ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ

ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ - eb australia 021821 2x - ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ
ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ - Untitled design - ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ

ຊາວ​ອົດ​ສະຕຣາລີ​ກຳລັງ​ຕົກ​ໃຈຕໍ່​ເຟສບຸກ ​ເພາະ​ນັບ​ແຕ່​ວັນ​ທີ 18 ກຸມພາ ຈະ​ບໍ່​ມີ​ຂ່າວສານ​ຈາກ​ສຳນັກ​ຂ່າວ​ຕ່າງໆ​ປາກົດ​ໃນ​ໜ້າ​ຂອງ​ເຟສບຸ​ກອີກ​ຕໍ່​ໄປ. ຂະນະ​ດຽວ​ກັນ ບັນດາ​ສຳນັກ​ຂ່າວ​ຢູ່​ອົດ​ສະຕຣາລີ ຈະ​ບໍ່​ໄດ້​ຮັບ​ອະນຸຍາດ​ໃຫ້​ໂພສຂ່າວ​ໃນ​ເຟສບຸກອີກ.

ທັງ​ໝົດ​ນີ້​ເປັນ​ເພາະ​ເຟສບຸກບໍ່​ຢາກ​ຈ່າຍ​ຄ່າ​ຂ່າວໃຫ້​ສຳນັກ​ຂ່າວ​ໃນ​ອົດ​ສະຕຣາລີ​ຕາມ​ນະ​ໂຍບາຍ​ຂອງ​ລັດຖະບານ ​ເຊິ່ງ​ເບິ່ງ​ວ່າ​ເຟສບຸກສວຍ​ໂອກາດ​ກິນ​ຄ່າ​ໂຄສະນາ ​ໂດຍ​ອາ​ໄສ​ຜົນ​ປະ​ໂຫຍດຈາກ​ເນື້ອ​ໃນ​ຂອງ​ບໍລິສັດ​ສື່​ໃນ​ອົດ​ສະຕຣາລີ. ທີ່​​ໄປ​ທີ່​ມາ​ຂອງ​ເຫດການ​ນີ້​ເປັນ​ແນວ​ໃດ ​ເຮົາ​ຈະ​ສະຫລຸບ​ໃຫ້​ອ່ານດັ່ງ​ນີ້:

ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ - Wave100S AD to Website 2020 0 - ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ
  1. ​ໃນ​ວັນ​ທີ 18 ກຸມພາ, ​ເຟສບຸກ ​ເຄືອ​ຂ່າຍ​ສັງຄົມ​ອອນ​ລາຍ​ຊື່​ດັງ ບັງຄັບ​ໃຊ້​ມາດ​ຕະການ​ປິດ​ກັ້ນ​ເນື້ອ​ໃນ​ທີ່​ເປັນ​ຂ່າວສານ​ໃນ​ອົດ​ສະຕຣາລີ ​ເຊິ່ງຈະ​ສົ່ງ​ຜົນ​ໃຫ້​ຜູ້ນຳ​ໃຊ້​ເຟສບຸກ​ໃນ​ອົດ​ສະຕຣາລີ ຈະ​ບໍ່​ເຫັນ​ເນື້ອ​ໃນ​ທີ່​ເປັນ​ຂ່າວສານ​ໃນ​ໜ້າ​ເພ​ລ​ອີກ​ຕໍ່​ໄປ ບໍ່​ວ່າ​ຈະ​ເປັນ​ຂ່າວຈາກ​ສຳນັກ​ຂ່າວ​ໃນ​ອົດ​ສະຕຣາລີ​ເອງ ຫລື ຂ່າວ​ຕ່າງປະ​ເທດ​ຈາກ​ສື່​ຕ່າງປະ​ເທດ, ຜູ້ນຳ​ໃຊ້​ໃນ​ອົດ​ສະຕຣາລີ​ຈະ​ຖືກ​ປິດ​ກັ້ນການ​​ແນມ​ເຫັນ​ທັງ​ໝົດ.
