ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ

ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ - np file 72805 - ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ
ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ - Untitled design - ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ

ອະດີດ​ປະທານາທິບໍດີ ນິ​ໂກ​ລາສ ຊາ​ໂກ​ຊີ ຂອງຝຣັ່ງ ຖືກ​ສັ່ງ​ຈຳ​ຄຸກ 3 ປີ​ໃນ​ຂໍ້​ຫາສໍ້​ລາດ​ບັງ​ຫລວງ, ​ແຕ່​ໂທດ​ຈຳ​ຄຸກ 2 ຈາກ 3 ປີ​ດັ່ງກ່າວ​ນັ້ນ​ໃຫ້ລໍ​ລົງ​ອາຍາ ​ໂດຍ​ທ່ານ​ຖືກ​ຕັດສິນ​ວ່າ​ພະຍາຍາມ​ຕິດ​ສິນ​ບົນ​ຜູ້​ພິພາກສາ​ເມື່ອ​ປີ 2014 ຫລັງ​ພົ້ນຈາກ​ຕຳ​ແໜ່​ງ.

​ໂດຍ​ຄະດີ​ຕິດ​ສິນ​ບົນ​ດັ່ງກ່າວ​ເກີດ​ຈາກ​ການ​ທີ່​ຕຳຫລວດ​ສາມາດ​ບັນທຶກ​ການ​ສົນທະນາ​ລະຫວ່າງ​ທ່ານ ຊາ​ໂກ​ຊີ ກັບທ່ານ ​ເທີຍຣີ ​ເຮີ​ຊອກ ທະນາຍຄວາມ​ຂອງ​ທ່ານ​ໄວ້​ໄດ້. ການ​ສົນທະນາ​ມີ​ເນື້ອ​ໃນ​ວ່າ: ທັງ​ສອງ​ພະຍາຍາມ​ຕິດ​ສິນ​ບົນ​ທ່ານ ກິລ​ເບິດ ອາ​ຊິ​ເບິດ ຜູ້​ພິພາກສາ​ອາວຸ​ໂສ ​ໂດຍ​ຈະ​ໃຫ້ “ຕຳ​ແໜ່​ງງານ​ອັນ​ມີ​ກຽດ” ​ໃນ​ໂມ​ນາ​ໂກ ​ເພື່ອ​ແລກ​ກັບ​ຂໍ້​ມູນ​ການ​ສອບ​ສວນ​ໃນ​ອີກ​ກໍລະນີ​ທີ່​ທ່ານ ຊາ​ໂກ​ຊີ ຖືກ​ສອບ​ສວນ​ວ່າ​ອາດ​ຮັບ​ເງິນ​ບໍ່​ຖືກຕ້ອງ​ດ້ວຍ​ກົດໝາຍ​ຈາກ​ທ່ານ ລິ​ລຽນ ​ເບ​ຕ໊ອງກູດ ​ເສດຖີ​ທາຍາດ​ຂອງ​ລໍຣີອັລ ສຳລັບ​ການ​ຫາ​ສຽງ​ເລືອກ​ຕັ້ງປະທານາທິບໍດີ ​ໃນ​ປີ 2007 ​ເຊິ່ງສື່​ຕ່າງປະ​ເທດ​ລາຍ​ງານ​ວ່າ​ມີ​ສຽງ​ຂອງ​ທ່ານ ຊາ​ໂກ​ຊີ ທີ່​ກ່າວ​ກັບ​ທະນາຍ​ວ່າ: “ຂ້ອຍຈະ​ຊ່ວຍ​ໃຫ້​ເຂົາ​ໄດ້​ເລື່ອນ​ຕຳ​ແໜ່​ງ ຂ້ອຍ​ຈະ​ຊ່ວຍ​ເຂົາ” ​ແລະ ອີກ​ການ​ສົນທະນາ​ໜຶ່ງ​ກໍ​ມີ​ສຽງ​ຂອງ​ທະນາຍ​ຂອງ​ທ່ານ​ເນັ້ນທ່ານ ຊາ​ໂກ​ຊີ ​ໃຫ້ “ກ່າວ​ຄຳ​ຄຳ​ໜຶ່ງ” ສຳລັບ ອາ​ຊິ​ເບິດ ລະຫວ່າງ​ການ​ເດີນທາງ​ໄປ​ໂມ​ນາ​​ໂກ.

