ວັກຊີນປ້ອງກັນໂຄວິດ-19 ຂອງຈີນ ຈໍານວນ 3 ແສນໂດສ ມາຮອດລາວແລ້ວ
ວັກຊີນປ້ອງກັນໂຄວິດ-19 ຈໍານວນ 300.000 ໂດສ ພ້ອມເຂັມສັກຢາ ເຊິ່ງເປັນການຊ່ວຍເຫຼືອລ້າຈາກ ສປ ຈີນ ໃຫ້ແກ່ ສປປ ລາວ ໄດ້ມາຮອດສະໜາມບິນວັດໄຕສາກົນ ນະຄອນຫຼວງວຽງຈັນ ໃນເວລາ 00:48 ໂມງ ຂອງວັນທີ 8 ກຸມພາ 2021 ເຊິ່ງປະເທດລາວເປັນໜຶ່ງໃນປະເທດຊຸດທໍາອິດທີ່ໄດ້ຮັບການຊ່ວຍເຫຼືອຢາວັກຊິນຈາກລັດຖະບານ ສປ ຈີນ, ໃຫ້ກຽດຕ້ອນຮັບຢ່າງອົບອຸ່ນໂດຍທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານ ຈ່ຽງຈ້າຍຕົ່ງ ເອກອັກຄະລັດຖະທູດຈີນ ປະຈໍາລາວ.
ໂອກາດນີ້, ທ່ານ ບຸນກອງ ສີຫາວົງ ໄດ້ຕາງໜ້າໃຫ້ລັດຖະບານ ແລະ ປະຊາຊາຊົນລາວ ສະແດງຄວາມໃຈຢ່າງສູງຕໍ່ລັດຖະບານ ແລະ ປະຊາຊົນຈີນ ທີ່ຍາມໃດກໍໃຫ້ເຫັນຄວາມສໍາຄັນ ແລະ ຫ່ວງໄຍປະຊາຊົນລາວ ແລະ ເອົາໃຈໃສ່ນໍາເອົາວັກຊີນປ້ອງກັນໂຄວິດ-19 (ວັນຊີນຊີໂນຟາມ, ສປ ຈີນ) ມາໃຫ້ ສປປ ລາວ ເຊິ່ງການຊ່ວຍເຫຼືອຄັ້ງນີ້ມີວັກຊີນປ້ອງກັນໂຄວິດ-19 ຈໍານວນ 300.000 ໂດສ ແລະເຂັ້ມສັກຢາຈໍານວນ 300.800 ອັນ ໃຫ້ແກ່ ສປປ ລາວ ເຊິ່ງໄດ້ສ້າງຂັວນ ແລະ ກໍາລັງໃຈໃຫ້ແກ່ ປະຊາຊົນລາວບັນດາເຜົ່າ ແລະ ຍັງເປັນສັນຍາລັກຂີດໝາຍສາຍພົວພັນແບບຄູ່ຮ່ວມມືຍຸດທະສາດຮອບດ້ານຕາມທິດ 4 ດີ ແລະ ເພື່ອນມິດທີ່ເປັນຄູ່ຮ່ວມຊະຕາກໍາກັນຢ່າງແທ້ຈິງ. ທ່ານຍັງກ່າວຕື່ມວ່າ: ວັກຊີນທີ່ໄດ້ຮັບຊຸດນີ້ ເປັນຄວາມຮຽກຮ້ອງຕ້ອງສູງຂອງແພດໝໍ ແລະ ປະຊາຊົນລາວບັນດາເຜົ່າໃນການປ້ອງກັນ ແລະ ສະກັດກັ້ນພະຍາດດໂຄວິດ ເພື່ອບໍ່ໃຫ້ມີຜົນກະທົບຕໍ່ສຸຂະພາບ ແລະ ເສດຖະກິດ.
ຫວ່າງບໍ່ດົນມານີ້, ທ່ານ ສົມດີ ດວງດີ ຮອງນາຍົກລັດຖະມົນຕີ, ທ່ານ ບຸນກອງ ແລະ ແພດໝໍປະຈໍາປ້ອມ ແລະ ດ່ານຕ່າງໆກໍໄດ້ສັກຢາວັກຊີນດັ່ງກ່າວແລ້ວ ເຊິ່ງກະຊວງສາທາລະນະສຸກກໍໄດ້ຕີລາຄາສູງຕໍ່ຢາວັກຊີນຊີໂນຟາມ ຂອງ ສປ ຈີນ ທີ່ໄດ້ຖືກປະເມີນຜົນເປັນທີ່ຫນ້າເພິ່ງພໍໃຈ, ມີປະສິດທິພາບສູງ, ຄວາມປອດໄພສູງ ແລະ ສາມາດສ້າງພູມຄຸ້ມກັນທີ່ດີໄດ້.
ທ່ານ ບຸນກອງ ກ່າວຕື່ມວ່າ: ການຜະລິດຢາວັກຊີນຂອງ ສປ ຈີນ ເປັນນິມິດຫມາຍທີ່ສໍາຄັນທີ່ສຸດໃນປະຊາຄົມໂລກ ເຊິ່ງຈະເຮັດໃຫ້ມີການປ້ອງກັນການລະບາດຂອງພະຍາດໂຄວິດ-19, ທັງສາມາດເຮັດໃຫ້ປະຊາຄົມໂລກເຂົ້າເຖິງວັກຊີນທີ່ມີປະສິດທິພາບ, ມີຄວາມປອດໄພ ແລະ ມີຄວາມຍຸຕິທໍາ.
ຕາມຂໍ້ມູນແຈ້ງວ່າ: ພິທີມອບ-ຮັບຢ່າງເປັນທາງການຈະໄດ້ຈັດຂຶ້ນໃນຕອນເຊົ້າຂອງວັນທີ 8 ກຸມພາ.