  2. ມາດ​ຕະການ​ຂອງ​ເຟສບຸກຍັງ​ລວມ​ເຖິງ​ການບລັອກສຳນັກ​ຂ່າວ​ໃນ​ອົດ​ສະຕຣາລີ ບໍ່​ໃຫ້​ໂພສຂ່າວສານ​ທາງ​ເຟສບຸກ ​ເຊິ່ງຈາກ​ການກວດ​ສອບ​ຂອງ​ທີ​ມຂ່າວ​ພົບ​ວ່າ: ຖ້າ​ເຮົາ​ເຂົ້າ​ໄປ​ໃນ​ໜ້າ​ເພລ​ເຟສບຸກສຳນັກ​ຂ່າວ​ອົດ​ສະຕຣາລີ​ເຊັ່ນ: ABC News Australia ຫລື 9 News ຈະ​ຂຶ້ນຂໍ້ຄວາມ​ວ່າ: “ຍັງ​ບໍ່​ມີ​ໂພສ”.
  3. ການ​ປິດ​ກັ້ນຂ່າ​ວສານ​ຂອງ​ເຟສບຸກ​ໃນ​ອົດ​ສະຕຣາລີ​ຖືກ​ເບິ່ງ​ວ່າ​ເປັນ​ມາດ​ຕະການ​ຕອບ​ໂຕ້ ຫລັງ​ລັດຖະບານ​ອົດ​ສະຕຣາລີ​ເດີນ​ໜ້າ​ຊຸກຍູ້​ມາ​ຢ່າງ​ຕໍ່​ເນື່ອງ ​ໃຫ້​ບໍລິສັດ​ຍັກ​ໃຫຍ່​ໄອ​ທີ ​ໂດຍ​ສະ​ເພາະ​ເຟສບຸກ ​ແລະ ກູ​ເກິ​ລ ຕ້ອງ​ຈ່າຍ​ຄ່າ​ເນື້ອ​ໃນ​ໃຫ້​ສຳນັກ​ຂ່າວ ​ເພາະ​ເບິ່ງ​ວ່າ​ຜ່ານ​ມາ​ແພກຟອມອອນ​ລາຍ​ເຫລົ່າ​ນີ້​ເອົາ​ປຽບ​ສຳນັກ​ຂ່າວ ຜ່າ​ນການ​ໃຊ້​ເນື້ອ​ໃນ​ໄປ​ສ້າງ​ລາຍ​ໄດ້​ເຂົ້າບໍລິສັດ​ຕົນ​ເອງ.
  4. ຈາກ​ການ​ປະ​ເມີນ​ລາຍ​ໄດ້​ໂຄສະນາ​ໃນ​ສື່​ອອນ​ລາຍ​ຢູ່​ອົດ​ສະຕຣາລີ ພົບ​ວ່າ​ເຕີບ​ໃຫຍ່​ສູງ​ເຖິງ 8 ​ເທົ່າ ​ໃນ​ໄລຍະ 16 ປີຜ່ານມາ ​ໂດຍ​ປັດຈຸບັນ​ມີ​ມູນ​ຄ່າ​ປະມານ 9 ພັນ​ລ້ານ​ໂດ​ລາ​ອົດ​ສະຕຣາລີ, ​ແຕ່​ເມື່ອ​ເຈາະ​ລົງ​ໄປ​ເບິ່ງ​ໃນ​ລາຍ​ລະອຽດ​ພົບ​ວ່າ: ລາຍ​ໄດ້​ຈາກ​ການ​ໂຄສະນາ​ເກືອບ 1 ​ໃນ 3 ​ເຂົ້າສູ່​ເຈົ້າຂອງ​ແພກຟອມ ຄື​ເຟສບຸກ ​ແລະ ກູ​ເກິ​ລ.
