ຝຶກສະໝອງແນວໃດໃຫ້ເຊົາວິຕົກກັງວົນ

- advert banner 728 90 728x90 - ຝຶກສະໝອງແນວໃດໃຫ້ເຊົາວິຕົກກັງວົນ

          ສຸຂະພາບຈິດຈະໄດ້ຮັບຜົນກະທົບຈາກຄວາມວິຕົກກັງວົນ ເຊິ່ງເປັນສິ່ງອັນຕະລາຍຫລາຍ, ບາງຄົນບອກວ່າເຮົາສາມາດ ຫລີກເວັ້ນໄດ້ໂດຍການຝຶກສະໝອງໃຫ້ເຊົາວິຕົກກັງວົນ  ເນື່ອງຈາກມັນເປັນພຽງແຕ່ນິໄສຢ່າງໜຶ່ງ, ຂະນະທີ່ບາງຄົນຄິດວ່າເປົ້າ ໝາຍຂອງມັນແມ່ນເພື່ອຊ່ວຍສະໝອງໃນການຮຽນຮູ້ຄວາມຜິດພາດທີ່ຜ່ານມາ ແລະ ພ້ອມທີ່ຈະເປີດຮັບປະສົບການໃໝ່ໆ. ຄວາມ ແຕກຕ່າງລະຫ່ວາງອາການຊຶມເສົ້າກັບຄວາມວິຕົກກັງວົນແມ່ນ ຄວາມຕົກກັງວົນຈະເກີດຂຶ້ນເມື່ອສະໝອງເນັ້ນເປົ້າໄປຫາເຫດການໃນອະນາຄົດທີ່ເຮົາບໍ່ສາມາດຄວບຄຸມໄດ້, ສ່ວນອາການຊຶມເສົ້າແມ່ນອາການເມື່ອສະໝອງສົນໃຈສິ່ງທີ່ເກີດຂຶ້ນໄດ້ອະດີດ ເຊິ່ງເຮົາກໍຮູ້ສຶກເສຍໃຈ ແລະຕ້ອງການປ່ຽນແປງມັນ. ນີ້ແມ່ນວິທີຝຶກສະໝອງເພື່ອກຽມຮັບມືກັບເຫດການທີ່ຈະຜ່ານເຂົ້າມາ ລວມເຖິງວິທີຢຸດອາການວິຕົກກັງວົນ :

- lattana 1 - ຝຶກສະໝອງແນວໃດໃຫ້ເຊົາວິຕົກກັງວົນ

     1. ຈົດບັນທຶກ ແລະ ເຊົາກັງວົນ :ວິທີນີ້ໄດ້ຮັບການພິສູດແລ້ວວ່າສາມາດຝຶກສະໝອງເພື່ອໃຫ້ເຊົາວິຕົກກັງວົນທີ່ໄດ້ຜົນດີຫລາຍທີ່ສຸດ, ເລີ່ມຈາກຂຽນລົງໄປໃນເຈ້ຍ ຫລື ໃສ່ອຸປະກອນອີເລັກໂຕຣນິກ ຈາກນັ້ນສະໝອງຂອງທ່ານຈະຮູ້ສຶກຜ່ອນຄາຍ ແລະ ບໍ່ຕ້ອງເປືອງພະລັງງານໃນການຈື່ຈຳສິ່ງຕ່າງໆ. ດັ່ງນັ້ນ ຫາກທ່ານຢາກຮູ້ວ່າຈະຕ້ອງກຽມຫຍັງແດ່ເມື່ອໝູ່ມາຢາມເຮືອນ ກໍພຽງແຕ່ຂຽນສິ່ງທີ່ຕ້ອງກຽມ ແລະ ສະໝອງຈະຮູ້ວ່ານີ້ແມ່ນສິ່ງທີ່ຕ້ອງຈື່ຈຳ ພ້ອມກັບຫາວິທີແກ້ໄຂແທນທີ່ຈະມາກັງວົນວ່າບໍ່ໃຫ້ລືມ. ແລ້ວການຂຽນຊ່ວຍໄດ້ແນວໃດ ? ກຸ່ມຜູ້ຊ່ຽວຊານພົບຫລັກຖານວ່າຜູ້ທີ່ມີອາການວິຕົກກັງວົນຮຸນແຮງຈະມີພຶດຕິກຳຫລີກເວັ້ນບັນຫາຄືກັນ ພວກເຂົາຈຶ່ງທົດລອງໂດຍໃຫ້ຜູ້ເຂົ້າຮ່ວມຂຽນຜົນໄດ້ຮັບຈາກເຫດການທີ່ພວກເຂົາກັງວົນລົງໃສ່ເຈ້ຍທັງໝົດ 3 ຂໍ້ ຈາກນັ້ນພວກເຂົາກໍປະມວນຜົນເພື່ອຫາວິທີແກ້ໄຂ ປະກົດວ່າ : ຜົນທີ່ໄດ້ບໍ່ມີຄວາມເປັນຮູບປະທຳ, ຜູ້ເຂົ້າຮ່ວມກໍຍິ່ງມີອາການວິຕົກກັງວົນ ເຊິ່ງພິສູດແລ້ວວ່າຄວາມວິຕົກກັງວົນບໍ່ໄດ້ມີສ່ວນຊ່ວຍໃນການແກ້ໄຂບັນຫາເລີຍ, ແຕ່ສະແດງໃຫ້ເຫັນວ່ານີ້ແມ່ນ  ການຫລີກໜີບັນຫາໃນການຮັບຮູ້.

