6 ສ ປັດໄຈພາໃຫ້ນະຄອນຫລວງກ້າວໄປ

- advert banner 728 90 728x90 - 6 ສ ປັດໄຈພາໃຫ້ນະຄອນຫລວງກ້າວໄປ

- 6922744f9 - 6 ສ ປັດໄຈພາໃຫ້ນະຄອນຫລວງກ້າວໄປ

- new3 - 6 ສ ປັດໄຈພາໃຫ້ນະຄອນຫລວງກ້າວໄປ

ໂດຍ: ກ້ອງສ່ອງ ອິດສະຫລະ

ຫວ່າງ​ອາທິດຫລັງໆ​ມາ​ນີ້, ມີ​ຫາງ​ສຽງ​ສັງຄົມ​ຕ່າງ​ກໍພາກັນຍ້ອງຍໍ​ຊົມ​ເຊີຍ​ທາງເມືອງ​ສີ​ສັດຕະ​ນາກ ແລະ ທາງ​ພາກສ່ວນ​ນະ​ຄອນຫລວງທີ່​ໄດ້​ສົມທົບ​ກັນ​ເລີກ​ຮື້​ຄວາມ​ບໍ່​ເປັນ​ລະບຽບ​ຮຽບຮ້ອຍ​ຢູ່​ແຖວ​ຕະຫລາດ​ຂົວ​ດິນ, ຄິວລົດ​ເມ​ເກືອບ​ເວົ້າ​ໄດ້​ວ່າ​ແປນເອີ​ດ​ເຕີ​ດ. ຈາກ​ການ​ຕັດ​ສິນ​ໃຈລົງມື​ເຮັດ​ແບບເອົາ​ຈິງເອົາ​ຈັງຄື​ດັ່ງກ່າວ ​ໄດ້ເຮັດ​ໃຫ້ການ​ໄປ​ມາຢູ່​ແຖວ​ນັ້ນໂລ່ງ​ລຽນສະດວກ​ສະບາຍ ​ແລະ ທັງ​ສະອາດ​ງາມ​ຕາ, ລົດ​ທຽວ​ໄປ​ມາ​ກໍ​ສະດວກ ​ທັງເປັນຕາ​ເບິ່ງ​ຕາ​ແຍງ. ຕາມ​ເຮົາ​ວ່າ, ການ​ຕັດສິນ​ໃຈ​ປະຕິບັດ​​ຄື​ແນວ​ນີ້ ​ມັນ​ກໍ​ເປັນ​ສິ່ງ​ຈໍາ​ເປັນ ​ເພາະ​ຈຸດ​ດັ່ງກ່າວ​ມີຄວາມແອອັດ​ສັບສົນພໍ​ສົມຄວນ ແລະ ​ໄດ້​ເວົ້າ​ກັນ​ມາຫລາຍ​ຄັ້ງ​ແລ້ວ, ​ແຕ່​ກໍ​ຍັງ​ມີ​ອັນ​ຂ້ອງໆ​ຄາໆ​ເໝືອນ​ດັ່ງ​ເຄືອ​ພັນ​ໄມ້,​ ແຕ່​ສໍາລັບຄັ້ງ​ນີ້​​ເຫັນວ່າເປັນ​ການ​ປະຕິບັດ​ການ​ຢ່າງ​ມີ​ໝາກ​ມີ​ຜົນ ​ແລະ​ ເປັນ​ຮູບ​ປະ​ທໍາ​ອອກ​ມາ​ໃຫ້​ທຸກ​ຄົນ​ເຫັນອີ່ຫລີ.

