ໄຟໄໝ້ປ່າ ບັນຫາທີ່ຕ້ອງລະວັງ

ໄຟໄໝ້ປ່າ ບັນຫາທີ່ຕ້ອງລະວັງ - 565a84bb73fd9aa3c3ec - ໄຟໄໝ້ປ່າ ບັນຫາທີ່ຕ້ອງລະວັງ
ໄຟໄໝ້ປ່າ ບັນຫາທີ່ຕ້ອງລະວັງ - Untitled design - ໄຟໄໝ້ປ່າ ບັນຫາທີ່ຕ້ອງລະວັງ

ໂດຍ: ມຶກບໍ່ແຫ້ງ

ການປົກຫຸ້ມຂອງປ່າໄມ້ເຖິງ 70% ຂອງເນື້ອທີ່ປະເທດ ແມ່ນເປົ້າໝາຍທີ່ມີຊື່ສຽງຂອງພວກເຮົາ ແຕ່ຈະບັນລຸເປົ້າໝາຍນີ້ໄດ້ ບໍ່ພຽງແຕ່ ປູກປ່າຄືນໃໝ່ ແຕ່ຕ້ອງໃສ່ໃຈການຮັກສາຕື່ມອີກ.

ປ່າໄມ້ເປັນຊັບສົມບັດອັນມີຄ່າຍິ່ງຂອງພວກເຮົາ, ໃນເບື້ອງຕົ້ນ ລັດຖະບານ ໄດ້ຕັ້ງເປົ້າໝາຍວ່າ ປີ 2020 ພວກເຮົາ ຈະສູ້ຊົນໃຫ້ການປົກຫຸ້ມຂອງປ່າໄມ້ໃຫ້ໄດ້ 70​% ຂອງເນື້ອທີ່ປະເທດ ແຕ່ ມາຮອດປັດຈຸບັນ ການບັນລຸເປົ້າໝາຍ ດັ່ງກ່າວນັ້ນ ໄດ້ຕໍ່ເວລາອອກໄປ ຈົນຮອດປີ 2025 ຍ້ອນຫຼາຍປັດໄຈ ທີ່ຍັງເປັນສິ່ງທ້າທາຍ.

ໜຶ່ງໃນສິ່ງທ້າທາຍຂອງການບັນລຸເປົ້າໝາຍນີ້ ກໍແມ່ນ ໄຟໄໝ້ລາມປ່າ ເຊິ່ງເປັນບັນຫາຊໍາເຮື້ອມາຫຼາຍປີ, ໃນປີ 2020​ ສປປລາວ ໄດ້ສູນເສຍ ເນື້ອທີ່ການປົກຫຸ້ມຂອງປ່າໄມ້ໄປຫຼາຍພັນ ເຮັກຕາ ໂດຍສະເພາະທາງ ພາກເໜືອ ທີ່ປະສົບກັບ ໄຟໄໝ້ລາມປ່າຮຸນແຮງ ອັນນຳມາເຊິ່ງການສູນເສຍ ບໍ່ສະເພາະແຕ່ປ່າໄມ້ ແຕ່ຍັງລວມເຖິງ ຊີວະນາໆພັນ ທີ່ເປັນສິ່ງມີຄ່າປະດັບປ່າ ທີ່ໜ້າອອນຊອນຂອງລາວ.

ຄວາມຈິງແລ້ວ ໄຟໄໝ້ລາມປ່າ ບໍ່ພຽງແຕ່ເກີດຂຶ້ນກັບປະເທດເຮົາ, ບັນດາປະເທດທີ່ຈະເລີນແລ້ວຫຼາຍປະເທດ ກໍປະສົບກັບ ບັນຫານີ້ ຊໍ້າຊ້ອນຫຼາຍປີ ທີ່ມີຄວາມຮຸນແຮງກວ່າພວກເຮົາຫຼາຍ ໂດຍສະເພາະ ຢູ່ປະເທດ ອົດສະຕີ, ສະຫະລັດອາເມລິ ລວມທັງປະເທດໃນ ເຂດອາເມລິກາກາງ ຫາ ໃຕ້ ໂດຍສະເພາະ ເຂດອາມາຊອນ ທີ່ນັບວ່າ ເປັນ ປອດຂອງໂລກ. ນອກນັ້ນ ປະເທດເພື່ອນບ້ານພວກເຮົາ ກໍຄືບັນດາປະເທດໃນເຂດ ອາຊີຕາເວັນອອກສຽງໃຕ້ ກໍປະສົບບັນຫານີ້ບໍ່ແມ່ນໜ້ອຍເຊັ່ນກັນ ຈົນເຮັດໃຫ້ ເກີດມີໝອກຄວັນ ທີ່ເປັນມົນລະພິດຂ້າມຊາຍແດນ ຫຼາຍຕໍ່ຫຼາຍເທື່ອ.

