10 ເຫດຄາດຕະກໍາໂຫດໃນປີ 2018

10 ເຫດຄາດຕະກໍາໂຫດໃນປີ 2018 - advert banner 728 90 728x90 - 10 ເຫດຄາດຕະກໍາໂຫດໃນປີ 2018

  ໃນປີ 2018 ຜ່ານມາ, ຢູ່ປະເທດເຮົາໄດ້ມີອາຊະຍາກໍາຫລາຍຮູບເກີດຂຶ້ນ, ອັນໄດ້ສ້າງຄວາມສູນເສຍແກ່ຊີວິດ ແລະ ຊັບສີນຂອງປະຊາຊົນເປັນຈໍານວນບໍ່ໜ້ອຍ ແລະ ໜັງສືພີມລາວພັດທະນາສະບັບມື້ນີ້ຂໍນໍາເອົາ 10 ຄະດີຄາດຕະກໍາໂຫດທີ່ເກີດຂຶ້ນໃນປີຜ່ານມາສະເໜີຄື: (1) ໃນວັນທີ 5 ໄດ້ເກີດເຫດຄາດຕະກໍາຢູ່ເຂດບ້ານວຽງພັດທະນາເມືອງຜາອຸດົມແຂວງບໍ່ແກ້ວ, ໂດຍທ້າວ ເຢຍມົວ ອາຍຸ 33 ປີມີອາການປະສາດຫລອນແລ້ວໃຊ້ມີດແທງເມຍ ອາຍຸ 29 ປີ ແລະ ລູກສາວ ອາຍຸ 5 ປີເສຍຊີວິດຄາທີ່, ກ່ອນແທງຕົວເອງຕາຍຕາມ. (2) ໃນວັນທີ 13 ຕຸລາ, ທ້າວ ຍົມ ອາຍຸ 19 ປີຢູ່ບ້ານ ພູສອນ, ເມືອງຮຸນແຂວງອຸດົມໄຊ ໄດ້ກໍ່ເຫດຂົ່ມຂືນແລ້ວຂ້າຍິງສາວບ້ານດຽວກັນເຖິງ 2 ຄົນ. (3) ໃນວັນທີ 14 ສິງຫາ, ໄດ້ເກີດເຫດຄາດຕະກໍາຢູ່ບ້ານຫ້ວຍຍາງ, ເມືອງຂວາແຂວງຜົ້ງສາລີ, ນາງ ຄໍາ ອາຍຸ 37 ປີໃຊ້ພ້າປາດຄໍລູກສາວຕົນເອງຈົນເສຍຊີວິດຄາທີ່. (4) ໃນວັນທີ 12 ສິງຫາ, ຄົນຮ້າຍສອງຄົນ (ຊາວຈີນ) ໄດ້ຄາດຕະກໍາທ້າວ ໄຊຊະນະ ຫຍົດສະຫວັດ (ຫລີຈາວເພິງ) ອາຍຸ 42 ປີເຊື້ອຊາດຈີນ, ສັນຊາດລາວ ອາຊີບນັກທຸລະກິດ ເສຍຊີວິດຄາທີ່ພາຍໃນເຮືອນຢູ່ທີ່ບ້ານສີໄຄທົ່ງ, ເມືອງສີໂຄດຕະບອງ ນະຄອນຫລວງວຽງຈັນ ແລະ ຕໍ່ມາເຈົ້າໜ້າທີ່ສາມາດຈັບຕົວຄົນຮ້າຍ ແລະ ຜູ້ບົງການຊາວຈີນອີກ 2 ຄົນ ມາດໍາເນີນຄະດີຕາມລະບຽບກົດໝາຍ. (5) ໃນວັນທີ 7 ກໍລະກົດ ທ້າວ ລົດຕະນາ ອາຍຸ 24 ປີໄດ້ກໍ່ເຫດຂົ່ມຂືນແລ້ວຂ້າເດັກຍິງອາຍຸ 