ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ

ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ - 146091557 1741276912718362 8339398277641156971 o - ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ
ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ - Untitled design - ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ

ໂດຍ: ທິດ​ກໍ່າ

ອີງຕາມການລາຍງານຂອງເຈົ້າໜ້າທີ່ຕຳຫລວດຈະລາຈອນໃຫ້ຮູ້ວ່າ: ພຽງ​ເດືອນ​ດຽວ​ໃນ​ທົ່ວ​ປະ​ເທດ​ມີ​ຄົນ​ລາວ​ເຮົາ​ຕາຍ​ຍ້ອນ​ອຸປະຕິ​ເຫດ​ເຖິງ 106 ຄົນ, ບາດ​ເຈັບ 1.076 ຄົນ, ລົດ​ເປ່​ເພ​ເສຍ​ຫາຍ 1.276 ຄັນ ​ແລະ ສູນ​ເສຍ​ເງິນ​ຄຳຊັບສິນ​ລວມມູນ​ຄ່າ​ເຖິງ 11 ຕື້ກີບ. ນີ້​ແມ່ນ​ຕົວ​ເລກ​ທີ່​ໄດ້​ມາ​ຈາກ​ກົມ​ຕຳຫລວດ​ຈະລາຈອນ ກະຊວງ​ປ້ອງ​ກັນ​ຄວາມ​ສະຫງົບ​ໃນ​ເດືອນ​ກຸມພາ​ນີ້​ເອງ. ​ເມື່ອ​ຮູ​ເຫັນ​ສະພາບ​ແບບ​ນີ້​ແລ້ວ ຄິດ​ໄປ​ຄິດ​ມາ​ມັນ​ກໍ​ໜ້າ​ຫົດ​ຫູ່​ສັງ​ເວດ ​ແລະ ສຸດ​ທີ່​ເປັນ​ຫ່ວງ​ຕໍ່​ຊາຕາກຳ​ຂອງ​ຜູ້​ຕາຍ, ຜູ້​ຍັງ ​ແລະ ຜູ້​ເຈັບ​ຜູ້​ເປັນ, ​ແຕ່​ທຸກ​ສິ່ງ​ຢ່າງ​ມັນ​ກໍ​ກັບ​ເກີດ​​ເປັນ​ໄປ​ຕາມ​ກຳ​ຂອງ​ໃຜ​ມັນ​ແລ້ວ. ​ເວົ້າ​ໄດ້​ວ່າ​ພົນລະ​ເມືອງ​ລາວ​ມັນ​ກໍ​ໜ້ອຍ​ຢູ່​ແລ້ວ ​ເມື່ອ​ມາ​ປຽບທຽບ​ໃສ່​ການ​ເກີດ​ກັບ​ການ​ຕາຍ​ໃນ​ແຕ່ລະ​ເດືອນ, ​ແຕ່ລະ​ປີ​ມັນ​ກໍ​ອາດ​ບໍ່​ຫລຸດ​ລື່ນ​ໂຕນ​ກັນ​ຫລາຍ​ພໍ​ເທົ່າ​ໃດ, ຊ້ຳບໍ່​ໜຳ ​ໃນ​ເງື່ອນ​ໄຂ​ທີ່​ປະ​ເທດ​ຊາດ​ຂອງ​ພວກ​ເຮົາ​ກໍ​ພວມ​ຢູ່​ໃນ​ຊ່ວງ​ໄລຍະ​ການ​ປະຕິບັດ​ບັນດາ​ມາດ​ຕະການ​ຕ້ານ ​ແລະ ສະກັດ​ກັ້ນການລະບາດ​ຂອງ​ພະຍາດ​ໂຄ​ວິດ-19 ທີ່​ພວມ​ແຜ່​ລາມ​ໄປ​ທົ່ວ​ໂລກ​ກໍ​ຍິ່ງ​ພ້ອມ​ກັນ​ມີ​ສະຕິ​ບໍ່​ຄວນ​ປະໝາດ ​ເພາະ​ເຊື້ອພະຍາດ​ດັ່ງກ່າວ​ພວມ​ສັງຫານ​ມວນ​ມະນຸດ​ໃນ​ທົ່ວ​ໂລກ​ຫລາຍ​ລ້ານ​ຄົນ​ມາ​ແລ້ວ. ສຳລັບ​ປະ​ເທດ​ເຮົາ ​ເຖິງ​ວ່າ​ຍັງ​ບໍ່​ທັນ​ມີ​ຜູ້​ໃດ​ເສຍ​ຊີວິດ​ຍ້ອນ ​ແຕ່​ວ່າ​ມັນ​ກໍ​ມີ​ຜົນ​ກະທົບ​ບໍ່​ໜ້ອຍ​ຕໍ່​ເສດຖະກິດ-ສັງຄົມ​ຂອງ​ປະ​ເທດ ​ເຊິ່ງມາ​ຮອດ​ປັດຈຸບັນ ພວກ​ເຮົາ​ກໍ​ຍັງ​ຢູ່​ໃນ​ເງື່ອນ​ໄຂ​ປິດ​ປະ​ເທດ​ຢູ່.

