ປະສົບການດີໆຈາກການເຮັດວຽກມາຫລາຍປີ

ປະສົບການດີໆຈາກການເຮັດວຽກມາຫລາຍປີ - advert banner 728 90 728x90 - ປະສົບການດີໆຈາກການເຮັດວຽກມາຫລາຍປີ


ປະສົບການດີໆຈາກການເຮັດວຽກມາຫລາຍປີ - lattana 1 - ປະສົບການດີໆຈາກການເຮັດວຽກມາຫລາຍປີ

     1. ການໄດ້ເຮັດວຽກເທື່ອ ທຳອິດໃນຊີວິດອາດຈະບໍ່ແມ່ນຍ້ອນທ່ານເກັ່ງທີ່ສາມາດເອົາຊະນະໃຈຜູ້ສຳພາດທ່ານໄດ້, ແຕ່ອາດຈະເປັນຍ້ອນເຂົາຫາໃຜບໍ່ໄດ້ແລ້ວ ແບບວ່າຮັບເຂົ້າມາກ່ອນ ຫລັງ 3 ເດືອນຈຶ່ງພິຈາລະນາອີກເທື່ອໜຶ່ງວ່າຈະຜ່ານການທົດລອງ ງານຫລືບໍ່ຜ່ານ.

     2. ຂະນະສຳພາດວຽກ  ຖ້າຄຳຖາມໃດທີ່ບໍ່ຮູ້ ກໍຕອບວ່າບໍ່ຮູ້, ຢ່າເດົາ, ຢ່າມົ້ວ, ແຕ່ຢ່າຈົບຢູ່ຄຳວ່າບໍ່ຮູ້ ຄວນຖາມຜູ້ສຳພາດຄືນ ຈັກໜ້ອຍວ່າ ແລ້ວຕາມປະສົບການໆເຮັດວຽກຂອງເອື້ອຍ ຫລື ອ້າຍ ຄິດວ່າຄຳຕອບທີ່ຖືກຕ້ອງ ຫລື ທີ່ເໝາະສົມແມ່ນຫຍັງ ? ເຊື່ອວ່າເທົ່ານີ້ທ່ານກໍໄດ້ໃຈເຂົາໄປແລ້ວ ເພາະໃນການເຮັດວຽກໂຕຈິງ ເຂົາບໍ່ມີເວລາໃຫ້ທ່ານມາລອງຜິດລອງຖືກກັບວຽກຂອງ ເຂົາດອກ ການຖາມຜູ້ຮູ້ແມ່ນທາງລັດທີ່ດີທີ່ສຸດ ແລະ ປອດໄພທີ່ສຸດ ເລື່ອງຂອງການຮຽນຮູ້ເປັນເລື່ອງຫລັງຈາກທີ່ແກ້ໄຂບັນຫານັ້ນໄດ້ແລ້ວ ຈົ່ງຈື່ໄວ້.

ປະສົບການດີໆຈາກການເຮັດວຽກມາຫລາຍປີ - 042512 2018 - ປະສົບການດີໆຈາກການເຮັດວຽກມາຫລາຍປີ

     3. ການທີ່ວິສະວະກອນຕ້ອງຮຽນຮູ້ວຽກຈາກຊ່າງເຕັກນິກ ບໍ່ໄດ້ເປັນສິ່ງທີ່ຜິດ ຫລື ຫ້າມເຮັດແຕ່ຢ່າງໃດ ທ່ານສາມາດຮຽນຮູ້ວຽກຈາກລູກນ້ອງໄດ້ຕາບໃດທີ່ປະສົບການຂອງຄົນເກົ່າຄົນແກ່ ຍັງມີຫລາຍກ່ວາຄວາມຮູ້ຂອງວິສະວະກອນຈົບໃໝ່.

     4. ຄືກັນກັບວິສະວະກອນຈົບໃໝ່ກໍສາມາດຮຽນຮູ້ວຽກຈາກພະນັກງານຝ່າຍຜະລິດໄດ້ ບໍ່ມີກົດ ຫລື ຂໍ້ຫ້າມໃດໆລະບຸໄວ້ໃນລະບຽບຂອງບໍລິສັດ ຖ້າຈະມີກໍມີແຕ່ໂຕທ່ານເອງເທົ່ານັ້ນທີ່ຍັງບໍ່ຍອມເສຍປຽບ.

