ໂທລະພາບແຫ່ງຊາດລາວຍັງມີສິ່ງທ້າທາຍຫລາຍດ້ານ

ໂທລະພາບແຫ່ງຊາດລາວຍັງມີສິ່ງທ້າທາຍຫລາຍດ້ານ - advert banner 728 90 728x90 - ໂທລະພາບແຫ່ງຊາດລາວຍັງມີສິ່ງທ້າທາຍຫລາຍດ້ານ

  ໂທລະພາບແຫ່ງຊາດລາວ (ທຊລ) ຍັງມີສິ່ງທ້າທາຍຫລາຍດ້ານເປັນຕົ້ນ ຄຸນນະພາບຂອງຂ່າວ ແລະ ລາຍການ ເວົ້າລວມຍັງບໍ່ທັນດີເທົ່າທີ່ຄວນ, ບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການຕົວຈິງຂອງຍຸກສະໄໝ, ໂດຍສະເພາະແມ່ນດ້ານເຕັກນິກຍັງບໍ່ທັນເປັນລະບົບຄົບຊຸດ, ພາຫະນະເກົ່າແກ່ຊຸດໂຊມ, ເນື້ອໃນຂອງຂ່າວ, ລາຍການແມ່ນຍັງບໍ່ທັນດຶງດູດຈັບໃຈຜູ້ຊົມ, ການສ່ອງແສງສະພາບຄວາມເປັນຈິງທາງດ້ານເສດຖະກິດ ແລະ ຊີວິດສັງຄົມຍັງບໍ່ທັນເລິກເຊິ່ງ, ການໂຄສະນາເຜີຍແຜ່ວຽກດີຄົນເດັ່ນ ແລະ ບົດຮຽນທີ່ເປັນປະໂຫຍດເກີດຂຶ້ນໃນວຽກງານຕົວຈິງຂອງສັງຄົມຍັງເຮັດໄດ້ໜ້ອຍ.   

ໂທລະພາບແຫ່ງຊາດລາວຍັງມີສິ່ງທ້າທາຍຫລາຍດ້ານ - lattana 1 - ໂທລະພາບແຫ່ງຊາດລາວຍັງມີສິ່ງທ້າທາຍຫລາຍດ້ານ

  ທ່ານ ບຸນເຈົ້າ ພິຈິດ ຜູ້ອໍານວຍການໃຫຍ່ໂທລະພາບແຫ່ງຊາດລາວໄດ້ ກ່າວໃນພິທີສະເຫລີມສະຫລອງວັນສ້າງຕັ້ງໂທລະພາບແຫ່ງຊາດລາວຄົບຮອບ 35 ປີ ໃນວັນທີ 26 ທັນວານີ້ວ່າ: ຕະຫລອດໄລຍະ 35 ປີຜ່ານມາໄດ້ມີລາຍການຕ່າງໆອອກສູ່ສາຍຕາຜູ້ຊົນເປັນຕົ້ນລາຍການຂ່າວ, ຮູບເງົາ, ສາລະຄະດີ ແລະ ສິລະປະວັນນະຄະດີອື່ນໆ, ເຊິ່ງມາຮອດປັດຈຸບັນ, ລາຍການອອກອາກາດທາງຊ່ອງ ທຊລ 1 ມີທັງໝົດ 54 ລາຍການ, ໃນນັ້ນລາຍການຜະລິດເອງມີ 19 ລາຍການ, ວຽກງານຂ່າວໄດ້ຄ່ອຍໆເຕີບໃຫຍ່ຂະຫຍາຍຕົວ ແລະ ຫັນເປັນທັນສະໄໝເທື່ອລະກ້າວ ຈາກລະບົບອານາລັອກໄປສູ່ລະບົບດີຈີຕອນ ເຮັດໃຫ້ວຽກງານຂ່າວມີຄວາມວ່ອງໄວທັນກັບເຫດການ, ເນື້ອໃນອຸດົມສົມບູນຂຶ້ນກວ່າເກົ່າ.

  ທ່ານ ບຸນເຈົ້າ ພິຈິດ ໃຫ້ຮູ້ວ່າ: ເພື່ອເຊື່ອມໂຍງກັບພາກພື້ນ ແລະ ສາກົນ ໂທລະພາບແຫ່ງຊາດໄດ້ສູ້ຊົນຫັນປ່ຽນພື້ນຖານເຕັກນິກໃຫ້ທັນສະໄໝກ້າວສູ່ ນຳໃຊ້ລະບົບດີຈີຕອນເທື່ອລະກ້າວ, ໂດຍການຮ່ວມມື ແລະ ຊ່ວຍເຫລືອທາງດ້ານວັດຖຸເຕັກນິກຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນ ຄື: ສສ ຫວຽດນາມ, ສປ ຈີນ, ຍີ່ປຸ່ນ, ຝຣັ່ງ, ອົດສະຕາລີ, ເຢຍລະມັນ, AIBD, ABU ເປັນຕົ້ນ. ສະເພາະແຕ່ນີ້ຮອດປີ 2030 ໂທລະພາບແຫ່ງຊາດຈະເລັ່ງພັດທະນາຕົນເອງໃຫ້ກ້າວສູ່ຄຸນນະພາບ, ທັນສະໄໝ, ວ່ອງໄວ, ຊັດເຈນ, ສາມາດເຂົ້າເຖິງໄດ້ທຸກພື້ນທີ່ໃນທົ່ວປະເທດ.

  ໃນໂອກາດດຽວກັນ, ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍໄດ້ໃຫ້ກຽດໂອ້ລົມ,

ເຊິ່ງທ່ານໄດ້ເນັ້ນໃຫ້ພະນັກງານ-ລັດຖະກອນເອົາໃຈໃສ່ແກ້ໄຂບັນດາຂໍ້ຄົງຄ້າງ ແລະ ສ້າງຜົນງານໃໝ່ອັນໃຫຍ່ຫລວງກວ່າເກົ່າ, ໂດຍສະເພາະໃຫ້ເອົາໃຈໃສ່ຍົກສູງການເມືອງແນວຄິດໃນວົງການສື່ມວນຊົນໃຫ້ເລິກເຊິ່ງກວ້າງຂວາງ, ກຳແໜ້ນນະໂຍບາຍຂອງພັກໃນແຕ່ລະໄລຍະ, ສ້າງລາຍການທີ່ດີ, ມີສາລະ ແລະ ສອດຄ່ອງກັບວັດທະນະທຳຂອງລາວ, ນຳເອົາສາລະຄວາມບັນເທີງທີ່ດີມາສູ່ຜູ້ຊົມ, ພ້ອມນີ້, ໃຫ້ສືບຕໍ່ຮ່ວມມືກັບບັນດາປະເທດເພື່ອມິດຍຸດທະສາດໃຫ້ຫລາຍຂຶ້ນ ພ້ອມທັງສ້າງລາຍຮັບວິຊາການໃຫ້ສາມາດກຸ້ມຕົນເອງໄດ້.