ຮັບຮອງຫລາຍບັນຫາສຳຄັນ ໃນການຄຸ້ມຄອງຄົນຕ່າງປະເທດ ທີ່ເຄື່ອນໄຫວຢູ່ ລາວ

- advert banner 728 90 728x90 - ຮັບຮອງຫລາຍບັນຫາສຳຄັນ ໃນການຄຸ້ມຄອງຄົນຕ່າງປະເທດ ທີ່ເຄື່ອນໄຫວຢູ່ ລາວ

ກອງປະຊຸມປຶກສາຫາລື ກ່ຽວກັບແຜນສືບຕໍ່ແກ້ໄຂຄົນຕ່າງປະເທດ ທີ່ເຄື່ອນໄຫວບໍ່ຖືກ ຕ້ອງຕາມກົດໝາຍຂອງ ສປປ ລາວ ທົ່ວປະເທດ ຄັ້ງວັນທີ 7-8 ມັງກອນ 2019 ໄດ້ຮັບຮອງຫລາຍບັນຫາສຳຄັນຕົ້ນຕໍ ເພື່ອນຳໄປຈັດຕັ້ງປະຕິບັດ ໃນການຄຸ້ມຄອງຄົນຕ່າງປະເທດທີ່ເຄື່ອນໄຫວຢູ່ ສ ປປ ລາວ ໃຫ້ຖືກຕ້ອງຕາມກົດໝາຍ ແລະ ລະບຽບການເທື່ອລະກ້າວ.

- lattana 1 - ຮັບຮອງຫລາຍບັນຫາສຳຄັນ ໃນການຄຸ້ມຄອງຄົນຕ່າງປະເທດ ທີ່ເຄື່ອນໄຫວຢູ່ ລາວ

       ກອງປະຊຸມເຫັນດີເປັນເອກະພາບ ຕີລາຄາສະພາບການຈັດຕັ້ງປະຕິບັດຄຳສັ່ງເລກທີ 62/ນຍ ໂດຍການເປັນເຈົ້າການ ຂອງຂະແໜງການປ້ອງກັນຄວາມສະຫງົບ ແລະ ຂະແໜງການແຮງງານ ແລະ ສະຫວັດດີການສັງຄົມ, ໂດຍປະສານງານກັບຂະແໜງການທີ່ກ່ຽວຂ້ອງ ທັງຢູ່ຂັ້ນສູນກາງ ແລະ ທ້ອງຖິ່ນ, ເຫັນດີໃຫ້ຫັນການຄຸ້ມຄອງຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຢູ່ ສປປ ລາວ ເຂົ້າສູ່ກົດໝາຍຢ່າງເປັນເອກະພາບໃນທົ່ວປະເທດ ເພື່ອສ້າງຄວາມສະຫງົບ ແລະ ຄວາມເປັນລະບຽບຮຽບຮ້ອຍທົ່ວສັງຄົມ. ກອງປະຊຸມເຫັນດີເປັນເອກະພາບ ຮັບຮອງເອົາແຜນການ ສືບຕໍ່ແກ້ໄຂບັນຫາຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ ແລະ ຂໍ້ຕົກລົງຮ່ວມຂອງລັດຖະ ມົນຕີ ກະຊວງປ້ອງກັນຄວາມສະຫງົບ ແລະ ກະຊວງແຮງງານ ແລະ ສະຫວັດດີການສັງຄົມ ວ່າດ້ວຍການເພີ່ມທະວີຄວາມຮັບຜິດຊອບ ໃນການແກ້ໄຂຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ, ເຫັນດີເປັນເອກພາບໃຫ້ສາມຂະແໜງການ ຄື: ຂະແໜງແຮງງານ ແລະ ສະຫວັດດີການສັງຄົມ, ຂະແໜງປ້ອງກັນຄວາມສະຫງົບ ແລະ ຂະແໜງອຸດສາຫະກຳ ແລະ ການຄ້າ ສົມທົບກັບຂະແໜງການທີ່ກ່ຽວຂ້ອງ ຈັດຕັ້ງປະຕິບັດແຜນການດັ່ງກ່າວຕາມກຳນົດເວລາ ແລະ ໃຫ້ລາຍງານຜົນຫາລັດຖະບານ ເປັນແຕ່ລະໄລຍະ ແລະ ເຫັນດີເປັນເອກະພາບ ໃຫ້ທຸກກະຊວງ, ຂະ  ແໜງການ ແລະ ອົງການປົກຄອງທ້ອງຖິ່ນທຸກຂັ້ນ ຕ້ອງມີການປະສານງານ ແລະ ຮ່ວມມືກັນເປັນຢ່າງດີ ຫລີກເວັ້ນແບບຕ່າງຝ່າຍຕ່າງປະຕິບັດ, ໃນກໍລະນີລະບຽບການຂອງຂະແໜງການຫາກບໍ່ສອດ ຄ່ອງກັນໃນບາງເນື້ອໃນ ຫລື ມີຄວາມເຂົ້າໃຈຕ່າງກັນ ກໍໃຫ້ຮີບຮ້ອນພ້ອມກັນແກ້ໄຂ ຫລື ລາຍງານຂັ້ນເທິງຖັດຕົນເພື່ອແກ້ໄຂ.