ສຳລັບ ການເກີດໄຟໄໝ້ໃນປະເທດເຮົານັ້ນ ກໍມີຫຼາຍສາເຫດ ໂດຍສະເພາະ ຈາກການບຸກເບີກ ເນື້ອທີ່ທຳການຜະລິດ ໂດຍສະເພາະ ການຈູດໄຮ່ ທີ່ບໍ່ສາມາດ ຄວບຄຸມໄດ້ ເລີຍລາມເຂົ້າສູ່ເຂດພື້ນທີ່ປ່າໄມ້ຢ່າງງ່າຍດາຍ ບວກກັບ ອາກາດທີ່ແຫ້ງແລ້ງ ແລະ ຮ້ອນອົບເອົ້າ, ນອກນັ້ນ ກໍແມ່ນການຂາດສະຕິ ແລະ ຂາດຄວາມຮັບຜິດຊອບຕ່າງໆ ຂອງກຸ່ມຄົນ ນຳໃຊ້ໄຟ ໃກ້ພື້ນທີ່ປ່າໄມ້.

ໄຟໄໝ້ປ່າ ບັນຫາທີ່ຕ້ອງລະວັງ - Wave100S AD to Website 2020 0 - ໄຟໄໝ້ປ່າ ບັນຫາທີ່ຕ້ອງລະວັງ

ໄຟໄໝ້ປ່າທີ່ລະດັບບໍ່ຮຸນແຮງ ອາດເປັນຜົນດີຕໍ່ປ່າໄມ້ບາງປະເພດ ແຕ່ສ່ວນໃຫຍ່ໄຟໄໝ້ປ່າ ແມ່ນເປັນອັນຕະລາຍ ຕໍ່ຄວາມອຸດົມສົມບູນຂອງລະບົບນິເວດປ່າໄມ້, ສ້າງຄວາມເສື່ອມໂຊມຕໍ່ຄຸນນະພາບດິນ, ການສູນເສຍຊີວະນາໆພັນ ທີ່ຫາຍາກ, ສູນເສຍເຄື່ອງຈັກທີ່ໃຫຍ່ໂຕ ສ້າງໂດຍທຳມະຊາດໃນການ ດູດຊັບ ທາດອາຍກາກບອນ ແລະ ເຮັດໃຫ້ ການປົກຫຸ້ມຂອງປ່າໄມ້ ບໍ່ສາມາດບັນລຸໄດ້ຕາມເປົ້າໝາຍ.

ໃນໄລຍະຜ່ານມາ ເມື່ອກ້າວເຂົ້າສູ່ຍາມແລ້ງ, ກະຊວງກະສິກຳ ແລະ ປ່າໄມ້ ໄດ້ ອອກແຈ້ງການ ກ່ຽວກັບ ການປ້ອງກັນ ແລະ ການຄວບຄຸມໄຟໄໝ້ລາມປ່າຂອງປະເທດເຮົາເປັນປະຈຳ ເຊິ່ງເປັນການໃຫ້ຄວາມສຳຄັນ ກັບບັນຫາດັ່ງກ່າວ ຢ່າງຈິງຈັງ.

ແຕ່ຢ່າງໃດກໍຕາມການຜັນຂະຫຍາຍ ແລະການຈັດຕັ້ງປະຕິບັດ ຕໍ່ຄຳແນະນຳ ຂອງສູນກາງລົງສູ່ທ້ອງຖິ່ນນັ້ນ ກໍຍັງເຫັນວ່າບາງຂົງເຂດກໍຍັງເຮັດບໍ່ທັນໄດ້ດີ ບວກໃສ່ກັບ ຄວາມອາດສາມາດທີ່ຍັງອ່ອນນ້ອຍຂອງພາກສ່ວນ ທີ່ກ່ຽວຂ້ອງ ຂັ້ນທ້ອງຖິ່ນ, ຂາດການຮ່ວມມື ຈາກພາກສ່ວນທີ່ກ່ຽວຂ້ອງ ເຮັດໃຫ້ການປ້ອງກັນ ແລະ ຄວບຄຸມໄຟໄໝ້ລາມປ່າຍັງເປັນສິ່ງທ້າທາຍ.

ເພື່ອເຮັດໃຫ້ການປ້ອງກັນ ແລະຄວບຄຸມ ໄຟໄໝ້ລາມປ່າໃຫ້ໄດ້ດີ ຮຽກຮ້ອງໃຫ້ ປະຊາຊົນ ແລະ ພາກສ່ວນຕ່າງໆ ມີສະຕິ, ໃຫ້ການຮ່ວມມື, ຮຽນຮູ້ວິທີປ້ອງກັນຢ່າງມີປະສິດທິພາບ, ປ້ອງກັນໄຟໄໝ້ລາມປ່າ ກໍສໍ່າກັບວ່າ ປົກປ້ອງຊັບສົມບັດຂອງພວກເຮົາ.

ໄຟໄໝ້ປ່າ ບັນຫາທີ່ຕ້ອງລະວັງ - WhatsApp Image 2020 05 27 at 5 - ໄຟໄໝ້ປ່າ ບັນຫາທີ່ຕ້ອງລະວັງ
ໄຟໄໝ້ປ່າ ບັນຫາທີ່ຕ້ອງລະວັງ - WhatsApp Image 2020 05 27 at 5 - ໄຟໄໝ້ປ່າ ບັນຫາທີ່ຕ້ອງລະວັງ
error: Alert: ເນື້ອຫາຂ່າວມີລິຂະສິດ !!