ປີ 2019 ເອົາຊົນນະບົດເປັນເຄົ້າ

ປີ 2019 ເອົາຊົນນະບົດເປັນເຄົ້າ - advert banner 728 90 728x90 - ປີ 2019 ເອົາຊົນນະບົດເປັນເຄົ້າ

ພວກເຮົາໄດ້ຍິນແນວທາງທີ່ວ່າ ຫຼຸດຜ່ອນຄວາມແຕກຕ່າງລະຫວ່າງການພັດທະນາຕົວເມືອງ ແລະ ຊົນນະບົດ ມາໂດຍຕະຫຼອດ ແຕ່ເຖິງປານນັ້ນ ຊົນນະບົດ ກໍຍັງຫ່າງເຫີນຈາກຕົວເມືອງຫຼາຍສົມຄວນ.

ປີ 2019 ເອົາຊົນນະບົດເປັນເຄົ້າ - lattana 1 - ປີ 2019 ເອົາຊົນນະບົດເປັນເຄົ້າ

ຫຼາຍປະເທດ ນັບທັງ ສປປລາວເຮົາ ກຳລັງພົບພໍ້ກັບບັນຫາ ຄົນຊົນນະບົດຫຼັ່ງໄຫຼເຂົ້າສູ່ຕົວເມືອງ ເພື່ອຊອກສະແຫວງ ຫາໂອກາດ ສ້າງຄຸນນະພາບຊີວິດທີ່ດີກວ່າ ບໍ່ວ່າຈະເປັນການສຶກສາຮໍ່າຮຽນ, ການບໍລິການ ທາງດ້ານສຸຂະພາບ, ວຽກເຮັດງານທຳທີ່ມີລາຍຮັບດີກວ່າທີ່ຊົນນະບົດ ບໍ່ສາມາດສະໜອງໃຫ້ໄດ້ຢ່າງ ພຽງພໍ ເຊິ່ງກໍແມ່ນ ຜົນພອຍຂອງ ຄວາມບໍ່ກໍ່າເກິ່ງກັນທາງດ້ານການພັດທະນາລະຫວ່າງຕົວເມືອງ ແລະຊົນນະບົດ.

ເມື່ອເປັນເຊັ່ນນັ້ນ ກໍບໍ່ຫຼີກໜີໄດ້ວ່າ ຕົວເມືອງຈະແອອັດຂຶ້ນ, ຖ້າຫາກຂາດການຄຸ້ມຄອງທີ່ດີ ກໍອາດມີອາຊະຍາກຳຕ່າງໆ ແຕ່ໃນຂະນະທີ່ ຊົນນະບົດ ພັດມີຜູ້ເຖົ້າ ແລະເດັກນ້ອຍເປັນສ່ວນຫຼາຍ ເຊິ່ງບໍ່ສາມາດ ກາງຕໍ່ໃສ່ ການເຮັດກະສິກຳແບບດັ່ງເດີມຢ່າງເຕັມສ່ວນ​ໄດ້.

ນອກນັ້ນ, ຄວາມແຕກຕ່າງດັ່ງກ່າວ ຍັງນຳມາເຊິ່ງຄວາມບໍ່ເທົ່າທຽມກັນໃນຮູບແບບຕ່າງໆ ຂອງຄົນພາຍໃນຊາດ, ສ້າງພາບພົດ ທີ່ເຂີນອາຍຕໍ່ ວົງຄະນາຍາດສາກົນ, ໃນລັກສະນະທີ່ວ່າ ກຸ່ມໜຶ່ງຢູ່ດີກິນດີ ມີຄວາມພຽບພ້ອມປັດໄຈ ພື້ນຖານຕ່າງໃນການດຳລົງຊີວິດ ແຕ່ອີກກຸ່ມໜຶ່ງພັດຕ້ອງໄດ້ສູ້ຊົນ ເພື່ອຄາບເຂົ້າແຕ່ລະຄາບ ຊິເປັນບໍ?

ການຫັນສູ່ຊົນນະບົດ ເພື່ອຍົກສູງຄຸນນະພາບຊີວິດຂອງປະຊາຊົນບັນດາເຜົ່າ ບໍ່ພຽງແຕ່ພວກເຮົາເຫັນໃຈ ແລະເຄົາລົບ ເພື່ອນຮ່ວມຊາດ ແຕ່ຍັງເປັນການຮັກສາກຽດສັກສີຂອງພວກເຮົາ ທີ່ຈະບັນລຸຄາດໝາຍ, ເປົ້າໝາຍການພັດທະນາສາກົນ ທີ່ພວກເຮົາໄດ້ໄປໃຫ້ຄຳໝັ້ນສັນຍາມາແລ້ວ ເປັນຕົ້ນ ເປົ້າໝາຍການພັດທະນາທີ່ຍືນຍົງ (SDGs).

