ມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ

ມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ - advert banner 728 90 728x90 - ມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ

      ພິທີມອບຮັບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນໃນຫົວຂໍ້ “ປີທ່ອງທ່ຽວລາວ 2018” ໄດ້ຈັດຂຶ້ນໃນວັນທີ 31 ທັນວານີ້ ທີ່ສະຖານີໂທລະພາບແຫ່ງຊາດລາວ ໂດຍການເຂົ້າຮ່ວມ ແລະໃຫ້ກຽດມອບລາງວັນດັ່ງກ່າວ ໂດຍທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ.

ມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ - lattana 1 - ມອບລາງວັນຜະລິດຕະພັນສື່ ແລະພິມຈຳໜ່າຍດີເດັ່ນ

      ໂຄງການກວດສອບຜະລິດຕະພັນສື່ ແລະພິມຈຳໜ່າຍ ເປັນຄວາມຮັບຜິດຊອບຂອງສະມາຄົມນັກຂ່າວແຫ່ງປະເທດລາວ ເພື່ອປະກອບສ່ວນເຂົ້າໃນການສົ່ງເສີມທ່ອງທ່ຽວ 2018 ໃຫ້ບັນດານັກຂ່າວ, ນັກຂຽນ ໃນນາມນັກຮົບປາຍປາກກາໄດ້ມີສ່ວນຮ່ວມເຂົ້າໃນວຽກງານດັ່ງກ່າວນີ້ຢ່າງພ້ອມພຽງ ແລະເປັນຂະບວນຟົດຟື້ນ. ໂດຍແບ່ງອອກເປັນ 5 ປະເພດລາງວັນຄື: ຂ່າວ, ບົດສາລະຄະດີດີເດັ່ນ, ບົດຂ່າວປະກອບສຽງ, ຄລິບວີດີໂອ ແລະປຶ້ມຂໍ້ມູນຂ່າວສານດ້ານການທ່ອງທ່ຽວ ປະເພດລະ 2 ລາງວັນຄື:​

1. ປະເພດຂ່າວດີເດັ່ນ

– ລາງວັນທີ 1 ໄດ້ແກ່ຂ່າວ “Simply beautiful campaign pushes visitor attractions in Luang Prabang” ອອກໃນໜັງສືພິມວຽງຈັນທາຍ ສະບັບວັນທີ 5 ກໍລະກົດ 2018, ຂຽນໂດຍ ນາງສີສຸລັດ ສຸລິຍົງ.

– ລາງວັນທີ 2 ໄດ້ແກ່ຂ່າວ “ບຸນກອງເຂົ້າໃຫຍ່ແຂວງໄຊຍະບູລີສ້າງຄວາມປະທັບໃຈໃຫ້ຜູ້ມາທ່ຽວຊົມ” ອອກໃນໜ້າໜັງສືພິມລາວພັດທະນາ ອອກໃນສະບັບວັນທີ 10/1/2018 ຂຽນໂດຍ ທ່ານຄຳພຸດ.

2. ບົດສາລະຄະດີດີເດັ່ນ

– ລາງວັນທີ່ 1 ໄດ້ແກ່ບົດ: “ຈາກສະໝໍລະພູມແຫ່ງການສູ້ຮົບກາຍເປັນແຫຼ່ງທ່ອງທ່ຽວ”, ອອກໃນໜ້າໜັງສືພິມປະຊາຊົນ ສະ ບັບລົງວັນທີ 1/10/2018 ຂຽນໂດຍ ທ່ານ ຄໍາເຮືອງ ຄໍາປະສິດ.

– ລາງວັນທີ 2 ໄດ້ແກ່ບົດ: “ຊຽງຄວນສວນແຫ່ງມົນຂັງ ແລະ ສະເໜ່”, ອອກໃນຫນ້າໜັງສືພິມປະເທດລາວ ສະບັບອອກວັນທີ 16/10/2018, ຂຽນໂດຍ ທ່ານ ລໍາເງິນ ແກ້ວວິຈິດ ໃນນາມປາກກາຄົນສັນຈອນ.

3. ບົດຂ່າວປະກອບສຽງດີເດັ່ນ

– ລາງວັນທີ່ 1 ໄດ້ແກ່ບົດຂ່າວ: “ພ້ອມກັນສົ່ງເສີມການທ່ອງທ່ຽວລາວໃຫ້ໂດດເດັ່ນ” ໂດຍ ທ່ານ ນາງ ຈັນທະສອນ ສີຫານາດ ອອກໃນລາຍການວິທະຍຸກະຈາຍສຽງແຫ່ງຊາດລາວ, ຄັ້ງວັນທີ 11/11/2018.

