ປີ​ໃໝ່​ເວົ້າໃຫ້ໜ້ອຍ

ປີ​ໃໝ່​ເວົ້າໃຫ້ໜ້ອຍ - advert banner 728 90 728x90 - ປີ​ໃໝ່​ເວົ້າໃຫ້ໜ້ອຍ

​ໂດຍ : ທິດກ່ຳ

ປີ​ໃໝ່​ເວົ້າໃຫ້ໜ້ອຍ - lattana 1 - ປີ​ໃໝ່​ເວົ້າໃຫ້ໜ້ອຍ

ເດືອນ​ມັງກອນ​ປີ 2019 ​ເປັນ​ຈຸດ​ເລີ່​ມຕົ້ນຂອງ​ປີ​ໃໝ່​ສາກົນ, ທັງ​ເປັນ​ສັນຍາ​ລັກ​ຂອງ​ເດືອນ​ພະຍາ​ ​ມັງກອນ​ທີ່​ຈະ​ພາ​ບຸກນ້ຳລຸຍ​ໄຟ​ຕ້ານ​ກັບ​ສິ່ງ​ຫຍໍ້​ທໍ້​ຄົງ​ຄ້າງ​ໃນ​ປີຜ່ານມາ​ແລ້ວ​ດົນ​ບັນດານ​ຈິດ​ໃຈ​ໃຫ້​ພວກ​ເຮົາ​ເດີນ​ໜ້າ​ກ້າວ​ໄປ​ຢ່າງ​ບໍ່ ຢຸດ​ຢັ້ງ, ນີ້​ຄື​ເຫດຜົນ​ແຫ່ງ​ຄວາມ​ເຊື່ອ​ຂອງ​ຜູ້​ມີ​ສັດທາ.

​        ແຕ່​ຖ້າ​ຜູ້​ໃດ​ບໍ່​ທັນ​ເຊື່ອນັ້ນກໍ​ຢ່າ​ຟ້າວ​ລົບ​ລູ່​ໃຫ້​ຄ່ອຍ​ພາກັນ​ຕິດຕາມ​ໄປ​ວ່າ​ຄວາມ​ຈິງ​ຂອງ​ສັດຈະ​ທຳ ຫລື ວ່າການ​ປ່ຽນ​ແປງ​ຂອງ​ໂລກ​ນັ້ນມັນ​ຈະ​ເປັນ​ໄປ​ໃນ​ທິດ​ທາງ​ໃດ​ຫລາຍ​ກວ່າ​ກັນ (​ໃນ​ທາງ​ບວກ​ກັບ​ທາງ​ລົບ)

​        ໃນ​ປີ 2018 ຜ່ານ​ມາ, ພວກ​ເຮົາ​ສາມາດ​ຜ່ານ​ພົ້ນບັນດາ​ວິ​ກິດ​ການ ​ແລະ ຜົນ​ກະທົບ​ຫລາຍ​ຢ່າງ​ທັງ​ພາຍ​ໃນ ​ແລະ ພາຍ​ນອກ; ​ແຕ່​ສິ່ງ​ສຳຄັນ​ປະ​ເທດ​ຊາດ​ກໍ​ຍັງ​ເດີນ​ໜ້າ ​ແລະ ມີ​ການ​ພັດທະນາ​ໄປ​ຕິກໆ.

ດ້ານ​ການ​ເມືອງ​ນັບ​ມື້ມີ​ສະ​ເຖຍລະ​ພາບ​ໝັ້ນຄົງ ​ແລະ ໜັກ​ແໜ້ນ, ​ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ​ອັດຕະສະ​ເລ່ຍ 6,5% ຕໍ່​ປີ, ດ້ານ​ວັດທະນະທຳ-ສັງຄົມ ກໍ​ນັບ​ມື້ມີ​ຄວາມ​ຈະ​ເລີ​ນຮຸ່ງ​ເຮືອງ ​ແລະ ສະຫງົບ​ສຸກ​ໂດຍ​ລວມ, ຊີວິດ​ການ​ເປັນ​ຢູ່​ຂອງ​ປະຊາຊົນ​ກໍ​ນັບ​ມື້ດີ​ຂຶ້ນ.

