ການແຂ່ງຂັນເຕະບານຊາຍຊີງແຊ້ມອາຊີ 2019 ທີ່ UAE ຈະເປີດສາກມື້ນີ້

ການແຂ່ງຂັນເຕະບານຊາຍຊີງແຊ້ມອາຊີ 2019 ທີ່ uae ຈະເປີດສາກມື້ນີ້ - advert banner 728 90 728x90 - ການແຂ່ງຂັນເຕະບານຊາຍຊີງແຊ້ມອາຊີ 2019 ທີ່ UAE ຈະເປີດສາກມື້ນີ້

      ການ​ແຂ່ງຂັນ​ເຕະບານ​ຊາຍ ຊີງ​ແຊ້ມອາຊີ ຄັ້ງທີ 17 ຫລື ​ເອຊຽນຄັບ 2019 ທີ່​ສະຫະລັດ​ອາຣັບ ​ເອມິ​ເຣດ ​ໄດ້​ຮັບ​ກຽດ​ເປັນ​ເຈົ້າພາບ​ຄັ້ງທຳ​ອິດ ຈະລະ​ເບີດ​ຄວາມ​ມັນ​ໃນ​ວັນ​ທີ 5 ມັງກອນ ຫາ​ວັນ​ທີ 1 ກຸມພາ 2019 ​ໂດຍ​ມີ 24 ທີ​ມທີ່​ຜ່ານ​ການ​ຄັດ​ເລືອກ​ຮ່ວມ​ຊີງ​ໄຊ.

ການແຂ່ງຂັນເຕະບານຊາຍຊີງແຊ້ມອາຊີ 2019 ທີ່ uae ຈະເປີດສາກມື້ນີ້ - lattana 1 - ການແຂ່ງຂັນເຕະບານຊາຍຊີງແຊ້ມອາຊີ 2019 ທີ່ UAE ຈະເປີດສາກມື້ນີ້

      ກຸ່ມ A ປະກອບ​ມີ: ​ເຈົ້າພາບ ສະຫະລັດ​ ອາຣັບ ​ເອມິ​ເຣດ (UAE) ​ເຂົ້າຮ່ວມ​ເປັນຄັ້ງທີ 10 ຜົນງານ​ດີ​ສຸດ​ໄດ້​ອັນ​ດັບ 2 ​ໃນ​ປີ 1996 ຮ່ວມ​ກຸ່ມ​ກັບ​ ທີ​ມຊາດ​ໄທ ທີ່​ເຂົ້າຮ່ວມ​ຮອບ​ສຸດ​ທ້າຍ​ໃນ​ຮອບ 11 ປີ ​ເປັນຄັ້ງທີ 7 ຜົນງານ​ດີ​ສຸດ​ໄດ້​ອັນ​ດັບ 3 ​ໃນ​ປີ 1972. ພ້ອມ​ກັນ​ນີ້ ກໍ​ມີ ທີ​ມຊາດ​ອິນ​ເດຍ ຮ່ວມ​ເປັນຄັ້ງທີ 4 ຜົນງານ​ດີ​ສຸດ​ໄດ້​ອັນ​ດັບ 2 ​ໃນ​ປີ 1964 ​ແລະ ທີ​ມຊາດ​ບາ​ເຣນ ຮ່ວມ​ຮອບ​ສຸດ​ທ້າຍ​ເປັນຄັ້ງທີ 5 ຕິດ​ຕໍ່​ກັນ ຄັ້ງນີ້​ເປັນຄັ້ງທີ 6 ຜົນງານ​ດີ​ສຸດ​ໄດ້​ອັນ​ດັບ 4 ​ໃນ​ປີ 2004.

