ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ

ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ - 131707922 1882127921944220 2717671908577947515 n - ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ
ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ - Untitled design - ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ

ໂດຍ: ທິດ​ກໍ່າ

ວັນ​ເວລາ​ການ​ເລືອກ​ສະມາຊິກ​ສະພາ​ແຫ່ງ​ຊາດ ​ແລະ ຂັ້ນ​ແຂວງນັບ​ມື້ຈໍ້​ມໍ່​ເຂົ້າມາຕິກໆ ຄື​ວັນ​ທີ 21 ກຸມພາ 2021 ​ເຊິ່ງກົງ​ກັບ​ວັນ​ອາທິດ​ພໍດີ. ນັບ​ຈາກນີ້​ໄປ ຜູ້​ມີ​ສິດ​ປ່ອນ​ບັດ​ເລືອກ​ຕັ້ງກໍ​ຕ້ອງ​ໄດ້​ກຽມ​ຈິດ​ໃຈ​ເພື່ອ​ຈະ​ໄປ​ປ່ອນ​ບັດ​ຄັດ​ເລືອກ​ເອົາ​ຜູ້​ແທນ​ທີ່​ຕົນ​ມີ​ສັດທາ ​ແລະ ​ເຊື່ອ​ໝັ້ນຢ່າງ​ເຕັມ​ຮ້ອຍ. ກໍ​ດັ່ງ​ຮັບ​ຮູ້​ມາ​ນຳ​ກັນ​ແລ້ວ​ວ່າ, ຜູ້​ແທນ​ທີ່​ດີ​ຂອງ​ປະຊາຊົນ​ນັ້ນ ຕ້ອງ​ເປັນ​ຄົນ​ທີ່​ມີ​ສຸຂະພາບ​ແຂງ​ແຮງ, ມີ​ຄວາມ​ຮູ້​ຄວາມ​ສາມາດ, ສະຫລາດ​ຫລັກ​ແຫລມ, ຖື​ຜົນ​ປະ​ໂຫຍ​ດຂອງ​ຊາດ​ເໜືອກ​ວ່າ​ຜົນ​ປະ​ໂຫຍ​ດຂອງ​ຕົນ​ເອງ. ຍິ່ງ​ໄປ​ກວ່າ​ນັ້ນ ຕ້ອງ​ເປັນ​ຜູ້​ໃກ້ຊິດຕິດ​ແທດ​ກັບ​ມະຫາຊົນ, ຊ່ວຍ​ເຫລືອ​ປະຊາຊົນ​ຍາມ​ເຂົາ​ທຸກ​ຍາກ​ລຳບາກ, ​ເຮັດ​ວຽກ​ເພື່ອ​ປະຊາຊົນ, ຮັບ​ໃຊ້​ປະຊາຊົນ​ດ້ວຍ​ຄວາມ​ສັດ​ຊື່​ບໍລິສຸດ ​ແລະ ຈົງ​ຮັກ​ພັກດີ​ຕໍ່​ປະ​ເທດຊາດ​ບ້ານ​ເມືອງ ທັງ​ມີ​ຄວາມ​ມານະ​ອົດທົນ ​ແລະ ​ເສຍສະຫລະ​ອັນ​ສູງ​ສົ່ງ, ບໍ່​ສໍ້​ລາດ​ບັງ​ຫລວງ ຫລື ຫາ​ວິທີ​ຂູດ​ຮີດ​ປະຊາຊົນ. ອີກ​ປະການ​ໜຶ່ງ ກໍ​ຕ້ອງ​ເປັນ​ຜູ້​ໂດດ​ເດັ່ນ, ມີ​ຜົນງານ​ປະກອບສ່ວນ​ໃຫ້​ປະ​ເທດ​ຊາດ ​ແລະ ສັງຄົມ​ຈົນ​ເປັນ​ທີ່​ຍອມຮັບ​ຈາກ​ມະຫາຊົນ​ທົ່ວ​ໄປ.

