ສູນກາງ ແລະ ທ້ອງຖິ່ນ ຮ່ວມຫາລືວຽກງານສົ່ງເສີມ ແລະ ຄຸ້ມຄອງການລົງທຶນ

- advert banner 728 90 728x90 - ສູນກາງ ແລະ ທ້ອງຖິ່ນ ຮ່ວມຫາລືວຽກງານສົ່ງເສີມ ແລະ ຄຸ້ມຄອງການລົງທຶນ

ໃນວັນທີ 9 ມັງກອນນີ້, ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ຂັ້ນສູນກາງ, ຂັ້ນແຂວງ ແລະ ນະຄອນຫຼວງ ໄດ້ຈັດກອງປະຊຸມ ປະຈໍາປີຂອງຕົນ, ຂຶ້ນຢູ່ສູນການຮ່ວມມືສາກົນ ແລະ ການຝຶກອົບຮົມ (ICTC) ນະຄອນຫຼວງວຽງຈັນ, ໂດຍການເປັນປະທານ ຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນຂັ້ນສູນກາງ (ຄລທ.ສ), ມີທ່ານລັດຖະມົນຕີກະຊວງແຜນການ ແລະ ການລົງທຶນ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ມີບັນດາເຈົ້າແຂວງ, ຮອງເຈົ້າແຂວງເຂົ້າຮ່ວມ.

- lattana 1 - ສູນກາງ ແລະ ທ້ອງຖິ່ນ ຮ່ວມຫາລືວຽກງານສົ່ງເສີມ ແລະ ຄຸ້ມຄອງການລົງທຶນ

ທ່ານລັດຖະມົນຕີກະຊວງແຜນການ ແລະ ການລົງທຶນ ຮອງປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນຂັ້ນສູນກາງ ໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນເສດຖະກິດ-ສັງຄົມໃນປີ 2018 ຜ່ານມາເຫັນວ່າໄດ້ຮັບຜົນສໍາເລັດຕາມຄາດໝາຍທີ່ກຳນົດໄວ້ໃນແຜນໂດຍສະເພາະ ຍອດຜະລິດຕະພັນພາຍໃນ (GDP) ບັນລຸໄດ້ 152.425 ຕື້ກີບ,​ ສະເລ່ຍຕໍ່ຫົວຄົນບັນລຸ 2.599 ໂດລາສະຫະລັດ, ລວມຍອດລາຍໄດ້ແຫ່ງຊາດຕໍ່ຫົວຄົນ (GNI) 2.209 ໂດລາສະຫະລັດ, ການເກັບລາຍຮັບງົບປະມານແມ່ນບັນລຸໄດ້ຕາມແຜນການ ແລະ ການຄຸ້ມຄອງບໍລິຫານລັດ ຕາມກົດໝາຍໃນຂະແໜງການໄດ້ຮັບການປັບປຸງດີຂຶ້ນ, ໃນນັ້ນວຽກງານການສົ່ງເສີມການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ຊຶ່ງໃນໄລຍະ 8 ເດືອນຂອງປີ 2018ບັນລຸໄດ້ ເຖິງ 3,8 ຕື້ໂດລາສະຫະລັດ.

ສ່ວນວຽກງານການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ມາຮອດປັດຈຸບັນ ໄດ້ມີບັນດາບໍລິສັດເຂົ້າມາລົງທຶນ ແລະ ຈົດທະບຽນແລ້ວ 593 ບໍລິສັດ, ໃນນັ້ນ, ຢູ່ພາຍໃນມີ 89 ບໍລິສັດ, ຕ່າງປະເທດ 474 ບໍລິສັດ ແລະ ຮ່ວມກັບຕ່າງປະເທດ 29 ບໍລິສັດ. ໃນນີ້ເຂດທີ່ມີການລົງທຶນຫຼາຍກວ່າໝູ່ແມ່ນ ຂສພ ສາມຫລ່ຽມຄໍາ ມີ 147 ບໍລິສັດ, ບໍ່ເຕັນແດນງາມ 128 ບໍລິສັດ, ຂສພ ສະຫວັນ-ເຊໂນ 117 ບໍລິສັດ, ເຂດກວມລວມໄຊເສດຖາ 48 ບໍລິສັດ, ເຂດນິຄົມອຸດສາຫະກໍາ ແລະ ການຄ້າວຽງຈັນ-ໂນນທອງ 47 ບໍລິສັດ, ຂສພ ຈໍາປາສັກ 33 ບໍລິສັດ ແລະ ຂສພ ອື່ນໆ 73 ບໍລິສັດ. ໃນປີ 2018  ເຂດເສດຖະກິດດັ່ງກ່າໃນທົ່ວປະເທດສາມາດປະຕິບັດພັນທະເຂົ້າລັດທັງໝົດ 13 ລ້ານກວ່າໂດລາສະຫະລັດ ທຽບໃສ່ປີຜ່ານມາໄດ້ລື່ນ 3 ເທົ່າຕົວ. ໄດ້ມີແຮງງານເຂົ້າໃໝ່ທັງໝົດ 8 ພັນກວ່າຄົນ, ໃນນັ້ນ, ຕ່າງປະເທດ 6 ພັນກວ່າຄົນ ແລະ ລາວ 1 ພັນກວ່າຄົນ. ໄດ້ນໍາເຂົ້າວັດຖຸດິບ, ເຄື່ອງກົນຈັກ ແລະ ອຸປະກອນ ເພື່ອມາຮັບໃຊ້ການຜະລິດ ແລະ ກໍ່ສ້າງພື້ນຖານໂຄງລ່າງ ມູນຄ່າ 430 ລ້ານກວ່າໂດລາສະຫະລັດ. ສ່ວນການສົ່ງອອກສິນຄ້າ ມີມູນຄ່າ 249 ລ້ານກວ່າໂດລາສະຫະລັດ, ການສົ່ງອອກສ່ວນໃຫຍ່ແມ່ນສິນຄ້າປະເພດ ສິ້ນສ່ວນເອເລັກໂຕນິກ, ເລນແວ່ນຕາ, ກ້ອງຖ່າຍຮູບ, ຜະລິດຕະພັນ ເຄື່ອງນຸ່ງຫົ່ມ, ວິກຜົນ ແລະ ເຄື່ອງຫຼິ້ນເດັກນ້ອຍ.

ສໍາລັບແຜນພັດທະນາເສດຖະກິດ-ສັງຄົມປີ 2019 ນີ້, ລັດຖະບານໄດ້ມີຄາດໝາຍສູ້ຊົນ ໂດຍກໍານົດລວມຍອດຜະລິດຕະພັນພາຍໃນ (GDP) ໃຫ້ຂະຫຍາຍຕົວ 6,5% ຂຶ້ນໄປ. ໃນນັ້ນ, ວຽກງານສົ່ງເສີມການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໃຫ້ບັນລຸ 23 ຕື້ກວ່າກີບ ກວມເອົາ 52,06% ຂອງທຶນທັງໝົດ (ເທົ່າກັບ 13,95% ຂອງ GDP).