     5. ການອ່ອນນ້ອມຖ່ອມຕົນໃນສັງຄົມທີ່ເຮັດວຽກເປັນສິ່ງທີ່ດີ ແຕ່ຢ່າລືມສະແດງຄວາມເປັນຜູ້ນຳ ຫລື ສະແດງຄວາມຄິດເຫັນ ຂອງທ່ານເອງໃນກອງປະຊຸມແດ່ ເຊື່ອວ່າເຖິງທ່ານຈະນອບນ້ອມປານໃດ ແຕ່ຖ້າທ່ານບໍ່ສະແດງໂຕຕົນ ຫລື ສັກກະຍະພາບຂອງທ່ານອອກມາເລີຍ ຊີວິດການເຮັດວຽກຂອງທ່ານກໍໄປບໍ່ຮອດໃສ.

    6. ມື້ທີ່ທ່ານຍັງເປັນລູກນ້ອງຢູ່ ຖ້າທ່ານບໍ່ມັກຫຍັງທີ່ຫົວໜ້າ ທ່ານເຮັດວັນຂ້າງໜ້າຖ້າທ່ານໄດ້ເປັນຫົວໜ້າ ກໍຢ່າເຮັດສິ່ງນັ້ນກັບລູກນ້ອງຂອງທ່ານ.

     7. ການບໍລິຫານວຽກແບບເປັນກັນເອງເປັນສິ່ງທີ່ດີສຳລັບການເຮັດວຽກແບບຄົນລາວ, ແຕ່ຖ້າລູກນ້ອງເຮັດຜິດ ກໍຢ່າລືມລົງ  ໂທດຕາມລະບຽບຂອງບໍລິສັດເພາະທ່ານຈະເອົາລູກນ້ອງບໍ່ຢູ່ ຖ້າທ່ານຍອມຕັ້ງແຕ່ທຳອິດ.

    8. ຢ່າຄິດວ່າບໍລິສັດທີ່ທ່ານເຮັດວຽກຢູ່ນັ້ນໝັ້ນຄົງທີ່ສຸດໃນໂລກ  ເພາະບໍລິສັດທີ່ໃຫຍ່ກ່ວາບໍລິສັດຂອງທ່ານກໍລົ້ມລະລາຍມາ ຫລາຍບໍລິສັດແລ້ວ ດັ່ງນັ້ນທ່ານຕ້ອງມີແຜນສຳຮອງໃຫ້ກັບຕົນເອງຢູ່ຕະຫລອດເວລາ.

     9. ຢ່າເຮັດວຽກບ່ອນໃດບ່ອນໜຶ່ງດົນເກີນ 5 ປີ  ເພາະຖ້າດົນກ່ວານີ້ ຮາກທ່ານຈະປົ່ງ ຄວາມທ້າທາຍຈະຫາຍໄປ ແລະ ຄວາມສາມາດຂອງທ່ານຈະຫລຸດລົງຈົນສຸດທ້າຍທ່ານເອງຈະບໍ່ກ້າປ່ຽນວຽກ ແລະ ຈະເຮັດໃຫ້ຊີວິດການເຮັດວຽກຂອງທ່ານໜ້າເບື່ອ.

     10. ຄົນລະດັບຫົວໜ້າວຽກເກືອບທຸກຄົນລ້ວນແຕ່ມີອາຊີບທີ 2 ຂອງຕົນເອງທັງໝົດ ບໍ່ເຊື່ອລອງເບິ່ງຫົວໜ້າຂອງທ່ານກໍໄດ້ ນັ້ນສະແດງໃຫ້ເຫັນວ່າວຽກປະຈຳບໍ່ແມ່ນຄຳຕອບທຸກຢ່າງຂອງຊີວິດທ່ານ ແລະ ໃນເມື່ອທ່ານຮູ້ແບບນີ້ແລ້ວ ສິ່ງທີ່ທ່ານຕ້ອງເຮັດ ຕໍ່ຈາກນີ້ກໍຄື ການຫາວຽກທີ 2 ເອົາໄວ້ເປັນແຜນສຳຮອງຂອງໂຕທ່ານເອງ.