​ເມື່ອ​ຕັ້ງ​ໂຈດ​ກັນ​ວ່າ, ຖ້າ​ຢາກ​ໄດ້​ຜູ້​ແທນ​ທີ່​ດີ​ມາ​ບໍລິຫານ​ບ້ານ​ເມືອງ​ຮັບ​ໃຊ້​ຊາດ, ຮັບ​ໃຊ້​ປະຊາຊົນ​ຕ້ອງ​ປ່ອນ​ບັດ​ຄັດ​ເລືອກ​ເອົາ​ແນວ​ໃດ ? ກ່ອນ​ອື່ນ​ໝົດ ຕ້ອງ​ສຶກສາຄົ້ນຄວ້າ​ຊອກ​ຮູ້​ປະຫວັດ​ຄວາມ​ເປັນ​ມາ​ຂອງ​ຜູ້​ທີ່​ສະໝັກ​ເປັນ​ຜູ້​ແທນ​ສະພາ​ແຫ່ງ​ຊາດ ​ແລະ ຜູ້​ແທນ​ສະພາ​ປະຊາຊົນ​ຂັ້ນ​ແຂວງ​ໃຫ້​ລະອຽດ​ຖີ່​ຖ້ວນ. ການ​ຊອກ​ຮູ້​ປະຫວັດ​ຄວາມ​ເປັນ​ມາ​ຂອງ​ຜູ້​ສະໝັກ​ເປັນ ສສຊ ​ແລະ ສສຂ ​ໃນ​ຍຸກ​ນີ້​ມັນ​ກໍ​ມີ​ຫລາຍ​ຊ່ອງ​ທາງ​ໃຫ້​ເລືອກ ​ເພາະ​ທຸກ​ຢ່າງ​ມັນ​ຫັນ​ເປັນ​ອັນ​ທັນ​ສະ​ໄໝ​ໄປ​ແລ້ວ ​ເປັນຕົ້ນທາງ​ສື່​ອອນ​ລາຍ ດັ່ງ​ເຮົາ​ໄດ້​ເຫັນ​ມາ​ຫລາຍ​ທ່ານ, ຫລາຍ​ສະຫາຍ ​ແລະ ຫລາຍ​ຄົນ​ທີ່​ອົງການ ຫລື ຂະ​ແໜງ​ການ​ກ່ຽວຂ້ອງ​ເພິ່ນ​ໄດ້​ລົງ​ໂຄສະນາ​ກ່ອນ​ລ່ວງ​ໜ້າ ນັບ​ແຕ່​ໄລຍະ​ນີ້​ຈົນ​ຮອດ​ມື້ປ່ອນ​ບັດ​ເລືອກ​ຕັ້ງ. ນອກຈາກ​ນັ້ນ ​ໃນ​ມື້ປ່ອນ​ບັດ​ເລືອກ​ຕັ້ງ ພວກ​ເຮົາ​ຕ້ອງ​ກຽມ​ຈິດ​ໃຈ​ໄປ​ໃຫ້​ທັນ​ເວລາ ຫລື ກ່ອນ​ເວລາ​ຍິ່ງ​ເປັນ​ການ​ດີ ​ເພາະ​ຈະ​ໄດ້​ມີ​ໂອກາດ​ໄດ້​ອ່ານ​ເບິ່ງ​ປະຫວັດ​ທີ່​ໄປ​ທີ່​ມາ​ຂອງ​ຜູ້​ສະໝັກ ສສຊ ​ແລະ ສສຂ ​ແຕ່ລະ​ທ່ານ ​ເພື່ອ​ຄວາມ​ຕັດສິນ​ໃຈ​ເລືອກ​ເອົາ​ຜູ້​ແທນ​ທີ່​ດີ ທັງ​ຖືກ​ກັບ​ເປົ້າໝາຍ, ​ເງື່ອນ​ໄຂ ​ແລະ ຈິດ​ໃຈ​ຜູ້​ທີ່​ເຮົາ​ມັກ. ການ​ໄປ​ປ່ອນ​ບັດ​ຄັດ​ເລືອກ​ເອົາ​ຜູ້​ແທນ​ສະພາ​ແຫ່ງ​ຊາດ ຊຸດ​ທີ IX ​ແລະ ຜູ້​ແທນ​ສະພາ​ຂັ້ນ​ແຂວງ ຊຸດ​ທີ II ຖື​ເປັນ​ເຫດການ​ທາງ​ການ​ເມືອງ​ທີ່​ສຳຄັນ ​ແລະ ມີ​ລັກສະນະ​ປະຫວັດສາດ​ໃນ​ແຕ່ລະ​ໄລຍະ 5 ປີ​ໜຶ່ງ​ຄັ້ງ ຖື​ວ່າ​ມາ​ຮອດ​ປີ 2021 ​ເຮົາ​ໄດ້​ດຳ​ເນີນ​ການ​ເລືອກ​ສະພາ​ແຫ່ງ​ຊາດ​ມາ​ແລ້ວ 8 ຄັ້ງ ​ແລະ ຄັ້ງນີ້​ເປັນຄັ້ງທີ 9. ສ່ວນ​ການ​ປ່ອນ​ບັດ​ເລືອກ​ຕັ້ງ​ເອົາ​ສະມາຊິກ​ສະພາ​ຂັ້ນ​ແຂວງ​ນັ້ນຖື​ວ່າຄັ້ງນີ້​ເປັນຄັ້ງທີ 2.