  5. ຂະນະ​ທີ່​ບັນດາ​ບໍລິສັດ​ສື່​ໃນ​ອົດ​ສະຕຣາລີ​ຍັງ​ຕ້ອງ​ຜະ​ເຊີນ​ຊະ​ຕາ​ກຳ​ຄື​ກັບ​ບໍລິສັດ​ສື່​ທົ່ວ​ໂລກ ຄື​ບັນຫາ​ເຕັກ​ໂນ​ໂລ​ຊີ​ທີ່​ຄຸກ​ຄາມ​ທຸລະ​ກິດ​ສື່​ຢ່າງ​ຮຸນ​ແຮງ ​ເຮັດ​ໃຫ້​ອັດຕາ​ການ​ໂຄສະນາ​ຜ່ານ​ຊ່ອງ​ທາງ​ສື່​ເກົ່າ​ເຊັ່ນ: ໜັງສືພິມ ຫລື ​ໂທລະພາບ​ຫລຸດ​ລົງ.
  6. ສະຖານະ​ການ​ເຫລົ່າ​ນີ້ ​ເຮັດ​ໃຫ້​ລັດຖະບານ​ອົດ​ສະຕຣາລີ ລວມທັງ​ບໍລິສັດ​ສື່​ເຈົ້າຂອງ​ເນື້ອ​ໃນ​ເບິ່ງ​ວ່າ: ກຳລັງ​ບໍ່​ໄດ້​ຮັບ​ຄວາມ​ເປັນ​ທຳ​ຈາກ​ເຟສບຸກ ​ແລະ ກູ​ເກິ​ລ ​ເຊິ່ງ​ເປັນ​ເຈົ້າຂອງ​ແພກຟອມ ນຳ​ໄປ​ສູ່​ການ​ອອກ​ກົດໝາຍ​ເພື່ອ​ບັງຄັບ​ໃຫ້​ເຈົ້າຂອງ​ແພກຟອມຕ້ອງ​ຈ່າຍ​ເງິນ​ຄ່າ​ເນື້ອ​ໃນ​ໃຫ້​ບໍລິສັດ​ສື່​ທ້ອງ​ຖິ່ນ.
  7. ກູ​ເກິລ ​ເຊິ່ງຖືກ​ບັງຄັບ​ໃຊ້​ມາດ​ຕະການ​ດຽວ​ກັບ​ເຟສບຸກ ຍອມ​ປະຕິບັດ​ຕາມ​ລັດຖະບານ​ອົດ​ສະຕຣາລີ ​ໂດຍ​ເລີ່​ມ​ເຂົ້າ​ໄປ​ເຈລະຈາ​ກັບ​ບໍລິສັດ​ສື່​ເພື່ອ​ຂໍຊື້​ເນື້ອ​ໃນ, ​ແຕກ​ຕ່າງ​ຈາກ​ເຟສບຸກທີ່​ຢືນຢັນ​ຈະ​ບໍ່​ເຈລະຈາ ກ່ອນ​ຈະ​ດຳ​ເນີນ​ການ​ປິດ​ກັ້ນ​ເນື້ອ​ໃນ​ຂ່າວ.
  8. ​ເຟສບຸກຊີ້​ແຈງ​ວ່າ: ສາ​ເຫດ​ທີ່​ບໍ່​ໄປ​ເຈລະຈາ​ຊື້​ເນື້ອ​ໃນ​ແບບ​ກູ​ເກິ​ລ ​ເປັນ​ເພາະ​ລັກສະນະ​ຂອງ​ກູ​ເກິ​ລກັບ​ເຟສບຸກ​ແຕກ​ຕ່າງ​ກັນ ​ໂດຍ​ເຟສບຸ​ກອ້າງ​ວ່າ: ກູ​ເກິ​ລ​ເປັນ​ການຄົ້ນຫາ​ຂໍ້​ມູນ​ທີ່​ບັນດາ​ເຈົ້າຂອງ​ເນື້ອ​ໃນ​ບໍ່​ໄດ້​ສະໝັກ​ໃຈ​ໃຫ້​ປາກົດ​ໃນ​ກູ​ເກິ​ລ ​ແຕກ​ຕ່າງ​ຈາກ​ເຟສບຸກທີ່​ບັນດາ​ບໍລິສັດ​ສື່ ​ເລືອກ​ເປັນ​ຝ່າ​ຍ​ໂພສ​ເນື້ອ​ໃນ​ໃຫ້​ເຟສບຸກ​ເອງ.
