ຕຳແລ້ວໜີມີໂທດໜັກ

- advert banner 728 90 728x90 - ຕຳແລ້ວໜີມີໂທດໜັກ

ປັດຈຸບັນສະພາບອຸປະຕິເຫດບົນທ້ອງຖະໜົນນັບທັງຢູ່ຕົວເມືອງ ແລະ ທ້ອງຖິ່ນຕ່າງໆເຫັນວ່າມີລັກສະນະແຜ່ຫລາຍ ແລະ ເກີດຂຶ້ນລາຍວັນ, ອັນໄດ້ສ້າງຄວາມເສຍຫາຍແກ່ຊີວິດ ແລະ ຊັບສີນຂອງສັງຄົມເປັນຈໍານວນບໍ່ໜ້ອຍ ແລະ  ສິ່ງທີ່ສັງຄົມເລີ່ມມີຄວາມເປັນຫວ່ງຫລາຍໃນປັດຈຸບັນແມ່ນສະພາບອຸປະຕິເຫດຕຳແລ້ວໜີທີ່ພວມເກີດຂຶ້ນຢ່າງຕໍ່ເນື່ອງຄືດັ່ງມີການເຜີຍແຜ່ໃນສື່ສັງຄົມອອນລາຍຕ່າງໆ.

ເຈົ້າໜ້າທີ່ ໃຫ້ຮູ້ວ່າ: ສະເພາະ 6 ເດືອນຜ່ານມາຢູ່, ນະຄອນຫລວງວຽງຈັນ ມີອຸປະຕິເຫດເກີດຂຶ້ນຫລາຍກວ່າ 800 ກໍລະນີ, ມີຜູ້ເສຍຊີວິດ 127 ຄົນ, ໃນນີ້ຕຳແລ້ວໜີມີ 13 ກໍລະນີ, ສົ່ງຜົນໃຫ້ມີຜູ້ເສຍຊີວິດ 9 ຄົນ, ເຊິ່ງບັນຫາດັ່ງກ່າວເບື້ອງເຈົ້າໜ້າທີ່ກ່ຽວຂ້ອງກຳລັງຫາວິທີສະກັດກັ້ນ, ແກ້ໄຂ ແລະ ມີມາດຕະການລົງໂທດຕໍ່ຜູ້ກະທຳຜິດຕຳແລ້ວໜີເຂັ້ມງວດຫລາຍຂຶ້ນ ເພື່ອໃຫ້ສັງຄົມມີຄວາມເກງກົວຕໍ່ຕົວບົດກົດໝາຍ ແລະ ການຖືກລົງໂທດຫລາຍຂຶ້ນ.

ທ່ານພັນຕີ ວິຣະພົງ ສະເໜ່ຫາ ຮອງຫົວໜ້າພະແນກຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນເຈົ້າໜ້າທີ່ໄດ້ເອົາໃຈໃສ່ເຂັ້ມງວດໃນການແກ້ໄຂບັນຫາອຸປະຕິເຫດ, ໂດຍສະເພາະການເລັ່ງໂຄສະນາໃຫ້ສັງຄົມເຂົ້າໃຈກົດລະບຽບຈະລາຈອນ ແລະ ພ້ອມກັນປະຕິບັດຢ່າງເຂັ້ມງວດ, ພ້ອມດຽວກັນກໍຈະເພີ່ມທະວີໃນການແກ້ໄຂບັນຫາອຸປະຕິເຫດລັກສະນະຕຳແລ້ວໜີທີ່ກຳລັງເປັນປະກົດການຫຍໍ້ທໍ້ໜຶ່ງຂອງສັງຄົມທີ່ພວມເກີດຂຶ້ນຫລາຍໃນສັງຄົມ, ເຊິ່ງຜ່ານມາການຕິດຕາມຈັບຕົວຜູ້ຕຳແລ້ວໜີມາດໍາເນີນຄະດີຕາມລະບຽບກົດໝາຍເຫັນວ່າມີຫລາຍ, ພ້ອມທັງໄດ້ປັບໃໝຕາມດຳລັດ 188/ນຍ ແລະ ປະຕິບັດໂທດຕາມ ກົດໝາຍອາຍາກໍານົດ, ແຕ່ບັນຫາດັ່ງກ່າວກໍຍັງສືບຕໍ່ເກີດຂຶ້ນ. ສະນັ້ນ, ເຈົ້າໜ້າທີ່ຈະດຳເນີນການປັບໃໝຂຶ້ນເປັນ 2 ເທົ່າຕໍ່ຜູ້ຂັບຂີ່ຕຳແລ້ວໜີ, ພ້ອມທັງດຳເນີນຄະດີຕາມລະບຽບກົດໝາຍຢ່າງເຂັ້ມງວດກວ່າເກົ່າ.