​ແນວ​ໃດ​ກໍ​ຕາມ, ພວກ​ເຮົາ​ມີ​ຄວາມ​ຫວັງ​ຢ່າງ​ຍິ່ງ​ວ່າ ການ​ປ່ອນ​ບັດ​ເລືອກ​ຕັ້ງ​ໃນ​ຄັ້ງນີ້​ຈະ​ເປັນ​ໄປ​ຕາມ​ຄາດໝາຍ, ມີ​ຜົນສຳ​ເລັດ​ທຸກ​ປະການ ​ແລະ ຈະ​ໄດ້​ຜູ້​ທີ່​ດີ​ມາ​ເປັນ​ຜູ້​ແທນ ​ເພື່ອ​ໄປ​ເຮັດ​ໜ້າ​ທີ່​ໃນ​ສະພາ ທັງ​ເປັນ​ຜູ້ຕາງໜ້າ​ໃຫ້​ປະຊາຊົນ​ໃນ​ການ​ແກ້​ໄຂ​ບັນຫາ​ຂອງ​ຊາດ ​ແລະ ສິດຜົນປະ​ໂຫຍ​ດຂອງ​ປະຊາຊົນ​ໂດຍ​ລວມ ​ແລະ ​ໃຫ້​ສົມ​ກັບ​ວ່າ​ເປັນ​ຜູ້​ແທນ​ປະຊາຊົນ, ມາ​ຈາກ​ປະຊາຊົນ, ​ເພື່ອ​ປະຊາຊົນ ​ແລະ ຮັບ​ໃຊ້​ປະຊາຊົນ. ​ໃນ​ເງື່ອນ​ໄຂ​ທີ່​ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ຍັງ​ທຸກ​ຍາກ ​ແລະ ດ້ອຍ​ພັດທະນາ ພວມ​ເລັ່ງສ້າງສາ​ພັດທະນາ​ປະ​ເທດ​ຊາດ ​ເຊິ່ງມີ​ທັງ​ອັນ​ດີ ​ແລະ ຫຍໍ້​ທໍ້ຫລາຍ​ຢ່າງ​ຄື​ທຸກ​ວັນ​ນີ້, ພາລະກິດ​ຂອງ​ຜູ້​ແທນ​ສະພາ​ຂັ້ນສູນ​ກາງ ​ແລະ ທ້ອງ​ຖິ່ນ​ຍິ່ງ​ມີ​ຄວາມ​ສຳຄັນ ຍ້ອນ​ວ່າ​ມັນ​ຮຽກຮ້ອງ​ເຖິງ​ຄວາມ​ເປັນ​ມາດ​ຕະຖານ​ວຽກ​ງານ​ຫລາຍ​ດ້ານ ​ເປັນຕົ້ນດ້ານ​ຄວາມ​ຮູ້​ຄວາມ​ສາມາດ, ຄຸນສົມບັດ​ສິນ​ທຳ​ປະຕິວັດ, ມີ​ວິ​ໄນ​ທັດ​ອັນ​ກວ້າງ​ໄກ ສາມາດ​ເຊື່ອມ​ໂຍງ​ເຂົ້າກັບ​ມະຫາຊົນ, ນຳພາ​ປະຊາຊົນ​ສ້າງສາ​ທຳ​ມາ​ຫາ​ກິນ​ໃຫ້​ສາມາດ​ຫລຸດ​ພົ້ນອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ເທື່ອ​ລະ​ກ້າວ​ຕາມ​ແນວທາງ​ຂອງ​ພັກ ​ແລະ ລັດຖະບານ​ວາງ​ອອກ.

ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ - Wave100S AD to Website 2020 0 - ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ

​ໃນ​ສະ​ໄໝ​ເກົ່າ, ພວກ​ເຮົາ​ເຄີຍ​ໄດ້​ຍິນ​ເຂົາ​ຊ່າ​ກັນ​ວ່າ ມີ​ຜູ້​ແທນ​ບາງ​ທ່ານ, ບາງ​ຄົນ ​ເວລາ​ໄປ​ໂຄສະນາ​ແນະນຳ​ໂຕ​ຕໍ່​ປະຊາຊົນ ​ເພິ່ນ​ປະຕິຍານ​ເວົ້າວ່າ ຖ້າ​ເພິ່ນ​ໄດ້​ເປັນ​ຜູ້​ແທນ​ແລ້ວ ຈະ​ເຮັດ​ທຸກ​ສິ່ງ​ທຸກ​ຢ່າງ​ເພື່ອ​ສິດ ​ແລະ ຜົນ​ປະ​ໂຫຍ​ດຂອງ​ປະຊາຊົນ, ​ແຕ່​ບາດ​ເພິ່ນ​ໄດ້​ເປັນ​ຜູ້​ແທນ​ແລ້ວ ໜ້າ​ທໍ່​ສອງ​ນິ້ວກໍ​ບໍ່​ເຫັນ, ບໍ່​ເຄີຍ​ລົງ​ໄປ​ຢ້ຽມຢາມ​ເບິ່ງ​ສະພາບ​ຄວາມສຸກ​ທຸກ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ເຂດ​ເລືອກ​ຕັ້ງຂອງ​ຕົນ​ເອງ​ຈັກ​ເທື່ອ.