  9. ​ເຟສບຸກຍັງ​ຢືນຢັນ​ອີກ​ວ່າ: ຜ່ານ​ມາ​ຂ່າວ​ໃນ​ເຟສບຸກສ້າງ​ລາຍ​ໄດ້​ໃຫ້​ເຟສບຸກບໍ່​ເຖິງ 4% ຂອງ​ເນື້ອ​ໃນ​ທັງ​ໝົດ​ໃນ​ໜ້າ​ເພສ. ຂະນະ​ດຽວ​ກັນ ຍັງ​ເຊື່ອ​ວ່າ: ບໍລິສັດ​ສື່​ຕ່າງຫາກ​ທີ່​ເປັນ​ຝ່າຍ​ໄດ້​ປຽບ​ຈາກ​ການ​ນຳ​ເອົາ​ເນື້ອ​ໃນ​ໄປ​ລົງ​ໄປ​ເຟສບຸກ ​ໂດຍ​ອ້າງ​ເຖິງ​ລາຍ​ໄດ້​ມູນ​ຄ່າ​ກວ່າ 407 ລ້ານ​ໂດ​ລາ​ອົດ​ສະຕຣາລີ ທີ່​ບໍລິສັດ​ສື່​ໄດ້​ຮັບ​ຈາກ​ການ​ໃຊ້​ແພກຟອມ​ເຟສບຸກ.
  10. ​ເຖິງ​ຢ່າງ​ໃດ​ກໍ​ຕາມ, ມາດ​ຕະການ​ປິດ​ກັ້ນສື່​ທັງ​ໝົດ​ໃນ​ອົດ​ສະຕຣາລີ​ຂອງ​ເຟສບຸກ ກາຍ​ເປັນ​ສິ່ງ​ທີ່​ຫລາຍ​ຝ່າຍ​ວິຈານ​ຢ່າງ​ໜັກ​ວ່າ​ບໍ່​ເໝາະ​ສົມ ​ເພາະ​ຕອນ​ທຳ​ອິດ​ເຟສບຸກປິດ​ກັ້ນການ​ເຂົ້າ​ເຖິງ​ຂໍ້​ມູນ​ຂອງ​ເພສຂ່າວສານ​ຈາກ​ໜ່ວຍ​ງານ​ລັດ​ທີ່​ເປັນ​ຊ່ອງ​ທາງ​ເຜີຍ​ແຜ່​ຂໍ້​ມູນ​ສຳຄັນ​ໄປ​ນຳ​ເຊັ່ນ: ຂ່າວ​ກ່ຽວ​ກັບ​ການລະບາດ​ຂອງ​ພະຍາດ​ໂຄ​ວິດ-19 ຖືກ​ປິດ​ກັ້ນການ​ເຂົ້າ​ເຖິງ​ໃນ​ໄລຍະ​ທຳ​ອິດ ​ແຕ່​ໃນ​ເວລາ​ຕໍ່​ມາ​ເຟສບຸກຍອມຮັບ​ວ່າ: ນີ້​ເປັນຄວາມ​ຜິດພາດ.
