ໂຄວິດຮອບໃໝ່ຢູ່ຫວຽດນາມ ເປັນເຊື້ອ “ສາຍພັນອັງກິດ”
ຫວຽດນາມເປີດເຜີຍວ່າ: ການແຜ່ລະບາດຮອບໃໝ່ຂອງພະຍາດໂຄວິດ-19 ໃນປະເທດ ເຊິ່ງມີສູນກາງຢູ່ແຂວງທາງເໜືອ ເປັນເຊື້ອໄວຣັສໂຄໂຣນາ “ຊະນິດກາຍພັນ” ແບບທີ່ພົບແຫ່ງທຳອິດໃນອັງກິດ.
ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງຫວຽດນາມອອກລາຍງານໃນວັນທີ 2 ກຸມພາ 2021 ວ່າ: ນັບແຕ່ພົບຜູ້ຕິດເຊື້ອໂຄວິດ-19 ຈາກການໄດ້ຮັບເຊື້ອເປັນຄົນທຳອິດໃນຮອບ 55 ວັນ ຢູ່ແຂວງຫາຍເຊືອງ ທາງຕອນເໜືອຂອງປະເທດ ເຊື້ອພະຍາດໄດ້ແຜ່ກະຈາຍອອກໄປແລ້ວຫລາຍກວ່າ 10 ແຂວງ ລວມທັງນະຄອນຫລວງຮ່າໂນ້ຍ ແລະ ເມືອງໂຮ່ຈີມິນ ພົບຜູ້ຕິດເຊື້ອສະສົມຢ່າງໜ້ອຍ 276 ຄົນ.
ເຖິງຢ່າງໃດກໍຕາມ, ຜົນການກວດສອບທາງພັນທຸກຳຢ່າງລະອຽດ ຂອງເຊື້ອໄວຣັສໂຄໂຣນາສາຍພັນໃໝ່ທີ່ພົບໃນຜູ້ຕິດເຊື້ອກຸ່ມຫລ້າສຸດ ປາກົດວ່າມີຢ່າງໜ້ອຍ 12 ຄົນ ຕິດເຊື້ອໄວຣັສຊະນິດກາຍພັນ “ບີ117” ເຊິ່ງເປັນສາຍພັນທີ່ພົບຄັ້ງທຳອິດໃນອັງກິດ ແລະ ເປັນໜ້າກັງວົນວ່າ ການສອບສວນພະຍາດຍັງບໍ່ສາມາດລະບຸໄດ້ແນ່ນອນວ່າ ຜູ້ຕິດເຊື້ອຄົນທຳອິດຂອງກຸ່ມ ເຊິ່ງເປັນຜູ້ຍິງໄດ້ຮັບເຊື້ອຈາກແຫລ່ງໃດ, ເຖິງວ່າບຸກຄົນໃກ້ຊິດກັບນາງຄົນຫລ້າສຸດ ເຊິ່ງເປັນເພື່ອນຮ່ວມງານຜູ້ຍິງເດີນທາງໄປຍີ່ປຸ່ນ ແລະ ກວດພົບເຊື້ອຢູ່ນັ້ນ ແຕ່ຍັງບໍ່ອາດຢືນຢັນໄດ້ວ່າ ການຕິດເຊື້ອເກີດຂຶ້ນເມື່ອໃດ.
ທັງນີ້, ເມືອງຫາຍເຊືອງ ເຊິ່ງເປັນເມືອງເອກຂອງແຂວງຫາຍເຊືອງ ປະກາດລັອກດາວຫລາຍຈຸດເປັນເວລາ 21 ວັນ ນັບແຕ່ວັນທີ 31 ມັງກອນຜ່ານມາ. ຂະນະທີ່ໂຮງຮຽນໃນນະຄອນຫລວງຮ່າໂນ້ຍ ແລະ ອີກ 22 ແຂວງ ເລື່ອນປິດຮຽນໃນຊ່ວງເທດສະການເຕັດໃຫ້ໄວຂຶ້ນກວ່າກຳນົດ.
ປັດຈຸບັນ ຫວຽດນາມມີຜູ້ຕິດເຊື້ອສະສົມຈາກໂຄວິດ-19 ຢ່າງໜ້ອຍ 1.851 ຄົນ ແລະ ເສຍຊີວິດ 35 ຄົນ.