      ກຸ່ມ B ປະກອບ​ມີ: ​ແຊ້ມ​ເກົ່າ ອົດ​ສະຕຣາລີ ​ແຍກ​ຈາກ​ຂົງ​ເຂດ​ໂອ​ເຊ​ອາ​ນີ ​ເຂົ້າຮ່ວມ​ເປັນຄັ້ງທີ 3 ຕິດ​ຕໍ່​ກັນ, ຊີ​ເຣຍ ​ເຂົ້າຮ່ວມ​ເປັນຄັ້ງທີ 6 ບໍ່​ເຄີຍ​ຜ່ານ​ຮອບ​ແບ່ງ​ກຸ່ມ, ຈໍ​ແດນ ​ເຂົ້າຮ່ວມ​ເປັນຄັ້ງທີ 5 ຜົນງານ​ດີ​ສຸດ​ເຂົ້າຮອບ 8 ທີ​ມ ປີ 2004, 2011, ທີ​ມຊາດ​ປາ​ແລັສຕິນ ​ເຂົ້າຮ່ວມ​ເປັນຄັ້ງທີ 2 ຕໍ່​ຈາກ​ປີ 2015 ຜົນງານ​ຄັ້ງຜ່ານ​ມາ​ຕົກ​ຮອບ​ແບ່ງ​ກຸ່ມ.

      ກຸ່ມ C ປະກອບ​ມີ: ສາທາລະນະ​ລັດ​ເກົາຫລີ ​ແຊ້ມ 2 ສະ​ໄໝ ​ເຂົ້າຮ່ວມ​ເປັນຄັ້ງທີ 14 ​ໄດ້​ແຊ້ມປີ 1956, 1960 ຮ່ວມ​ກັບ ທີ​ມຊາດ​ຈີນ ​ເຂົ້າຮ່ວມ​ເປັນຄັ້ງທີ 12 ຜົນງານ​ດີ​ສຸດ​ໄດ້​ອັນ​ດັບ 2 ​ໃນ​ປີ 1984, 2004 ​ແລະ ມີ​ສອງ​ນ້ອງ​ໃໝ່ ທີ​ມຊາດ​ຟີ​ລິບ​ປິນ ​ແລະ ທີ​ມຊາດ​ກີກິດ​ສະຖານ.

       ກຸ່ມ D ປະກອບ​ມີ: ອີຣານ ​ແຊ້ມ 3 ສະ​ໄໝ 1968, 1972 ​ແລະ 1976 ​ເຂົ້າຮ່ວມ​ເປັນຄັ້ງທີ 14 ຕິດ​ຕໍ່​ກັນ ຜົນງານ​ຄັ້ງຫລ້າ​ສຸດ​ປີ 2015 ຕົກ​ຮອບ 8 ທີ​ມສຸດ​ທ້າຍ ຮ່ວມ​ກັບ ທີ​ມຊາດ​ອີຣັກ ທີ່​ເຂີຍ​ທີ​ມຊາດ​ອີຣານຕົກ​ຮອບ 8 ທີ​ມຄັ້ງຜ່ານ​ມາ ອີຣັກ ​ເຄີຍ​ເປັນ​​ແຊ້ມ 1 ສະ​ໄໝ​ປີ 2007 ​ເຂົ້າຮ່ວມ​ເປັນຄັ້ງທີ 8 ​ແລະ ​ເປັນຄັ້ງທີ 7 ຕິດ​ຕໍ່​ກັນ. ນອກ​ນີ້ ຍັງ​ມີ​ ທີ​ມຊາດ​ຫວຽດນາມ ​ແຊ້ມອາ​ຊຽນ 2018 ທີ​ມທີ່​ໜ້າ​ຈັບ​ຕາ​ເປັນ​ພິ​ເສດ ​ເຂົ້າຮ່ວມ​ເປັນຄັ້ງທີ 4 ຕໍ່​ຈາກ​ປີ 2007 ​ແລະ ​ເປັນຄັ້ງທີ 2 ນັບ​ແຕ່​ເປັນ ສສ ຫວຽດນາມ ສ່ວນ​ອີກ​ໜຶ່ງ​ທີ​ມ​ໃນ​ກຸ່ມ​ນີ້​ແມ່ນ​ນ້ອງ​ໃໝ່ ທີ​ມຊາດ​ເຢ​ເມນ.

