ບັນຫານ້ອຍໆ ແຕ່ບໍ່ຄວນເບິ່ງຂ້າມ

- WhatsApp Image 2017 07 12 at 9 - ບັນຫານ້ອຍໆ ແຕ່ບໍ່ຄວນເບິ່ງຂ້າມ

​ເພື່ອນ​ຜູ້​ອ່ານ​ທີ່​ຮັກ​ແພງ, ຍັງ​ອີກ​ບໍ່​ດົນ​ລາວ​ຈະ​ເປີດ​ປີ​ທ່ອງ​ທ່ຽວ ​ແນ​ໃສ່​ສົ່ງ​ເສີມ ​ແລະ ດຶງ​ດູດ​ນັກ​ທ່ອງ​ທ່ຽວ​ເຂົ້າປະ​ເທດ​ໃຫ້​ຫລາຍ​ຂຶ້ນ, ພາຍຫລັງ​ເຫັນ​ວ່າ​ສະພາບ​ຜູ້​ມາ​ທ່ອງ​ທ່ຽວ​ລາວ​ມີ​ລັກສະນະ​ຫລຸດ​ລົງ​ເມື່ອ​ທຽບ​ໃສ່​ຊຸມ​ປີຜ່ານມາ ຍ້ອນ​ຫລາຍ​ປັດ​ໄຈ​ທັງ​ໃນ​ຕົວ ​ແລະ ນອກ​ຕົວ​ຂອງ​ມັນ. ກໍ​ດັ່ງ​ກົມ​ພັດທະນາ​ການທ່ອງທ່ຽວ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ​ໃຫ້​ຮູ້​ວ່າ: 3 ​ເດືອນ​ຕົ້ນປີ 2017 ນີ້ ຈຳນວນ​ນັກ​ທ່ອງ​ທ່ຽວ​ເຂົ້າມາ​ທ່ຽວ​ລາວ​ຫລຸດ​ລົງ 11% ທຽບ​ໃສ່​ໄລຍະ​ດຽວ​ຂອງ​ປີ 2016 ຜ່ານ​ມາ ​ແລະ ຄາດ​ວ່າ​ໝົດ​ປີ​ນີ້​ຈະ​ມີ​ນັກ​ທ່ອງ​ທ່ຽວ​​ເຂົ້າລາວ​ພຽງ 1,1 ລ້ານ​ຄົນ​ເທົ່າ​ນັ້ນ. ​ແຕ່​ເຖິງ​ຢ່າງ​ໃດ​ກໍ​ດີ ກໍ​ມີ​ອັດຕາ​ສ່ວນ​ດີກ​ວ່າ​ເມື່ອ​ທຽບ​ໃສ່​ຫລາຍ​ປະ​ເທດ​ໃນ​ຂົງ​ເຂດ ​ເຊິ່ງສາ​ເຫດ​ຕົ້ນຕໍ​ແມ່ນ​ເກີດ​ຈາກ​ສະພາບ​ຂອງ​ພາກພື້ນ ​ແລະ ສາກົນ​ມີ​ການ​ຜັນ​ແປ​ຢ່າງ​ສັບສົນ, ຈຳນວນ​ນັກ​ທ່ອງ​ທ່ຽວ​ມີ​ການ​ໃຊ້​ຈ່າຍ​ປະຢັດ​ລົງ​ ​ແລະ ອື່ນໆ, ສ່ວນ​ຢູ່​ປະ​ເທດ​ເຮົາ​ເດ ກໍ​ອາດ​ມີ​ຫລາ​ຍອັນ​ທີ່​ຈະ​ຕ້ອງ​ໄດ້​ເອົາ​ໃຈ​ໃສ່ ນັບ​ແຕ່​ຂອດ​ນ້ອຍໆ ດັ່ງ​ການ​ອະນາ​ໄມ​ຮັກສາ​ຄວາມ​ສະອາດ, ​ຈຳກັດ​ສິ່ງ​ກີດຂວາງ​ທາງ​ດ້ານ​ລາຄາ ​ແລະ ຄ່າ​ບໍລິການ ​ແລະ ອາຫານ​ການ​ກິນ​ຕ່າງໆ​ຢູ່​ປະ​ເທດ​ເຮົາ​ຂ້ອນ​ຂ້າງ​ແພງ​ເມື່ອ​ທຽບ​ໃສ່​ບາງ​ປະ​ເທດ​ໃກ້​ຄຽງ​ເຮົາ ຄື​ເຝີ​ຖ້ວຍ​ໜຶ່ງ​ຢູ່​ປະ​ເທດ​ເຂົາ​ຈະ​ມີ​ລາຄາ​ພຽງ 10-15.000 ກີບ ​ແຕ່​ປະ​ເທດ​ເຮົາ​ສູງ​ເຖິງ 30-50.000 ກີບ, ຄ່າ​ຂົນ​ສົ່ງ ​ແລະ ​ໂດຍສານ​ກໍ​ແພງ ຕະຫລອດ​ຮອດ​ປີ້​ເຂົ້າຊົມ​ເຂ​ດທ່ອງ​ທ່ຽວ​ກໍ​ເຊັ່ນ​ກັນ ​ແລະ ສິ່ງ​ທີ່​ສຳຄັນ​ໜຶ່ງ​ອີກ​ແມ່ນ​ຂອດ​ຮັກສາ​ອະນາ​ໄມ​ດ້ານ​ໂພຊະ​ນາ​ການ ​ແລະ ສະຖານ​ທີ່​ທ່ອງ​ທ່ຽວ​ຕ່າງໆ​ແມ່ນ​ໃຜ​ເປັນ​ຜູ້​ຮັບຜິດ ຊອບ, ບາງ​ບ່ອນ​ແຫ​ລ່ງທ່ອງ​ທ່ຽວ​ໃນ​ຕົວ​ເມືອງ​ແທ້ໆ​ກໍ​ຍັງ​ບໍ່​ມີ​ຮອດ​ຖັງຖິ້ມຂີ້​ເຫຍື້ອ, ຫົນທາງ ​ແລະ ​ເດີ່ນ​ຍ່າງ​ໃນ​ບ່ອນ​ທ່ອງ​ທ່ຽວ​ກໍ​ຍັງ​ຂາດ​ການ​ຂັດ​ຖູ ກໍ່​ໃຫ້​ເກີດ​ຄາບ​ເປື້ອນ​ເປັນ​ຈຸດ​ດ່າງ​ຈຸດ​ດຳ ​ເບິ່ງ​ແລ້ວ​ບໍ່​ຄ່ອຍ​ງາມ​ຕາ. ດັ່ງ​ເດີ່ນ​ຍ່າງ​ຊົມ​ວິວຕົວ​ເມືອງ​ໃນ​ບໍລິ​ເວນ​ຈຸດ​ທ່ອງ​ທ່ຽວ​ອານຸສາ​ວະລີ (ປະຕູ​ໄຊ) ຢູ່​ໃຈກາງ​ນະຄອນຫລວງ​ວຽງ​ຈັນ​ແທ້ໆ​ກໍ​ຍັງ​ປະປ່ອຍ​ໃຫ້​ມີ​ສະພາບ​ດ່າງ​ດຳ ​ໂດຍ​ບໍ່​ມີ​ການ​ຂັດ​ຖູ​ໃດໆ, ຖ້າ​ສະພາບ​ດັ່ງກ່າວ​ຫາກ​ປະປ່ອຍ​ໄປ​ດົນ​ກໍ​ອາດ​ຈະ​ເຮັດ​ໃຫ້​ຄວາມ​ງົດ​ງາມ​ໃນ​ບໍລິ​ເວນ​ດັ່ງກ່າວ​ສູນ​ເສຍ​ໄປ ​ແລະ ອີກ​ອັນ​ໜຶ່ງ​ກໍ​ແມ່ນ​ພາບ​ພົດ​ຂອງ​ຜູ້​ເຮັດ​ບໍລິການ​ຖ່າຍຮູບ​ໃຫ້​ນັກ​ທ່ອງ​ທ່ຽວ​ທີ່​ເຂົ້າມາ​ທ່ຽວ​ບໍລິ​ເວນ​ດັ່ງກ່າວ​ນັ້ນ ​ເບິ່ງ​ແລ້ວ​ບໍ່​ຄ່ອຍ​ງົດ​ງາມ​ຈາກ​ການ​ຍາດ​ຊີງ ​ແລະ ຊັກ​ຊວນ​ຜູ້​ຖ່າຍ​ຮູບ​ບາງ​ຄັ້ງຈົນ​ລຳ​ຄານ​ຈາກ​ມາລະຍາດ​ທີ່​ບໍ່​ຄ່ອຍສຸພາບ​ດັ່ງກ່າວ ​ແລະ ສິ່ງ​ນີ້​ເຖິງ​ຈະ​ເປັນ​ບັນຫາ​ນ້ອຍໆ, ​ແຕ່​ຂະ​ແໜງ​ການ​ກ່ຽວຂ້ອງ​ບໍ່​ຄວນ​ເບິ່ງ​ຂ້າມ ​ເພື່ອ​ພວກ​ເຮົາ​ຈະ​ສາມາດ​ພັດທະນາ​ການທ່ອງທ່ຽວ​ລາວ​ໃຫ້​ເຕີບ​ໃຫຍ່​ເຂັ້ມ​ແຂງ ​ແລະ ​ເຮັດ​ໃຫ້​ປີ​ທ່ອງ​ທ່ຽວ​ລາວ 2018 ປະສົບ​ຜົນສຳ​ເລັດ.

- lattana 1 - ບັນຫານ້ອຍໆ ແຕ່ບໍ່ຄວນເບິ່ງຂ້າມ