​ເຖິງ​ຢ່າງ​ໃດ​ກໍ​ດີ, ສຳລັບ​ຜູ້​ແທນ​ສະພາ​ແຫ່ງ​ຊາດ ຊຸດ​ທີ IX ​ແລະ ຜູ້​ແທນ​ສະພາ​ຂັ້ນ​ແຂວງ ຊຸດ​ທີ II ຈະ​ບໍ່​ເປັນ​ແນວ​ນັ້ນຢ່າງ​ແນ່ນອນ ​ເພາະ​ທຸກ​ທ່ານ, ທຸກ​ຄົນ​ລ້ວນ​ແລ້ວ​ແຕ່​ມີ​ລະດັບ​ປະລິນຍາ​ຕີ, ປະລິນຍາ​​ໂທ, ປະລິນຍາ​ເອກ, ມີ​ວິຊາ​ສະ​ເພາະ​ທີ່​ແນ່ນອນ​ຢ່າງ​ເຕັມຕົວ ​ແລະ ອັນ​ທີ່​ປາກົດ​ເຫັນ​ສິ່ງ​ໃໝ່​ສຳລັບ​ຜູ້​ແທນ​ສະພາ​ແຕ່ລະ​ຂັ້ນຊຸດ​ນີ້ ​ແມ່ນ​ມີ​ນັກທຸລະກິດ, ນັກວິຊາການ, ພະນັກງານ​ທີ່​ມີ​ວຸດ​ທິຢ່າງ​ຄົບ​ຂັນ​ ​ແຕ່​ໃຜ​ຈະ​ເປັນ​ຜູ້​ແທນ​ຊຸດ​ນີ້​​ແທ້ ກໍ​ຕ້ອງ​ແມ່ນ​ປະຊາຊົນ​ເປັນ​ຜູ້​ເລືອກ. ສຳຄັນ​ເມື່ອ​ໄດ້​ເປັນ​ຜູ້​ແທນ​ແລ້ວ ຕ້ອງ​ໄດ້​ເຮັດ​ໜ້າ​ທີ່​ເພື່ອ​ຊາດ ​ແລະ ​ເພື່ອ​ປະຊາຊົນ​ຢ່າງ​ເຕັມທີ່. ສິ່ງ​ທີ່​ປະຊາຊົນ​ຢາກ​ໃຫ້​ທ່ານ​ຜູ້​ແທນ​ແກ້​ນັ້ນ ​ແມ່ນ​ປາບ​ການ​ສໍ້​ລາດ​ບັງ​ຫລວງ, ​ແກ້​ໄຂ​ບັນຫາ​ຢາ​ເສບ​ຕິດ, ຂີ້ລັກ​ງັດ​ແງະ ​ແລະ ປາກົດການ​ຫຍໍ້​ທໍ້​ອື່ນໆ​ທີ່​ພາ​ໃຫ້​ເສຍ​ພາບ​ພົດ​ຂອງ​ປະ​ເທດ​ຊາດ, ກະທົບ​ເຖິງ​ຄວາມ​ສະຫງົບ​ສຸກ​ຂອງ​ສັງຄົມ, ກົດ​ໜ່ວງ​ຄວາມ​ຈະ​ເລີ​ນຂອງ​ປະ​ເທດ​ຊາດ​ໃນ​ປັດຈຸບັນ ​ແລະ ອະນາຄົດ​ຍາວ​ນານ ​ແລະ ພາລະກິດ​ອື່ນໆ​ທີ່​ພົວພັນ​ເຖິງ​ໜ້າ​ທີ່​ຂອງ​ຜູ້​ແທນ.

ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ - WhatsApp Image 2020 05 27 at 5 - ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ
ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ - WhatsApp Image 2020 05 27 at 5 - ພ້ອມ​ກັນ​ຕັ້ງ​ໃຈ​ໄປ​ເລືອກ​ຕັ້ງ​ເອົາ​ຜູ້​ແທນ​ທີ່​ດີ​ຂອງ​ປະຊາຊົນ
error: Alert: ເນື້ອຫາຂ່າວມີລິຂະສິດ !!