ຈຳນວນ​ຄອບຄົວ​ທຸກ​ຍາກ, ບ້ານ​ທຸກ​ຍາກ​ນັບ​ມື້ຫລຸດ​ລົງ​ໃນ​ແຕ່​ປີ, ​ເຖິງ​ວ່າ ທິດ​ກ່ຳ ບໍ່​ໄດ້​ມີ​ຕົວ​ເລກ​ຕົວ​ຜາ​ມາ​ປຽບທຽບ​ແຕ່​ເບິ່ງ​ພາບ​ລວມ​ໃນ​ທົ່ວ​ປະ​ເທດ​ມັນ​ກໍ​ນັບ​ມື້ມີ​ທ່າ​ອ່ຽງປ່ຽນ​ແປງ​ໄປ​ໃນ​ທາງ​ທີ່​ດີ ​ແລະ ກ້າວໜ້າ​ຄື​ດັ່ງ​ທີ່​ເຮົາ​ເຫັນ​ໃນ​ແຕ່ລະ​ໄລຍະ.

​ແນວ​ໃດ​ກໍ​ຕາມ, ສຳລັບ​ປີ 2019 ​ໂດຍ​ສະ​ເພາະ​ຖ້າ​ນັບ​ຖອຍຫລັງ​ກໍ​ຍັງ​ອີກ​ບໍ່ພໍ​ເທົ່າ​ໃດ​ວັນ​ພວກ​ເຮົາ​ກໍ​ຈະ​ໄດ້​ພ້ອມ​ກັນ​ຮັບ​ໂຊກ​ໃຫຍ່​​ໃນຕົ້ນປີນັ້ນ ກໍ​ຄື​ການສະ​ເຫລີ​ມສະຫລອງ​ວັນ​ສ້າງຕັ້ງກອງທັບ​ປະຊາຊົນ​ລາວ​ຄົບຮອບ 70 ປີ (20 ມັງກອນ 1949-20 ມັງກອນ 2019).

​        ເນື່ອງ​ໃນ​ວັນ​ປະຫວັດສາດ​ອັນ​ສຳຄັນ​ດັ່ງກ່າວ, ພັກ ​ແລະ ລັດຖະບານ​ເຮົາ​ໄດ້​ຕົກລົງ​ໃຫ້​ມີການສະ​ເຫລີ​ມສະຫລອງ​ຢ່າງ​ຍິ່ງ​ໃຫຍ່​ອາ​ລັງກາ​ນ ​ເຊິ່ງບໍ່​ເຄີຍ​ມີ​ມາ​ໃນ​ປະຫວັດສາດ​ຂອງກອງທັບ ​ແລະ ຂອງ​ຊາດ​ເຮົາ​ໃນ​ແຕ່​ລະ​ຍຸກ​ແຕ່​ລະສະ​ໃໝ​ຜ່ານ​ມາ.

ສ່ວນ​ການຈັດຕັ້ງປະຕິບັດ​ແຜນ​ພັດທະນາ​ເສດຖະກິດ-ສັງຄົມ ປະຈຳ​ປີ 2019 ລັດຖະບານ​ກໍ​ໄດ້​ຕັ້ງ​ເປົ້າ​ໃຫ້​ບັນລຸ 6,7% ຂຶ້ນ​ໄປ, ການ​ສົ່ງ​ອອກ​ກໍ​ໃຫ້​ບັນລຸ 5.516 ລ້ານ​ໂດ​ລາ. ​ເກັບ​ລາຍ​ຮັບ​ພາຍ​ໃນ​ໃຫ້​ໄດ້​ເພີ່ມ 6,78% ທຽບ​ໃສ່​ປີ 2018.