​ແຕ່​ວ່າ​ແນວ​ໃດ​ກໍ​ຕາມ, ສິ່ງ​ທີ່​ຕ້ອງ​ພ້ອມ​ພາກັນ​ຄິດ​ນັ້ນ ຄົນ​ລາວ​ພັດ​ມາ​ພາກັນ​ຕາຍ​ຍ້ອນ​ອຸປະຕິ​ເຫດ​ຕາມ​ທ້ອງ​ຖະໜົນ​ໃນ​ແຕ່​ລະມື້, ​ແຕ່ລະ​ເດືອນ ​ແລະ ​ແຕ່ລະ​ປີ​ເປັນ​ຈຳນວນ​ຫລາຍ​ຮ້ອຍ​ຫລາຍ​ພັນ​ຄົນ. ຕາມ​ທິດ​ກໍ່າ​ວ່າ ​ໃນ​ການ​ເສຍ​ຊີວິດ, ການ​ເຈັບ​ການ​ເປັນ​ຍ້ອນ​ອຸປະຕິ​ເຫດ​ແຕ່ລະຄັ້ງນັ້ນ ອັນຕົ້ນຕໍ​ມັນ​ກໍ​ມາ​ຈາກ​ຄວາມ​ປະໝາດ​ເລີ້ນ​ເລີ້​ຂາດ​ສະຕິ​ຂອງ​ຜູ້​ຂັບ​ຂີ່​ທີ່​ນຳ​ໃຊ້​ລົດ​ນຳ​ໃຊ້​ຖະໜົນ​ນັ້ນ​ເອງ ບໍ່​ຕ້ອງ​ໄປ​ໂທດ​ໃສ່​ຄົນ​ອື່ນ ຫລື ​ເງື່ອນ​ໄຂ​ອື່ນ ​ເພາະ​ຖ້າ​ທຸກ​ສິ່ງ​ຢ່າງຖ້າ​ເຮົາ​ມີ​ສະຕິ​ຮອບ​ຄອບ ​ໄພ​ອັນຕະລາ​ຍ່ອມ​ບໍ່​ມາ​ກັບ​ເກີດ​ກັບ​ເຮົ​າ​ເດັດຂາດ.

