ມາເລເຊຍ-ສິງກະໂປ ເຫັນພ້ອມຫາທາງ ຫລຸດຜ່ອນຂໍ້ຂັດແຍ່ງ ທາງທະເລ-ທາງອາກາດ
ລັດຖະມົນຕີຕ່າງປະເທດມາເລເຊຍ ແລະ ສິງກະໂປ ຖະແຫລງຮ່ວມກັນໃນວັນທີ 8 ມັງກອນວ່າ: ທັງສອງປະເທດເຫັນພ້ອມເລື່ອງຈະຫາທາງຫລຸດຜ່ອນຂໍ້ຂັດແຍ່ງທາງທະເລ ແລະ ທາງອາກາດລະຫວ່າງກັນ.
ທ່ານ ວິວຽນ ບາລາກິດນັນ ລັດຖະມົນຕີຕ່າງປະເທດສິງກະໂປ ແລະ ທ່ານ ໄຊຟຸດດິນ ອັບດຸນລາ ລັດຖະມົນຕີຕ່າງປະເທດມາເລເຊຍ ອອກຖະແຫລງການຮ່ວມຫລັງສຳເລັດການຫາລື ຢູ່ສິງກະໂປ ໃນວັນທີ 8 ມັງກອນວ່າ: ທັງສອງປະເທດເນັ້ນເລື່ອງຍຶດໝັ້ນຕໍ່ການຮັກສາການພົວພັນອັນສຳຄັນລະຫວ່າງສອງປະເທດ ແລະ ປັບປຸງການພົວພັນທະວີພາຄີໃຫ້ດີຂຶ້ນບົນພື້ນຖານຄວາມສະເໝີພາບ ແລະ ໃຫ້ກຽດກັນ, ເຫັນພ້ອມເລື່ອງຄວາມສຳຄັນຂອງການຮັກສາສະຖານະການໃຫ້ສະຫງົບຮຽບຮ້ອຍ ເພື່ອເປີດທາງໃຫ້ມີການຫາລືທ່າມກາງບັນຍາກາດທີ່ສ້າງສັນ.
ລາຍງານລະບຸວ່າ: ມາດຕະການທີ່ທັງສອງຝ່າຍເຫັນພ້ອມ ປະກອບມີການໃຫ້ທັງສອງຝ່າຍງົດດຳເນີນການໃດໆຊົ່ວຄາວພ້ອມກັນ, ຫລັງຈາກມາເລເຊຍຂະຫຍາຍຂອບເຂດທ່າເຮືອຍະໂຮບາຣູໄປລ່ວງລ້ຳນ່ານນ້ຳສິງກະໂປໃນວັນທີ 25 ຕຸລາ ເຮັດໃຫ້ສິງກະໂປຕອບໂຕ້ດ້ວຍການຂະຫຍາຍຂອບເຂດທ່າເຮືອຂອງຕົນເອງໃຫ້ຄວບຄຸມນ່ານນ້ຳຂອງປະເທດທັງໝົດນັບແຕ່ວັນທີ 6 ທັນວາ ແລະ ງົດໃຊ້ຂະບວນການລົງຈອດແບບໃໝ່ຢູ່ສະໜາມບິນເຊີເລີຕາ ທາງຕາເວັນອອກສຽງເໜືອຂອງສິງກະໂປທີ່ມາເລເຊຍຄັດຄ້ານວ່າຈະກະທົບຕໍ່ການພັດທະນາສິ່ງປຸກສ້າງໃນເມືອງປາຊີ ກູດັງ ລັດຍະໂຮຂອງມາເລເຊຍ ເພາະຈຳກັດຄວາມສູງຂອງອາຄານທີ່ຈະສ້າງໃໝ່ ເຊິ່ງຢູ່ໃນເສັ້ນທາງລົງຈອດເຮືອບິນ. ນອກຈາກນີ້ ຍັງເຫັນພ້ອມເລື່ອງຈະຕັ້ງຄະນະເຮັດວຽກຂຶ້ນມາຫາລືເລື່ອງຂອບເຂດທ່າເຮືອຂອງທັງສອງຝ່າຍ.
ການພົບກັນໃນຄັ້ງນີ້ມີຂຶ້ນຫລັງຈາກຮອງນາຍົກລັດຖະມົນຕີ ຕຽວ ຊີຮຽນ ແລະ ທ່ານ ເຮງ ສະວີກິດ ລັດຖະມົນຕີການເງິນສິງກະໂປ ເຂົ້າພົບນາຍົກລັດຖະມົນຕີ ມະຫາເທ ໂມຮຳໝັດ ຂອງມາເລເຊຍ ຢູ່ນະຄອນຫລວງປຸຕຣາຈາຢາ ໃນທ້າຍປີຜ່ານມາ. ຈາກນັ້ນ ນາຍົກລັດຖະມົນຕີ ລີ ຊຽນລຸງ ຂອງສິງກະໂປ ກ່າວໃນສານວັນຂຶ້ນປີໃໝ່ສາກົນວ່າ: ບັນຫາກ່ຽວກັບມາເລເຊຍຈະໄດ້ຮັບການດຳເນີນການຢ່າງໃຈເຢັນ ແລະ ສ້າງສັນ. ຂະນະທີ່ນາຍົກລັດຖະມົນຕີ ມະຫາເທ ກ່າວວ່າ: ໝັ້ນໃຈວ່າບັນຫາສອງປະເທດຈະແກ້ໄຂໄດ້ດ້ວຍການເຈລະຈາ.
