ສຳມະນາ “ຄວາມສ່ຽງໃນການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ກາງ”

- WhatsApp Image 2017 07 12 at 9 - ສຳມະນາ “ຄວາມສ່ຽງໃນການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ກາງ”

ທະນາຄານແຫ່ງ ສປປ ລາວ ແລະ ທະນາຄານພັດທະນາອາຊີ (ADB)ໄດ້ຈັດສຳມະນາການບໍລິຫານຄວາມສ່ຽງໃນການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ຂະໜາດກາງ ໃນລະຫວ່າງວັນທີ 13-16 ມິຖຸນາ 2017 ຢູ່ທີ່ໂຮງແຮມຄຣາວພລາຊ່າ, ນະຄອນຫລວງວຽງຈັນ ໂດຍການເປັນປະທານຂອງທ່ານ ນ. ວັດທະນາ ດາລາລອຍ ຮອງຜູ້ວ່າການ ທະນາຄານແຫ່ງ ສປປ ລາວ ແລະ ທ່ານ ນ. ອິງກຣິດ ແວນ ວີສ (Ingrid Van Wees) ຮອງປະທານທະນາຄານພັດທະນາອາຊີ ໂດຍມີບັນດາຜູ້ອຳນວຍການ-ຜູ້ຈັດການ ທະນາຄານທຸລະກິດ ແລະ ສະຖາບັນການເງິນທີ່ກ່ຽວຂ້ອງເຂົ້າຮ່ວມ.

- lattana 1 - ສຳມະນາ “ຄວາມສ່ຽງໃນການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ກາງ”

ທ່ານ ນ. ວັດທະນາ ດາລາລອຍ ໄດ້ແຈ້ງໃຫ້ຮູ້ວ່າແມ່ນ ເພື່ອຜັນຂະຫຍາຍແຜນຍຸດທະສາດ 5 ປີ ທີ່ທະນາຄານພັດທະນາອາຊີຈະໄດ້ສະໜັບສະໜູນການຈະເລີນເຕີບໂຕທີ່ທົ່ວເຖິງ ແລະ ຍືນຍົງຂອງ ສປປ ລາວ ໂດຍຜ່ານ 3 ຍຸດທະສາດທີ່ເປັນບູລິມະສິດໃນນີ້ມີ ການສ້າງວຽກເຮັດງານທຳ ແລະ ສ້າງລາຍໄດ້; ການປັບປຸງຊັບພະຍາກອນມະນຸດ ແລະ; ການຄຸ້ມຄອງຊັບພະຍາກອນທຳມະຊາດທີ່ຍືນຍົງ ແລະ ຄວາມສາມາດຮັບມືກັບການປ່ຽນແປງສະພາບດິນຟ້າອາກາດ. ນອກຈາກນີ້, ທະນາຄານພັດທະນາອາຊີ ຍັງຈະໄດ້ສຸມໃສ່ຂະແໜງອຸດສະຫະກຳ ແລະ ການຄ້າເປັນຂະແໜງບູລິມະສິດຕື່ມແລະ ຈະສະໜັບສະໜູນຂອບຍຸດທະສາດການຮ່ວມມືທາງດ້ານເສດຖະກິດໃນຂົງເຂດອະນຸພາກພື້ນແມ່ນ້ຳຂອງ (GMS) ແຕ່ປີ 2012-2022 ທີ່ ສປປ ລາວເປັນສະມາຊິກ. ເນື້ອໃນຕົ້ນຕໍຂອງການສຳມະນາແມ່ນກວມເອົາຫລາຍບົດຮຽນທີ່ຕິດພັນກັບການບໍລິຫານຄວາມສ່ຽງກ່ຽວກັບການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ກາງ ເປັນຕົ້ນແມ່ນຫຼັກການລວມກ່ຽວກັບການບໍລິຫານຄວາມສ່ຽງ, ການປະເມີນຄູ່ຮ່ວມງານຂອງທະນາຄານກ່ຽວກັບຂະບວນການສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ຂະໜາດກາງ, ການຈັດວາງຄວາມສ່ຽງ, ການຕິດຕາມກະແສເງິນສົດ ແລະ ອື່ນໆ ທີ່ສຳຄັນຕໍ່ກັບທະນາຄານ ແລະ ສະຖາບັນການເງິນ.

ການພົວພັນຮ່ວມມືລະຫວ່າງ ສປປ ລາວ ແລະ ທະນາຄານພັດທະນາອາຊີແມ່ນໄດ້ເລີ່ມແຕ່ປີ 1966 ເປັນຕົ້ນມາ ກໍຄືນັບແຕ່ປີທີ່ທະນາຄານພັດທະນາອາຊີໄດ້ຮັບການສ້າງຕັ້ງຂຶ້ນ ໂດຍໃນທຸກໆ 5 ປີ ສປປ ລາວ ແລະ ທະນາຄານພັດທະນາອາຊີຈະປຶກສາຫາລືເພື່ອສ້າງຍຸດທະສາດການຮ່ວມມື ສປປ ລາວ-ທະນາຄານພັດທະນາອາຊີ ໂດຍສອດຄ່ອງກັບແຜນພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ ເຊິ່ງໃນໄລຍະຜ່ານມາ, ທະນາຄານພັດທະນາອາຊີໄດ້ປະກອບສ່ວນໃນການສະໜັບສະໜູນການພັດທະນາຂະແໜງການເງິນ-ການທະນາຄານ ໂດຍຜ່ານໂຄງການຊ່ວຍເຫຼືອດ້ານວິຊາການຕ່າງໆ ເປັນຕົ້ນແມ່ນການພັດທະນາຂະແໜງການເງິນຊົນນະບົດ ແລະ ການເງິນຈຸລະພາກ ເພື່ອຫຼຸດຜ່ອນຄວາມທຸກຍາກ ແລະ ສ້າງຄວາມເຂັ້ມແຂງໃຫ້ສະຖາບັນການເງິນດັ່ງກ່າວ.