ຮອງນາຍົກລັດຖະມົນຕີລົງຊຸກຍູ້ການກໍ່ສ້າງໂຮງຮຽນປະຖົມສົມບູນພັນໄຊ

ຮອງນາຍົກລັດຖະມົນຕີລົງຊຸກຍູ້ການກໍ່ສ້າງໂຮງຮຽນປະຖົມສົມບູນພັນໄຊ - advert banner 728 90 728x90 - ຮອງນາຍົກລັດຖະມົນຕີລົງຊຸກຍູ້ການກໍ່ສ້າງໂຮງຮຽນປະຖົມສົມບູນພັນໄຊ

ເຊົ້າວັນທີ 7 ພະຈິກນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ລົງຊຸກຍູ້, ຕິດຕາມ-ກວດກາ ຄວາມຄືບໜ້າການກໍ່ສ້າງອາຄານໂຮງຮຽນຫຼັງໃໝ່ຂອງໂຮງຮຽນປະຖົມສົມບູນພັນໄຊ, ເມືອງຊຳເໜືອແຂວງຫົວພັນ, ໂດຍມີການນໍາຂອງແຂວງໃຫ້ການຕ້ອນຮັບຢ່າງອົບອຸ່ນ.

ຮອງນາຍົກລັດຖະມົນຕີລົງຊຸກຍູ້ການກໍ່ສ້າງໂຮງຮຽນປະຖົມສົມບູນພັນໄຊ - lattana 1 - ຮອງນາຍົກລັດຖະມົນຕີລົງຊຸກຍູ້ການກໍ່ສ້າງໂຮງຮຽນປະຖົມສົມບູນພັນໄຊ

ອາຄານໂຮງຮຽນຫຼັງນີ້ ແມ່ນຄອບຄົວຂອງທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ມອບເປັນຂອງຂວັນ ໃຫ້ແກ່ອົງການປົກຄອງ ແລະ ປະຊາຊົນທ້ອງຖິ່ນດັ່ງກ່າວ ໂດຍການສຳໜັບສະໜູນທຶນ ຈາກທະນາຄານ ເອັດທີ (ST Bank), ເປັນອາຄານກໍ່ສອງຊັ້ນ, ມີຂະໜາດ 9 x 33 ແມັດ, ປະກອບມີ 6 ຫ້ອງຮຽນ, 2 ຫ້ອງການຄູອາຈານ, ສາມາດຮອງຮັບນັກຮຽນໄດ້ 200 ກວ່າຄົນ, ຕົກເປັນມູນຄ່າການກໍ່ສ້າງທັງໝົດ 2,4 ຕື້ກີບ ໂດຍແມ່ນບໍລິສັດ ໄຊເສດຖາ ກໍ່ສ້າງຂົວທາງ ຈຳກັດ ເປັນຜູ້ຮັບເໝົາກໍ່ສ້າງ, ຊຶ່ງໄດ້ເລີ່ມລົງມືມາແຕ່ເດືອນກັນຍາ 2018, ມາຮອດປັດຈຸບັນ ມີຄວາມຄືບໜ້າປະມານ 30% ໂດຍຈະໃຫ້ສຳເລັດ 100% ໃນເດືອນເມສາ 2019. ໂຮງຮຽນປະຖົມສົມບູນພັນໄຊມີນັກຮຽນແຕ່ຊັ້ນ ປ1-ປ5 ລວມທັງໝົດ 196 ຄົນ, ມີຄູອາຈານ 9 ທ່ານ. ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມ ຕໍ່ບໍລິສັດຜູ້ຮັບເໝົາກໍ່ສ້າງ ແລະ ຄູອາຈານ ໂດຍໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ບໍລິສັດ ແລະ ຄູອາຈານ ທີ່ສາມາດປະຕິບັດໜ້າທີ່ວຽກງານຂອງຕົນ ມີຜົນສຳເລັດເປັນກ້າວໆມາ. ພ້ອມໄດ້ຊີ້ນໍາໃຫ້ສືບຕໍ່ເອົາໃຈໃສ່ກໍ່ສ້າງໂຮງຮຽນດັ່ງກ່າວ ໃຫ້ໄດ້ມາດຕະຖານ, ຖືກຕ້ອງຕາມເຕັກນິກວິຊາການ ແລະ ສຳເລັດຕາມຄາດໝາຍທີ່ວາງໄວ້. ນອກຈາກນັ້ນ ກໍໄດ້ເນັ້ນໃຫ້ຄູອາຈານ ຈົ່ງພ້ອມກັນສືບຕໍ່ເສີມຂະຫຍາຍມູນເຊື້ອອັນດີງາມ ຂອງໂຮງຮຽນ ກໍຄື ທ້ອງຖິ່ນຂອງຕົນ ໃຫ້ກວ້າງຂວາງ, ເລິກເຊິ່ງ ແລະ ໝັ້ນຄົງຍາວນານ; ເອົາໃຈໃສ່ ຕໍ່ວຽກງານການສິດສອນປະຕິບັດໜ້າທີ່ ແລະ ຄວາມຮັບຜິດຊອບຂອງຕົນ ໃຫ້ມີຜົນສຳເລັດໃໝ່ ແລະ ຍິ່ງໃຫຍ່ກວ່າເກົ່າ, ທີ່ສຳຄັນແມ່ນສິດສອນນັກຮຽນ ໃຫ້ຮຽນເກັ່ງ, ມີຄຸນນະພາບ, ສາມາດແຂ່ງຂັນໄດ້ ແລະ ກາຍເປັນຜູ້ສືບທອດທີ່ດີ ໃນອະນາຄົດ.