​ແລະ ​ໃນ​ມື້ດຽວ​ກັນ, ທັງ ​ເຮີ​ຊອກ ​ແລະ ອາ​ຊິ​ເບິດ ຖືກ​ຕັດສິນ​ລົງ​ໂທດ​ແບບ​ດຽວ​ກັບ​ທ່ານ ຊາ​ໂກ​ຊີ ຄື​ຈຳ​ຄຸກ​ຄົນ​ລະ 3 ປີ ​ແຕ່​ໂທດ​ຈຳ​ຄຸກ 2 ​ໃນ 3 ປີນັ້ນ​ໃນ​ລໍ​ລົງ​ອາຍາ.

ທັງ​ນີ້, ສຳນັກ​ຂ່າວ AP ລາຍ​ງານ​ວ່າ: ທ່ານ ອາ​ຊິ​ເບິດ ບໍ່​ໄດ້​ຮັບ​ວຽກ​ໃດໆ​ຈາກ​ໂມ​ນາ​ໂກ ​ແລະ ຂະ​ບວນການ​ສືບສວນ​ໃນ​ກໍລະນີ​ທີ່​ທ່ານ ຊາ​ໂກ​ຊີ ​ເຄີຍ​ພະຍາຍາມ​ຫາ​ຂໍ້​ມູນ​ດັ່ງກ່າວ​ນັ້ນກໍ​ຖືກ​ຍົກ​ເລີກ​ໄປ, ​ແຕ່​ໄອ​ຍະ​ການ​ໄດ້​ສະຫລຸບ​ວ່າ: “ຄຳ​ສັນຍາ​ທີ່​ລະບຸ​ໄວ້​ຢ່າງ​ຈະ​ແຈ້ງ” ຍັງ​ຖື​ເປັນ​ການ​ສໍ້​ລາດ​ບັງ​ຫລວງ​ພາຍ​ໃຕ້​ກົດໝາຍ​ຂອງຝຣັ່ງ ​ເຖິງ​ວ່າ​ຄຳ​ສັນຍານັ້ນຈະ​ບໍ່​ບັນລຸ​ຜົນ​ກໍ​ຕາມ. ສ່ວນ​ທ່ານ ຊາ​ໂກ​ຊີ ປະຕິ​ເສດ​ເຈດ​ຕະນາ​ຮ້າຍ​ໃນ​ການສະ​ເໜີ​ການ​ຊ່ວຍ​ເຫລືອ​ແກ່​ທ່ານ ອາ​ຊິ​ເບິດ ​ແລະ ລະບຸ​ວ່າ ຊີວິດ​ທາງ​ການ​ເມືອງ​ຂອງ​ທ່ານ​ລ້ວນ​ກ່ຽວ​ກັບ “ການ​ໃຫ້ການ​ຊ່ວຍ​ເຫລືອ​ເລັກ​ໜ້ອຍ​ແກ່​ຜູ້​ຄົນ” ພ້ອມ​ສະ​ແດງ​ຄວາມ​ບໍ່ພໍ​ໃຈ​ທີ່​ການ​ສົນທະນາ​ລະຫວ່າງ​ທະນາຍ ​ແລະ ລູກ​ຄ້າ​ຖືກ​ລັກ​ຟັງ, ​ແຕ່​ສານ​ບອກ​ວ່າ: ການ​ໃຊ້​ບົດ​ສົນທະນາ​ທີ່​ຖືກ​ລັກ​ຟັງ​ນັ້ນຍອມຮັບ​ໄດ້​ຕາບ​ເທົ່າ​ທີ່​ບົດ​ສົນທະນາ​ເຫລົ່າ​ນີ້​ສະ​ແດງ​ໃຫ້​ເຫັນ​ຫລັກ​ຖານ​ກ່ຽວ​ກັບ​ການ​ກະທຳ​ຜິດ​ທີ່​ກ່ຽວ​ກັບ​ການ​ສຸ​ຈະລິດ.

ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ - Wave100S AD to Website 2020 0 - ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ

ທັງ​ນີ້ ຜູ້​ພິພາກສາ​ລະບຸ​ວ່າ: ທ່ານ ຊາ​ໂກ​ຊີ ຮູ້​ວ່າ​ສິ່ງ​ທີ່​ທ່ານ​ເຮັດ​ລົງ​ໄປ​ເປັນ​ສິ່ງ​ທີ່​ຜິດ ​ແລະ ກ່າວ​ເພີ່ມ​ວ່າ: ການ​ກະທຳ​ຂອງ​ທ່ານ ​ແລະ ທະນາຍຄວາມ​ກໍ່​ໃຫ້​ເກີດ​ພາບ​ພົດ​ກ່ຽວ​ກັບ​ຄວາມ​ຍຸຕິ​ທຳ​ທີ່​ບໍ່​ດີ​ຕໍ່​ສາທາລະນະ​ຊົນ.

​ໃນ​ເດືອນ​ນີ້, ທ່ານ ຊາ​ໂກ​ຊີ ຍັງ​ຕ້ອງ​ເຂົ້າຮັບ​ການ​ພິຈາລະນາ​ຄະດີ​ທີ່​ພັກ​ອະນຸລັກ​ນິຍົມ​ຂອງ​ທ່ານ ​ແລະ ບໍລິສັດ​ຊື່ Bygmalion ຖືກ​ກ່າວ​ຫາ​ວ່າ​ໃຊ້​ລະບົບ​ໃບ​ແຈ້ງ​ໜີ້​ພິ​ເສດ ​ເພື່ອ​ປົກ​ປິດ​ການ​ໃຊ້​ເງິນ 42,8 ລ້ານ​ເອີ​ໂຣ (50,7 ລ້ານ​ໂດ​ລາ). ນອກຈາກ​ນີ້ ທ່ານ​ຍັງ​ຕ້ອງ​ຜະ​ເຊີນ​ການ​ສອບ​ສວນ​ຂໍ້ກ່າວ​ຫາ​ວ່າ​ທ່ານ​ໄດ້​ຮັບ​ເງິນ​ຈາກ ມູອຳມາ ກັດ​ດາ​ຟີ ອະດີດ​ຜູ້ນຳ​ຂອງ​ລິ​ເບຍ​​ແບບ​ບໍ່​ຖືກຕ້ອງດ້ວຍ​ກົດໝາຍ ​ເພື່ອ​ໃຊ້​ໃນ​ການ​ຫາ​ສຽງ​ເລືອກ​ຕັ້ງປີ 2007 ​ເຊິ່ງທັງ​ສອງ​ກໍລະນີ​ດັ່ງກ່າວ ທ່ານ ຊາ​ໂກ​ຊີ ຢືນຢັນ​ວ່າ​ຕົນ​ເອງ​ເປັນ​ຜູ້​ບໍລິສຸດ​ເຊັ່ນ​ດຽວ​ກັບ​ຄະດີ​ທີ່​ຫາ​ກໍ​ຖືກ​ຕັດສິນ​ໄປ ​ແລະ ປັດຈຸບັນ​ທ່ານ​ຍັງ​ເປັນ​ທີ່​ນິຍົມ​ໃນ​ຜູ້​ມີ​ສິດ​ເລືອກ​ຕັ້ງທີ່​ມີ​ແນວ​ຄິດ​ອະນຸລັກ​ນິຍົມ.

ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ - WhatsApp Image 2020 05 27 at 5 - ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ
ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ - WhatsApp Image 2020 05 27 at 5 - ສານສັ່ງຈຳຄຸກອະດີດປະທານາທິບໍດີຝຣັ່ງ ຂໍ້ຫາສໍ້ລາດບັງຫລວງ
error: Alert: ເນື້ອຫາຂ່າວມີລິຂະສິດ !!