ນັກວິໄຈຢັ້ງຢືນວ່າການກອດດີຕໍ່ຫົວໃຈ

ນັກວິໄຈຢັ້ງຢືນວ່າການກອດດີຕໍ່ຫົວໃຈ - advert banner 728 90 728x90 - ນັກວິໄຈຢັ້ງຢືນວ່າການກອດດີຕໍ່ຫົວໃຈ

ຜົນວິໄຈເທື່ອນີ້ອາດຊ່ວຍສະໜັບສະໜູນຄວາມຄິດທີ່ວ່າ ກອດກັນມື້ລະໜ້ອຍຊ່ວຍໃຫ້ຈິດໃຈແຈ່ມໃສ ເພາະການສຳຜັດທາງ ກາຍທີ່ສື່ເຖິງຫົວໃຈນັ້ນ ໄດ້ຮັບການຢັ້ງຢືນທາງວິທະຍາສາດຈາກມະຫາວິທະຍາໄລໃນສະຫະລັດອາເມລິກາ ແລ້ວວ່າ : ອ້ອມ ກອດຈາກໃຜຈັກຄົນຈະຊ່ວຍໃຫ້ຄວາມກັງວົນ ແລະ ເສົ້າໝອງນັ້ນຫາຍໄປໄດ້.

ນັກວິໄຈຢັ້ງຢືນວ່າການກອດດີຕໍ່ຫົວໃຈ - lattana 1 - ນັກວິໄຈຢັ້ງຢືນວ່າການກອດດີຕໍ່ຫົວໃຈ

ທີມວິທະຍາສາດຈາກພາກວິຊາຈິດຕະວິທະຍາຄາເນກີ ເມລລອນ ທີ່ຕີພິມໃນວາລະສານ Plos One ໄດ້ສັງເກດພຶດຕິກຳທາງສັງຄົມຂອງຜູ້ຄົນຫລາຍກ່ວາ 400 ຄົນໃນເວລາ 2 ອາທິດ ນັບຕັ້ງແຕ່ກິດຈະວັດປະຈຳວັນ, ຄວາມສຳພັນທາງຮ່າງກາຍ ແລະ ອາລົມ ເຊິ່ງພົບຄວາມກ່ຽວພັນທີ່ເປັນເຫດເປັນຜົນກັນລະຫ່ວາງສະພາບອາລົມ, ຄວາມຂັດແຍ່ງ ແລະ ປະລິມານການກອດທີ່ແຕ່ລະບຸກຄົນມອບໃຫ້ ແລະ ໄດ້ຮັບ.

ຈາກການສຶກສາພົບວ່າ : ການກອດ ຫລື ສຳຜັດຮ່າງກາຍແບບຍິນຍອມພ້ອມໃຈກັນທັງສອງຝ່າຍຈະຊ່ວຍຫລຸດຜ່ອນຄວາມຮູ້ສຶກທີ່ບໍ່ດີລົງໄດ້ ຫລັງຈາກພວກເຂົາພະເຊີນກັບຄວາມຂັດແຍ່ງ ຫລື ເຫດການໃນດ້ານລົບທີ່ພວກເຂົາພົບໃນແຕ່ລະມື້ ແລະ ການກອດກັນນັ້ນໃຫ້ຜົນແບບດຽວກັນກັບທຸກເພດທຸກໄວໃນການສຶກສາເທື່ອນີ້.

ທີ່ໜ້າສົນໃຈກໍຄື ຜົນດີຈາກການກອດບໍ່ໄດ້ຜົນແຕກຕ່າງໃນລະດັບຄວາມສຳພັນລະຫ່ວາງຜູ້ທີ່ສວມກອດກັນ ໝາຍເຖິງ ບໍ່ຈຳ ເປັນວ່າຜູ້ທີ່ກອດ ແລະ ຖືກກອດຈະຕ້ອງມີຄວາມສຳພັນໃກ້ຊິດກັນແບບຄົນຮັກພຽງຢ່າງດຽວຈຶ່ງຈະຊ່ວຍຫລຸດຄວາມເສົ້າໝອງໃຈໃຫ້ກັບຜູ້ກອດໄດ້.

ທ່ານ ໄມເຄິລ ເມີຟີ ນັກວິໄຈໃນເທື່ອນີ້ບອກວ່າ ການວິໄຈເທື່ອຕໍ່ໄປຄວນຕໍ່ຍອດຈາກການສວມກອດຈາກຜູ້ຄົນທີ່ມີລະດັບຄວາມສຳພັນທາງສັງຄົມທີ່ແຕກຕ່າງກັນ ເຊັ່ນ : ການປຽບທຽບຜົນດີຂອງການກອດລະຫ່ວາງຄົນແປກໜ້າກັບຄົນທີ່ຫາກໍຜິດຖຽງກັນ ຫລື ວັດແທກຜົນດີຈາກການກອດຈາກຄົນຮັກທີ່ຫາກໍຜິດຖຽງກັນກັບການກອດຂອງແມ່ທີ່ຫລາຍຄົນເຊື່ອວ່າເປັນຢາຫລຸດຜ່ອນຄວາມທຸກທັງປວງ. ແຕ່ກ່ອນຈະມີຜົນວິໄຈໃໝ່ອອກມາ ຫາກທ່ານກຳລັງຮູ້ສຶກທໍ້, ໝົດຫວັງ, ຕົກຢູ່ໃນສະພາບເຄັ່ງຄຽດ, ຊຶມເສົ້າ ຫລື ຫາກໍຜິດຖຽງ ຫາກໍໝາງໃຈກັບໃຜມາ ຂໍໃຫ້ເຊັດນຳ້ຕາແລ້ວໄປຫາອ້ອມກອດອຸ່ນໆຈາກໃຜຈັກຄົນເພື່ອຊ່ວຍແບ່ງເບົາຄວາມກັງວົນ ແລະ ຄວາມທຸກໃຈໄດ້ບໍ່ຫລາຍກໍໜ້ອຍ.