ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ

ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ - 564000002163601 - ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ
ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ - Untitled design - ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ

ອິນ​​ເຕີ​ໂພ​ລລາຍ​ງານ​ຜົນ​ການ​ຈັບ​ກຸມ​ແກ້ງ​ຜະລິດ​ວັກ​ຊີ​ນ​ໂຄ​ວິດ-19 ປອມ​ຢູ່​ຈີນ ​ແລະ ອາ​ຟຣິກາ​ໃຕ້ ພ້ອມ​ເຕືອນ​ວ່າ: ຄະດີ​ກ່ຽວ​ກັບ​ວັກ​ຊີ​ນ​ໂຄ​ວິດ-19 ຍັງ​ມີ​ອີກ​ຫລາຍ.

​ໃນ​ວັນ​ທີ 3 ມີນາ 2021, ຕຳຫລວດ​ສາກົນ ຫລື ອິນ​ເຕີ​ໂພ​ລ ລາຍ​ງານ​ວ່າ: ​ເຈົ້າໜ້າ​ທີ່​ຕຳຫລວດ​ຢູ່​ຈີນ ​ແລະ ອາ​ຟຣິກາ​ໃຕ້ ​ໄດ້​ບຸກຍຶດຂອງ​ກາງ​ເປັນ​ວັກ​ຊີ​ນ​ໂຄ​ວິດ-19 ປອມ​ຫລາຍ​ພັນ​ໂດ​ສ ​ເຊິ່ງອົງ​ກອນ​ລະບຸ​ວ່າ: ​ເປັນ​ພຽງ “ຍອດພູ​ເຂົາ​ນ້ຳກ້ອນ” ​ໃນ​ອາ​ຊະ​ຍາ​ກຳ​ທີ່​ກ່ຽວຂ້ອງ​ກັບ​ວັກ​ຊີ​ນ​ໂຄ​ວິດ-19 ​ເທົ່າ​ນັ້ນ.

ອິນ​ເຕີ​ໂພ​ລ ກ່າວ​ວ່າ: ຢູ່​ສາງ​ໃນ​ເຈີ​ມິນ​ສຕັນ ນອກ​ເມືອງ​ໂຈ​ຮັນ​ເນສ​ເບິ​ກ ອາ​ຟຣິກາ​ໃຕ້ ພົບ​​ແກ້ວ​ວັກ​ຊີ​ນປອມ 400 ​ແກ້ວ ​ເຊິ່ງທຽບ​ເທົ່າ​ວັກ​ຊີ​ນປະມານ 2.400 ​ໂດ​ສ ພາຍ​ໃນ​ບັນຈຸ​ວັກ​ຊີ​ນ​ໂຄ​ວິດ-19 ປອມ​ໄວ້. ນອກຈາກ​ນີ້ ຍັງ​ພົບ​ຜ້າ​ອັດ​ປາກ-ດັງ​ປອມ ​ແລະ ຈັບ​ກຸມ​ຜູ້​ຕ້ອງ​ສົງ​ໄສ​ຊາວ​ຈີນ 3 ຄົນ ​ແລະ ຊາວ​ແຊມ​ເບຍ​ອີກ 1 ຄົນ​ໄດ້.

ສ່ວນ​ຢູ່​ປະ​ເທດ​ຈີນ, ຕຳຫລວດ​ພົບ​ເຄື​ອຂ່າຍ​ຫລອກ​ຂາຍ​ວັກ​ຊີ​ນ​ໂຄ​ວິດ-19 ປອມ​ໄດ້​ສຳ​ເລັດ ພວກ​ເຂົາ​ບຸກ​ເຂົ້າ​ໄປ​ໃນ​ໂຮງງານ​ຜະລິດ ສົ່ງ​ຜົນ​ໃຫ້​ມີ​ການ​ຈັບ​ກຸມ​ຜູ້​ຕ້ອງ​ສົງ​ໄສ​ປະມານ 80 ຄົນ ​ແລະ ຍຶດວັກ​ຊີ​ນປອມ​ໄດ້​ຫລາຍ​ກວ່າ 3.000 ​ໂດ​ສ​ໃນ​ຈຸດ​ເກີດ​ເຫດ.

​ເມື່ອ​ຕົ້ນປີຜ່ານມາ, ອິນ​ເຕີ​ໂພ​ລ ​ໄດ້​ອອກ “ປະກາດ​ເຕືອນ​ໄພ​ສີສົ້ມ” ​ໃຫ້​ໜ່ວຍ​ງານ​ທົ່ວ​ໂລກ​ຕິດ​ຕາມ ​ແລະ ກຽມພ້ອມ​ຮັບ​ມື​ເຄືອ​ຂ່າຍ​ອາ​ຊະ​ຍາ​ກຳ​ທີ່​ມຸ່ງ​ເປົ້າ​ການ​ສວຍ​ໂອກາດ​ໃນ​​ໄລຍະ​ທີ່​ທົ່ວ​ໂລກ​ຕ້ອງການ​ວັກ​ຊີ​ນ​ໂຄ​ວິດ-19.

