ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ

ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ - advert banner 728 90 728x90 - ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ

  ພາຍຫລັງ​ທີ່​ມີ​ສຽງວິພາກ​ວິຈານ​ກ່ຽວກັບ​ສະພາບ​ເສັ້ນທາງ​​ເປ່​ເພ, ຊຸດ​ໂຊມ​ລົງ​ຫລາຍຢູ່ນະຄອນຫລວງ​ວຽງຈັນ, ​ແຕ່ການກໍ່ສ້າງ​ສ້ອມ​ແປງ​ພັດ​ມີ​ຄວາມ​ຫລ້າ​ຊ້າ, ສົ່ງ​ຜົນ​ກະທົບ​ໃຫ້ການ​ສັນຈອນ​ໃນ​ຕົວ​ເມືອງ​ຫລວງພົບ​ຄວາມ​ຫຍຸ້ງຍາກ​ລຳບາກ​ເປັນ​ທີ່​ສຸດ.

ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ - lattana 1 - ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ

   ຕໍ່ກັບ​ບັນຫາ​ດັ່ງກ່າວ, ​ໃນ​ວັນ​ທີ 26 ທັນວານີ້, ທ່ານ ​ເດດ​ສົງຄາມ ທຳ​ມະ​ວົງ ຫົວໜ້າພະ​ແນ​ກ​ໂຍທາ​ທິການ ​ແລະ ຂົນ​ສົ່ງນະຄອນຫລວງ​ວຽງຈັນ ​​ໄດ້​ຊີ້​ແຈງ​ໃນ​ກອງ​ປະຊຸມສະ​ໄໝສາມັນເທື່ອ​ທີ 6 ຂອງສະພາ​ປະຊາຊົນນະຄອນຫລວງ​ວຽງຈັນ, ຊຶ່ງພວມ​ດຳ​ເນີນ​ຢູ່​ໃນປັດຈຸບັນນີ້ວ່າ: ສະພາບ​ເສັ້ນທາງ​ເປ່​ເພ​ຫລາຍນັ້ນ ຕົ້ນຕໍ​ແມ່ນ​ມາ​ຈາກ​ການກໍ່ສ້າງ​ຂາດ​ຄຸນ​ນະພາ​ບ ​ແລະ ຜົນ​ກະທົບ​ຈາກ​ລະດູຝົນ​ຜ່ານ​ມາ ​ແລະ ຄຽງຄູ່​ກັນ​ນັ້ນ ​ກໍ​ແມ່ນ​ຄວາມ​ຫລ້າ​ຊ້າ​ຂອງຜູ້​ຮັບ​ເໝົາກໍ່ສ້າງ​ເອງ ດັ່ງ​​ໂຄງການກໍ່ສ້າງ​ເສັ້ນທາງ​ແຕ່​ສາມ​ແຍກ​ບ້ານ​ບໍ່​ໂອຫາບ້ານສີ​ຖານ​ໃຕ້ ​ແລະ ​ໂຄງການ​ກໍ່ສ້າງ​ເສັ້ນທາງຕານ​ມີ​ໄຊຫາໜອງບຶກ. ​ສິ່ງ​ນີ້ກໍ​ຍ້ອນ​ ບໍລິສັດ​​ຮັບ​ເຫມົາບໍ່ມີ​ງົບປະມານພຽງພໍທີ່​ຈະ​ມາ​ທຳ​ການກໍ່ສ້າງ ​ແລະ ​ເງື່ອນ​ໄຂອື່ນໆ.

  ​ທ່ານ ​ເດດ​ສົງຄາມ ​ທຳ​ມະ​ວົງ ​ໃຫ້​ຮູ້​ວ່າ: ກ່ຽວກັບ​ໂຄງການ​ກໍ່ສ້າງ​ທາງ​ແຕ່​ສາມ​ແຍກ​ບ້ານບໍ່​ໂອຫາບ້ານສີ​ຖານ​ໃຕ້ມີ​ສະພາບ​ຄວາມ​ຫຍຸ້ງຍາກ, ພາຍຫລັງ​ດຳ​ເນີນ​ການກໍ່ສ້າງ​ມາ​ແຕ່​ປີ 2015 ມາ​ຮອດ​ປັດຈຸບັນ​ມີ​ຄວາມ​ຄືບໜ້າ 54% ​ເປັນ​ຕົ້ນ​ຄື: ສຳ​ເລັດປູໜ້າທາງ, ​ຕິດ​ຕັ້ງໄຟ​ເຍືອງ​ທາງ, ລະບົບລະບາຍ​ນ້ຳສຳ​ເລັດ 4 ກິ​ໂລ​ແມັດ ​ຄື: ​ແຕ່​ 3 ​ແຍກຈີ່ນາຍ​ໂມ້-ບ້ານ​ບໍ່​ໂອ ​ແລະ ບ້ານສົມ​ໂຮງ ປູໜ້າທາງ​ເຄິ່ງທາງ​ໄດ້ 7 ກິ​ໂລ​ແມັດ ​ແລະ ວາງທໍ່ລະບາຍ​ນ້ຳສອງ​ຝາກ​ທາງ​ໄດ້​ທັງໝົດ 14 ກິ​ໂລ​ແມັດ, ທຽບ​ໃສ່​ແຜນ​ຕາມ​ສັນຍາ​ກໍ່ສ້າງ​ໂຄງການ​ເຫັນ​ວ່າຍັງ​ມີ​ຄວາມ​ຊັກ​ຊ້າ ​ແລະ ​ໄດ້​ມີ​ການຢຸດ​ຊົ່ວຄາວ ​ເພື່ອ​ຊອກ​ຫາ​ແຫ​ລ່ງທຶນ​ມາ​ສືບຕໍ່ກໍ່ສ້າງ​ໂຄງການ, ຊຶ່ງ​ຄາດ​ວ່າທ້າຍ​ປີ 2019 ຈະ​ໃຫ້​ສຳ​ເລັດ.

ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ - Untitled 3 1 - ໂຍທານະຄອນຫລວງຊີ້​ແຈງສະພາບການກໍ່ສ້າງສ້ອມ​ແປງ​ເສັ້ນທາງ​ຊັກ​ຊ້າ

   ຫົວໜ້າພະ​ແນ​ກ​ໂຍທາ​ທິການ ​ແລະ ຂົນ​ສົ່ງນະຄອນຫລວງວຽງຈັນ ​ໃຫ້​ຮູ້​ວ່າ: ປັດຈຸບັນ, ຢູ່ນະຄອນຫລວງ​ວຽງຈັນມີ​ເສັ້ນທາງ​ຫລາຍ​ກ່ວາ 2.700 ກິ​ໂລ​ແມັດ, ​​ເພີ່ມ​ຂຶ້ນ 276 ກິ​ໂລ​ແມັດ, ​​ໃນ​ນັ້ນ​ມີເສັ້ນທາງ​ເບ​ຕົງ​ເພີ່ມ​ຂຶ້ນກ່ວາ 128 ກິ​ໂລ​ແມັດ, ​ມີ​ທາງ​ປູ​​ເບ​ຕົງ​ທີ່​ໃຊ້​ໄດ້ 195 ກິ​ໂລ​ແມັດ ​ແລະ ທາງ​ປູຢາງ​ທີ່​ໃຊ້​ໄດ້ ພຽງ 30%, ດັ່ງ​ນັ້ນຖ້າ​ທຽບ​ໃສ່​ການພັດທະ​ນາພື້ນຖານ​ໂຄງ​ລ່າງຂະ​ຫຍາຍ​ຕາໜ່າງ​ເສັ້ນທາງ​ແມ່ນ​ມີໜ້ອຍບໍ່ສົມ​ຄູ່​ກັນ, ການ​ຄຸ້ມ​ຄອງ​ລົດ​ບັນທຸກໜັກ​ຍັງ​ເ​ຫັນ​ວ່າ​​ບໍ່ທັນ​ໄດ້​ດີ, ອີກ​ບັນຫາໜຶ່ງຍ້ອນພື້ນທີ່​ຂອງນະຄອນຫລວງ​ວຽງຈັນ​ເປັນ​ພຶ້ນທີ່​ຕ່ຳ​ມີຄວາມ​ຊຸ່ມ​ສູງ, ຊຶ່ງ​ເປັນ​ຄວາມ​ສ່ຽງຕໍ່ບັນຫານ້ຳຖ້ວມ​ຂັງ ​ແລະ ​ເສັ້ນທາງ​ປູຢາງ​ສອງ​ຊັ້ນ​ຈຳນວນໜຶ່ງກໍ​ໄດ້​ຮັບ​ການກໍ່ສ້າງ​ມາ​ດົນ​ແລ້ວ​, ຊຶ່ງ​ມີ​ຄວາມ​ຈຳ​ເປັນ​ຕ້ອງ​ໄດ້​ຮັບ​ການ​ຍົກ​ລະດັບ​ຟຶ້ນຟູ​ໃໝ່​ໃຫ້​ດີ ​ແລະ ພ້ອມ​ຈະ​ຕ້ອງ​ໄດ້​ເພີ່ມ​ງົບປະມານ​ສ້ອມ​ແປງ​ໃຫ້​ພຽງພໍຈຶ່ງ​ຈະ​ເຮັດ​ໃຫ້​ສະພາບ​ເສັ້ນທາງ​ໃນ​ນະຄອນຫລວງ​ດີ​ຂຶ້ນ.