ລາວປັບຂຶ້ນອາກອນຊົມໃຊ້ຢາສູບຕື່ມ 100 ກີບ

- advert banner 728 90 728x90 - ລາວປັບຂຶ້ນອາກອນຊົມໃຊ້ຢາສູບຕື່ມ 100 ກີບ

ທ່ານຮອງລັດຖະມົນຕີກະຊວງອຸດສາຫະກໍາແລະການຄ້າສົມຈິດອິນທະມິດໃຫ້ຮູ້ຢູ່ກອງປະຊຸມເຜີຍແຜ່ຄໍາສັ່ງການຄວບຄຸມຜະລິດຕະພັນຢາສູບເມື່ອທ້າຍອາທິດຜ່ານມາວ່າ: ລັດຖະບານຈະເລີ່ມປະຕິບັດການຈັດເກັບອາກອນຊົມໃຊ້ຜະລິດຕະພັນຢາສູບຈາກ 500 ກີບຂຶ້ນເປັນ 600 ກີບຕໍ່ລາຄາຂາຍຍ່ອຍແລະຂາຍຍົກ, ເຊິ່ງຈະເລີ່ມແຕ່ເດືອນມັງກອນ 2019 ເປັນຕົ້ນໄປ. ພາຍຫລັງເຫັນວ່າຜະລິດຕະພັນຢາສູບເປັນສີນຄ້າຟູມເຟືອຍແລະເປັນອັນຕະລາຍຕໍ່ຜູ້ຊົມໃຊ້, ຈຶ່ງຈໍາເປັນຕ້ອງມີມາດຕະການຄວບຄຸມດ້ານລາຄາເພື່ອຫລຸດຜ່ອນການເຂົ້າເຖິງຢາສູບຂອງຊາວໜຸ່ມເຍົາວະຊົນກໍຄືຜູ້ມີລາຍຮັບຕໍ່າ.

- lattana 1 - ລາວປັບຂຶ້ນອາກອນຊົມໃຊ້ຢາສູບຕື່ມ 100 ກີບ

ຮອງລັດຖະມົນຕີກະຊວງດັ່ງກ່າວເວົ້າວ່າ: ຜ່ານການສໍາຫລວດຄັ້ງລ້າສຸດຂອງຂະແໜງກ່ຽວຂ້ອງພົບວ່າຫລາຍກວ່າ 36% ຂອງຜະລິດຕະພັນຢາສູບທີ່ຈໍາໜ່າຍຢູ່ສປປລາວເປັນຢາສູບເຖື່ອນທີ່ລັກລອບນໍາເຂົ້າຈາກຕ່າງປະເທດ. ຂະນະດຽວກັນພົບເຫັນຜະລິດຕະພັນຢາສູບທີ່ບໍ່ຕິດໂຄສະນາເຕືອນໄພອັນຕະລາຍຈາກການສູບຢາມີຫລາຍຍີຫໍ້, ເຊິ່ງນອກຈາກເປັນການລະເມີດລະບຽບກົດໝາຍແລ້ວ, ຍັງເຮັດໃຫ້ພາກລັດສູນເສຍລາຍຮັບງົບປະມານຈາກການເກັບພາສີ-ອາກອນແຕ່ລະປີເກືອບ 100 ຕື້ກີບ. ສະນັ້ນ ມາດຕະການປັບຂຶ້ນອາກອນຊົມໃຊ້ໃນອັດຕາດັ່ງກ່າວ, ນອກຈາກຈະຊ່ວຍໃຫ້ລັດສາມາດເກັບພາສີ-ອາກອນໄດ້ເພີ່ມຂຶ້ນແລ້ວ, ຍັງເປັນການປົກປ້ອງສຸຂະພາບຂອງປະຊາຊົນທີ່ໄດ້ຮັບຜົນກະທົບຈາກຢາສູບອີກດ້ວຍ.

ກະຊວງອຸດສາຫະກໍາແລະການຄ້າໃຫ້ຮູ້ວ່າ: ໃນຄໍາສັ່ງເລກທີ 1791/ອຄ.ກຄພນລົງວັນທີ 18 ທັນວາ 2018 ວ່າດ້ວຍການຄວບຄຸມຜະລິດຕະພັນຢາສູບດ້ວຍການກໍານົດລາຄາຂາຍຍ່ອຍແລະຂາຍຍົກຕໍ່າສຸດ, ເຊິ່ງໄດ້ມີການກໍານົດລາຄາຂາຍຍ່ອຍພາຍໃນແລະຜະລິດຕະພັນຢາສູບທີ່ນໍາເຂົ້າຈາກຕ່າງປະເທດເພື່ອຈໍາໜ່າຍໃນສປປລາວຕໍ່າສຸດບໍ່ຫລຸດ 4.000 ກີບຕໍ່ຊອງ, ກໍານົດລາຄາຂາຍຍົກສໍາລັບຜູ້ຜະລິດ,​ຜູ້ນໍາເຂົ້າແລະຕົວແທນຈໍາໜ່າຍບໍ່ໃຫ້ເກີນ 30.000 ກີບຕໍ່ຕຸດ.