- lattana 1 - 6 ສ ປັດໄຈພາໃຫ້ນະຄອນຫລວງກ້າວໄປ

​ແນວ​ໃດ​ກໍ​ດີ, ຕາມ​ເຮົາ​ວ່າ ​​ເມື່ອ​ເຮົາ​ແກ້​ໄຂ​ໃນ​ຈຸດ​ດັ່ງ​ກ່າວ​ສໍາ​ເລັດ​ໄປແລ້ວ​ ເຮົາ​ກໍ​ຕ້ອງ​ໄດ້​ຖອດ​ຖອນ​ເອົາ​ເປັນ​ບົດຮຽນ​​ເພື່ອໄປ ຈັດ​ຕັ້ງ​ປະຕິບັດຢູ່​ບ່ອນ​ອື່ນໆຍິ່ງຈະ​ເປັນ​ການ​ດີ ​​​ໂດຍ​ສະ​ເພາະ​​ແມ່ນ​ບັນດາ​ຕະຫລາດ​ແຕ່ລະໝ້ອງ ແລະ ​ບັນຫາ​ການ​ຈອດ​ລົດ​ແອ​ອັດ​ຊະຊາຍ​ບໍ່​ເປັນ​ລະບຽບ​ໃນຕົວເມືອງ. ​ໃນ​ຄວາມ​ເປັນ​ຈິງ​ແລ້ວ,​ ເວົ້າ​ເຖິງການຈັດ​ສັນ​ຄວາມ​ຈົບງາມ ​ແລະຄວາມ​ເປັນ​ລະບຽບ​ຮຽບຮ້ອຍນີ້ ມັນ​​ຍັງ​ມີ​ຫລາຍ​ຈຸດຫລາຍ​ບ່ອນທີ່​ຈະ​ຕ້ອງ​ໄດ້​ປັບປຸງ​ປົວ​ແປງ​​ແລະ ​ແກ້​ໄຂໃຫ້ສວຍ​ງາມ​ຍິ່ງໆ​ຂຶ້ນ ເຊິ່ງ​ກ່ອນ​ອື່ນ​ໝົດ​ແມ່ນ​ຕ້ອງ​ເອົາ 6ສ ​ມາ​​ເປັນ​ບ່ອນ​ອີງ​ແລະ ​ເປັນ​ຕົວ​ວັດ​ໃນ​ການຈັດ​ຕັ້ງ​ປະຕິບັດ, ເທົ່າ​ທີ່ຜູ້​ຂຽນ​ໄດ້​ຕິດຕາມຜ່ານ​ມາ ຄືນັບແຕ່​ມື້​ມີ​ໂຄງການ 6ສ​ ເກີດ​ຂຶ້ນ ​ໄດ້​ເຮັດ​ໃຫ້​ນະຄອນຫລວງ​ເຮົາ​ມີ​ປັດໄຈ​ອັນ​ໃໝ່​ທີ່​ດີ​ເກີດ​ຂຶ້ນເລື້ອຍໆ​. ປັດຈຸບັນເຮົາ​​ເຫັນ​ວ່າ​ນະຄອນຫລວງ​ວຽງ​ຈັນ​ມີ​ການ​ພັດທະນາ​ສວຍ​ງາມ​ຂຶ້ນ​ຕິກໆ​ກາຍ​ເປັນ​ສູນ​ກາງ​ການ​ເມືອງການ​ປົກຄອງ, ​ເປັນ​ສູນ​ກາງ​ເສດຖະກິດ-ສັງຄົມ​ນັບ​ມື້​ຂະຫຍາຍຕົວ​ຢ່າງ​ບໍ່​ຢຸດ​ຢັ້ງ.​ ເພື່ອພິສູດ​ໃຫ້​ເຮົາ​ເຫັນ​ເຖິງ​ໂຄງການ 6ສ​​ ຜູ້​ຂຽນ​ຂໍ​ຍົກ​​ເອົາ​ແຕ່ລະ “ສ” ມາ​ເວົ້າ ຫລື ​ປຽບທຽບ ຄືໜຶ່ງ ສ.ສະຫງົບ ​ເຫັນ​ວ່າມີ​ອັນ​ດີ​ຂຶ້ນ​ກວ່າ​ເກົ່າຫລາຍຖ້າ​ທຽບ​ໃສ່​ຜ່ານມາ. ສ.ສີວິ​ໄລ ​ເຫັນ​ວ່າດຽວນີ້ມີ​ຄວາມຈະ​ເລີ​ນກ້າວໜ້າຂຶ້ນຫລາຍ ສະ​ເພາະ​ເຮົາ​ຢູ່ວຽງ​ເຫັນແຕ່​ລະ​ມື້​ກໍ​ຖື​ວ່າ​ເປັນເລື່ອງ​ທໍາ​ມະ​ດາ, ​ແຕ່ສໍາລັບ​ຄົນ​ຢູ່​ຕ່າງ​​ແຂວງ ຫລື ​ຕ່າງປະ​ເທດ​ເປັນ 5 ປີ 10 ປີ ​ເຂົາມາ​ເຫັນ​ເຂົາ​ກໍຕື່ນ​ຈົນຫລົງວ່າ​ຊັ້ນ. ສ.