       ກຸ່ມ E ປະກອບ​ມີ: ທີ​ມຊາດ​ຊາ​ອຸ​ດິ ອາຣະບີ ​ແຊ້ມ 2 ສະ​ໄໝ 1984, 1988, 1996 ​ເຂົ້າຮ່ວ​ມ​ເປັນຄັ້ງທີ 10 ຕິດ​ຕໍ່​ກັນ ຄັ້ງຫລ້າ​ສຸດ 2015 ຕົກ​ຮອບ​ແບ່ງ​ກຸ່ມ, ທີ​ມຊາດ​ກາ​ຕ້າ ​ເຂົ້າຮ່ວມ​ເປັນຄັ້ງທີ 10 ຜົນງານ​ດີ​ສຸດ​ຮອບ 8 ທີ​ມສຸດ​ທ້າຍ​ປີ 2000, 2011, ທີ​ມຊາດ ສປປ ​ເກົາຫລີ ​ເຂົ້າຮ່ວມ​ເປັນຄັ້ງທີ 5 ຜົນງານ​ດີ​ສຸດ​ໄດ້​ທີ 4 ປີ 1980 ຄັ້ງຫລ້າ​ສຸດ 2015 ຕົກ​ຮອບ​ແບ່ງ​ກຸ່ມ ​ແລະ ທີ​ມຊາດ​ເລ​ບາ​ນອນ ​ເຂົ້າຮ່ວມ​ເປັນຄັ້ງທີ 2 ຕໍ່​ຈາກ​ປີ 2000.

       ກຸ່ມ F ປະກອບ​ມີ: ທີ​ມຊາດ​ຍີ່ປຸ່ນ ​ແຊ້ມສູງ​ສຸດ 4 ສະ​ໄໝ 1992, 2000, 2004, 2011 ​ເຂົ້າຮ່ວມ​ເປັນຄັ້ງທີ 9 ຕິດ​ຕໍ່​ກັນ ຜົນງານ​ຄັ້ງຫລ້າ​ສຸດ 2015 ຕົກ​ຮອບ 8 ທີ​ມສຸດ​ທ້າຍ ຮ່ວມ​ກຸ່ມ​ກັບ ທີ​ມຊາດ​ອຸດ​ສະ​ເບ​ກິດ​ສະຖານ ​ແຊ້ມ U23 ອາຊີ 2018 ​ເຂົ້າຮ່ວມ​ເປັນຄັ້ງທີ 7 ຕິດ​ຕໍ່​ກັນ ຄັ້ງຫລ້າ​ສຸດ 2015 ຕົກ​ຮອບ 8 ທີ​ມ. ນອກ​ນີ້ ຍັງ​ມີ​ທີ​ມຊາດ​ໂອ​ມານ ​ແລະ ຕວກມີ​ນິດ​ສະຖານ, ທີ​ມຊາດ​ໂອ​ມານ​ ​ເຂົ້າຮ່ວ​ມ​ເປັນຄັ້ງທີ 4 ຜ່ານ​ມາ​ຕົກ​ຮອບ​ແບ່ງ​ກຸ່ມ​ໝົດ. ຂະນະ​ທີ່ ທີ​ມຊາດ​ຕວກມີ​ນິດ​ສະຖານ ​ເຂົ້າຮ່ວມ​ເປັນຄັ້ງທີ 2 ຕໍ່​ຈາກ​ປີ 2004 ຕົກ​ຮອບ​ແບ່ງ​ກຸ່ມ.

       ຄູ່​ເປີດ​ສະໜາມ ກຸ່ມ A ​ເຈົ້າພາບ ສະຫະລັດ ​ອາຣັບ ​ເອມິ​ເຣດ ພົບ ທີ​ມຊາດ​ບາ​ເຣນ ​ເວລາ 20:00 ຕາມ​ເວລາ​ຢູ່ UAE ກົງ​ກັບ​​ເວລາ​ປະ​ເທດ​ລາວ 23:00 ​ໂມງ. ຮູບ​ແບບ​ການ​ແຂ່ງຂັນ​ພົບ​ກັນ​ໝົດ​ໃນ​ກຸ່ມ ​ແລ້ວ​ຄັດ​ເອົາ​ທີ 1-2 ຂອງ​ແຕ່​ລະ​ກຸ່ມ ​ແລະ ທີ 3 ດີ​ສຸດ 4 ທີ​ມຈາກ 6 ກຸ່ມ​ເຂົ້າສູ່​ຮອບ 16 ທີ​ມສຸດ​ທ້າຍ​ຕໍ່​ໄປ.