- 1 1 - ຕຳແລ້ວໜີມີໂທດໜັກ
- Tiger Head 728x90 - ຕຳແລ້ວໜີມີໂທດໜັກ

ທ່ານ ຈຳປາ ພັນທະຈັກ ຮອງປະທານສານປະຊາຊົນນະຄອນຫລວງວຽງຈັນ ໃຫ້ຮູ້ວ່າ: ອຸປະຕິເຫດຕຳແລ້ວໜີແມ່ນເປັນການກະທຳຜິດໃນກົດໝາຍອາຍາຄື: ໃນມາດຕາ 86 ລະບຸວ່າ: ບຸກຄົນໃດຫາກໄດ້ລະເມີດກົດຈະລາຈອນທີ່ພາໃຫ້ເກີດອຸປະຕິເຫດ ແລະ ເຮັດໃຫ້ຜູ້ອື່ນຖືກບາດເຈັບ ຈະຖືກປັບໃໝແຕ່ 50.000-300.000 ກີບ. ໃນກໍລະນີທີ່ເປັນການກະທຳຜິດເຮັດໃຫ້ມີຜູ້ບາດເຈັບສາຫັດ, ເຈັບຫລາຍຄົນ ຫລື ເສຍອົງຄະ ຈະຖືກລົງໂທດຕັດອິດສະຫລະພາບແຕ່ 6ເດືອນຫາ 3 ປີ ແລະ ຈະຖືກປັບໃໝແຕ່ 100.000-500.000 ກີບ. ໃນກໍລະນີທີ່ເປັນການກະທຳຜິດຊຶ່ງພາໃຫ້ມີຄົນເສຍຊີວິດຈະຖືກລົງໂທດຕັດອິດສະຫລະພາບແຕ່ 2-5 ປີ ແລະ ຈະຖືກປັບໃໝແຕ່ 150.000-700.000 ກີບ. ໃນກໍລະນີທີ່ເປັນການກະທຳຜິດຊຶ່ງພາໃຫ້ມີຄົນເສຍຊີວິດເປັນຈຳນວນຫລາຍ ຈະຖືກລົງໂທດຕັດອິດສະຫລະພາບແຕ່ 5-10 ປີ ແລະ ຈະຖືກປັບໃໝແຕ່ 200.000-1.000.000 ກີບ. ມາດຕາ 87: ການຫລົບໜີຈາກອຸປະຕິເຫດ ຖ້າບຸກຄົນໃດຫາກໄດ້ເຮັດໃຫ້ຜູ້ອື່ນເສຍຊີວິດດ້ວຍຄວາມປະໝາດ, ຄວາມເລີ່ນເລີ້ ຈະຖືກລົງໂທດຕັດອິດສະຫລະພາບແຕ່ 2-5 ປີ ແລະ ຈະຖືກປັບໃໝແຕ່ 200.000-1.000.000 ກີບ, ຄວາມພະຍາຍາມກໍ່ການກະທຳຜິດກໍຈະຖືກລົງໂທດເຊັ່ນກັນ ແລະ ເມື່ອບໍ່ດົນມານີ້, ສານປະຊາຊົນນະຄອນຫລວງວຽງຈັນ ໄດ້ຕັດສິນລົງໂທດຜູ້ຂັບລົດໃຫຍ່ຕຳລົດຈັກ, ເຮັດໃຫ້ສອງແມ່ລູກເສຍຊີວິດຄາທີ່ ທີ່ບ້ານໂພນປ່າເປົ້າ, ເມືອງສີສັດຕະນາກ, ນະຄອນຫລວງວຽງຈັນໃນປີຜ່ານມາ, ແລ້ວຄົນຂັບລົດເອົາໂຕລົບໜີ, ໂດຍສານໄດ້ລົງໂທດຕັດອິດສະຫລະພາບຜູ້ກ່ຽວຈໍາຄຸກເປັນເວລາ 5 ປີ 6 ເດືອນ, ພ້ອມປັບໃໝ 1 ລ້ານກີບ ແລະ ໃຫ້ຜູ້ກ່ຽວຮັບຜິດຊອບທາງແພ່ງໃນການມ້ຽນຄາບອາບສົບ, ສົ່ງສະການ ແລະ ປົວແປງຈິດໃຈຄອບຄົວຜູ້ເສຍຊີວິດເປັນຈຳນວນເງີນຫລາຍກວ່າ 100 ລ້ານກີບ.

error: Content is protected !!