ໄຂງານວາງສະແດງເຄື່ອງເຮືອນລາວ ຄັ້ງທີ 2 

- advert banner 728 90 728x90 - ໄຂງານວາງສະແດງເຄື່ອງເຮືອນລາວ ຄັ້ງທີ 2 

ງານວາງສະແດງເຄື່ອງເຮືອນລາວ ຄັ້ງທີ 2 ປະຈຳປີ 2017 ໄດ້ໄຂຂຶ້ນໃນວັນທີ 10 ກໍລະກົດນີ້, ທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສົມຫວັງ ນິນທະວົງ ຫົວຫນ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ, ມີທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ມີບັນດານັກທຸລະກິດ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານປະທານສະມາຄົມເຟີນີເຈີ ກ່າວເປີດພິທີວ່າ: ງານດັ່ງກ່າວ     ຈະດຳເນີນໄປຮອດວັນທີ 15 ກໍລະກົດນີ້, ເພື່ອເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະ ມີໄວ້ໃຊ້ຢ່າງຍືນຍົງ, ໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບມາຈາກໄມ້, ຫວາຍ ແລະ ໄມ່ປ່ອງໃຫ້ມີຫລາກຫລາຍຜະລິດຕະພັນຕາມທີ່ສັງຄົມຕ້ອງການ ແລະ ເປັນທີ່ນິຍົມກັນຢູ່ ດ້ວຍການນຳໃຊ້ເຕັກໂນໂລຊີທີ່ທັນສະໄຫມ, ທັງເປັນການສ້າງມູນຄ່າເພີ່ມໃຫ້ກັບໄມ້ລາວໃຫ້ກາຍເປັນສິນຄ້າທີ່ມີຄຸນນະພາບ ຕາມຄວາມຕ້ອງການຂອງລູກຄ້າ ແລະ ຕະຫລາດ, ເຮັດໃຫ້ສາມາດສົ່ງອອກຕ່າງປະເທດໄດ້. ພ້ອມນີ້ ຍັງເປັນການສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພຫວ່າງງານ ແລະ ຫລຸດຜ່ອນຄວາມທຸກຍາກໃນອະນາຄົດນຳອີກ. ທ່ານຫົວຫນ້າກົມສົ່ງເສີມການຄ້າ ກ່າວວ່າ: ງານດັ່ງກ່າວເປັນການສົ່ງເສີມໃຫ້ຜູ້ປະກອບການໄດ້ມີໂອກາດແລກປ່ຽນບົດຮຽນ, ປະສົບການຮ່ວມກັນ ແລະ ຍັງເປັນການຊຸກຍູ້ໃຫ້ປະຊາຊົນບັນດາເຜົ່າໄດ້ມີການຜະຜິດສິນຄ້າໃຫ້ນັບມື້ຫລາຍຂຶ້ນ. ພ້ອມນີ້ ຍັງເປັນການດຶງດູດເອົາການລົງທຶນຈາກພາຍໃນ ແລະ ຕ່າງປະເທດໃຫ້ມາລົງທຶນໃນຂົງເຂດການຜະລິດເຟີນີເຈີ, ກໍຄືການປະກອບສ່ວນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ. ພາຍໃນງານໄດ້ມີຜູ້ປະກອບການທຸລະກິດຫລາຍກວ່າ 60 ຫົວຫນ່ວຍ, ໃນນັ້ນ ມາຈາກຕ່າງແຂວງ 16 ຫົວຫນ່ວຍ ແລະ ມີຫ້ອງວາງສະແດງ-ຈຳຫນ່າຍສິນຄ້າຫລາຍກວ່າ 160 ຫ້ອງ, ໃນນັ້ນ ມີສິນຄ້າໂອດອບ 16 ຫ້ອງ, ນອກນີ້ ຍັງໄດ້ຈັດໃຫ້ມີຫລາກຫລາຍກິດຈະກຳ ເປັນຕົ້ນ ການສະແດງສິລະປະສາທິດການແກະສະລັກ, ຈົກສະຫລາກຊິງໂຊກ ແລະ ແຂ່ງຂັນດົນຕີເຕັມວົງ ເພື່ອຊິລາງວັນ ເພື່ອສ້າງບັນຍາກາດໃຫ້ເບີກບານມ່ວນຊື່ນອີກດ້ວຍ. ພິເສດ ຄາດວ່າຈະມີຜູ້ເຂົ້າຮ່ວມຊື້ສິນຄ້າປະມານ 4 ແສນກວ່າຄົນ ແລະ ມີເງິນຫມູນວຽນພາຍໃນງານປະມານ 40 ຕື້ກີບ.

- new3 - ໄຂງານວາງສະແດງເຄື່ອງເຮືອນລາວ ຄັ້ງທີ 2 

 

- lattana 1 - ໄຂງານວາງສະແດງເຄື່ອງເຮືອນລາວ ຄັ້ງທີ 2 

 

error: Content is protected !!