ລັດຖະບານຍ້ອງຍໍບຸກຄົນ-ກົມກອງທີ່ມີຜົນງານເດັ່ນໃນໂຄງການເທີນ-ຫີນບູນພາກຂະຫຍາຍ

ລັດຖະບານຍ້ອງຍໍບຸກຄົນ-ກົມກອງທີ່ມີຜົນງານເດັ່ນໃນໂຄງການເທີນ-ຫີນບູນພາກຂະຫຍາຍ - advert banner 728 90 728x90 - ລັດຖະບານຍ້ອງຍໍບຸກຄົນ-ກົມກອງທີ່ມີຜົນງານເດັ່ນໃນໂຄງການເທີນ-ຫີນບູນພາກຂະຫຍາຍ

ພິທີດັບຫລຽນໄຊແຮງງານຊັ້ນ II ໃຫ້ແກ່ 10 ສະຫາຍ ແລະ 2 ກົມກອງ, ຫລຽນໄຊແຮງງານຊັ້ນ III ໃຫ້ແກ່ 21 ສະຫາຍ ແລະ 3 ກົມກອງ, ຫລຽນກາແຮງງານໃຫ້ແກ່ 49 ສະຫາຍ ແລະ 1 ກົມກອງ ແລະ ມອບໃບຍ້ອງຍໍລັດຖະບານໃຫ້ແກ່ 70 ສະຫາຍ ແລະ 2 ກົມກອງ ທີ່ມີຜົນງານດີເດັ່ນປະກອບສ່ວນເຂົ້າໃນການກໍ່ສ້າງໂຄງການເຂື່ອນເທີນ-ຫີນບູນພາກຂະຫຍາຍ, ໄດ້ຈັດຂຶ້ນໃນວັນທີ 8 ພະຈິກນີ້, ທີ່ໂຮງແຮມຄຣາວພລາຊາ, ນະຄອນຫລວງວຽງຈັນ, ໂດຍການເຂົ້າຮ່ວມ ແລະ ປະດັບຫລຽນດັ່ງກ່າວຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານ ຄໍາມະນີ ອິນທະລາດ ລັດຖະມົນຕີກະຊວງພະລັງງານ-ບໍ່ແຮ່, ມີຮອງເຈົ້າແຂວງບໍລິຄໍາໄຊ, ຄໍາມ່ວນ ແລະ ພາກສ່ວນກ່ຽວຂ້ອງເຂົ້າຮ່ວມ.

ລັດຖະບານຍ້ອງຍໍບຸກຄົນ-ກົມກອງທີ່ມີຜົນງານເດັ່ນໃນໂຄງການເທີນ-ຫີນບູນພາກຂະຫຍາຍ - lattana 1 - ລັດຖະບານຍ້ອງຍໍບຸກຄົນ-ກົມກອງທີ່ມີຜົນງານເດັ່ນໃນໂຄງການເທີນ-ຫີນບູນພາກຂະຫຍາຍ

ທ່ານຮອງອໍານວຍການໃຫຍ່ບໍລິສັດ ເທີນ-ຫີນບູນ ພາວເວີ ຈໍາກັດ ໄດ້ລາຍງານວ່າ: ໂຄງການເທີນ-ຫີນບູນພາກຂະຫຍາຍ ແມ່ນສືບຕໍ່ຈາກໂຄງການເຂື່ອນໄຟຟ້າເທີນ-ຫີນບູນ ທີ່ມີຢູ່ແລ້ວ, ເພື່ອເພີ່ມຂີດຄວາມສາມາດໃນການຜະລິດກະແສໄຟຟ້າຂຶ້ນຕື່ມ, ໂດຍການກໍ່ສ້າງເຂື່ອນອ່າງເກັບນໍ້າຢູ່ສາຍນໍ້າຍວງ, ທີ່ຢູ່ຫ່າງຈາກເຂື່ອນເທີນ-ຫີນບູນເກົ່າປະມານ 20 ກິໂລແມັດ, ເພື່ອຍົກລະດັບກໍາລັງຕິດຕັ້ງຂຶ້ນເປັນ 500 ເມກາວັດ, ຈາກ 220 ເມກາວັດທີ່ມີຢູ່ແລ້ວ ແລະ  ຕິດຕັ້ງຈັກປັ່ນໄຟໃໝ່ 60 ເມກາວັດອີກໜ່ວຍໜຶ່ງຢູ່ເຂື່ອນນໍ້າຍວງ, ມີລະບົບສາຍສົ່ງໄຟຟ້າ 230 ກິໂລໂວນ ແຕ່ສະຖານີສໍາຮອງຢູ່ທ່າແຂກແຂວງຄໍາມ່ວນຫາສະຖານີຮັບໄຟຟ້າຢູ່ຝັ່ງປະເທດໄທຍາວ 87 ກິໂລແມັດ ແລະ ລະບົບສາຍສົ່ງໄຟຟ້າ 115 ກິໂລໂວນຈາກສະຖານີນໍ້າຍວງຫາສະຖານີຄອນສົງ ມີຄວາມຍາວ 55 ກິໂລແມັດ.

ໂຄງການເຂື່ອນພາກຂະຫຍາຍດັ່ງກ່າວເລີ່ມກໍ່ສ້າງມາແຕ່ປີ 2008 ແລະ ສໍາເລັດໃນປີ 2012, ໂດຍແມ່ນບໍລິສັດ ຜະລິດໄຟຟ້າລາວ ມະຫາຊົນ (EDL- GEN) ຕາງລັດຖະບານຖືຫຸ້ນ 60%, ບໍລິສັດ GMS International 20% ແລະ ບໍລິສັດ Nordic Hydropower 20%.

ໃນໂອກາດນີ້, ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ມີຄໍາເຫັນວ່າ: ໂຄງການເທີນ-ຫີນບູນ ແມ່ນໂຄງການທໍາອິດຂອງເອກະຊົນຕ່າງປະເທດທີ່ໄດ້ເຂົ້າມາພັດທະນາອຸດສະຫະກໍາພະລັງງານໄຟຟ້າໃນ ສປປ ລາວ ແລະ ດໍາເນີນງານໃນຮູບແບບຮ່ວມມືລະຫວ່າງພາກລັດ ແລະ ເອກະຊົນ ທີ່ມີປະສິດທິຜົນສູງ, ທັງໄດ້ຮັບການເອົາໃຈໃສ່ຊີ້ນໍາຢ່າງໃກ້ຊິດຈາກລັດຖະບານ ແລະ ສະໜັບສະໜູນຈາກບັນດາອົງການການເງິນສາກົນ ແລະ ນັກລົງທຶນຕ່າງປະເທດເປັນຢ່າງດີ. ນອກນີ້, ໂຄງການເທີນ-ຫີນບູນ ຍັງເປັນຕົວແບບຂອງການພັດທະນາພະລັງງານທີ່ສະອາດ, ການພັດທະນາສິ່ງແວດລ້ອມ ແລະ ຊຸມຊົນທີ່ຍືນຍົງ ແລະ ທັງເປັນແຫລ່ງສ້າງລາຍຮັບສໍາຄັນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດນໍາດ້ວຍ.