  11. ຜູ້ອຳນວຍການ​ເຟສບຸກປະຈຳ​ອົດສະຕຣາລີ​ຢືນຢັນ​ວ່າ: ​ເຟສບຸກຈະ​ສະໜັບສະໜູນ​ການ​ນຳ​ສະ​ເໜີ​ຂ່າວສານ ​ແລະ ​ແນວທາງ​ສື່​ມວນ​ຊົນ ​ເຊິ່ງ​ເປັນ​ຫົນທາງ​ຂອງ​ປະຊາທິປະ​ໄຕ​ຕໍ່​ໄປ ​ໂດຍ​ຍັງ​ເປີດ​ໃຫ້​ຜູ້​ໃຊ້​ໃນ​ອົດ​ສະຕຣາລີ​ເຂົ້າ​ເຖິງ​ສູນ​ຂໍ້​ມູນ​ໂຄ​ວິດ-19 ລວມທັງ​ຍັງ​ສະໜັບສະໜູນ​ໜ່ວຍ​ງານ​ຕ່າງໆ​ທີ່​ເຮັດ​ໜ້າ​ທີ່​ກວດ​ສອບ​ຂໍ້​ມູນ​ຄວາມ​ຈິງ ​ແລະ ​ເນັ້ນການ​ບັງຄັບ​ໃຊ້​ມາດ​ຕະການ​ຕໍ່ຕ້ານ​ຂໍ້​ມູນ​ທີ່​ບິດ​ເບືອນ​ນຳ.
  12. ຂະນະ​ທີ່​ຊາວ​ອົດ​ສະຕຣາລີ ​ເຊິ່ງ​ເປັນ​ຜູ້​ໃຊ້​ເຟສບຸກ ຕ່າງ​ສະ​ແດງ​ຄວາມ​ບໍ່​ເຫັນ​ພ້ອມ​ຕໍ່​ມາດ​ຕະການ​ຂອງ​ເຈົ້າຂອງ​ແພກຟອມ ​ໂດຍ​ລະບຸ​ວ່າ: ສ່ວນ​ຫລາຍ​ຜູ້​ໃຊ້​ມັກ​ຕິດຕາມ​ຂ່າວ​ຜ່ານ​ທາງ​ເຟສບຸກ​ເປັນ​ຫລັກ ການ​ປິດ​ກັ້ນຂ່າວ​ໃນ​ເຟສບຸກສົ່ງ​ຜົນ​ກະທົບ​ຫລາຍ​ຕໍ່​ການ​ໃຊ້​ຊີວິດ.
  13. ສຽງ​ວິພາກ​ວິຈານ​ເຟສບຸກຕໍ່​ມາດ​ຕະການ​ນີ້​ຍັງ​ມາ​ຈາກ​ໜ່ວຍ​ງານ​ດ້ານ​ສິດທິ​ມະນຸດ​ຄື “ຮິ​ວ​ແມນ​ໄຣວອດ” ທີ່​ເບິ່ງ​ວ່າ: ການ​ປິດ​ກັ້ນຂ່າວສານ​ກັບ​ຜູ້​ໃຊ້​ໃນ​ອົດ​ສະຕຣາລີ​ເປັນ​ເລື່ອງ​ອັນຕະລາຍ ລວມທັງ​ລັດຖະມົນຕີ​ສື່ສານ​ຂອງ​ອົດ​ສະຕຣາລີ​ທີ່​ຊີ້​ວ່າ: ມາດ​ຕະການ​ຂອງ​ເຟສບຸກຈະ​ເຮັດ​ໃຫ້​ປະຊາຊົນ​ເຂົ້າບໍ່​​ເຖິງ​ຂ່າວ​ທີ່​ຜະລິດ​ໂດຍ​ສື່​ມວນ​ຊົນ​ມື​ອາຊີບ ​ແລະ ຜ່ານ​ຂະ​ບວນການ​ກັ່ນ​ກອງ​ຂໍ້​ມູນ​ຄວາມ​ຈິງ​ແລ້ວ.
ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ - WhatsApp Image 2020 05 27 at 5 - ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ
ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ - WhatsApp Image 2020 05 27 at 5 - ເຟສບຸກອົດສະຕຣາລີ ປິດກັ້ນຂ່າວສານ ເພາະບໍ່ຢາກຈ່າຍຄ່າຂ່າວ
error: Alert: ເນື້ອຫາຂ່າວມີລິຂະສິດ !!