7 ປີຢູ່ປ່າໃນເຂດບ້ານໃໝ່ສີວິໄລ, ເມືອງໂຂງແຂວງຈໍາປາສັກ. (6) ໃນວັນທີ 20 ເມສາ, ທ້າວ ຄໍາສອນ ອາຍຸ 50 ປີຢູ່ບ້ານນາແຄ, ເມືອງໄຊທານີ ນະຄອນຫລວງວຽງຈັນ, ໄດ້ທໍາຮ້າຍຮ່າງກາຍເມຍ ໂດຍໃຊ້ໄມ້ຕີຫລາຍບາດຈົນເມຍເສຍຊີວິດ, ສາເຫດຍ້ອນຂໍເງິນນໍາເມຍບໍ່ໄດ້. (7) ໃນວັນທີ 21 ພຶດສະພາ ໄດ້ເກີດເຫດຄາດຕະກໍາຢູ່ບ້ານຫ້ວຍມ້າ, ເມືອງຊໍາເໜືອແຂວງຫົວພັນ, ໂດຍທ້າວ ໄຊຈື່ມົວ ອາຍຸ 44 ປີໃຊ້ປືນຍິງເມຍ ແລະ ຕົນເອງເສຍຊີວິດ. (8) ໃນວັນທີ 9 ກຸມພາ, ທ້າວ ສິນໄຊຢາງ ອາຍຸ 30 ປີຢູ່ບ້ານຖໍ້າດິນ, ເມືອງລ້ອງຊານແຂວງໄຊສົມບູນ ໄດ້ຄາດຕະກໍານາງ ແຈະວື ອາຍຸ 50 ປີຢູ່ບ້ານດອນທາດ, ເມືອງຕົ້ນເຜີ້ງແຂວງບໍ່ແກ້ວ, ໂດຍການໃຊ້ເຊືອກຮັດຄໍຈົນເສຍຊີວິດຄາທີ່ໃນເຮືອນພັກແຫ່ງໜຶ່ງເຂດບ້ານຕານມາໄຊ, ເມືອງໄຊທານີນະຄອນຫລວງວຽງຈັນ. (9) ໃນວັນທີ 10 ຕຸລາ, ໄດ້ເກີດເຫດຄາດຕະກໍາຢູ່ເຂດບ້ານລໍາທວຍ, ເມືອງຊົນນະບູລີ ແຂວງສະຫວັນນະເຂດ, ໂດຍທ້າວ ຈັນສະໄໝ ອາຍຸ 18 ປີໄດ້ໃຊ້ໄມ້ຕີພໍ່ຈົນເສຍຊີວິດຄາທີ່ ຍ້ອນພໍ່ຫ້າມບໍ່ໃຫ້ຕົນເອງໄປພົວພັນຢາເສບຕິດ ແລະ (10) ໃນທ້າຍເດືອນກໍລະກົດ 2018 ທ້າວ ວິໄລ ອາຍຸ 27 ປີຢູ່ບ້ານນາອ້ອຍໝູ, ເມືອງປາກຊັນ ແຂວງບໍລິຄໍາໄຊ ໄດ້ຄາດຕະກໍານາງ ພັນ ອາຍຸ 48 ປີຄົນບ້ານດຽວກັນ ໂດຍການໃຊ້ຜ້າແພຮັດຄໍຈົນເສຍຊີວິດຢູ່ເຮືອນຜູ້ກ່ຽວເອງ, ໂດຍສາເຫດແມ່ນທ້າວ ວິໄລ ໄດ້ເຂົ້າໄປລັກຊັບໃນເຮືອນນາງພັນ. ຈາກນັ້ນນາງ ພັນ ຮູ້ເມື່ອແລ້ວຮ້ອງຄົນມາຊ່ວຍຈຶ່ງຖືກຄາດຕະກໍາດັ່ງກ່າວ.   

10 ເຫດຄາດຕະກໍາໂຫດໃນປີ 2018 - lattana 1 - 10 ເຫດຄາດຕະກໍາໂຫດໃນປີ 2018