– ລາງວັນທີ 2 ໄດ້ແກ່ບົດຂ່າວ: ຫົວພັນດິນແດນທີ່ໜ້າທ່ຽວ ໂດຍ ທ່ານ ບຸນຕຽງ ຈັນທະວົງ ອອກໃນລາຍການວິທະຍຸກະ ຈາຍສຽງແຫ່ງຊາດລາວ ຄັ້ງວັນທີ 26/2/2018.

4. ຄລິບວີດີໂອດີເດັ່ນ

– ລາງວັນທີ່ 1 ໄດ້ແກ່ຄລິບວີດີໂອ: ມະຫັດສະຈັນທ່ອງທ່ຽວລາວ ຜະລິດໂດຍ ທ່ານ ຄໍາເພັດ ໂທລະພາບແຫ່ງຊາດລາວ, ອອກໃນວັນທີ 27/8/2018.

– ລາງວັນທີ 2 ໄດ້ແກ່ຄລິບວີດີໂອ: ບຸນກອງເຂົ້າທີ່ເມືອງພຽງແຂວງໄຊຍະບູລີ, ຜະລິດໂດຍ ທ່ານ ພູນຊັບ ເທວົງສາ ໜັງສືພິມພາສາຕ່າງປະເທດ, ອອກໃນວັນທີ 18/1/2018.

5. ປື້ມຂໍ້ມູນຂ່າວສານດ້ານການທ່ອງທ່ຽວດີເດັ່ນ

– ລາງວັນທີ່ 1 ໄດ້ແກ່ປຶ້ມ: ຫອມແຜ່ນດິນແມ່ ຂຽນໂດຍ ທ່ານ ດຣ. ທອງຄໍາ ອ່ອນມະນີສອນ.

– ລາງວັນທີ 2 ໄດ້ແກ່ປຶ້ມ: ກອງປະຊຸມສຸດຍອດສື່ມວນຊົນຂອບການຮວ່ມມືແມ່ນໍ້າຂອງ-ແມ່ນ້ໍາລ້ານຊ້າງ ຈັດພິມໂດຍໜັງ ສືພິມພາສາຕ່າງປະເທດ, ຈັດພິມເດືອນ ກໍລະກົດ 2018.

ນອກນັ້ນ, ສະມາຄົມາຍັງມີລາງວັນຊົມເຊີຍອີກຕື່ມສອງລາງວັນຄື ບົດວີດີໂອສາລະຄະດີຖ້ໍານ້ໍາລອດເຊບັ້ງໄຟ ທີ່ໄດ້ອຸທິດ ເພື່ອໂຄງການສະເຫນີ “ປ່າສະຫງວນພູຫີນຫນາມຫນໍ່ເປັນມໍລະດົກໂລກທາງດ້ານທໍາມະຊາດ” ຜະລິດໂດຍ ທ່ານ ນາງ ວິໄລ ວອນ ເບົ້າຈະເລີນພອນ ແລະ ໂຄສົກດີເດັ່ນທີ່ໄດ້ປະກອບສ່ວນໃນການທໍາຫນ້າທີ່ເປັນພິທີກອນໃນງານ “ປີທ່ອງທ່ຽວລາວ 2018” ຢູ່ທັງພາຍໃນ ແລະ ຕ່າງປະເທດ ປະກອບດ້ວຍ ທ່ານ ນາງ ສຸນິຕາ ພິມມະສອນ, ທ່ານ ຈັນທະສອນ ທະວີໄຊ ແລະ ທ່ານ ສຸພັກສອນ ສີລາເພັດ.