​ເມື່ອ​ເອີ່ຍ​ເຖິງ​ອຸປະຕິ​ເຫດ​ຕາມ​ທ້ອງ​ຖະໜົນ​ໃນ​ປະ​ເທດ​ເຮົາ​ທີ່​ກາຍ​ເປັນ​ກະ​ແສ​​ໂດ່​ງດັງ​ສະຫຍອງ​ຂວັນ​ອີກ​ບ່ອນ​ໜຶ່ງ ກໍ​ຄື​ຕາມ​ສາຍ​ທາງ​ດ່ວນ​ວຽງ​ຈັນ-ວັງ​ວຽງ ຈົນ​ມາ​ຮອດ​ປັດຈຸບັນ​ກໍ​ຍັງ​ແກ້​ບໍ່​ທັນ​ຕົກ ທັງໆ​ທີ່​ເສັ້ນທາງ​ດັ່ງກ່າວ​ໄດ້​ມາດຕະຖານ ​ແຕ່​ພັດ​ຍັງ​ໄປ​ຄາ​ນຳ​ສະພາບ​ແວດ​ລ້ອມ ຄື​ມີ​ງົວ, ຄວາຍ​ເຂົ້າ​ໄປ​ຍ່າງ​ຕາມ​ເສັ້ນທາງ​ແບບ​ໂກ້ໆ ​ເຊິ່ງ​ເບິ່ງ​ຢ່າງ​ໜຶ່ງ​ມັນ​ຄ້າຍຄື​ຂາດ​ຄວາມ​ຮັບຜິດຊອບ​ຂອງ​ພາກ​ສ່ວນ​ກ່ຽວຂ້ອງ ​ໂດຍ​ສະ​ເພາະ​ກໍ​ແມ່ນ​ເຈົ້າຂອງ​ສັດ​ທີ່​ເປັນ​ຄົນ​ລ້ຽງ​ປະປ່ອຍ​ຕາມ​ລຳພັງ​ໃຈ. ນອກ​ນັ້ນ ຮົ້ວຮາວ​ເພື່ອ​ກີດ​ກັ້ນສັດສາ​ວາ​ສິ່ງ​ເຂົ້າ​ໄປ​ໃນ​ບາງ​ບ່ອນ​ກໍ​ຍັງບໍ່​ທັນ​ໄດ້​ມາດຕະຖານ ​ແລະ ບໍ່​ທັນ​ສຳ​ເລັດ​ເທື່ອ.

ມາ​ຮອດ​ປັດຈຸບັນ, ​ເຫັນ​ວ່າ​ອຸປະຕິ​ເຫດ​ທີ່​ເກີດ​ຂຶ້ນຕາມ​ສາຍ​ທາງ​ດ່ວນ​ວຽງ​ຈັນ-ວັງ​ວຽງ​ກໍ​ຍັງ​ປາກົດ​ມີ​ໃຫ້​ເຫັນ​ຢ່າງ​ລຽນຕິດ ​ເຊິ່ງ​ໃນ​ການ​ເກີດ​ອຸປະຕິ​ເຫດ​ແຕ່ລະຄັ້ງນັ້ນ ມັນ​ກໍ​ມີ​ຫລາຍ​ສາ​ເຫດ ​ແລະ ຫລາຍ​ກໍລະນີ ​ເປັນຕົ້ນລົດ​ແລ່ນ​ໄປ​ຕຳ​ທ້າຍ​ລົດ​ທີ່​ກຳລັງ​ແລ່ນ​ໄປ​ທາງ​ເບື້ອງໜ້າ, ລົດ​ແລ່ນ​ແຊງ​ກັນ​ແລ້ວ​ເຈືອກ​ໄປ​ຕຳ​ຮົ້ວກັ້ນ ຫລື​ບໍ່ ກໍ​ແມ່ນ​ລົດ​ແລ່ນ​ໄປ​ຕຳ​ເອົາ​ງົວ ຕາຍ​ທັງ​ງົວ, ຕາຍ​ທັງ​ຄົນ ​ແລະ ພາຫະນະ​ກໍ​ເປ່​ເພ​ເສຍ​ຫາຍ​ມຸ່ນ​ປານ​ເຕະ​ເຫັດ. ຕາມ​ທຳ​ມະ​ດາ​ແລ້ວ ການ​ແລ່ນ​ລົດ​ຕາມ​ສາຍ​ທາງ​ດ່ວນ​ມັນ​ກໍ​ຕ້ອງ​ໄປ​ຕາມ​ກົດ​ຢ່າງ​ເຄັ່ງ​ຂັດ ​ແລະ ຖ້າ​ຜູ້​ໃດ​ຝືນ​ກົດ​ກໍ​ຈະ​ມີ​ອັນ​ເປັນ​ໄປ​ບໍ່​ໄວ​ກໍ​ຊ້າ.

ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ - Wave100S AD to Website 2020 0 - ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ

ສຳລັບ​ຢູ່​ປະ​ເທດ​ເຮົາຫາ​ກໍ​ມີ​ສາຍ​ທາງ​ດ່ວນ​ຍ່ານ​ນະຄອນຫລວງ​ວຽງ​ຈັນ​ຫາ​ວັງ​ວຽງ​ແຫ່ງ​ດຽວ ​ເຊິ່ງມີ​ຄວາມ​ຍາວ​ພຽງ 100 ກວ່າ​ກິ​ໂລ​ແມັດ, ​ແຕ່​ຖ້າ​ຫາກ​ຍັງ​ມີ​ອີກ​ຫລາຍ​ບ່ອນ​ໃນ​ອະນາຄົດ​ຍັງ​ບໍ່​ຮູ້​ວ່າ​ຈະ​ຕາຍ​ໜ້ອຍ ຫລື ຕາຍ​ຫລາຍ. ​ເມື່ອ​ຕັ້ງ​ໂຈດ​ກັນ​ວ່າ ອຸປະຕິ​ເຫດ​ຕາມ​ທ້ອງ​ຖະໜົນ​ຢູ່​ບ້ານ​ເຮົາ​ແຕ່ລະຄັ້ງສາ​ເຫດ​ຍ້ອນ​ຫຍັງ ​? ​ເກີດ​ມາ​ຈາກ​ໃສ ? ​ແລະ ຈາກ​ປັດ​ໄຈ​ເງື່ອນ​ໄຂ​ອັນ​ໃ​ດ​ແດ່ ? ຄຳ​ຕອບ​ຂອງ​ຫລາຍ​ຄົນ​ກໍ​ວ່າ​ຍ້ອນ​ເມົາ, ບາງ​ຄົນ​ກໍ​ວ່າ​ຍ້ອນ​ເສັ້ນທາງ​ບໍ່​ມາດຕະຖານ. ນອກຈາກ​ນັ້ນ ກໍ​ວ່າ​ຍ້ອນ​ບໍ່​ປະຕິບັດ​ກົດ​ລະບຽບ​ຈະລາຈອນ​ຢ່າງ​ເຄັ່ງ​ຂັດ. ​ແຕ່​ຖ້າ​ຈະ​ເອົາ​ສະພາບ​ຕົວ​ຈິງ​ມາ​ວັດ​ກັນ​ທຸກ​ສິ່ງ​ຢ່າງ​ທີ່​ອຸປະຕິ​ເຫດ​ທີ່​ມັນ​ເກີດ​ຂຶ້ນກັບ​ຕົວ​ເຮົາ​ນັ້ນມັນ​ກໍ​ແມ່ນ​ຍ້ອນ​ເຮົາ​ເອງ​ເປັນ​ຫລັກ ຖ້າ​ເມື່ອ​ໃດ​ຂາດ​ຄວາມ​ພ້ອມ, ຂາດ​ສະຕິ​ປະໝາດ​ເລີ້​ນ​ເລີ້​ ມັດຈຸລາດ​ຍ່ອມ​ມາ​ຫ​າ​ເຮົາ​ໄດ້​ທຸກ​ເມື່ອ​ທຸກ​ເວລາ ນັ້ນ​ແລ !.

 

ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ - WhatsApp Image 2020 05 27 at 5 - ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ
ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ - WhatsApp Image 2020 05 27 at 5 - ອຸປະຕິ​ເຫດ​ເກີດ​ຂຶ້ນ​ໄດ້​ທຸກ​ເມື່ອ ຖ້າ​ປະໝາດ​ຂາດ​ສະຕິ
error: Alert: ເນື້ອຫາຂ່າວມີລິຂະສິດ !!