     2. ຝຶກສະມາທິເພື່ອໃຫ້ສະໝອງປອດໂປ່ງ : ກຸ່ມຜູ້ຊ່ຽວຊານກ່າວວ່າ ການຝຶກສະມາທິມີປະໂຫຍດຫລາຍ ແລະ ສາມາດຫລຸດ ລະດັບຄວາມວິຕົກກັງວົນລົງໄດ້, ແຕ່ຄົນສ່ວນຫລາຍຄິດວ່າການຝຶກສະມາທິຕ້ອງໃຊ້ເວລາດົນ ແລະ ພວກເຂົາບໍ່ມີເວລາ, ແຕ່ຄວາມຈິງແລ້ວ ທ່ານສາມາດຫລັບຕາ ແລະ ຢູ່ນິ້ງໆໄດ້ຢ່າງໜ້ອຍ 30 ວິນາທີກໍໃຊ້ໄດ້ແລ້ວ. ຂະບວນການຜ່ອນຄາຍ ແລະ ຢູ່ໃຫ້ຫ່າງຈາກອາການວິຕົກກັງວົນ ແລະ ຄວາມເຄັ່ງຄຽດເປັນຂັ້ນຕອນທຳອິດໃນການຝຶກສະໝອງເພື່ອຫລີກເວັ້ນຄວາມວິຕົກກັງວົນ ເຖິງວ່າທ່ານອາດຈະນຶກເຖິງສິ່ງທ່ີເຮັດໃຫ້ທ່ານຮູ້ສຶກກັງວົນໃນລະຫ່ວາງທີ່ຝຶກສະມາທິ, ແຕ່ນີ້ແມ່ນເລື່ອງປົກກະຕິ. ກຸ່ມຜູ້ຊ່ຽວຊານດ້ານຝຶກສະໝອງ ແນະນຳວ່າທ່ານຄວນນຶກເຖິງພາບບັນຫາທີ່ເຮັດໃຫ້ທ່ານຮູ້ສຶກກັງວົນໄປພ້ອມໆກັບນຶກເຖິງພາບ  ຕອນທີ່ທ່ານສະບາຍໃຈທີ່ໄດ້ເອົາຄວາມວິຕົກກັງວົນອອກໄປຈາກສະໝອງໄດ້ຢ່າງວ່ອງໄວ ແລະ ງ່າຍດາຍ.

3. ອອກກຳລັງກາຍເພື່ອເຮັດໃຫ້ສະໝອງ ແລະ ຮ່າງກາຍເຊົາວິຕົກກັງວົນ : ຄວາມວິຕົກກັງວົນຈະກະຕຸ້ນການເຮັດວຽກຂອງສະໝອງໃນການແກ້ໄຂບັນຫາວ່າຈະສູ້ ຫລື ໜີໄປ ມັນອາດອອກມາໃນຮູບແບບຂອງຄວາມຢ້ານ ເຊັ່ນ : ເມື່ອເສືອຈູ່ໂຈມທ່ານ ລະດັບອະດຣີນາລີນຈະແລ່ນຂຶ້ນສູງທັນທີ ແລະ ເຮັດໃຫ້ທ່ານຮູ້ສຶກຢ້ານຫລາຍບໍ່ຕ່າງຈາກຕອນທີ່ທ່ານຮູ້ສຶກວິຕົກກັງວົນ. ມີການສຶກສາໜຶ່ງພົບວ່າການອອກກຳລັງກາຍມີປະສິດທິພາບສູງໃນການບັນເທົາອາການທີ່ເກີດຈາກຄວາມວິຕົກກັງວົນໄດ້ ເຊັ່ນ : ອາການກະວົນກະວາຍໃຈ ເມື່ອລະດັບຄວາມເຄັ່ງຄຽດຫລຸດລົງ ສະໝອງກໍຈະພິຈາລະນາວ່າບໍ່ມີເລື່ອງທີ່ຕ້ອງໃຫ້ວິຕົກກັງວົນແລ້ວ ຮ່າງກາຍຂອງທ່ານກໍຈະບໍ່ມີອາການຕື່ນໂຕອີກຕໍ່ໄປ. ນອກຈາກການອອກກຳລັງກາຍຈະຊ່ວຍຫລຸດຄວາມດັນເລືອດແລ້ວ ຍັງຊ່ວຍຫລຸດຄວາມວິຕົກກັງວົນໄດ້ນຳ ດັ່ງນັ້ນ ເມື່ອທ່ານຮູ້ສຶກວິຕົກກັງວົນລອງຍ່າງຫລິ້ນປະມານ 5 – 10 ນາທີ, ຊື່ນຊົມທັດສະນີຍະພາບ ແລະ ເພີດເພີນໄປກັບສຽງທຳມະຊາດທີ່ຢູ່ອ້ອມໂຕ ລວມເຖິງຕັ້ງສະມາທິຢູ່ກັບການຫາຍໃຈ ແລະ ການເຄື່ອນ ໄຫວໄປພ້ອມໆກັນ.