      ພ້ອມນີ້ ໃນພິທີຍັງໄດ້ມອບໃບຍ້ອງຍໍໃຫ້ກັບນ້ອງນັກຮຽນເກັ່ງ 3 ຄົນທີ່ເຂົ້າຮ່ວມໂຄງການຖາມຕອບຄວາມຮູ້ກ່ຽວກັບອາຊຽນອີກດ້ວຍ.       ໃນໂອກາດອັນສະຫງ່າລາສີນີ້ ທ່ານ ບໍ່ແສງຄຳ ວົງດາລາ ໄດ້ມີຄຳເຫັນເຫັນແນະນຳວ່າ: “ໂຄງການດັ່ງກ່າວນີ້ຖືວ່າມີຄວາມໝາຍຄວາມສຳຄັນ ເພາະມັນເປັນການສະຫຼຸບຕີລາຄາການເຄື່ອນໄຫວວຽກງານຂອງສະມາຄົມນັກຂ່າວແຫ່ງ ສປປລາວ ໃນໄລຍະ 1 ປີຜ່ານມາ ແລະທິດແຜນການໃນຕໍ່ໜ້າ, ມັນສະແດງເຖິງໝາກຜົນອັນດີ ແລະສິ່ງທ້າທາຍຂອງບັນດານັກຮົບປາຍປາກກາ, ຍາມໃດນັກຂ່າວ, ນັກຂຽນ ກໍຄືຜູ້ມີຫົວໃຈໃນການເຜີຍແຜ່ຂໍ້ມູນຂ່າວສານກໍໄດ້ຄຽງບ່າຄຽງໄຫຼ່ກັບກຳລັງປະກອບອາວຸດຢູ່ສະເໝີ, ນັກຂ່າວກໍແມ່ນກ້ອນກຳລັງໜຶ່ງໃນແນວໜ້າໃນແຕ່ລະບັ້ນຮົບ ດັ່ງນັ້ນ, ການມອບລາງວັນໃຫ້ແກ່ພະນັກງານອາວຸໂສ ແລະຜູ້ມີຜົນງານດີເດັ່ນ ຖືວ່າເປັນການຊົມເຊີຍນໍ້າໃຈ, ເປັນການກະຕຸກຊຸກຍູ້ໃຫ້ກຳລັງໃຈບຸກຄົນດັ່ງກ່າວໄດ້ສືບຕໍ່ໜ້າທີ່ວຽກງານຂອງຕົນໃຫ້ດີຍິ່ງຂຶ້ນ ແລະພ້ອມເປັນກະບອກສຽງໃຫ້ກັບສັງຄົມລາວ ກໍຄືຊາດລາວ ແລະສັງຄົມໂລກໃຫ້ເຂົາໄດ້້ຮູ້ເຫັນເຖິງຄວາມສວຍສົດງົດງາມຫຼາຍໆຢ່າງໃນລາວ”./.                  ໃນໂອກາດດຽວກັນນີ້ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ຖວທ, ປະທານສະມາຄົມນັກຂ່າວແຫ່ງປະເທດລາວ ໄດ້ກ່າວຕໍ່ພິທີດັ່ງກ່າວວ່າ: ປະເທດລາວເປັນປະເທດໜຶ່ງທີ່ມີແຫຼ່ງທ່ອງທ່ຽວອັນສວຍສົດງົດງາມທາງດ້ານທໍາມະຊາດ, ປະຫວັດສາດ ແລະ ວັດທະນະທໍາ, ແລະ ປະຊາຊົນລາວບັນດາເຜົ່າ ກໍມີວິຖີຊີວິດ ແລະ ຮີດຄອງປະເພນີເປັນເອກລັກຊຶ່ງໄດ້ຮັບການປົກປັກຮັກສາ ແຕ່ອະດີດຈົນມາຮອດປັດຈຸບັນນີ້ສື່ມວນຊົນລາວເຮົາ ກໍຄືນັກຂຽນນັກປະພັນເຮົາ, ໂດຍຮັບຮູ້ດີ ແລະ ດ້ວຍຄວາມພາກພູມໃຈຢ່າງສູງທີ່ມີຕໍ່ມົນສະເໜ່ ແລະ ຄວາມສວຍສົດງົດງາມຂອງປະເທດຊາດບ້ານເກີດເມືອງນອນຂອງຕົນ, ຈຶ່ງໄດ້ນໍາໃຊ້ຄວາມຮູ້ຄວາມສາມາດ ທາງດ້ານວິຊາສະເພາະຂອງຕົນໃນການຊອກສະແຫວງຫາຄວາມມີສະເໜ່ອັນໂດດເດັ່ນທີ່ບົ່ມຊ້ອນຢູ່ໃນຜືນແຜ່ນດິນລາວ, ເພື່ອນໍາມາໂຄສະນາ ແລະ ພັນລະນາສ່ອງແສງຢ່າງມີຫລາກຫລາຍຮູບແບບສີສັນ, ຜ່ານບົດຂ່າວ, ບົດສາລະຄະດີ, ພາບໜຶ່ງ, ຂ່າວ-ບົດປະກອບສຽງ, ສະປອດໂຄສະນາ, ຄລິບວີດີໂອ ແລະ ວິດີໂອສາລະຄະດີ, ເປັນຈໍານວນຫລາຍຮ້ອຍຫລາຍພັນຜະລິດຕະພັນ, ມີທັງພາສາລາວ ແລະພາສາຕ່າງປະເທດ, ເຜີຍແຜ່ອອກຜ່ານຫລາຍຊ່ອງທາງ ບໍ່ວ່າຈະເປັນທັງສືແບບເກົ່າ ແລະແບບໃໝ່ຢ່າງຫຼວງຫຼາຍ.