ຍ້ອນແນວນັ້ນ ທ່ານ ທອງລຸນ ສີສຸລິດ ນາຍົກແຫ່ງ ສປປລາວ ຈຶ່ງໄດ້ກ່າວຕອນໜຶ່ງ ໃນບົດລາຍງານ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ເດືອນພະຈິກ 2018 ວ່າ:  

ປີ 2019 ທີ່ຈະມາເຖິງນີ້ ຂໍໃຫ້ເປັນປີ ທີ່ຫັນລົງສູ່ຊົນນະບົດ, ຫັນລົງສູ່ຮາກຖານ, ສ້າງຂະບວນການ ຢູ່ຮາກຖານ ໃຫ້ມີສະຖຽນລະພາບທາງການເມືອງ, ເສດຖະກິດ ພັດທະນາຊີວິດການເປັນຢູ່ໃຫ້ມີການປ່ຽນແປງດີຂຶ້ນ, ຄວາມທຸກຍາກໃຫ້ຫຼຸດຜ່ອນລົງ ໃຫ້ປະຊາຊົນເຮົາເປັນເຈົ້າທ້ອງຖິ່ນ, ເປັນເຈົ້າຕົນເອງ, ຮູ້ສ້າງ, ຮູ້ຄ້າ, ຮູ້ຂາຍ ດີຂຶ້ນກວ່ານີ້ ຢ່າງເປັນຮູບປະທຳ, ເຮັດໃຫ້ແນວທາງນະໂຍບາຍ ຖືປະຊາຊົນເປັນກົກ, ຖືຊົນນະບົດເປັນຮາກຖານ ທີ່ໝັ້ນ ອັນໜັກແໜ້ນ ຂອງພັກເຮົາ ໃຫ້ປະກົດຜົນເປັນຈິງ

ເຊິ່ງເປັນແນວທາງທີ່ສຳຄັນ ແລະຈຳເປັນທີ່ສຸດໃນສະພາບປັດຈຸບັນ ແລະ ເມື່ອທ້າຍເດືອນ ທັນວາ 2018 ນີ້ ທ່ານ ນາຍົກ ຍັງໄດ້ໃຫ້ສຳພາດຕໍ່ສື່ມວນຊົນ ໂດຍເນັ້ນໜັກຕຶ່ມວ່າ “ພັກ ແລະ ລັດຖະບານ ໄດ້ຖື ເອົາປະຊາຊົນເປັນກົກ ເອົາຊົນນະບົດເປັນເປົ້າໝາຍ ໃນການພັດທະນາປະເທດ ແລະທຸກສິ່ງທຸກຢ່າງ ຕ້ອງເຮັດໃຫ້ປະຊາຊົນ ຄ່ອຍຫຼຸດພົ້ນອອກຈາກຄວາມທຸກຍາກ ແລະ ພະຍາຍາມເອົາປະເທດເຮົາ ຄ່ອຍໆ ກ້າວຂຶ້ນ ໃຫ້ເປັນປະເທດທີ່ຫຼຸດພົ້ນອອກຈາກສະຖານະພາບດ້ອຍພັດທະນາ”.

ແນ່ນອນວ່າ ຄຳກ່າວນີ້ແມ່ນເປັນທີ່ນິຍົມຊົມຊອບຂອງປວງຊົນຊາວລາວ ໂດຍສະເພາະຜູ້ອາໄສຢູ່ເຂດຊົນນະບົດ ເນື່ອງຈາກຈະໄດ້ຮັບຄວາມເອົາໃຈໃສ່ເພີ່ມຂຶ້ນ, ແຕ່ສຳຄັນກວ່ານັ້ນ ກໍຂໍໃຫ້ແນວທາງດັ່ງກ່າວ ໄດ້ຮັບການຜັນຂະຫຍາຍສູ່ແຜນງານ ໂຄງການ ອັນລະອຽດ ທີ່ຈະຕ້ອງໄດ້ຕິດຕາມຢ່າງໃກ້ຊິດ ເຖິງການປ່ຽນແປງ ທີ່ຈະເກີດຂຶ້ນ ເພື່ອໃຫ້ແນ່ໃຈວ່າ ພວກເຮົາ ເວົ້າແທ້ ທຳຈິງ!