ລາວ-ອົດສະຕຣາລີ ຫາລື​ວຽກ​ງານ​ພັດທະນາ​ຊັບພະຍາກອນ​ມະນຸດ ປະ​ຈໍາປີ 2019

- advert banner 728 90 728x90 - ລາວ-ອົດສະຕຣາລີ ຫາລື​ວຽກ​ງານ​ພັດທະນາ​ຊັບພະຍາກອນ​ມະນຸດ ປະ​ຈໍາປີ 2019

    ກອງ​ປະຊຸມ​ສົນທະນາ​ຫາລື​ກ່ຽວ​ກັບ​ການ​ພັດທະ​ນາ​ຊັບພະຍາ​ກອນ​ມະນຸດ ລະຫວ່າງລາວ ແລະ ອົດສະຕຣາລີ ​ໄດ້ຈັດຂຶ້ນໃນວັນທີ 8 ມັງກອນນີ້, ​ ໂດຍ​ການ​ເປັນ​ປະທານ​ຮ່ວມ​ຂອງ​ທ່ານ ກອງ​ສີ ​ແສງ​ມະນີ ຮອງ​ລັດຖະ​ມົນຕີ​ກະຊວງ​ສຶກສາ​ທິການ ​ແລະ ກິລາ ​ແລະ ທ່ານ ຈີນ ​ເບີ​ນາດ ຄາຣາດສ​ໂຄ ​ເອກ​ອັກຄະ​ລັດຖະທູດ​ອົດ​ສະ​ຕາ​ລີ ປະ​ຈໍາລາວ, ມີ​ຜູ້ຕາງໜ້າ​ຈາກ​ກະຊວງ​ແຜນການ​ ແລະ​ ການ​ລົງ​ທຶນ, ກະຊວງ​ແຮງ​ການ ​ແລະ ສະ​ຫວັດ​ດີກາ​ນສັງຄົມ ແລະ ຄະນະ​ຮັບຜິດຊອບ​ວຽກ​ງານ​ກ່ຽວ​ຂ້ອງຕ່າງໆ​ເຂົ້າຮ່ວມນໍາດ້ວຍ​.

- lattana 1 - ລາວ-ອົດສະຕຣາລີ ຫາລື​ວຽກ​ງານ​ພັດທະນາ​ຊັບພະຍາກອນ​ມະນຸດ ປະ​ຈໍາປີ 2019

    ໃນ​ກອງປະຊຸມ, ທ່ານ ກອງ​ສີ​ ແສງ​ມະນີ ​ ​ໄດ້ມີຄໍາເຫັນວ່າ: ເພື່ອ​ການ​ຜັນ​ຂະຫຍາຍ​​ຜົນ​ຂອງ​ກອງ​ປະຊຸມ​ໂຕະມົນ ປະ​ຈໍາປີ 2017 ​ແລະ ກອງ​ປະຊຸມ​ຄະນະ​ຊີ້​ນໍາ​ການຈັດ​ຕັ້ງປະຕິບັດ​ໂຄງການ​ຄັ້ງ​ທີ 5 ຂ​ອງ​ແຜນ​ງາ​ນການ​ພັດທະນາ​ຊັບພະຍາກອນ​ມະນຸ​ດລາວ​-ອົດສະຕຣາລີ ຄັ້ງວັນ​ທີ 31 ມັງກອນ 2018 ຜ່ານມາ ແລະ ​ແນ​ໃສ່​ການຈັດ​ຕັ້ງປະຕິບັດ​ຍຸດ​ທະ​ສາດ​ການ​ພັດທະ​ນາ​ຊັບພະຍາກອນ​ມະນຸ​ດ​ແຫ່ງ​ຊາດ ຮອດ​ປີ 2025 ​ແລະ ​ແຜນ​ພັດທະນາ​ເສດຖະກິດ-​ສັງຄົມ​ແຫ່ງ​ຊາດ ຄັ້ງ​ທີ 5, ລັດຖະບານລາ​ວ ​ໄດ້​ເອົາ​ໃຈ​ໃສ່​ການ​ກໍ່ສ້າງ ​ແລະ ພັດທະນາ​ຊັບພະຍາກອນ​ມະນຸດ ​ໂດຍ​ສະ​ເພາະ​​ແມ່ນ​ກາ​ນະ​ພັດທະນາ​ກໍາລັງ​ແຮງ​ງານ​ໃຫ້​ມີ​ ປະ​ສິດທິພາ​ບ ​ເພື່ອ​ຕອບ​ສະໜອງ​ຄວາມ​ຕ້ອງ​ການ​ຂອງ​ຕະຫຼາດ​ແຮງ​ງານ​ທັງ​ພາຍ​​ໃນ ​ແລະ ຕ່າງປະ​ເທດ, ຄຽງ​ຄູ່​​ກັບ​ການ​ຊ່ວຍ​ເຫຼືອ​ຈາກບັນດາ​ປະ​ເທດ​ເພື່ອນ​ມິດ ​ແລະ ຄູ່​ຮ່ວມ​ພັດທະນາ​ເຊັ່ນ: ລັດຖະບານ​ອົດ​ສະ​ຕຣາລີ, ຈີນ, ຫວຽດນາມ, ​ໄທ, ຍີ່ປຸ່ນ, ​ເກົາຫຼີ, ສິງ​ກະ​ໂປ ​ແລະ ອີກ​ຫຼາຍໆ​ປະ​ເທດ ທີ່​ໄດ້ສຸມ​​ທຶນຮອນ, ສະຕິ​ປັນຍາ ​ແລະ ​ເຫື່ອ​ແຮງ ຢ່າງ​ຕັ້ງໜ້າ​ເຂົ້າ​​ໃນ​ການ​ພັດທະນາ​ຊັບພະຍາກອນ​ມະນຸດ​ໃຫ້​ແກ່ລາວ.