      ໃນຂະນະດຽວກັນ, ກໍໃຫ້ສືບຕໍ່ໂຄສະນາເຜີຍແຜ່ກົດໝາຍ ແລະ ນິຕິກຳຕ່າງໆ ທີ່ກ່ຽວພັນເຖິງການຄຸ້ມຄອງຄົນຕ່າງປະເທດ ເວົ້າລວມ, ເວົ້າສະເພາະ ແມ່ນຄົນຕ່າງປະເທດທີ່ເຮັດວຽກ, ປະກອບອາ ຊີບ ແລະ ດຳເນີນທຸລະກິດຢູ່ ສປປ ລາວ ໃຫ້ກວ້າງຂວາງ ແລະ ທົ່ວເຖິງ ລວມທັງພາກລັດ, ເອກະຊົນ, ອົງການປົກຄອງທຸກຂັ້ນ ແລະ ພົນລະເມືອງລາວທຸກຄົນ ເພື່ອສ້າງສະຕິຊາດ ສະຕິຕໍ່ກົດໝາຍ.

      ນອກຈາກນັ້ນ, ກອງປະຊຸມ ຍັງໄດ້ຮຽກຮ້ອງໃຫ້ທຸກພາກສ່ວນຂັ້ນສູນກາງ, ທ້ອງຖິ່ນ, ອົງການຈັດຕັ້ງສາກົນ ແລະ ພົນລະເມືອງລາວທຸກທົ່ວໜ້າ ຈົ່ງໃຫ້ການຮ່ວມມື, ມີສ່່ວນຮ່ວມໃນການຈັດຕັ້ງປະຕິບັດກົດໝາຍ ໃນການຄຸ້ມຄອງຄົນຕ່າງປະເທດ ທີ່ເຄື່ອນໄຫວຢູ່ ສປປ ລາວ ຢ່າງເປັນເຈົ້າການ. ບັນຫາຕ່າງໆທີ່ເກີດຂຶ້ນຢູ່ບ່ອນໃດ, ສະຖານທີ່ໃດ ກໍຮີບຮ້ອນເປັນເຈົ້າການແກ້ໄຂຢ່າງວ່ອງໄວ, ທັນການ ແລະ ມີຄວາມຮັບຜິດຊອບສູງ. ພ້ອມດຽວກັນນັ້ນ, ທຸກຂະແໜງການ ແລະ ອົງການປົກຄອງທ້ອງຖິ່ນທຸກຂັ້ນ ຕ້ອງຜັນຂະຫຍາຍຈັດຕັ້ງປະຕິບັດ ຕາມແຜນການ ແລະ ຂໍ້ຕົກລົງສະບັບນີ້ຢ່າງເອົາໃຈໃສ່, ໂດຍການອອກແຈ້ງການ ຫລື ຄຳສັ່ງແນະນຳໄປຍັງສາຍຕັ້ງຂອງຕົນ ເພື່ອຈັດຕັ້ງປະຕິບັດພ້ອມທັງໃຫ້ມີການສະຫລຸບຕີລາຄາ ແລະ ລາຍງານຕໍ່ວິຊາການ ຮ່ວມສອງກະຊວງຢ່າງໜ້ອຍສອງເດືອນຕໍ່ຄັ້ງ ເພື່ອຈະໄດ້ສະຫລຸບຜົນການຈັດຕັ້ງປະຕິບັດແຜນການ ຕໍ່ຫ້ອງວ່າການສຳນັກງານນາຍົກ ລັດຖະມົນຕີໃນແຕ່ລະໄລຍະ.