍປະເທດຈາກທົ່ວທຸກມູມໂລກໃນພາກພື້ນ ແລະ ຂົງເຂດ ໄດ້ມາພົບປະແລກປ່ຽນຮ່ວມມືດ້ານການຄ້າ ແລະ ການລົງທືນ, ພ້ອມທັງໂຄສະນາສີນຄ້າຂອງຕົນໂດຍ ແນ່ໃສຮັກສາລະບຽບການຄ້າສາກົນໃນການເປີດກ້ວາງການຮ່ວມມື ແລະ ເຊື່ອມໂຍງເສດຖະກິດຂອງຕົນກັບສາກົນ ແລະ ສົ່ງເສີມກົນໄກການຄ້າຫລາຍຝ່າຍ ເພື່ອແນ່ໃສ່ສ້າງເສດຖະກິດໂລກໃຫ້ສືບຕໍ່ພັດທະນາໄປຕາມທິດທາງທີ່ເປີດກ້ວາງ ແລະ ຕ່າງຝ່າຍຕ່າງມີຜົນປະໂຫຽດຫລາຍຂື້ນ.

ນອກຈາກງານວາງສະແດງສີນຄ້ານີ້ແລ້ວ ຍັງມີກອງປະຊຸມສຳມະນາໃນຫົວຂໍ້ຍ່ອຍປີ່ນອ້ອມ, ຊຶ່ງເປັນກອງປະຊຸມປຶກສາຫາລື ແລະ ແລກປ່ຽນນະໂຍບາຍດ້ານການຄ້າ-ການລົງທຶນ ຂອງບັນດາປະເທດທີ່ມາຮ່ວມງານ ໂດຍແບ່ງອອກເປັນ 3 ກອງປະຊຸມ ຄື: 1. ກອງປະຊຸມກ່ຽວກັບການຄ້າ ແລະ ການເປີດປະຕູ (Trade and Opening); 2. ກອງປະຊູມກ່ຽວກັບການຄ້າ ແລະ ນະວັດຕະກໍາໃໝ່ (Trade and Innovation); 3. ກອງປະຊູມກ່ຽວກັບການຄ້າ ແລະ ການລົງທືນ (Trade and Investment).

ໃນງານວາງສະແດງສີນຄ້າດັ່ງກ່າວ, ລາວເຮົາກໍໄດ້ສ້າງຫ້ອງວາງສະແດງແຫ່ງຊາດ National Pavilion ທີ່ມີເອກກະລັກຂອງລາວ, ໂດຍເອົາຮູບແບບຂອງວັດຊຽງທອງ ທີ່ເປັນວັດຄູ່ບ້ານຄູ່ເມືອງ ຂອງນະຄອນຫລວງພະບາງ ແລະ ເປັນທີ່ຮູ້ຈັກກັນດີໃນຖານະເປັນເມືອງມໍລະດົກໂລກ ທີ່ຕິດພັນກັບແຫລ່ງທ່ອງທ່ຽວອັນດັບຕົ້ນຂອງສາກົນ. ໃນຫ້ອງວາງສະແດງນີ້, ໄດ້ມີການເຜີຍແຜຂໍ້ມູນຂ່າວສານກ່ຽວກັບນະໂຍບາຍສົ່ງເສີມການຄ້າ ແລະ ການລົງທືນພາຍໃນ ແລະ ຕ່າງປະເທດ. ນອກຈາກນັ້ນ, ກະຊວງກ່ຽວຂ້ອງຍັງໄດ້ລະດົມຫົວໜ່ວຍທຸລະກິດລະດັບແຖວໜ້າຂອງປະເທດ 10 ບໍລິສັດເຂົ້າຮ່ວມວາງສະແດງສີນຄ້າຂອງຕົນ, ຊຶ່ງສ່ວນໃຫຍ່ເປັນສິນຄ້າທີ່ມີຄຸນນະພາບ ແລະ ໄດ້ມາດຕະຖານສາກົນ ເປັນຕົ້ນ: ເຄື່ອງດື່ມ, ເຄື່ອງຫັດຖະກຳ, ຜະລິດຕະພັນກະສິກຳປຸງແຕ່ງ, ກະສິກໍາສະອາດ ແລະ ອື່ນໆ.