    ການ​ລົງທຶນ​ໃສ່​ການ​ສຶກສາ ​ແລະ ການ​ພັດທະນາ​ສີມື​ແຮງ​ງານ ​ເພື່ອ​ພັດທະນາ​ຊັບພະ​ຍາກອນ​ມະນຸດ​ແມ່ນ​ມີ​ຄຸນຄ່າ ​ແລະ ມີ​ປະສິດທິ​ຜົນ​ສູງ ຕໍ່​ການ​ພັດທະນາ​ເສດຖະກິດ-​ສັງຄົມ ​ແຕ່ລະ​ໄລຍະ, ​ເພາະ​ຜູ້​ທີ່​ສໍາ​ເລັດ​ການ​ສຶກສາ ຈາກ​ພາຍ​ໃນ​ ​ແລະ ຕ່າງປະ​ເທ​ດ ​ໄດ້​ມີ​ຄວາມ​ຮູ້, ຄວາມ​ສາມາດ, ທັກ​ສະ ​ແລະ ປະສົບ​ການ​ທີ່​ສາມາດ​ຕອບ​ສະໜອງ​ຄວາມ​ຕ້ອງການ ຂອງ​ຕະຫຼາດ​ແຮງ​ງານ​ພາຍ​ໃນ​ປະ​ເທດ ​ແລະ ພາກ​ພື້ນໄດ້.

    ໃນກອງ​ປະຊຸມ​, ໄດ້​ຮັບ​ຟັງ​ການ​ນໍາ​ສະ​ເໜີ​ຄວາມ​ຄືບ​ໜ້າ ການຈັດ​ຕັ້ງ​ປະຕິບັດ​ຍຸດ​ທະ​ສາ​ດການ​ພັດທະນາ​ຊັບພະຍາກອນ​ມະນຸດ​ແຫ່ງ​ຊາດ ຮອດ​ປີ 2025: ຜົນ​ໄດ້​ຮັບ​ຈາກ​ກອງ​ປະຊຸມ​ໂຕະມົນ​ປີ 2017; ລາຍ​ງານ​ການ​ສ້າງ​ແບບ​ຈໍາລອງ​ການ​ພະຍາກອນ​ຕະຫຼາດ​ແຮງ​ງານ, ນໍາ​ສະ​ເໜີ​ຄວາມ​ຄືບ​ໜ້າການ​ພັດທະນາ​ຍຸດ​ທະ​ສາດ​ການ​ຝຶກ​ອົບຮົມ​ພາສາ​ອັງກິດ​ໃຫ້​ກັບ​ພະນັກງານ​ລັດຖະກອນ ​ແລະ ບັນຫາກ່ຽວຂ້ອງອື່ນໆອີກ.