ໂຄວິດເຮັດໃຫ້ທົ່ວໂລກສ້າງໜີ້ເພີ່ມເປັນປະຫວັດສາດ

ສະ​ຖາ​ບັນ​ການ​ເງິນ​ສາກົນ (IIF) ລະບຸ​ວ່າ: ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ສົ່ງ​ຜົນ​ໃຫ້​ໜີ້​ສິນ​ທົ່ວ​ໂລກ​ເພີ່ມ​ຂຶ້ນ 24 ຕື້​ໂດ​ລາ​ສະຫະລັດ ​ໃນ​ໄລຍະ​ປີຜ່ານມາ ​ໂດຍ​ມີ​ມູນ​ຄ່າ​ລວມ 281 ຕື້​ໂດ​ລາ​ສະຫະລັດ ຢູ່​ລະດັບ​ສູງ​ສຸດ​ເປັນ​ປະຫວັດສາດ ​ໂດຍ​ອັດຕາ​ສ່ວນ​ໜີ້​ຕໍ່​ລວມຍອດ​ຜະລິດ​ຕະພັນ​ພາຍ​ໃນ (GDP) ​ເພີ່ມ​ຂຶ້ນ 35% ຢູ່​ລະດັບ​ສູງ​ກວ່າ 355%.

​ໂດຍ​ສະ​ຖາ​ບັນ​ການ​ເງິນ​ສາກົນ​ໄດ້​ຕີ​ລາຄາ​ວ່າ: ການ​ໃຊ້​ຈ່າຍ​ຂອງ​ພາກ​ລັດ​ທົ່ວ​ໂລກ​ມີ​ອັດຕາ​ການ​ສ້າງ​ໜີ້​ເພີ່ມ​ຂຶ້ນປະມານ​ເຄິ່ງໜຶ່ງ. ຂະນະ​ທີ່​ບໍລິສັດ, ທະນາຄານ ​ແລະ ຄົວ​ເຮືອນ​ສ້າງ​ໜີ້​ທັງ​ໝົດ 5,4 ຕື້​ໂດ​ລາ​ສະຫະລັດ, 3,9 ຕື້​ໂດ​ລາ​ສະຫະລັດ ​ແລະ 2,6 ຕື້​ໂດ​ລາ​ສະຫະລັດ​ ຕາມ​ລຳດັບ.

ສົ່ງ​ຜົນ​ໃຫ້​ໃນ​ປີຜ່ານມາ ທ່າມກາງ​ວິ​ກິດ​ການ​ແຜ່​ລະບາດ​ຂອງ​ໂຄ​ວິດ-19 ໜີ້​ສິນ​ທົ່ວ​ໂລກ​ເພີ່ມ​ຂຶ້ນ​ເປັນ​ປະຫວັດສາດ​ຫລາຍ​ກວ່າ​ໃນ​ໄລຍະ​ວິ​ກິດ​ເສດຖະກິດ​ໂລກ​ເມື່ອ​ປີ 2008 ​ແລະ 2009 ​ເຊິ່ງ​ໃນ​ຂະນະ​ນັ້ນ ອັດຕາ​ສ່ວນ​ໜີ້​ຕໍ່ GDP ​ເພີ່ມ​ຂຶ້ນ 10% ​ແລະ 15% ຕາມ​ລຳດັບ.

ສະ​ຖາ​ບັນ​ການ​ເງິນ​ສາກົນ​ຍັງ​ໄດ້​ຄາດ​ຄະ​ເນ​ວ່າ: ​ໃນ​ປີ​ນີ້ ລະດັບ​ການ​ກູ້​ຢືມ​ຈະ​ຍັງ​ເພີ່ມ​ຂຶ້ນ ​ໂດຍ​ໄດ້​ຮັບ​ການ​ສະໜັບສະໜູນ​ຈາກ​ອັດຕາ​ດອກ​ເບ້ຍ​ທີ່​ຍັງ​ຢູ່​ໃນ​ລະດັບ​ຕໍ່າ.