ທ່ານ ​ເຈີ​ເກນ ສະຕ໊ອກ ​ເລຂາທິການ​ອິນ​ເຕີ​ໂພ​ລ ກ່າວ​ວ່າ: ​ເຖິງ​ວ່າ​ພວກ​​ເຮົາ​ຈະ​ຍິນ​ດີ​ກັບ​ຜົນ​ໄດ້​ຮັບ​ການ​ຈັບ​ກຸມ​ນີ້, ​ແຕ່​ນີ້​ເປັນ​ພຽງ​ຍອດ​ນ້ອຍໆ​ຂອງ​ພູ​ເຂົາ​ນ້ຳກ້ອນ​ເທົ່າ​ນັ້ນ​ເມື່ອ​ເວົ້າ​ເຖິງ​ອາ​ຊະ​ຍາ​ກຳ​ທີ່​ກ່ຽວຂ້ອງ​ກັບ​ວັກ​ຊີ​ນ​ໂຄ​ວິດ-19.

ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ - Wave100S AD to Website 2020 0 - ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ

ອິນ​ເຕີ​ໂພລ ກ່າວ​ວ່າ: ນອກຈາກ​ການ​ຈັບ​ກຸມ​ຢູ່​ອາ​ຟຣິກາ​ໃຕ້ ​ແລະ ຈີນ​ແລ້ວ ຍັງ​ໄດ້​ຮັບ​ລາຍ​ງານ​ເພີ່ມ​ຕື່ມ​ກ່ຽວ​ກັບ​ການ​ແຈກ​ຢາຍ​ວັກ​ຊີ​ນ​ໂຄ​ວິດ-19 ປອມ ​ແລະ ຄວາ​ມພະຍາຍາມ​ໃນ​ການ​ຫລອກ​ຂາຍ​ທີ່​ມຸ້ງ​ເປົ້າ​ໃສ່​ໜ່ວຍ​ງານ​ດ້ານ​ສຸຂະພາບ​ຕ່າງໆ​ເຊັ່ນ: ສະຖານ​ພະຍາ​ບານ ຈົນ​ຕ້ອງ​ມີ​ການ​ອອກ​ຄຳ​ເຕືອນ​ວ່າ: ບໍ່​ມີ​ວັກ​ຊີ​ນ​ໂຄ​ວິດ-19 ທີ່​ໄດ້​ຮັບ​ການ​ຮັບຮອງ​ວາງ​ຈຳ​ໜ່າຍ​ໃນ​ຊ່ອງ​ທາງ​ອອນ​ລາຍ​ຢ່າງ​ແນ່ນອນ.

“ວັກ​ຊີ​ນ​ໃດໆ ທີ່​ໂຄສະນາ​ໃນ​ເວັບ​ໄຊ ຫລື ​ເວັບ​ມືດ​ຈະ​ບໍ່​ຖືກຕ້ອງ​ຕາມ​ກົດໝາຍ ຈະ​ບໍ່​ຜ່ານ​ການ​ທົດ​ລອງ ​ແລະ ອາດ​ເປັນ​ອັນຕະລາຍ”.

ທ່ານ ສະຕ໊ອກ ​ໄດ້​ເຕືອນ​ແຕ່​ເດືອນ​ທັນວາ 2020 ວ່າ: ມີ​ອາ​ຊະ​ຍາ​ກຳ​ເພີ່ມ​ຂຶ້ນຢ່າງ​ວ່ອງ​ໄວ ຫລັງ​ມີ​ການ​ເປີດ​ຕົວ​ວັກ​ຊີ​ນ​ໂຄ​ວິດ-19 ​ໂດຍ​ນອກຈາກ​ຕ້ອງ​ລະວັງ​ວັກ​ຊີ​ນປອມ​ແລ້ວ ຍັງ​ຕ້ອງ​ລະວັງ​ການ​ໂຈລະ​ກຳ ​ແລະ ການ​ບຸກປຸ້ນ​ສາງ​ສິນຄ້າ ​ແລະ ການ​ໂຈມ​ຕີ​ລົດ​ຈັດ​ສົ່ງ​ວັກ​ຊີ​ນ​ໂຄ​ວິດ-19 ນຳ​ອີກ​.

ປັດຈຸບັນ ທົ່ວ​ໂລກ​ມີ​ຜູ້​ໄດ້​ຮັບ​ການ​ສັກ​ວັກ​ຊີ​ນ​ໂຄ​ວິດ-19 ​ແລ້ວ 268 ລ້ານ​ກວ່າ​ຄົນ, ຂະນະ​ທີ່​ຈຳນວນ​ຜູ້​ຕິດ​ເຊື້ອສະ​ສົມ​ທົ່ວ​ໂລກ​ມີ​ຫລາຍ​ກວ່າ 115 ລ້ານ​ຄົນ, ​ເສຍ​ຊີວິດ​ຫລາຍ​ກວ່າ 2,56 ລ້ານ​ຄົນ.

ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ - WhatsApp Image 2020 05 27 at 5 - ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ
ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ - WhatsApp Image 2020 05 27 at 5 - ຈີນ-ອາຟຣິກາໃຕ້ບຸກທຳລາຍແກ້ງວັກຊີນໂຄວິດ-19 ປອມ
error: Alert: ເນື້ອຫາຂ່າວມີລິຂະສິດ !!