ສະຫວ່າງ ​ເບິ່ງ​ໄປ​ທາງ​ໃດ​ກໍ​ຮູ້ສຶກ​ເປີດ​ຫູ​ເປີດ​ຕາ, ກາງຄືນ​ມາ​ກໍມີ​ແສງ​ສະຫວ່າງ​ເຮືອງ​ເຮື່ອ​ດ້ວຍ​ສີສັນ​ຂອງ​ທໍາ​ມະ​ຊາດ ​ແລະ ​ດອກ​ໄຟແຈ້ງ​ສະຫວ່າງ​ເປັນ​ສ່ວນ​ໃຫຍ່​ແລ້ວ. ສ.ສີຂຽວ ອັນ​ນີ້​ບໍ່​ແມ່ນ​ຜູ້​ຂຽນ​ຕັ້ງ​ຍ້ອງ​ຢູ່​ບ້ານ​ເຮົາ​ຄົນ​ລາວ​ມັນ​ຕັ້ງ​ມັກ​ທໍາ​ມະ​ຊາດ​ຢູ່​ແລ້ວ, ບັນດາ​ເສັ້ນທາງ​ທີ່​ສໍາ​ຄັນ, ຕາມ​ສວນສາທາລະນະ​ກໍ​ເຕັມ​ໄປ​ດ້ວຍ​ຕົ້ນ​ໄມ​ປະດັບ​ສີຂຽວ​ອຸ່ມ​ທຸ່ມ ​ພໍເຖິງ​ຍາມ​ແລ້ງມາ​ ຫລື​ວ່າ​ຍາມ​ລະດູບານ​ໃໝ່​ກໍ​ເຕັມ​ໄປ​ດ້ວຍ​ດອກ​ໄມ້​ນາໆ​ຊະນິດຫລາກສີສັນ​ຍາວ​ເດຍລະດາດຕາມ​ຖະໜົນ​ຫົນ ທາງ ເຊິ່ງ​ເບິ່ງ​ແລ້ວ​ຮູ້ສຶກ​ສົດ​ຊື່ນ​ ​ແລະ ​ອີ່ມ​ເອີ​ບຢູ່​ໃນ​ຈິດ​ໃຈ. ສ.ສະ​ເໜ່ ນະຄອນຫລວງ​ວຽງ​ຈັນ​ເຮົາ​ສ້າງ​ຕັ້ງມາ​ໄດ້ 450 ກວ່າປີ​ແລ້ວ, ສິ່ງ​ທີ່​ປູ່ຍ່າຕານາຍ​ເຮົາ​ໄດ້​ສືບ​ທອດ​ເອົາ​ໄວ້​ຄື​ສະຖາປັດຕະຍະ​ກໍາ,ວັດທະນະ​ທໍາອັນ​ດີງາມ ​ແລະ ​ອ່ອນ​ຊ້ອຍ​ບໍ່​ນ້ອຍ​ໜ້າ​​ຕ່າງ​ແດນ, ມີ​ຮີດຄອງ​ປະ​ເພນີ ​ແລະ ​ຂະ​ນົບ​ທໍານຽມ​ອັນ​ສຸຂຸມຮອບ​ຄອບ​ ແລະ ເຍືອກ​ເຢັນ. ຈາກ​ສິ່ງ​ນີ້​​ເຮັດ​ໃຫ້​ຄົນ​ລາວ​ ກໍ​ຄື​ຊາວ​ນະຄອນຫລວງ​ວຽງ​ຈັນ​ມີ​ສະ​ເໜ່ ​ແລະ ​ມີ​ເອກະລັກ​ສະ​ເພາະ. ສ່ວນວ່າ ສ.ສະອາດ ​ເຖິງ​ວ່າ​​ພວມ​ມີ​ການ​ບູລະນະ​​ສ້າງສາພັດທະນາ​ໃຫ້​ກາຍ​ເປັນ​ນະ ຄອນຫລວງ​ຂອງ​ປະ​ເທດ​ຢ່າງ​ສົມ​ກຽດ​ເຊິ່ງ​ມີ​ບາງ​ເຂດ​ບາງ​ຈຸດ ​​ແລະ ບາງ​ບ່ອນ​ຍັງ​ບໍ່​ທັນ​ສະອາດ​ງາມ​ຕາ​ເທົ່າ​ທີ່​ຄວນ, ​ແຕ່​ເບິ່ງພາບ​ທົ່ວ​ໄປ​ແລ້ວ​ເຫັນ​ວ່າ​ນະຄອນຫລວງ​ວຽງ​ຈັນ​ເຮົາ​ເລີ່ມ​ມີ​ຄວາມ​ສະອາດ​​​ເສາະ​ໃສ ​ແລະ ງາມ​ຕາ​ຫລາຍ​ຂຶ້ນ. ຈາກ​ສິ່ງ​ນີ້​ລະຜູ້​ຂຽນ​ຈື່ງ​ວ່າ​ໂຄງການ 6ສ​ ທີ່​​ນະຄອນຫລວງ​ໄດ້​ວາງ​ອອກ​ນັ້ນ​ໄດ້​ເປັນ​ປັດໄຈ​ກະຕຸກຊຸກຍູ້​ໃຫ້​ນະຄອນຫລວງ​ເຮົາ​ມີ​ການ​ຂະຫຍາຍຕົວ ​ແລະ ​ມີ​ການ​ພັດທະນາ​ທີ່​ດີ​ຂຶ້ນ​ໄປ​ເລື້ອຍ​ໆ.

