ປີໃໝ່ລາວເລັ່ງແກ້ໄຂຂໍ້ຫຍຸ້ງຍາກໃນການດຳເນີນທຸລະກິດ

- advert banner 728 90 728x90 - ປີໃໝ່ລາວເລັ່ງແກ້ໄຂຂໍ້ຫຍຸ້ງຍາກໃນການດຳເນີນທຸລະກິດ

ເມື່ອບໍ່ດົນນີ້, ກະຊວງແຜນການ ແລະ ການລົງທຶນ ໄດ້ປຶກສາຫາລືການ ແກ້ໄຂຂອດຫຍຸ້ງຍາກໃນ 10 ຕົວຊີ້ວັດກ່ຽວກັບຄວາມສະດວກໃນການດໍາເນີນທຸລະກິດທີ່ທະນາຄານໂລກກໍານົດອອກ, ໂດຍການເປັນປະທານຂອງທ່ານສຸພັນ ແກ້ວມີໄຊລັດຖະມົນຕີກະຊວງດັ່ງກ່າວ.

- lattana 1 - ປີໃໝ່ລາວເລັ່ງແກ້ໄຂຂໍ້ຫຍຸ້ງຍາກໃນການດຳເນີນທຸລະກິດ

ກອງປະຊຸມໄດ້ຍົກໃຫ້ເຫັນວ່າ: ປັດຈຸບັນ, ສປປ ລາວ ຈັດຢູ່ອັນດັບທີ 154 ໃນ 190 ປະເທດທີ່ມີເສດຖະກິດເຂັ້ມແຂງແລະພາຍຫລັງມີຄໍາສັ່ງເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດຢູ່ ສປປ ລາວ.

ບັນດາຂະແໜງການຕ່າງໆກໍໄດ້ເອົາໃຈໃສ່ປັບປຸງຕາມຂອບເຂດສິດ ແລະ ໜ້າທີ່ຮັບຜິດຊອບຂອງຕົນແລະເຫັນວ່າມີຫລາຍນິຕິກໍາໄດ້ຮັບການປັບປຸງ ແລະສ້າງຂຶ້ນໃຫມ່ເພື່ອອໍານວຍຄວາມສະດວກໃຫ້ແກ່ການດໍາເນີນທຸລະກິດເປັນຕົ້ນ: ດຳລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະ ການສໍາປະທານຂອງ ສປປ ລາວ,ຂໍ້ຕົກລົງວ່າດ້ວຍການຂຶ້ນທະບຽນວິສາຫະກິດແລະໃນຕໍ່ໜ້ານີ້ການຂື້ນທະບຽນວິສາຫະກິດຈະງ່າຍກວ່າເກົ່າ, ໂດຍສະເພາະການອອກໃບທະບຽນວິສາຫະກິດພ້ອມເລກປະຈຳຕົວຜູ້ເສຍອາກອນ,ຍົກເລີກຂັ້ນຕອນການຂໍໃບອະນຸຍາດຄວັດກາປະທັບ ແລະ ຂັ້ນຕອນແຈ້ງຂື້ນທະບຽນຮູບແບບກາປະທັບ ໂດຍສາມາດນໍາໃຊ້ໃບທະບຽນວິສາຫະກິດໄປຄວັດຕາປະທັບໄດ້ເລີຍ, ຊຶ່ງບໍ່ຈໍາເປັນໃຊ້ໃບອະນຸຍາດອື່ນໆອີກ,ໄດ້ລົບລ້າງການຂໍອອກອະນຸຍາດປ້າຍຊື່ວິສາຫະກິດ, ວິສາຫະກິດສາມາດນໍາເອົາໃບທະບຽນວິສາຫະກິດໄປຜະລິດປ້າຍນໍາວິສາຫະກິດທີ່ໄດ້ຮັບອະນຸຍາດດໍາເນີນທຸລະກິດກ່ຽວກັບປ້າຍໄດ້ເລີຍ,ລົບລ້າງການນຳໃຊ້ແບບຟອມໃບຢັ້ງຢືນທີ່ຕັ້ງສຳນັກງານ ຫລື ສາຂາຂອງວິສາຫະກິດຄື: ລັດວິສາຫະກິດໄຟຟ້າລາວ ກໍໄດ້ຄົ້ນຄວ້າຫລຸດຈໍານວນເອກະສານ ແລະ ຂັ້ນຕອນໃນການຂໍອະນຸຍາດຕິດຕັ້ງໄຟຟ້າຈາກ 7 ຫລຸດລົງເຫລືອ3 ຂັ້ນຕອນ,ທະນາຄານແຫ່ງ ສປປ ລາວ ກໍພວມຄົ້ນຄວ້ານຳໃຊ້ວິທີໃຫ້ຄະແນນສິນເຊື່ອ ຫລື ນຳໃຊ້ຂໍ້ມູນສາທາລະນຸປະໂພກ (ນ້ຳປະປາ, ໄຟຟ້າ, ໂທລະຄົມມະນາຄົມ) ມາສ້າງເປັນຂໍ້ມູນຂ່າວສານສິນເຊື່ອ ເພື່ອອໍານວຍຄວາມສະດວກໃນການເຂົ້າຫາສິນເຊື່ອ, ຊຶ່ງບັນດານິຕິກໍາ ແລະ ລະບຽບການຕ່າງໆທີ່ຕິດພັນກັບການປັບປຸງແຕ່ລະຕົວຊີ້ວັດນີ້ຈະຖືກສັງລວມ ແລະ ພິມເຜີຍແຜ່ໃນໄວໆນີ້.

ກອງປະຊຸມຄັ້ງນີ້, ຍັງໄດ້ນໍາສະເໜີແຜນງານປັບປຸງຕົວຊີ້ວັດໃນຕໍ່ໜ້າ, ໂດຍແບ່ງເປັນ 2 ກຸ່ມຄື: ຕົວຊີ້ວັດທີ່ສາມາດແກ້ໄຂໄດ້ໃນໄລຍະສັ້ນ ແລະ ແກ້ໄຂໃນໄລຍະຍາວ.ສໍາລັບການແກ້ໄຂໃນໄລຍະສັ້ນແມ່ນຈະມີການຕັດຂັ້ນຕອນ, ເວລາແລະຄ່າໃຊ້ຈ່າຍທີ່ບໍ່ຈໍາເປັນອອກ, ສ່ວນແກ້ໄຂໄລຍະຍາວແມ່ນການປັບປຸງບັນດາລະບຽບກົດໝາຍກ່ຽວຂ້ອງຕ່າງໆຕາມບົດຮຽນຂອງສາກົນເພື່ອປັບປຸງບັນຍາກາດການເນີນທຸລະກິດຢູ່ພາຍໃນປະເທດໃຫ້ດີຂຶ້ນ, ແນ່ໃສ່ດຶງດູດການລົງທຶນທີ່ມີຄຸນນະພາບ, ຊຸກຍູ້ສົ່ງເສີມ ແລະ ສ້າງຂີດຄວາມສາມາດໃນການແຂ່ງຂັນຂອງທຸລະກິດພາຍໃນໃຫ້ເຂັ້ມແຂງຂຶ້ນ.