ສ້າງມູນ​ຄ່າ​ເພີ່ມ​ຕາມ​ລາຄາ​ໃນ​ປີ​ປະມານ 165.475 ຕື້ກີບ, ລາຍ​ຮັບ​ສະ​ເລ່ຍຕໍ່​ຫົວ​ຄົນ 2.726 ​ໂດ​ລາ, ລາຍ​ໄດ້​ແຫ່ງ​ຊາດ (GNI) ຕໍ່​ຫົວ​ຄົນ​ປະມານ 2.317 ​ໂດ​ລາ.

ສືບ​ຕໍ່​ລະດົມ​ທຶນ​ເພື່ອ​ການ​ພັດທະນາ​ໃຫ້​ໄດ້​ທັງ​ໝົດ​ບໍ່​ຕ່ຳ​ກວ່າ 44.347 ຕື້ກີບ​ເທົ່າ 27% ຂອງ (GDP) ອັນ​ທີ​ພິ​ເສດ​ຕື່ມ​ອີກ​ໃນ​ປີ 2019 ກິດຈະກຳສິ້ນ​ໃຫຍ່ໆ​ທີ່​ພວກ​ເຮົາ​ຈະ​ໄດ້​ພ້ອມ​ກັນ​ຈັດຕັ້ງປະຕິບັດ​ກໍ​ຄືພ້ອມ​ກັນ​ຈັດ​ປີ​ທ່ອງ​ທ່ຽວລາວ-ຈີນ ​ຕາມການ​ຕົກລົງ​ລະຫວ່າງ 2 ປະມຸກ​ລັດ ​ ​ໃນ​ໂອກາດ​ການ​ໄປ​ຢ້ຽມຢາມ​ຈີນ​ໃນ​ປີ​ທີ່​ຜ່ານມາ.

​        ໃນ​ການຈັດ​ປີ​ທ່ອງ​ທ່ຽວ​ລາວ-ຈີ​ນ ຄັ້ງນີ້​ຄາດກະ​ດຶງ​ດູດ​ນັກ​ທ່ອງ​ທ່ຽວ​ຈາກ​ຈີນ​ເຂົ້າມາ​ທ່ຽວ​ລາວ​ໃຫ້​ໄດ້ 1 ລ້ານ​ຄົນຂຶ້ນ​ໄປ.

ນອກຈາກ​ພາລະກິດ ​ແລະ ໜ້າ​ງານ​ສິ້ນ​ໃຫຍ່ໆ ລະດັບ​ຊາດ ທີ່​ທິດ​ກ່ຳ ຍົກ​ມາ​ຂ້າງ​ເທິງ​ນີ້​ແລ້ວ, ຍັງ​ມີໜ້າ​ວຽກ​ຂອງ​ບັນດາ​ຂະ​ແໜງ​ການ​ທີ່​ກ່ຽວຂ້ອງ​ອີກ​ຫລາຍ​ຢ່າງ​ຫລາຍ​ແນວ​ເພື່ອ​ຈະ​ສູ້​ຊົນ​ໃຫ້​ໄປ​ເຖິງ​ເປົາ​ໃນ​ປີ​ໃໝ່.

ສະນັ້ນ, ຕາມ​ເຮົາ​ຄິດ​ບັນຫາ​ຕ່າງໆ ທີ່​ເຮົາ​ໄດ້​ສັງ​ເຄາະ​ເອົາ​ມາ​ເວົ້າຂ້າງ​ເທິງ​ນີ້ ຖ້າ​ພວກ​ເຮົາ​ບໍ່​ພ້ອມ​ກັນ​ຫັນ​ນອດຫັນ​ເກ​ຍ, ຍັງ​ພາກັນ​ເວົ້າຫລາຍ​ເຮັດ​ໜ້ອຍ​ຢາກ​ໄດ້​ຫລາຍ​ບໍ່​ຮ່ວມ​ແຮງ​ຮ່ວມ​ໃຈ​ພ້ອມ​ກັນ “​ເຢີ​ກ” ອີ່ຫລີ​ມັນ​ກໍ​ຈະ​ບໍ່​ໄປ​ເຖິງ​ເປົ້າ.