- lao kinh te 919997 - 6 ສ ປັດໄຈພາໃຫ້ນະຄອນຫລວງກ້າວໄປ
The Patuxai (Victory Gate) on Lan Xang Avenue, Vientiane, Laos, Indochina, Southeast Asia, Asia

​ເຖິງ​ຢ່າງ​ໃດ​ກໍ​ດີ, ຕາມ​​ເຮົາ​ວ່າ​ຈາກ​ສິ່ງ​ທີ່​ດີ​ທີ່​ປາກົດ​ໃຫ້​​ເຫັນ​ນັ້ນ ​ເຮົາ​ກໍຕ້ອງ​ພ້ອມ​ກັນ​ແກ້​ໄຂ​ຈຸດ​ອ່ອນທີ່​ຍັງ​​ເປັນ​ປາກົດ​ການ​ຫຍໍ້​ທໍ້ບາງ​ຢ່າງ​​ເຊັ່ນ​: ບາງ​ມື້​ມີ​ເຫດການ​ດຶງ​ກະ​ເປົາ, ​ເກີດ​ອຸປະຕິ​ເຫດ, ​​ເກີດຂີ້​ລັກ​ງັດ​ແງະ​ ແລະ ​ອື່ນໆ. ເສັ້ນທາງ​​ບາງ​ເສັ້ນຍັງ​ເປິະ​ເປື້ອນ ດ້ວຍ​ຂີ້ຕົມ, ຂີ້​ດິນ, ຂີ່​ຝຸ່ນ ​ແລະ ​ປົກ​ຫຸ້ມ​ດ້ວຍ​ຫຍ້າ.​ ແຕ່​ກໍ​ຄິດ​ວ່າດ້ວຍ​ຄວາມ​ຮັບຜິດຊອບ​ຂອງ​ໜ່ວຍ​ງານກ່ຽວຂ້ອງ ​ແລະ ​ຄົນ​ນະ ຄອນຫລວງ​ຈັບ​ມື​ຖື​ແຂນ​ກັນ​ມີ​ສ່ວນ​ຮ່ວມ​ ແນ່ນອນຄວາມ​ງາ​ມຂອງ​ນະຄອນຫລວງ​ຈະ​ຕ້ອງ​ກິນ​ໃຈ​ຜູ້​ທີ່​ມາ​ພົບ​ເຫັນຢ່າງ​ແນ່ນອນ.

error: Content is protected !!